सप्तदशवयस्केन चालितेन कार् यानघट्टनेन कुटुम्बनाथस्य मृत्युः। 

चत्वारः आरक्षकाधिकारिणः विलम्बिताः।

दुर्घटनाविधेयं यानं, मृतः जयबालकृष्णः च। 

# कार् यानस्य पञ्जीकरणं विलम्बिष्यते।

# १७ वयस्कस्य २५ तमवयः पर्यन्तम् अनुज्ञप्तिपत्रनिरासः।

# पितुः अतिरिक्तन्यायाधीशस्य उपरि अपराधः विहितः।

कोच्ची> नगरप्रान्ते सप्तदशवयस्केन कृते कार् यानदुर्घटनाविषये सर्वकारनिर्देशानुसारं आरक्षकविभागेन कर्कशप्रक्रमाः विधत्ताः। दुर्घटनायाः प्राथमिकान्वेषणे हानिरजायत इति उन्नताधिकारिणः प्रतिवेदनस्य आधारे चत्वारः आरक्षकाधिकारिणः निलम्बिताः। चेरानल्लूर् आरक्षकनिस्थानस्य CI, SHO, ASI, CPO पदीयाः सन्ति सेवायाः विलम्बिताः। 

  कार् यानस्य पञ्जीकरणं निरस्तुं प्रक्रमः यन्त्र वाहन विभागेन आरब्धः। तथा च १७ वयस्कः कुमारः तस्य २५ तमवयःपर्यन्तं चालनानुज्ञप्तिपत्रस्य निरासाय विहितः। 

  यदि अपक्ववयस्कः यन्त्रयानं प्रचाल्य दुर्घटनां कारयति तर्हि यानस्वामी रक्षिता वा अपराधी भविष्यतीति नियमानुसरणेन कुमारस्य पितुः अतिरिक्तन्यायाधिपस्य उपरि अपराधः विहितः। 

  अतीते रविवासरे प्रत्युषसि आसीत् दुर्घटना। माञ्ञालि निवासी जयबालकृष्णः आसीत् मृतः। आरक्षकाणां कृत्यविलोपे कुटुम्बस्य बहुजनस्यापि प्रक्षोभः एव कर्कशप्रक्रमानां प्रेरणा।

 कर्णाटके अन्तिमा मतदानावलिः प्रकाशिता।

९९.३२ लक्षं नामानि अपसृतानि। 

बङ्गलुरु> कर्णाटकराज्ये तीव्र मतदानावलीपरिष्करणस्य [एस् ऐ आर्] अन्ते अन्तिमा मतदानावलिः प्रकाशिता। ४,५५,००,०११ जनाः आवल्यां विद्यन्ते। एस् ऐ आर् प्रक्रियायाः पूर्वं ५,५४,३२,३१४ मतदानिनः आसन्। ९९,३२,३०३ नामानि आवल्याः तिरस्कृतानि।

  किन्तु ये अन्तिमावल्यां नान्तर्भवन्ति, तेषां form-6 प्रकारेण अपेक्षां  समर्पयितुं शक्यते इति मुख्यनिर्वाचनाधिकारिणा निगदितम्।

 तमिलनाट्।

तेनि जनपदस्थात् कारागृहात् १७  बन्धनस्धाः पलायिताः।

१३ निगृहीताः। 

चेन्नै> तममिलनाटे आण्टिप्पट्टि तेक्कं पाट्टा इत्यत्र जनपदीयकारगृहात् १७ कारागृहवासिनः सोमवासरे रात्रौ रक्षां प्राप्ताः। तेषु १३ कारागृहवासिनः अन्वेषणे मंगलवासरे उषसि एव निगृहीताः। चतुर्णां कृते अन्वेषणं केरले अपि अनुवर्तते। घटनायां नव कारागृहाधिकारिणः पदेभ्यः अल्पकालीनतया अपसृताः।

  कपटज्वरम् अभिनीय कारागृहाधिकारिणः समाहूय तान् आक्रम्य आसीत् कारागृहवासिनां रक्षाप्राप्तिः।

 विद्यालयकायिकोत्सवः

अत्लटिक् स्पर्धाः अद्य आरभन्ते।

कोष़िक्कोट्> केरले राज्यस्तरीय विद्यालयकायिकोत्सवे अत्लटिक् स्पर्धाः मंगलवासरे आरभन्ते। एन् ऐ टि क्रीडाङ्कणस्य नूतने 'सिन्तटिक्' मार्गे एव स्पर्धाः। 

  अद्य १४ स्पर्धासु विधिनिर्णयः भविष्यति। नूतने मार्गे कायिकाभिलेख्याः अधिकतया भविष्यन्ति वा इत्याकांक्षायां सन्ति कायिकप्रेमिणः।

SIR decisions were unanimous, the Election Commission informed the Supreme Court; the Commission also stated that they have not amended 'Form 6'

 निर्वाचनायोगस्य स्पष्टीकरणम्: ' फोर्म्६' इत्यस्मिन् संशोधनं न कृतम् इति।

​निर्वाचनायोगेन सर्वोच्चन्यायालयम् प्रति स्पष्टीकृतं यत् प्रथमवारं मतदातासूच्यां नामसमावेशनाय प्रयुज्यमाने ' फोर्म् ६' इत्यस्मिन् अस्मद्द्वारा कश्चन संशोधनं न कृतम् इति। एतादृशं संशोधनं कर्तुं केवलं केन्द्रीयसरकारस्य एव अधिकार: अस्ति इति आयोगेन अवगतम्।

​विशेष-गहन-पुनरीक्षण-सम्बद्धा: (SIR) सर्वे निर्णया: मुख्य-निर्वाचन-आयुक्तेन ज्ञानेशकुमारेण अन्यै: निर्वाचन-आयुक्ताभ्यां च मिलित्वा सर्वसम्मत्या एव गृहीता:, न तु कश्चन व्यक्तिगतरूपेण निर्णय: कृतः इति आयोगेन निवेदितम्।

​मूल-'फोर्म् ६' इत्यस्मिन् परिवर्तनं न कृतम्, अपितु केवलम् आवेदनेन सह प्रस्तुतस्य विशेष-घोषणापत्रस्य (Declaration) विषये एव चर्चा जाता, तत्तु 'फोर्म् ६' इत्यस्य संशोधनं न भवति इति आयोगेन प्रतिपादितम्।

​समाचारपत्राणां वार्तानाम् आधारेण एव याचिकाकर्तृभि: आरोप: कृत: इति कारणेन विधिदृष्ट्या समाचारपत्रवार्ता: प्रमाणरूपेण स्वीकार्य्यं न भवन्ति। अत: एता: याचिका: निरसनीया: इति आयोगेन सर्वोच्चन्यायालय: प्रार्थित:।

English|Hindi 📰 

 अपक्ववयस्केन चालितस्य कार् यानस्य घट्टनेन कुटुम्बनाथः मृतः।

दुर्घटनां कृतं कार् यानं।

कोच्ची> १७ वयस्केन न्यायाधिपुत्रेण चालितस्य  आडम्बरकार् यानस्य घट्टनेन द्विचक्रिकायात्रिकः कुटुम्बनाथः मृतः। एरणाकुलं जनपदे परवूर् निवासी जयबालकृष्णः [५५] एव हतभाग्यः। अपराधारोपिताय १७ वयस्काय मतिपुरःसररहितेन नरहत्यापराधं प्रकल्य प्रातिभाव्यं दत्तमपि प्रतिषेधे शक्ते आरक्षकैः  नरहत्यापराधः स्थापितः।

मृतः जयबालकृष्णः।

  एरणाकुलं चेरानल्लूर् 'कण्टयिनर् मार्गे' रविवासरे प्रत्युषसि द्विवादने आसीत् दुर्घटना। नगरप्रान्ते चिटूर् इत्यत्र चायापणिकः अस्ति हतभाग्यः जयबालकृष्णः। आपणं पिधाय स्वगृहं प्रत्यागच्छन्नासीत्। कार् यानस्य स्वामी कश्चन अतिरिक्तन्यायाधीशः  (Additional Judge) अस्ति। तस्य १५ वयस्कः पुत्रः एकेन कार् यानं चालितवानासीत्। रक्षितारः अज्ञात्वा गुप्तेन यानचालनाय प्रस्थितवान्। 

 यानचालनाय अनुज्ञापत्राय [License] पर्याप्तं वयः येषां नास्ति तादृशाः यानचालनेन दुर्घटनाः जनयति इति विषयः आशङ्कां जनयति।

 फ्रान्से बहुजनानां वीथीप्रतिषेधः। 

पारीसः> वर्धमानजीवितव्ययं विरुध्य प्रतिषेधाय सहस्रशः जनाः पुनरपि राष्ट्रस्य विभिन्नप्रदेशेषु वीथिषु सम्मिलितवन्तः। प्रक्षोभकान् विसर्जयितुं आरक्षकसेनया 'अश्रुजनकवायुः' [Tear gas] प्रयुक्तः। १३० तः अधिके जनाः विभिन्नस्थानेभ्यः निगृहीताः।

 हरिद्वारे अष्टादश संस्कृतमहोत्सवस्य राज्यस्तरीयायाः संस्कृतस्पर्धायाः समापनम्, विजेतृछात्रेभ्यः पुरस्कारवितरणम् च सम्पन्नम्।

संस्कृतस्य प्रचारप्रसाराय सर्वकारः व्यापकस्तरे कार्यं करोति — मदनकौशिकः

        हरिद्वारम्> उत्तराखण्डसंस्कृतसंस्थानेन (उत्तराखण्डसर्वकारः), हरिद्वारद्वारा आयोजितस्य अष्टादशस्य संस्कृतमहोत्सवस्य अन्तर्गतं राज्यस्तरीयायाः संस्कृतस्पर्धायाः (२०२६–२७) द्वितीयदिने विविधासु स्पर्धासु समापनसमारोहः पुरस्कारवितरणकार्यक्रमश्च हरिद्वारस्य भूपतवालास्थिते महाजनभवने सम्पन्नः। कार्यक्रमस्य शुभारम्भः सर्वैः अतिथिभिः दीपप्रज्वालनेन कृतः।

        उत्तराखण्डसंस्कृतसंस्थानस्य उपाध्यक्षः डॉ. नवीनचन्द्रपन्तः, संस्थानस्य सचिवः मुख्यसमन्वयकश्च प्रो. विनयकुमारविद्यालङ्कारः, वित्ताधिकारिणी मायादेवी तथा शोधाधिकारी राज्यसमन्वयकश्च डॉ. हरीशचन्द्रगुरुराणी इत्येते संयुक्तरूपेण मञ्चासीनानाम् अतिथीनां माल्यार्पणेन स्मृतिचिह्नप्रदानेन च स्वागतं कृतवन्तः।

 तन्त्रविद्यापीठे आचार्यपुरस्काराः समर्पिताः।

सि जि विजयकुमारः संस्कृतपुरस्कारेण सम्मानितः।

तन्त्ररत्नबिरुदानि प्रदत्तानि।

डो सि जि विजयकुमारः संस्कृतपुरस्कारं स्वीकरोति।

आलुवा> तन्त्रविद्यापीठस्य अस्य संवत्सरस्य आचार्यपुरस्काराः प्रौढे कार्यक्रमे समर्पिताः। 'मार्गदर्शकमण्डलं' सभायाः राज्यस्तरीयसचिवमुख्यः सत्स्वरूपानन्द सरस्वति स्वामिनः पुरस्कृतान् विशिष्टान् आदृतवन्तः। 'कोचिन् षिप् यार्ड्' संस्थायाः भूतपूर्वाध्यक्षः मधु एस् नायर् एकैकस्य कृते प्रशंसापत्रं पुरस्कारफलकं च समार्पयत्।

 तन्त्रशास्त्रमण्डले दीयमानः तान्त्रिकाचार्यः ब्रह्मश्री 'कल्पुष़ा दिवाकरन् नम्पूतिरि' स्मारक आचार्यपुरस्काराय ब्रह्मश्री पुटयूर् पाण्डुरङ्गन् नम्पूतिरि महाभागः अर्हः अभवत्।

ब्रह्मश्री वेष़प्परम्प परमेश्वरन् नम्पूतिरि महाभागस्य नाम्नि वैदिक संस्कृतिक्षेत्रे दीयमानः आचार्यपुरस्कारः कोम्पङ्कुलं विष्णु अक्कित्तिरिप्पाट्' वर्याय समार्पयत्। कालटी श्रीशंकराचार्य संस्कृतविश्वविद्यालयस्य पय्यन्नूर् प्रादेशिककेन्द्रे व्याकरणविभाध्यक्षः भवति विष्णु वर्यः। 

  संस्कृत भाषाप्रचारणाय दीयमानं ब्रह्मश्री के पि सि नारायणन् भट्टतिरिप्पाट् स्मारकाचार्यपुरस्कारं संस्कृतपण्डितः डो सि जि विजयकुमारः स्वीकृतवान्।  उज्जयिनीस्थ महर्षि पाणिनि संस्कृत विश्वविद्यालयस्य भूतपूर्वः कुलपतिः अस्ति विजयकुमारवर्यः। दशाब्दैः संस्कृतभाषायाः प्रचारणाय (मुख्यतया संस्कृतभारतीद्वारा) अकादमिकाभिवृद्धये च दत्तं सुदीर्घां सेवां पुरस्कृत्य अस्ति तस्मै पुरस्कारः। 

 २०२५ तमे वर्षे अध्ययनं   पूर्णतामेत्य उत्तीर्णेभ्यः पञ्चभ्यः युवकाचार्येभ्यः तन्त्ररत्नं, वेदविभूषणं, आचार्य [संस्कृत साहित्यं] इत्येतानि बिरुदानि च प्रदत्तानि।

 केरले वृष्टिः तीव्रायते।

अद्य त्रिषु जनपदेषु रक्तजागरूकता; अनध्ययनम्। 

अनन्तपुरी> केरलराज्ये अनुवर्तमाना वृष्टिः तीव्रायते इति केन्द्र ऋतु विज्ञीनीय विभागेन निगदितम्। कोष़िक्कोट्, वयनाट्, मलप्पुरं जनपदेषु रविवासरे रक्तजागरूकता उद्घोषिता। एषु जनपदेषु 'मद्रसा', निजीयशिक्षास्थानानि अभिव्याप्य अनध्ययनं विज्ञापितम्। 

  पत्तनंतिट्टा, कोट्टयं, कण्णूर्, पालक्काट्, एरणाकुलं तृश्शूर् जनपदेषु ओरञ्जजागरूकता घोषिता। इतरेषु पीतजागरूकता अस्ति।

 यमनतीरे लग्नाः उल्लासनौकास्थाः सर्वे भारतीयाः सुरक्षिताः।

दुबाय्> यमने समुद्रतीरसमीपे लग्नायाम् उल्लासनौकायां वर्तमानाः १४ भारतीययात्रिकाः अपि सुरक्षिताः इति भारतीयस्थानपतिकार्यालयेन निगदितम्। एते इदानीं यमने होदैदाप्रदेशे वर्तन्ते, तेषां क्षेमाय प्रवर्तनानि आयोज्यन्ते इति च कार्यालयेन स्पष्टीकृतम्।

  रक्तसमुद्रे यूखार् द्वीपसमीपे सौदीसेनया भारतस्य उल्लासनौका आक्रान्ता इति हूतिवक्त्रा आरोपितमासीत्। नौकास्थाः १४ भारतीयाः  अस्माभिरेव रक्षिताः इति ते अभिमानितवन्तः च। किन्तु घटनापृष्ठतः वर्तमानं वास्तविकं किमिति  स्पष्टीकरणीयमिति  कार्यालयेन निगदितम्।

 पैतृकसंरक्षणमालक्ष्य भारताय कर्म कर्तव्यम् - मधु एस् नायर्। 

कल्पुष़ा दिवाकरन् नम्पूतिरि जयन्तिसम्मेलनं सम्पन्नम्।

आचार्यस्मृतिमेलनं मधु एस् नायर् उद्घाटयति।

आलुवा> आलुवा तन्त्रविद्यापीठस्य स्थापकाचार्यः तन्त्रशास्त्रविशारदः तन्त्रशास्त्रबृहस्पतिः स्वर्गीयः ब्रह्मश्री कल्पुष़ा दिवाकरन् नम्पूतिरिप्पाट्  इत्यस्य ११३तमं जन्मदिनं विविधैः कार्यक्रमैः समामानितम्। आचार्यस्मृतिसम्मेलनस्य उद्घाटनं  कोच्चि महानौकाश्रयस्य (Cochin Ship Yard) भूतपूर्वः प्रबन्धनिदेशकः [Managing Director] एवम् अध्यक्षश्च मधु एस् नायर् कृतवान्। 

  विवेकानन्दस्वामिनः सूक्तैः भारतीयपैतृकं संस्मारितवान् मधुवर्यः अस्माकं पैतृकसंरक्षणं मुख्यतया लक्ष्यीकृत्य राष्ट्रसेवानिर्भरं कर्म कर्तव्यमिति सदस्यान् उद्बोधयामास। "स्वधर्मं निधनं श्रेयः" इत्यार्षवचनस्य माहात्म्यं वृत्तिमण्डले संस्थापयितव्यमिति सः उद्बोधितवान्। 

  मार्गदर्शक मण्डलस्य राज्यस्तरीयकार्यदर्शिप्रमुखः सत्स्वरूपानन्द सरस्वति स्वामिनः अनुग्रहभाषणमकरोत्। अन्त्यजाग्रजभेदभावनां विना समाजहिताय तन्त्रशास्त्रम् अध्येतव्यमिति सः अवोचत्। ब्राह्मण्यं कर्मणैव प्राप्तव्यमिति 'जन्मना जायते शूद्रः' इति सूक्तं व्याख्याय स्वामी उद्बोधयामास।

 तन्त्रविद्यापीठस्य उपप्राचार्यः एवं कल्पुष़ा आचार्यस्य वत्सलशिष्यः च ब्रह्मश्री चेङ्ङोत्त् श्रीनिवासन् पोट्टी आचार्यम् अनुस्मृतवान्। यतिसमानजीवनं नीतवान् कर्मयोगी आसीत् कल्पुष़ा दिवाकरन् नम्पूतिरिप्पाट् महाशयः इति तस्य जीवनरीतिं प्रस्तूय श्रीनिवासवर्यः उक्तवान्। 

  शबरिगिरि धर्मशास्तृमन्दिरस्य तथा मालिकप्पुरं मन्दिरस्य च नियुक्तमुख्यार्चकयोः सान्निध्यमपि जयन्तिदिनस्य शोभां प्रावर्धत। तन्त्रविद्यापीठस्य मुख्यरक्षाधिकारिणः प्रोफ पि एम् गोपिवर्यस्य आध्यक्षे  आयोजिते सम्मेलने विद्यापीठस्य कार्यदर्शी एम् पि सुब्रह्मण्य शर्मा स्वागतभाषणं, क्रियाध्यक्षः एन् बालमुरलिः कृतज्ञतावचनं चाकरोत्।

 Latest news Latest news

 ओम् प्रकाश माथुरः शपथं कृतवान्।

ओ पि माथुरः शपथवाचनं करोति। 

अनन्तपुरी> केरलस्य २९ तम राज्यपालरूपेण ओम् प्रकाश माथुरः शपथवाचनं कृतवान्। लोकभवने सम्पन्ने कार्यक्रमे उच्चन्यायालयस्य मुख्यन्यायाधिपः न्यायाधीशः सौमन सेनः शपथमकारयत्। राज्यपालनियुक्तिरूपः राष्ट्रपतेः आदेशः राज्यस्य मुख्यसचिवेन विश्वनाथ सिन्हेन वाचितः।

  सिक्किमस्य मुख्यमन्त्री प्रेम सिंह तमाङः विशिष्टातिथिः आसीत्। सिक्किमस्य राज्यपालः आसीत् राजस्थाने पाली जनपदीयः  माथुरवर्यः। 

  कार्यक्रमे मुख्यमन्त्री वी डी सतीशः, सभापतिः तिरुवञ्चियूर् राधाकृष्णः, इतरे मन्त्रिणः, संसद् सदस्याः, विधानसभासामाजिकाः इत्यादयः भागं कृतवन्तः।

 अरुणाचले भारत-चीनसंघर्षः।

नव दिल्ली> अरुणाचलप्रदेशे एल् ए सि इति यथार्थनियन्त्रणरेखायां भारतचीनयोर्मिथः पुनरपि संघर्षः। जूलाय् मासादारभ्य अत्र विविधस्थानेषु संघर्षः प्रचलन्नस्तीति भारत-टिबट् सीमारक्षकदलस्य [ITBP] निदेशकमुख्यः शत्रुजित कपूरेण स्पष्टीकृतम्।।

  पूर्वीयसीमायाः संघर्षावस्थामधिकृत्य प्रथमम् आधिकारिकदृढीकरणं भवति शत्रुजित कपूरस्य प्रस्तावः। सेनायाः सांवत्सरीये अनुमोदनकार्यक्रमे आसीदयं निर्णायकप्रस्तावः।

 केरलम्। 

राज्यस्तरीय विद्यालयकायिकोत्सवः २५ दिनाङ्कतः।

कुट्टुः 

कोष़िक्कोट्> केरलराज्यस्य ६८ तमः विद्यालयीयकायिकोत्सवः ओक्टोबर् २५ तमदिनाङ्कादारभ्य ३१ दिनाङ्कपर्यन्तं कोष़िक्कोट् जनपदे सम्पत्स्यति। १ संवत्सरेभ्यः परमेव कोष़िक्कोट् जनपदस्य आतिथेयत्वम्। 

  एन् ऐ टि संस्थायाः क्रीडाङ्कणं मुख्यवेदी भविष्यति। जनपदे विभिन्नस्थानेषु दश वेदिकाः कायिकोत्सवाय चिताः सन्ति। 

  २४ तमे सायं चतुर्वादने मुख्यमन्त्री वी डी सतीशः कायिकमेलायाः उद्घाटनं करिष्यति। ओलिम्प्यन् पी टी उषा दीपशिखाप्रोज्वलनं करिष्यति। १४ जनपदेभ्यः कायिकताराणि, परिशीलकाः, उद्योगस्थाश्च १५,००० जनाः भागं करिष्यन्ति। 'कुट्टु' नामकः कलभ अस्ति भाग्यचिह्नम्।

 तान्त्रिकवृत्तेः लक्ष्यं समाजक्षेमं भवेत् - अक्कीरमण् कालिदास भट्टतिरिः।

विद्वत्सभायाः उद्घाटनं कुर्वन् अक्कीरमण् कालिदासः प्रभाषते।

 

आलुवा> मन्दिरेषु इतराध्यात्मिकक्षेत्रेषु वा क्रियमाणाः तान्त्रिकवृत्तयः समाजक्षेममालक्ष्य भवितव्याः इति दक्षिणभारते प्रसिद्धः तान्त्रिकाचार्यः एवं केरल योगक्षेमसभायाः भूतपूर्वः अध्यक्षः ब्रह्मश्री अक्कीरमण् कालिदास भट्टतिरिः अवोचत्। आलुवा तन्त्रविद्यापीठे आचार्यस्मृतिदिनमनुबन्ध्य  'तान्त्रिकमण्डलाय किमपि नीतिप्रारूपम्' इति शीर्षके आयोजितं विद्वत्संवादम् उद्घाटनं कुर्वन् भाषमाणः आसीत् कालिदासवर्यः। समाजे सामान्येन, विशिष्य हैन्दवसमाजे जायमानानां आध्यात्मिक-धार्मिकापचयानां परिहाराय तन्त्रिमण्डलस्य कर्तव्यम् अनुपममिति सः स्मारयामास। अतः  सामाजिकप्रबुद्धता न विस्मर्तव्या इति सः निरदिशत्। 

  तन्त्रविद्यापीठस्य कुलपतिः ब्रह्मश्री मण्णारशाला सुब्रह्मण्यन् नम्पूतिरिः दीपप्रोज्वलं कृत्वा विद्वत्सभायाः शुभारम्भमकरोत्। तन्त्रविद्यापीठस्य पूर्वछात्रसमित्याः अध्यक्षः कल्पुष़ा कृष्णन् नम्पूतिरिः अध्यक्षपदमलङ्कृतवान्। तन्त्रशास्त्र-ज्योतिष-वास्तुशास्त्र-अर्चकसमितिमण्डलेषु परिणतप्रज्ञाः विषयकुशलाः विद्वत्सभायां भागं गृहीत्वा स्वमतानि प्रकटितवन्तः। विद्यापीठस्य उपप्राचार्यः चेङ्ङोत्त् श्रीनिवासः सभासंचालकः आसीत्। विद्यापीठस्य प्राचार्यः पि बालकृष्ण भट्टः स्वागतं व्याजहार।

 केरलस्य नूतनः राज्यपालः संप्राप्तवान्। 

स्थानारोहणम् अद्य। 

ओ पि माथुरवर्यं मुख्यमन्त्री वी डी सतीशः स्वी करोति। 

अनन्तपुरी> राज्यस्य नूतनराज्यपालरूपेण ओं प्रकाश माथुरः शुक्रवासरे मध्याह्ने शपथवाचनं कृत्वा कार्यभारं स्वीकरिष्यति। सः ह्यः सायं ६.४५ वादने अनन्तपुरीं संप्राप्तवान्। केरलस्य २९ तमः राज्यपालो भवति ओ पि माथुरः।

  अनन्तपुरी अन्ताराष्ट्रिय विमाननिलयं प्राप्तं नूतनराज्यपालं स्वीकर्तुं  मुख्यमन्त्री वी डी सतीशः, गृहमन्त्री रमेश चेन्नित्तला, सभापतिः तिरुवञ्चियूर् राधाकृष्णः, अनन्तपुरी महानगराध्यक्षः वि वि राजेषः इत्यादयः सन्निहिताः आसन्। 

  अद्य लोकभवने सम्पद्यमाने प्रौढगम्भीरे कार्यक्रमे केरलस्य उच्चन्यायालयस्य मुख्यन्यायाधिपः न्याया.  सौमन सेनः शपथवाचनं कारयिष्यति।

 सिम्बाब्वे विरुध्य महिला टि-२०

भारतस्य सम्पूर्णविजयः।

रायपुरं> सिम्बाब्वे विरुध्य  महिलानां टि-२० क्रिकेट परम्परायां भारतस्य सम्पूर्णविजयः।अन्तिमे एवं तृतीये प्रतिद्वन्द्वे ९२ धावनाङ्कैः आसीत् भारतस्य विजयः (३ - ०)। 

  ४१ कन्दुकेषु ९१ धावनाङ्कान् प्राप्तवत्याः हर्मन् प्रीत कौर् इत्यस्याः ३७ कन्दुकेषु ६९ धावनाङ्कान् प्राप्तवत्याः षेफाली वर्मा इत्यस्याश्च प्रभावेण भारतं २० क्षेपणचक्रेषु सप्त क्रीडिकाणां विनष्टे २१६ धावनाङ्कान् सम्प्राप। प्रत्युत्तरताडने सिम्बाब्वे दलेन २० क्षेपणचक्रेषु सप्त क्रीडिकाणां विनष्टे १२४ धावनाङ्काः एव सम्प्राप्ताः। हर्मन् प्रीता क्रीडाप्रवीरा तथा षेफाली परम्पराप्रवीरा च अभवत्।

 आलुवा तन्त्रविद्यापीठे आचार्यस्मृतिदिनोत्सवः २३, २४ दिनाङ्कयोः। 

ब्रह्मश्री कल्पुष़ा दिवाकरन् नम्पूतिरिः 

प्रथमदिने पूर्वछात्रसंगमः संवादश्च।

पुरस्क्रियमाणाः पाण्डुरंगन् नंपूतिरि, विष्णु अकित्तिरिप्पाट्, सि जि वविजयकुमारश्च।

आलुवा> भारतस्य वैदिक-तान्त्रिकमण्डले प्रसिद्धे   तन्त्रविद्यापीठे [आलुवा, केरलं] आचार्यस्मृतिदिनं  बहुभिः कार्यक्रमैः ओक्टोबर् २३, २४ दिनद्वये समाचर्यते। शुक्रवासरे प्रभाते दशवादनतः पूर्वीयछात्राणां संगमं प्रमुखः तान्त्रिकाचार्यः ब्रह्मश्री अक्कीरमण् कालिदास भट्टतिरिप्पाट् वर्यः उद्घाटयिष्यति। पूर्वछात्रीयसमित्याः अध्यक्षः ब्रह्मश्री कल्पुष़ा कृष्णन् नम्पूतिरिप्पाट् वर्यः सम्मेलने अध्यक्षो भविष्यति। 

   ततः 'तान्त्रिकमण्डले काचन नीतिरूपरेखा' इत्यस्मिन् विषये संवादः भविष्यति। सूर्यकालटी सूर्यन् परमेश्वरन्  नम्पूतिरिप्पाट्, कूटल् मन विष्णु नम्पूतिरिः, प्रोफ पि एम् गोपिः, अत्तिमट्टं प्रदीप नम्पूतिरिः, पष़ङ्ङापरम्प उण्णिकृष्णन् नम्पूतिरिः, वि के विश्वनाथः इत्यादयः तान्त्रिक-ज्योतिष-वास्तुमण्डलेषु प्रसिद्धाः उपविंशति पण्डिताः चर्चायां भागं करिष्यन्ति। तन्त्रविद्यापीठस्य उपप्राचार्यः ब्रह्मश्री चेङ्ङोत्त् श्रीनिवासः चर्चासंचालको भविष्यति। 

  तन्त्रविद्यापीठस्य स्थापकतान्त्रिकाचार्यवरिष्ठस्य स्वर्गीयस्य 'तन्त्रशास्त्र बृहस्पतिः ब्रह्मश्री कल्पुष़ा दिवाकरन् नम्पूतिरिप्पाट् वर्यस्य ११३ तम जन्मदिने शनिवासरे समायोज्यमाने आचार्यस्मृतिदिने गुरुपूजा, अनुस्मरणसम्मेलनं, आचार्यपुरस्कारसमर्पणं, तन्त्ररत्नबिरुददानम् इत्येतानि सम्पत्स्यन्ते। वैदिक-तान्त्रिक-संस्कृतक्षेत्रेषु लब्धप्रतिष्ठाः त्रयः पण्डितवर्याः पुरस्कारेण समाद्रियन्ते। तन्त्रशास्त्रविशारदः ब्रह्मश्री पुटयूर् पाण्डुरङ्गन् नम्पूतिरिः 'कल्पुष़ा दिवाकरन् नम्पूतिरिप्पाट्' वर्यस्य नाम्नि दीयमानेन पुरस्कारेण समाद्रियते। वैदिकसंस्कृतेः परिपोषणाय दीयमानेन आचार्यपुरस्कारेण अग्निहोत्री कोम्पङ्कुलं विष्णु अक्कित्तिरिप्पाट् वर्यः सम्मानीयते। संस्कृतभाषाप्रचरणाय दीयमानं पुरस्कारं 'महर्षि पाणिनि संस्कृत विश्वविद्यालयस्य' भूतपूर्वः कुलपतिः प्रोफ सि जि विजयकुमारः स्वीक्रियते। अनन्तरं तन्त्रविद्यापीठस्य तन्त्ररत्नं, वेदविभूषणं, आचार्यः इत्येतानि बिरुदानि च समर्पयिष्यन्ते।

 Latest news Latest news

 केरले रविवासरपर्यन्तं वृष्टिः अनुवर्तिष्यते।

अनन्तपुरी> दिनत्रयात्पूर्वम् आकेरलम् आरब्धा तुलावर्षः रविवासरपर्यन्तं तीव्रतया अनुवर्तिष्यते इति केन्द्र पर्यावरणविभागेन सूचितम्। गुरुवासरे ११ जनपदेषु पीतजागरूकता उद्घोषिता। लक्षद्वीपे अपि महती वृष्टिः भविष्यति।

 मणिपुरे संघर्षः अनुवर्तते।

भुषुण्डिप्रयोगे एकः हतः।

इम्फालः> वंशीयसंघर्षाः मणिपुरे तीव्रायते। काङ्पोक्पि नामके जनपदे मङ्गलवासरे अक्रमिभिः कृते भुषुण्डिप्रयोगे कश्चन कुक्किवंशीयः हतः। पूर्वेद्युः काष्ठसंग्रहणार्थं गताः त्रयः मेय्ती वंशीयाः अस्मिन् जनपदे एव हताः आसन्। तस्याः घटनायाः अनुबन्धरूपेणासीत् इयं हत्या। 

  कांजोङ् जनपदस्थे कुक्किग्रामे बहूनि भवनानि आक्रमणकारिणः बुधवासरे प्रत्युषसि प्रज्वालयन्ति स्म। कुक्कि-नागसंघर्षेण अस्मात् प्रदेशात् ग्रामवासिनः पूर्वमेव पलायन्ते स्म। दिनद्वयस्य आक्रमणे प्रतिषिध्य कुक्किविभागेन मेय्तिविभागेन च पृथक् 'बन्धप्रतिषेधः' उद्घोषितः।

 मणिपुरे आक्रमणे त्रयः मेय्ती वंशीयाः हताः।

इम्फालः> मणिपुरे वने काष्ठसंग्रहणे व्यापृतान् मेय्तीवंशीयान् ग्रामीणान् विरुध्य सायुधसंघेन कृते भुषुण्डिप्रयोगे त्रयः मृताः। मृतशरीरैः सह जनाः मुख्यमन्त्रिणः वासगृहस्य पुरतः प्रतिषेधमकुर्वन्। 

 सोमवासरे प्रभाते सप्तवादने इम्फालस्य पूर्वीयप्रान्ते ग्रामे आसीदाक्रमणम्। काष्ठसंग्रहणार्थमागतं १६ अंगोपेतसंघं विरुध्य सायुघसंघः निलीय गोलिकाप्रक्षेपं कुर्वन्नासीत्। त्रयः व्रणिताः सन्तः परिचर्यायां वर्तन्ते।

 यूरोपभूखण्डः कलहकलुषितः। 

फ्रान्सः, इटली, बल्जियं, पोर्चुगलः इत्यादिराष्ट्रेषु जनाः प्रक्षोभे। 

फान्से  दुरापन्नः अक्रमः। 

> अस्य वर्षस्य सेप्टम्बरमासादारभ्य प्रायेण यूरोपे सर्वत्र जनाः प्रक्षोभमार्गे वर्तन्ते। यूरोपीयराष्ट्रेषु जीवनव्ययः अधिकायते इति कलहस्य मुख्यहेतुः। 

  फान्से विद्यार्थिप्रक्षोभरूपेण आसीत् सेप्टम्बरमासे सर्वकारविरुधप्रतिषेधः आरब्धः। शिक्षकाणां दौर्लभ्यं, अयोग्याः कक्ष्याप्रकोष्ठाः, अत्यधिकः जीवितव्ययः, इन्धनस्य अधिकमूल्यमित्यादयः प्रक्षोभस्य हेतवः आसन्।ओक्टोबर्  १७ तमे दिनाङ्के व्यापकतया अक्रमपरम्परा आरब्धा। 

  इटलिदेशे च कारणानि समानानि आसन्। मिलान्, टूरिन्, बोलोणा इत्यादिषु नगरेषु ओक्टोबर् १६ तः महाप्रक्षोभः अजायत। 

 बल्जिये ओक्टोबर् नवमदिनाङ्के आरब्धः प्रतिषेधः १७ तमे दिनाङ्के महासंघर्षरूपेण पर्यवर्तत। तत्र विरताः सर्वकारोद्योगस्थाः, कर्मकराः, न्यूनवेतनिकाः च तेषां जीवनाशङ्कया प्रक्षोभमार्गं स्वीकृतवन्तः। 

पोर्चुगले  लिस्बणनगरे कर्मकरसंघटनानां नेतृत्वे सहस्रशः जनाः तेषां  जीवनावस्थायाः क्लेशमनुभूय तं प्रतिषिध्य पथसञ्चलनम् आयोजितवन्तः। अनियन्त्रितं भाटकवर्धनं, वर्धितं  गृहमूल्यं, असहनीयः जीवनव्ययः च कारणानि भवन्ति।

 भारत-सिम्बाब्वे महिला टि-२०।

परम्परां स्वायत्तीकृत्य भारतम्।वर्मा

अर्धशतकं प्राप्तवत्यौ स्मृती षेफाली च। 

राय्पुरं> नायिकापदं स्वीकृतवत्याः स्मृती मन्थानायाः प्रहर्षः। स्वस्य नायकत्वे स्पर्धितां प्रथमां क्रिकट्परम्परां विजयेन राष्ट्राय समर्प्य सा चारितार्थ्यवती बभूव। सिम्बाब्वें विरुध्य टि-२० क्रिकेट स्पर्धापरम्परायाः द्वितीयस्पर्धा अपि नव द्वारकाणाम् अनायासविजयेन  भारतेन स्वायत्तीकृता। अनेन विजयेन स्पर्धात्रयात्मिका परम्परा अपि  २-० इति रीत्या भारतेन स्वायत्तीकृता। 

  प्रथमं कन्दुकताडनं कृतवान् सिम्बाब्वेगणः २० क्षेपणचक्रेषु ८ ताडकानां विनष्टे १०२ धावनाङ्कान् सम्पादयामास। भारतं तु ८.५ क्षेपणचक्रेषु द्वारकैकस्य विनष्टे लक्ष्यं प्राप। 

  हर्मन् प्रीत कौर् इति नायिकायाः नेतृपदं स्वीकृतवत्याः स्मृती मन्थानायाः विजयस्मृतिमधुरमस्ति इयं परम्पराप्राप्तिः। षेफाली वर्मा २५ कन्दुकैः ५५ धावनाङ्कान् सम्प्राप्तवती। स्मृती तु २५ कन्दुकैः ४७ धावनाङ्कान् सम्प्राप्य अबाह्या जाता।

 फ्रान्से बहुजनप्रक्षोभः।

अक्रमः, चौर्यं, अग्निप्रज्वालनम्।

पारीस्> फ्रन्सराष्ट्रे मासैकात् पूर्वमारब्धः बहुजनप्रतिषेधः गतदिनेषु अक्रमासक्तः अभवत्। रविवासरे प्रक्षोभः तस्य मूर्धन्यतां प्राप। जनाः आपणेषु चौर्यमकुर्वन्। वाहनानि बभञ्जुः। यद्यत् दृष्टानि सर्वं अग्निसात्कृतानि। 

  शिक्षकदौर्लभ्यं, शैक्षिकमण्डले आधारसुविधानाम् अपर्याप्तता इत्यादिविषयान् उन्नीय छात्रसंघटनैः आरब्धः प्रक्षोभः क्रमेण बहुजनप्रक्षोभरूपेण परिणमति स्म। जीवनव्ययस्य अधिकता, आर्थिकशोषणम् इत्यादीनां प्रतिषेधरूपेण वृद्धिं प्राप।

 अरीक्करा सुब्रह्मण्यन् शङ्करन् नम्पूतिरिः शबरिगिर्यां मुख्यार्चकः।

शङ्करन् नम्पूतिरिः, दामोदरन् नम्पूतिरिः च। 

शबरिगिरिः> शबरिगिर्यां श्रीधर्मशास्तृमन्दिरस्य मुख्यार्चकरूपेण अनन्तपुरं प्रान्तीयः अरीक्करा निवासी सुब्रह्मण्यन् शङ्करन् नम्पूतिरिः[५१] शलाकाग्रहेण चितः। तथा च मालिकप्पुरं मन्दिरस्य मुख्यार्चकरूपेण कोष़िक्कोट् जनपदीयः वटकर निवासी दामोदरन् नम्पूतिरिः [५२] अपि चितः।

 केरलम्।

 तन्त्रविद्यापीठस्य आचार्यपुरस्काराः उद्घोषिताः।

 संस्कृतप्रचरणपुरस्कारः डो. सि जि विजयकुमाराय।

डो सि जि विजयकुमारः।

आलुवा> तन्त्रशास्त्र-वैदिकसंस्कृति-संस्कृतभाषाप्रचारणमण्डलेषु श्रेष्ठं योगदानं कृतवद्भ्यः  आलुवास्थेन तन्त्रविद्यापीठेन दीयमानाः आचार्यपुरस्काराः उद्घोषिताः। तन्त्रशास्त्रमण्डले दीयमानः तान्त्रिकाचार्यः ब्रह्मश्री 'कल्पुष़ा दिवाकरन् नम्पूतिरि' आचार्यपुरस्कारः पटयूर् पाण्डुरङ्गन् नम्पूतिरि महाभागाय दीयते। ब्रह्मश्री वेष़प्परम्प परमेश्वरन् नम्पूतिरि महाभागस्य नाम्नि वैदिक संस्कृतिक्षेत्रे दीयमानः आचार्यपुरस्कारः कोम्पङ्कुलं विष्णु अक्कित्तिरिप्पाट्' वर्याय दीयते। संस्कृत भाषाप्रचारणाय दीनयमानः ब्रह्मश्री के पि सि नारायणन् भट्टतिरिप्पाट् स्मारकाचार्यपुरस्कारः संस्कृतपण्डिताय डो सि जि विजयकुमाराय दीयते। 

  सि जि विजयकुमारवर्यः उज्जयिनीस्थ महर्षि पाणिनि संस्कृत विश्वविद्यालयस्य भूतपूर्वः कुलपतिः अस्ति। दशाब्दैः संस्कृतभाषायाः प्रचारणाय अकादमिकाभिवृद्धये च दत्तं सुदीर्घां सेवां पुरस्कृत्य अस्ति तस्मै पुरस्कारः। 

  तन्त्रविद्यापीठस्य स्थापकाचार्यः कल्पुष़ा दिवाकरन् नम्पूतिरिप्पाट् वर्यस्य जन्मदिनं पुरस्कृत्य ओक्टोबर् २४ तमे दिनाङ्के तन्त्रविद्यापीठे आयेज्यमाने आचार्यस्मृतिदिनाचरणकार्यक्रमे पुरस्काराः समर्पिष्यन्ते।

 रष्यीयतैलेन्धनविषये ट्रम्पस्य परावर्तनम्। 

भारतस्य आश्वासः।

वाषिङ्टणः> रष्यायाः तैलेन्धनं क्रीणन्तः युक्रैनयुद्धे रष्यायै आर्थिकसाह्यं कुर्वन्तीति यू एस् राष्ट्रपतेः डोनाल्ड ट्रम्पस्य आरोपे स एव परावर्तते। रष्यीयतैलेन्धनं क्रीणतां पञ्च राष्ट्राणां विरुध्य (तेषु भारतमपि अन्तर्भवति) १००% दण्डशुल्कं यू एसेन विहितमासीत्। इदानीम् अस्मिन् विषये विपुलानि लाघवानि तेन उद्घोषितानि। शुक्रवासरे आसीत् ट्रम्पस्य नूतनः प्रशासनादेशः।रष्यीयतैलस्य मुख्योपभोक्त्रे  भारताय महदाश्वासाय भवति ट्रम्पस्य इदं पराङ्मुखसरणम्।

 तुलामासपूजाभ्यः ‌शबरिगिरिमन्दिरम् उद्घाटितम्।

# मुख्यमन्त्री दर्शनं कृतवान्।

# मुख्यार्चकेभ्यः शालाकाग्रहः अद्य। 

शबरिगिरिः> केरले प्रसिद्धं शबरिगिरि श्रीधर्मशास्तृमन्दिरं तुलामासपूजाभ्यः उद्घाटितम्। स्वामिदर्शनाय अभूतपूर्वः भक्तजनसम्मर्दः अनुभूयते। 

  आगामिमासे आरभ्यमाणं 'मण्डलकालम्' अभिव्याप्य वर्षैकस्य देवपूजायै नियोक्तुं मुख्यार्चकाय दैवपरीक्षा - शालाकाग्रहः - रविवासरे प्रभाते मन्दिरसोपानमण्डपे विधास्यते। मालिकप्पुरं मन्दिरस्य मुख्यार्चकाय तत्र दैवपरीक्षा विधास्यते। 

  मुख्यमन्त्री वि डि सतीशः ह्यः सायं मन्दिरदर्शनमकरोत्। मण्डलकालतीर्थाटनस्य समग्रम् अवलोकनं तेन कृतम्।

 कोल्कोत्तायां दुर्गापूजामध्ये जनसम्मर्दः 

- १७ मरणानि; उपचत्वारिंशत् क्षताः।

दुरन्तदृश्यम्। 

कोल्कोत्ता> उत्तरकोल्कोत्तायां 'चोर्बगान्' इत्यत्र दुर्गापूजावेलायां दुरापन्ने जनसम्मर्दे १७ जनाः मृत्युमुपगताः। उपचत्वारिंशत् जनाः क्षताः। पञ्चानामवस्था गुरुतरा इति सूच्यते।

  शनिवासरे आसीदियं दुर्घटना। पूजासमये महती वृष्टिरभवत्। जनाः  पूजावितानस्य अन्तः प्रवेष्टुं अहमहमिकया उद्युक्ताः। एतदेव ददुर्घटनामनयत्। 

  मुख्यमन्त्री सुवेन्दु अधिकारी आतुरालयं प्राप्य क्षतान् सन्दर्शयामास। प्रधानमन्त्री नरेन्द्र मोदी घटनायाम् अन्वशोचयत्। मृतानां परिवारेभ्यः प्रतिपरिवारं लक्षद्वयं रूप्यकाणि साहाय्यधनम् उदघोषयच्च।

 भारत-विन्डीसयोः पञ्चमस्पर्धा अद्य। 

बङ्गलुरु> भारत-विन्डीसयोः टि-२० स्पर्धापरम्परायाः पञ्चमः  एवम् अन्तिमश्च प्रतिद्वन्द्वः शनिवासरे सम्पत्स्यते। चिन्नस्वामि क्रीडाङ्कणे सायं सप्तवादने अस्ति स्पर्धा। उभयोरपि गणयोः लक्ष्यमेकमेव- परम्पराप्राप्तिः।

 सौदीं प्रति विमानसेवा 'एयर् इन्डियया' २० तमपर्यन्तं निरस्ता। 

नव दिल्ली> पश्चिमेष्या संघर्षस्य आधारे सौदी अरेबियां प्रति विमानसेवा ओक्टोबर् २० तमदिनाङ्कं यावत् निरस्ता इति 'एयर् इन्डियया' संस्थया निगदितम्। ररियाद्, दमामः, जिद्दा इत्येतानि स्थानानि प्रति गमनागमनसेवा एव निरस्ता। सेवानिरासेन ये यात्रां न कुर्वन्ति तेभ्यः चिटिकामूल्यं प्रत्यर्पयिष्यते इति संस्थया निगदितम्।

लुधियान-नगरात् १६ वर्षीया गुणिशा कौर 2026-तमवर्षीयस्य 'अन्ताराष्ट्रिय-युवा-पर्यावरण-वीर-पुरस्कारस्य' (International Young Eco-Hero Awards) तृतीयं स्थानं प्राप्तवती।

चित्रम् -TOI

​यस्मिन् समये नगरेषु हरितक्षेत्राणि जैवविविधतायाः कृते अधिकाधिकं महत्त्वपूर्णानि वर्तन्ते, तस्मिन् समये पञ्जाबराज्यस्य लुधियाना-निवासिनी षोडशवर्षीया (१६) गुणिशा कौर द्विविधोद्देश्ययुक्तानाम् उद्यानानां निर्माणे निरता अस्ति - परागकहानाम् (pollinators) आवासप्रदानं, विशिष्टापेक्षाणां बालकानां कृते प्रकृतेः सुलभता च।

​तस्याः 'बसिङ् ब्लूम्स' (Buzzing Blooms) इति प्रक्रियया लुधियाना, मीरठ्, मुम्बई तथा च अन्येषु सहवर्तीक्षेत्रेषु विंशत्यधिकाः परागकोद्यानानि पर्यावरण-पुनरुद्धार-प्रकल्पाः च स्थिताः सन्ति। चतुर्विंशतिमासानाम् अनुवीक्षणस्य पश्चात् एतेषु उद्यानेषु परागकप्रजातीनाम् समृद्धिः १८ तः ४६ अथवा प्रतिशतं १५५ इति वर्धितेति 'आक्षन् फोर् नेचर्' (Action For Nature) इत्यनेन संगठनेन घोषितम्, येन गुणिशा तस्य पुरस्कारस्य  'अन्ताराष्ट्रिय-युवा-पर्यावरण-वीर-पुरस्कारस्य' (International Young Eco-Hero Awards) तृतीयस्थानेन सम्मानिता।

News Desk SampratiVartah.in|17 October 2026 |

 उपराष्ट्रपतिः अद्य केरले।

कोष़िक्कोट्> भारतस्य उपराष्ट्रपतिः सि पि राधाकृष्णः शुक्रवासरे अपराह्णे केरले कोष़िक्कोट् प्राप्नोति। प्रदेशस्थे चालप्पुरं केसरि भवने आयोज्यमानं नवरात्रसर्गोत्सवं उपराष्ट्रपतिः उद्घाटयिष्यति। सायं पञ्चवादने अस्ति कार्यक्रमः।

  उद्घाटनसम्मेलने राज्यपालः राजेन्द्र विश्वनाथ आर्लेकरः,  स्वामी चिदानन्द पुरी, राज्यसभासदस्यः सि सदानन्दन् मास्टर् इत्यादयः  भागं करिष्यन्ति।

 पाकिस्थाने विद्यालयछदिः प्रभञ्ज्य ३५ मरणानि। 

३४ छात्राः, एका अध्यापिका। 

दुर्घटनाधीनः विद्यालयः।

पेषवारं> पाकिस्थानस्य प्रान्ते खैबर् पख्तूण् ख्व इत्यत्र कस्यचन निजीयविद्यालयस्य छदिः  निपत्य ३४ छात्राः एका शिक्षिका च मृत्युमुपगताः। ४० जनाः  क्षताः। ऊनत्रयोदशवयस्काः छात्रा एव मृताः। 

  ११० छात्राः विद्यालये पठन्तः सन्ति। त्रितयस्तरोपेतस्य विद्यालयस्य छदिः एव भग्नः।  भवननिर्माणस्य अपाक एव दुर्घटनाहेतुरिति सूच्यते। विद्यालयभवनस्वामी निगृहीतः। पाकिस्थाने ईदश्यः विद्यालयदुर्घटनाः अनुस्यूततया जायन्ते। जूलाय् मासे विभिन्नदिनेषु एतादृशरीत्या छदिभञ्जनेन भित्तिकानाशेन च बहवः छात्राः मृताः आसन्।

 सौद्याम् अरांको आस्थाने हूत्याक्रमणम्, अग्निबाधा। 

रियादः> सौदी अरेबियायाः अधीने वर्तमाने अरांको तैलोद्पादनकेन्द्रे गतदिने यमनस्थानां हूतिनामाक्रमणमभवत्। आस्थानभवने बालिस्टिक् मिसैल् शस्त्राणि पतित्वा अग्निबाधा दुरापन्ना। आक्रमणभीषा आसीदित्यतः भवने कर्मकराः नासन्। 

  तथा च रियादे जनाधिवासक्षेत्रं लक्ष्यीकृत्य प्रयुक्तानि अग्निशस्त्राणि  विनाशितानीति सौदीप्रशासनेन निगदितम्। किन्तु शस्त्रखण्डानि पतित्वा चत्वारः व्रणिताः। १५ गृहाणि दुष्टान्यभवन्।

 टि-२० - चतुर्थस्पर्धायां विन्डीसस्य विजयः।

षाय् होपाय शतकम्।

शतकं प्राप्तवतः षाय्होपस्य आह्लादः। 

हैदराबादः> भारत-विन्डीसयोः टि-२०  क्रिकेट स्पर्धापरम्परायां चतुर्धस्पर्धा वेस्ट् इन्डीसेन विजिता। विन्डीसनायकस्य षाय् होप् इत्यस्य निर्दयं कन्दुकताडनं तेषां विजये निर्णायकमभवत्। सः ५० कन्दुकेषु १०२ धावनाङ्कान् सम्प्राप।

   २४ धावनाङ्कैः आसीत् भारतस्य पराजयः। प्राप्ताङ्कसूचिका - विन्डीसः २० क्षेपणचक्रेषु  २४७/३। अर्षदीपसिंहः व्रणितः सन् निवृत्तः इत्यतः भारतं १९.३ क्षेपणचक्रेषु २२३/९। अनेन विजयेन विन्डीसः भारतेन सह समस्थितं जग्राह [२ -२]।

 भारतस्य ७% वृद्धिः प्रोच्यते, ऐ एम् एफ् संस्थया। 

नवदिल्ली> भौगोलिकार्थिकव्यवस्था सन्दिग्धतां सृजते अपि भारतस्य सम्पद्व्यवस्था दृढतया वर्तते इति अन्ताराष्ट्रिय नाणकनिधिः [ऐ एम् एफ्]। राष्ट्रस्य आर्थिकवृद्धिः २०२६-२७ आर्थिकसंवत्सरे ७% भवेदिति संस्थायाः निर्णयः। पूर्वं ६. ४ आसीत् प्रोक्तवृद्धिः। 

ऐ एम् एफ् संस्थायाः गणनानुसारं भारतस्य वृद्धिः २०२५ तमे वर्षे ७. ८ आसीत्। २०२६, २०२७ वर्षयोरपि ७% वृद्धिः प्रोच्यते। चीनस्य वृद्धिः २०२६ तमे ४•५% तथा २०२७ तमे ४% च भविष्यतीति गण्यते।

 परम्परागतव्रीहीबीजानां संरक्षकः  

चेरुवयल् रामः दिवंगतः।

चेरुवयल् रामः स्वगृहे।

वयनाट्> जैवकृषिरीतिमवलम्ब्य अपूर्वाणां व्रीहीबीजानां संरक्षणं कृतवान्  चेरुवयल् रामः [७४] दिवंगतः। २०२३ तमे वर्षे राष्ट्रस्य पद्मश्रीपुरस्कारेण समादृत आसीत्। 

 वयनाट् जनपदे मानन्तवाटी प्रदेशे 'कम्मना' इत्यत्रस्थः गोत्रवर्गीयः कृषकः आसीत्  चेरुवयल् रामः। वंशनाशं प्राप्नुवन्ति अपूर्णाणि ४५ अधिकरणानि व्रीहीबीजानि स्वकीये केदारे परम्परागतरीत्या कृषिं कृत्वा संरक्षितवान्। न केवलं व्रीहीबीजानि, बहूनि शाकानि औषधसस्यानि च एवं रीत्या संरक्षितवान्। 

  २०११ तमे वर्षे हैदराबादे आयोजिते १२ राष्ट्राणां भागधेयत्वेन विशिष्टे जैववैविध्यसम्मेलने केरलस्य प्रतिनिधिः चेरुवयल् रामः आसीत्।

 वैशालिजिल्लायां राघोपुरथानसीमान्तर्गते मंगलवाररात्रौ गङ्गानद्यां नौकादुर्घटनया त्रयोदश बालाः मृताः। 

​नौकायाम् आरूढाः ग्रामीणः अन्यं ग्रामं गच्छन्ति स्म, यत्र तैः भोजने भागं स्वीकृतव्यम् आसीत्।

​स्थानीयजनस्य मतानुसारम्, भगताण्टोलायां (रामपुरश्याम्चंदपंचायती) मातामहराणीस्थानस्य पार्श्वे सिंहेश्वररायस्य नाम्ना व्यक्तेः गृहे भोज्यसत्कारस्यायोजनं कृतम् आसीत्। प्रायः विंशतिजनाः एकस्मिन् लघुनौकायाम् आरूढाः गच्छन्ति स्म।

​वैशाल्याः जिल्लाधिकारिण्या वर्षासिंहायाः मतानुसारम्, सप्त जनाः रक्षिताः ते च नालंदा-वैद्यकीय-महाविद्यालयस्य आतुरालयं प्रेषिताः। तया उक्तं यत् नौकायाम् सर्वे बालाः पञ्चदश-वयसकाः तद्यूनाः वा आसन्।

 भारत-विन्डीस् चतुर्थं टि-२० अद्य। 

भारतं विजयते चेत् परम्पराप्राप्तिः।

हैदराबादः> भारत-वेस्ट् इन्डीसयोः चतुर्धा टि-२० क्रिकटस्पर्धा बुधवासरे सायं हैदराबादे सम्पत्स्यते। पञ्चस्पर्धात्मिकायां परम्परायां त्रिषु प्रतिद्वन्द्वेषु समाप्तासु २-१ इति क्रमेण भारतम् अग्रे तिष्ठति। अद्यतनस्पर्धां विजयते चेत् भारतस्य परम्पराप्राप्तिः सिध्येत।