भारतीयज्ञानपरम्पराम् अधिकृत्य अन्ताराष्ट्रियसङ्गोष्ठीl

            त्रिपुणितुरा> (केरळम्) संस्कृतप्रचारसभा (SPS) एकां अन्ताराष्ट्रियसङ्गोष्ठीम् आयोजयति। "भारतीयज्ञानपरम्परा - परिप्रेक्ष्याणि, समन्वयः, साम्प्रतिकी प्रासंगिकता च" इति अस्याः विषयः अस्ति। एषा सङ्गोष्ठी २०२७ जनवरिमासे भविष्यति। त्रिपुणितुरा-राजकीय-संस्कृतमहाविद्यालयस्य अनुसन्धानमञ्चः, 'सम्प्रतिवार्ताः' इति पत्रिका च अस्याम् सहभागंकुरुतः।

अस्यां सङ्गोष्ठ्याम् अध्यापकाः, शोधच्छात्राः च भागं ग्रहीतुं शक्नुवन्ति। शोधसारः (Abstract) २०२६ नवम्बर् २० दिनाङ्कात् पूर्वं प्रेषणीयः। तस्मिन् १५०-२५० शब्दाः, न्यूनतमं ५ मुख्यपदानि च भवेयुः। स्वीकृत्याः सूचना नवम्बर् २५ दिनाङ्के लभ्यते।

पूर्णशोधप्रबन्धः (Full Paper) डिसेम्बर् १० दिनाङ्कात् पूर्वं प्रेषणीयः। तस्मिन् ३०००-६००० शब्दाः भवेयुः। संस्कृते 'Devanagari' युणीकोड् (14 pt), आङ्ग्लभाषायां 'Times New Roman' (12 pt) इति अक्षराणि उपयोक्तव्यानि।

पञ्जीकरणशुल्कम् भारतीयप्रबन्धप्रस्तोतृभ्यः ₹५०० अस्ति। विदेशिभ्यः $60, केवलं श्रोतृभ्यः ₹१०० च अस्ति। शोधप्रबन्धाः https://shodhamanjari.samprativartah.in इति सङ्केते प्रेषयितुं शक्यन्ते।

 ऐ ओ ए प्रतिनिधिनिर्वाचनं

पि टि उषा पराजिता; अज्जू बोबी जोर्ज् प्रथमस्थाने।

पि टि उषा, अज्जू बोबी जोर्जः च। 

नव दिल्ली> इन्डियन् ओलिम्पिक्स् असोसियेषन् [ I O A ]संस्थायाः महिलाप्रतिनिधिस्थानाय विधत्ते निर्वाचने वर्तमानीना अध्यक्षा केरलीया च पि टि उषा पराजिता अभवत्। किन्तु केरलीया तथा भूतपूर्वा कायिकक्रीडिका च अज्जू बोबी जोर्ज् प्रथमस्थानम् अवाप। 

  आवश्यकानि चत्वारि स्थानानि प्रति षट् पूर्वीय महिलाकायिकक्रीडिकाः स्पर्धितवत्यः। अञ्जू ५३ मतानि संप्राप्य प्रथमस्थानं प्राप। उषा तु ४० मतैः  पञ्चमस्थानं प्राप्तवती। 

  इदानीं निर्वाचिताः चतस्रः सदस्याः ऐ ओ ए संस्थायाः अध्यक्षपदनिर्वाचने स्पर्धितुं योग्याः भविष्यन्ति। उषावर्यायाः पराजयेन द्वितीयवारमपि अध्यक्षपदमिति तस्याः अभिलाषः अस्तं गतः।

चतुरङ्गस्पर्धायां भारताय विशेषोपलब्धिः।; शततमेन 'ग्राण्ड्मास्टरेण' सह जगति महाशक्तिरूपेण भारतम्।

News Desk | SampratiVartah|

विश्वचतुरङ्गस्य (Chess) इतिहासे स्वस्य आधिपत्यं सुदृढीकृत्य भारतेन ऐतिहासिकी उपलब्धिः सम्पादिता। मध्यप्रदेशस्य २२ वर्षीयः अनुजश्रीवात्रिः भारतस्य शततमः 'ग्राण्ड्मास्टर्' (Grandmaster) अभवत्, येन देशस्य एषा ऐतिहासिकी शतकात्मकसिद्धिः प्राप्ता। फिलिपीन्स-देशे आयोजितायां सप्तम्यां आसियान्-प्लस्-ओपन्-चतुराङ्ग-प्रतियोगितायां विजयं प्राप्य अनुजः साक्षात् ग्रैण्ड्मास्टर्-पदवीं प्राप्तवान्। 

अनेन रष्या, यु.एस्.ए. इत्येतयोः देशयोः अनन्तरम् १०० ग्रैण्ड्मास्टर्-क्रीडकान् प्रदाय जगति विरलेषु देशेषु भारतमपि समाविष्टमभवत्। 

सर्वाङ्गीणाः विशेषाः

१. विश्वनाथनानन्दात् अनुजश्रीवात्रिं यावत् (३८ वर्षाणां यात्रा)—

•  १९८८ तमे वर्षे विश्वनाथनानन्दस्य माध्यमेन भारतेन प्रथमः ग्रैण्ड्मास्टरः प्राप्तः। ३८ वर्षेभ्यः अनन्तरम् भारतेन स्वस्य शततमः ग्रैण्ड्मास्टरः अपि लब्धः।
•   गतेषु कतिपयेषु वर्षेषु भारतस्य ग्रैण्ड्मास्टर-क्रीडकानां संख्यायाम् महती वृद्धिः अभवत्। २०१० वर्षात् अनन्तरमेव प्रायः ८० क्रीडकाः एतां पदवीं प्राप्तवन्तः। ९८ तमः एस्. अश्वथः, ९९ तमः वि. एस्. रत्नवेलुः च एताम् उपाधिं प्राप्तवन्तौ आस्ताम्। 

२. राज्यानां योगदानम्—

•  देशे सर्वाधिकान् ग्रैण्ड्मास्टर्-क्रीडकान् तमिलनाडु-राज्यम् (प्रायः ४० क्रीडकाः) अयच्छत्। तदनन्तरं महाराष्ट्रस्य स्थानम् अस्ति। मध्यप्रदेशात् प्रथमः ग्रैण्ड्मास्टरः अस्ति अनुजश्रीवात्रिः।
•   केरलराज्यतः जी. एन्. गोपालः, एस्. एल्. नारायणन्, निहाल् सरिन् इत्येते त्रयः क्रीडकाः ग्रैण्ड्मास्टर्-उपाधिं प्राप्तवन्तः। 

३. महिला-ग्रैण्ड्मास्टर्-क्रीडिकाः—

•  भारतस्य १०० ग्रैण्ड्मास्टर्-क्रीडकेषु चतस्रः महिलाः सन्ति: कोनेरू हम्पी, डी. हरिका, आर. वैशाली, दिव्या देशमुखः च।  

४. दिग्गजानाम् अभिनन्दनम्— 

•  "एषः भारतीयचतुरङ्गस्य महान् ऐतिहासिकः क्षणः अस्ति" इति भारतीयचतुराङ्गदिग्गजः विश्वनाथनानन्दः 'X' (ट्विट्टर्)  मध्ये अलिखत्, अनुजं चाभिनन्दितवान्।
•  ‘ओल् इण्डिया चेस् फेडरेशन्’ (AICF) अपि अस्मिन् उपलब्धौ गर्वं प्रकटितवत्, अग्रिमं लक्ष्यं २०० ग्रैण्ड्मास्टर्-क्रीडकाः इति घोषितवत् च।

 ७९ संवत्सरेभ्यः परं लहोरस्थं सिख् मन्दिरम् उद्घाटितम्।

लहोर्> भारत-पाकिस्थानविभजनानन्तरं ७९ संवत्सरैः पिहितं लहोरस्थं चरित्रप्रसिद्धं गुरुद्वारामन्दिरं नाम्ना 'छेविन् पात् शाहि श्री गुरु हर्गोविन्द साहिब्' आराधनार्थं पुनरुद्घाटितम्। रविवासरे सिखधर्माचारैः आसीदुद्घाटनम्। 

  षष्ठः सिख गुरुः गुरु हर्गोविन्द साहिब् इत्यस्य लाहोरसन्दर्शनं पुरस्कृत्य स्थापितमस्ति इदं चरित्रस्मारकम्।

 हसीनां प्रत्यर्पयितुं भारतम् अपेक्षितम्।

धाक्का> राष्ट्रात् भ्रष्टवती भूतपूर्वा प्रधानमन्त्रिणी षैक् हसीना दण्डिता अपराधिनी इत्यतः सा प्रत्यर्पणीया इति बङ्गलादेशस्य नीतिमन्त्री मुहम्मद असदुस्समानः निगदितम्। बङ्गलादेशस्य निवेदनं लब्धं, तत्तु विचारे वर्तते इति भारतस्य विदेशकार्यमन्त्रालयेन च दृढीकृतम्।

 सौद्यां महत् हूत्याक्रमणम्

मिसैल् अवशिष्टं पतित्वा अराम्को गोपुरं क्षतम्।

दुबाय्> सौदी अरेबियायाः प्रधानप्रान्तप्रदेशान् लक्ष्यीकृत्य हूति विभागेन  रविवासरे महदाक्रमणं विधत्तम्। रियाद्, पूर्वप्रदेशाः, यमनदेशसमीपस्थाः प्रदेशाः आसन् आक्रमणलक्ष्याणि। अग्निशस्त्रस्य अवशिष्टानि पतित्वा सौद्याः देशीयतैलेन्धनसंस्था अरांको इत्यस्य बहुस्तरीयमन्दिरं क्षतं जातम्। किन्तु जनानां प्राणहानिः, क्षतः वा नाभवत्। 

  शनिवासरे यमने सनायां सौदीराष्ट्रात् व्योमाक्रमणं विधत्तमिति हूतिविभागेन आरोपितम्। आक्रमणे ३३ जनाः हताः इति तैः निगदितम्।

 पेट्रोले ३१% एथनोल् इति वादः केन्द्रप्रशासनेन निरस्तः।

नव दिल्ली> कर्णाटके तैलेन्धनवितरणकेन्द्रेषु विक्रियमाणे पेट्रोलेन्धने अनुज्ञायमानं २०% इत्यस्मादधिकं एथनोल् अधिगतमिति वादः केन्द्रपेट्रोलियं मन्त्रालयेन निरस्तः। राज्ये प्रमुखतेलेन्धनसंस्थाभिः विक्रियमाणस्य तैलेन्धनस्य मातृकासु कर्णाटकसर्वकारेण  परिशोधितासु ३१.२% एथनोल् अधिगतमिति वाद एव निरस्तः। 

  प्रशासननियन्त्रिततैलसंस्थाभिः विक्रियमाणम् ई-20 पेट्रोल् इन्धनं निर्दिष्टपरिशुद्धिं परिपाल्यते इति पेट्रोलियं मन्त्रालयेन निगदितम्।

 इराने पुनः यू एस् आक्रमणम्।

वाषिङ्टणः> मध्यकालीननिर्वाचनेे अनुभूतस्य प्रत्याघातस्य क्लमशमनात्पूर्वं पुनरपि इरानः यू एसेन आक्रान्तः। शुक्रवासरे इरानस्य व्योमप्रतिरोधसंविधानं विरुध्य आक्रमणं कृतमिति राष्ट्रपतिना डोनाल्ड ट्रम्पेन प्रोक्तम्। 

  होर्मुस् समुद्रसङ्कोचस्य समीपं सुसा प्रान्ते खेषं नामकद्वीपात् स्फोटनशब्दः श्रुत इति इरानस्य राष्ट्रियवार्तामाध्यमेन वृत्तान्तीकृतम्। मध्यकालीन निर्वाचनानन्तरं विधत्तं प्रथममाक्रमणं भवत्येतत्।

 सि बि एस् ई

१०, १२ कक्ष्यापरीक्षाः फेब्रुवरी १६ तमदिनाङ्कतः।

नव दिल्ली> सि बि एस् ई संस्थायाः १०, १२ कक्ष्ययोः परीक्षादिनाङ्काः उद्घोषिताः। दशमकक्ष्यायाः मुख्यपरीक्षा फेब्रुवरी १७ तमदिनाङ्कतः मार्च् नवमदिनाङ्कपर्यन्तं विधास्यति। द्वादशकक्ष्यायाः परीक्षाः फेब्रुवरी १६ तः आरभ्य एप्रिल् प्रथमे समाप्स्यन्ते। 

  प्रभाते १०.३० वादनतः परीक्षाः आरप्स्यन्ते। दशमकक्ष्यापरीक्षार्थं २६.५ लक्षं  छात्राः पञ्जीकृताः सन्ति।१२ कक्ष्याछात्रास्तु  १९.९ लक्षं सन्ति।

 कार्गिल् मध्ये वाहनदुर्घटना

द्वौ सैनिकौ मृतौ।

जम्मू> कार्गिल्-ले राष्ट्रियमार्गे सैनिकवाहनं गभीरगर्तं निपत्य द्वौ सैनिकौ मृतौ। मद्रास् रजिमेन्ट् [Madras Regiment] मध्ये हविल् दार् पदीयः केरलीयः कोष़िक्कोट् प्रदेशीयः एस् आर् अरुण राजः एव मृतः। द्वितीयः कः इति सूचना न लब्धा। गतदिने मध्याह्ने आसीत् दुर्घटना। वाहने द्वावेवास्तम्।

 क्रिस्टियानो रोनाल्डो अन्ताराष्ट्रीय पादकन्दुकात् विरतः।

लिस्बण्> पोर्चुगलराष्ट्रस्य विश्वविख्यातः पादकन्दुकक्रीडकः क्रिस्टियानो रोनाल्डो वर्यः अन्ताराष्ट्रीय पादकन्दुकक्रीडाभ्यः विरतः। किन्तु समित्यानां   स्पर्धासु [Club Football] ४१ वयस्कः सः परं क्रीडिष्यति। 

  अर्जेन्टीना इतिहासः लयणल् मेसी वर्यः समीपकाले अन्ताराष्ट्रीय पादकन्दुकक्रीडाभ्यः विरतः आसीत्। इदानीं CR 7 इति आराधकैः आह्वयमानः रोनाल्डो अपि विरमति इत्येतत् विश्वस्मिन् पादकन्दुकाराधकाणां मध्ये महच्छून्यतां जनयति।

 मेक्सिकोदेशस्य छात्रया ध्वनितरङ्गैः सञ्चालितम् अग्निशामकयन्त्रम् आविष्कृतम्; इन्दोनेष्यादेशे स्वर्णपदकं प्राप्तम्।

      ३० हर्ट्ज् (Hertz)-परिमाणानाम् ध्वनितरङ्गाणां प्रयोगं कृत्वा क्षणाभ्यन्तरे एव अग्निं शमयित्वा सप्तदशवर्षीया आञ्जेला करीम् वेनेगास् हेर्नान्देस् (Angela Karime Venegas Hernández) पञ्चविंशतिदेशेभ्यः आगतानि दलानि पराजितवती।

             'वोर्टेक्स् टेक्' (Vortex Tech) प्राणवायुं (Oxygen) निष्कास्य अग्निं शमयितुम् ३० हर्ट्ज् (Hertz)-ध्वनितरङ्गाणां प्रयोगं करोति।  प्रायः ११० अन्तर्राष्ट्रियप्रकल्पानां मध्ये स्पर्धां कृत्वा ISIF २०२६ स्पर्धायाम् आञ्जेला करीम् वेनेगास् हेर्नान्देस् (Angela Karime Venegas Hernández) स्वर्णपदकं जितवती। 'वोर्टेक्स् टेक्' (Vortex Tech) केवलम् एकम् आद्यप्ररूपम् (Prototype) अस्ति। व्यावहारिकप्रयोगात् पूर्वम् अस्य स्वतन्त्रपरीक्षणं प्रमाणीकरणञ्च आवश्यकम् अस्ति।

         ध्वनिः अग्निं शमयितुं शक्नोति। मेक्सिकोदेशस्य (Mexico) तामाउलीपास् (Tamaulipas)-राज्यस्य अल्तामीरा (Altamira)-नगरस्थ-CETis ७८-विद्यालयस्य (School) उच्चविद्यालयछात्रा आञ्जेला करीम् वेनेगास् हेर्नान्देस् (Angela Karime Venegas Hernández) निर्मितस्य 'वोर्टेक्स् टेक्' (Vortex Tech) अग्निशामक-आद्यप्ररूपस्य (Prototype) मूले अयमेव आश्चर्यजनकः सिद्धान्तः वर्तते।

 यू एस् मध्यकालीननिर्वाचनम्।

ट्रम्पस्य प्रत्याघातः। 

डमोक्राट् दलः अग्रे। 

डोनाल्ड ट्रम्पः। 

वाषिङ्टणः>  यू एस् राष्ट्रे उपरिसभा [Senate], जनप्रतिनिधिसभा इत्येनं सभाद्वयं प्रति सम्पन्ने मध्यकालीननिर्वाचने राष्ट्रपतेः डोनाल्ड ट्रम्पस्य महान् प्रत्याघातः। सभाद्वयस्यापि नियन्त्रणं विपक्षस्य डेमोक्राट्दलस्य अधीने आगच्छति। शतं स्थानेपु ५४ स्थानेषु डेमोक्राट्दलस्थानाशिनः अग्रगामिनः वर्तन्ते।

  ४३५ जनप्रतिनिधिसभासु २२८ स्थानेषु डेमोक्राट्दलस्थानाशिनः विजयीभूताः। राज्यपालेषु २८ संख्याकाः डमोक्राटीयाः विजिताः। २० स्थानेषु  ट्रम्पस्य दलीयाः विजिताः। ट्रम्पस्य सुरक्षितस्थानानि बहूनि विनष्टानि। आगामिवर्षद्वये शासनाय डोनाल्ड ट्रम्पः नितरां क्लेशिष्यते इति अभिज्ञाः वदन्ति।

 इराने पुनरपि यू एस् आक्रमणम्।

टेहरानं> अल्पकालीनविरामानन्तरम् इराने पुनरपि अमेरिकायाः आक्रमणम्। होर्मुस् समुद्रसङ्कोचतटे वर्तमानानि इरानस्य स्थानानि लक्ष्यीकृत्य ह्रस्वमाक्रमणं कृतमिति यू एस् सेनया निगदितम्। 

  इरानस्याधीने वर्तमाने खेषमद्वीपे, हेनगामद्वीपे, बन्दार् अब्बास् इत्यत्र च स्फोटनानि वृत्तान्तीकृतानि। यू एसे निर्वाचनाय होरासु अवशिष्टेषु आसीदिदम् आक्रमणम्।

 उदग्रयानसंघट्टनं - भारतीयः मृतः।

काठ्मण्डुः> समुद्रतलात् ४५०० कि मी उच्चस्थाने 'एवरस्ट् बेस् कैंप्' [Everest Base Camp] इत्यस्य समीपम् उदग्रयानद्वयसंघट्टनेन एकः भारतीयनागरिकः मृतः। मंगलवासरे प्रभाते नेपाले सोलुखुम्बु जनपदे आसीदियं दुर्घटना। ४७ वयस्कः वसन्तकुमार बालरामरामडुः एव मृतः। उदग्रयानचालकौ, इतरः कश्चन यात्रिकः न्यूसिलान्डमधिवसन् भारतीयवंशजः च क्षताः अभवन्। कति यात्रिकाः आसन्निति सूचना न लब्धा।

 यू एसे मध्यकालीननिर्वाचनम् अद्य।

वाषिङ्टणः> अमेरिकायाः राजनैतिकमण्डले निर्णायकं मध्यकालीननिर्वाचनं मंगलवासरे सम्पद्यते। राष्ट्रपतेः डोनाल्ड ट्रम्पस्य रिपब्लिकन् पार्टी, विपक्षः डेमोक्रेटिक् पार्टी इत्येतयोः प्रचरणस्य अन्तिमचरणं समाप्तम्। 

  जनप्रतिनिधिसभायाः सम्पूर्णस्थानेभ्यः (४३५),  सेनट् नामकसभायाः ३७ स्थानेभ्यः (आहत्य १००) च निर्वाचनं सम्पद्यते। एतदाभ्यन्तरे ५.४ कोटि जनाः स्वमतानि प्रकटितवन्तः सन्ति।

 आन्ध्रप्रदेशं लक्ष्यीकृत्य इतरः चक्रवातः समागच्छति।

केरले षट् जनपदेषु अद्य  वृष्टिसाध्यता।

अनन्तपुरी> अर्णबचक्रवातमनुगम्य 'मुरश्' इति कृतनामधेयः इतरः चक्रवातोSपि आन्ध्रप्रदेशं लक्ष्यीकृत्य रूपीकृतः अस्ति। वंगसमुद्रान्तराले चेन्नैतः ६३० कि मी पूर्वदक्षिणदिशि एव चक्रवातस्य उद्भवः। 

  सोमवासरे चक्रवातः तीव्रः भविष्यति। मंगलवासरे प्रत्युषसि १२० कि मी यावत् शीघ्रतां समार्ज्य आन्ध्रे नेल्लूर् नरसपुरम् इत्येतयोर्मध्ये स्थाने भूतलं समेष्यतीति पर्यावरणविभागेन निगदितम्। ओडीषा, आन्ध्रप्रदेशादि राज्येषु जागरूकता पालनीया।

  केरले मुरशचक्रवातस्य प्रभावेण बुधवासरपर्यन्तं वृष्टिसाध्यता प्रोक्ता अस्ति। अतः पालक्काट्, मलप्पुरं, कोष़िक्कोट्, वयनाट्, कण्णूर्, कासरगोड जनपदेषु  अद्य पीतजागरूकता उद्घोषिता।

 मेतिल् राधाकृष्णः एष़ुत्तच्छन् पुरस्कारेण समाद्रियते।

अनन्तपुरी> केरलसर्वकारस्य अस्य वर्षस्य  परमोच्चसाहित्यपुरस्कारः - एष़ुत्तच्छन् पुरस्कारः - सुविख्यातसाहित्यकाराय मेतिल् राधाकृष्णाय दीयते। सांस्कृतिकमन्त्री पि सि विष्णुनाथः पुरस्कारोद्घोषणं कृतवान्। 

  'अनन्येन लावण्यबोधेन धिषणाबलेन च मलयालसाहित्ये नवभावुकत्वं सृष्टवान् ग्रन्थकारो भवति मेतिल् राधाकृष्णः' इति विधिनिर्णयसमित्या निर्णीतम्। अस्मिन् मासे कोष़िक्कोट् समायोज्यमाने कार्यक्रमे पुरस्कारं प्रदास्यति।

 केरलम्।

राज्यस्तरीयविद्यालय कायिकोत्सवे तिरुवनन्तपुरं जनपदः सर्वाङ्गविजेता। 

अनन्तपुरीसंघस्य किरीटस्वीकरणम्। 

अत्लटिक्स् विभागे मलप्पुरं जनपदस्य त्रिक्रमिकविजयः; ऐडियल् विद्यालयः अत्लटिक्स् वीरः।

कोष़िक्कोट्> केरलस्य राज्यस्तरीयविद्यालय-कायिकोत्सवे अस्मिन् वर्षे अपि सर्वाङ्गविजेतृपदं [Overall Championship] तिरुवनन्तपुरं जनपदेन सम्प्राप्तम्। अनुस्यूततया तृतीयवारमेव अनन्तपुर्याः समग्रविजयप्राप्तिः। २२७ सुवर्णानि, १६० रजतानि, १७१ कांस्यानि इत्येवं क्रमेण २०१२.३ अङ्कान् सम्पाद्य एव अनन्तपुरस्य किरीटप्राप्तिः। ११७ पवन् इति भारयुतं सुवर्णचषकं शिक्षामन्त्री एन् षंसुदीनः अनन्तपुराय प्रदत्तवान्। तृश्शूर् मलप्पुरं जनपदौ यथाक्रमं द्वितीय तृतीयस्थानं प्रापतुः। 

  अत्लटिक्स् विभागे मलप्पुरं जनपदः त्रिक्रमिकविजयेन [Hattrick] किरीटं सम्प्राप। २०४.३ अङ्काः [१९ सुवर्णानि, २३ रजतानि, १९ कांस्यानि] मलप्पुरेण सम्प्राप्ताः। मलप्पुरं जनपदस्थः कटकश्शेरि ऐडियल् ई एछ् एस् एस् विद्यालयः अत्लटिक्स् विभागे किरीटं सम्प्राप।

महात्मगांधिनः प्रपौत्रस्य अमरीकास्थितस्य भूभागस्य पुनर्प्राप्तिः

 महात्मगांधिनः प्रपौत्रस्य अमरीकास्थितस्य भूभागस्य पुनर्प्राप्तिः

कनु गान्धी - (चित्रम् टी ओ ऐ)

     सूरत्>  ​गुजरातराज्यस्य सूरतनगरस्य निवासी परिमलदेशायीवर्यस्य विंशतिमासानां विधिक्रीडायाः साफल्येन महात्मगांधिनः प्रपौत्रस्य स्वर्गतस्य कनुगांधिनः तस्य पत्न्याः शिवागांधिनः च स्वामित्वे विद्यमानस्य वर्जीनिया (अमरीका) राज्यस्थितस्य ३० एकर् परिमितस्य भूभागस्य अनाधिकारक्रमणं दूरीकर्तुम् अमरीकीयायाः न्यायालयः आदेशं दत्तवान्। १९८७ तमे वर्षे क्रीतः एषः भूभागः गान्धिदम्पतीभ्यां संस्थापिताय धर्मार्थन्यासाय (Charitable Trust) समर्पितः आसीत्, यस्य प्रबन्धक-न्यासी परिमलदेशायीवर्यः अस्ति।

​१५ वर्षाणां प्रतिकूलाधिकारं (Adverse possession) स्वीकृत्य भूमेः स्वामित्वं दातुं ग्रेगोरी-ब्लैक्-नामकेन अमरीकीयनागरिकेन कृताः वादाः न्यायालयीयप्रमाणैः निरस्ताः। अक्टोबर् २१ दिनाङ्कस्य आदेशानुसारं वारेन्-कौण्टी-सर्किट्-न्यायालयस्य न्यायाधीशेन डारिल् एल्. फङ्क् वर्येण, भूमौ कृतानि अनधिकृतनिर्माणानि ३० दिनाभ्यन्तरे स्वकीयेन व्ययेन निष्कासयितुं, भूभागस्य आधिपत्यं न्यासाय समर्पयितुं च ग्रेगोरी-ब्लैक् इत्याख्यः निर्दिष्टः।

 जनसंख्यागणनस्य द्वितीयचरणं जनुवरिमासे।

नव दिल्ली> केरलमभिव्याप्य राज्येषु जनसंख्यागणनस्य द्वितीयचरणं जनुवरि २५ तमदिनाङ्के आरप्स्यते। फेब्रुवरि २८ तमे दिनाङ्के समाप्स्यते। प्रतिगृहं सदस्यानां संख्या, एकैकस्य सदस्यस्य व्यक्तिगतवृत्तान्तैः सह  सामाजिकार्थिकसूचनाः अपि संगृहिष्यन्ते। आहत्य ४० प्रश्नाः समाधेयाः भविष्यन्ति। जातिगणनमपि अस्मिन् चरणे सम्पत्स्यते।

  पूर्णतया डिजिटल् रूपेण भवति वृत्तान्तसंग्रहणम्। जनुवरि दशमदिनाङ्कतः २४ पर्यन्तं आत्मना एव वृत्तान्तसमर्पणाय [Self Enumeration] सुविधा अस्ति।

 प्रतिषेधप्रक्षोभेभ्यः विमुक्तिः।

जन्तरमन्तराय परं सांस्कृतिकपरिवेषः। 

'इन्डिया बिनाले' डिसम्बर् ४ तः आरभ्यते। 

जन्तरमन्तरम्। 

दिल्ली> इतःपर्यन्तं प्रतिषेध प्रक्षोभाणां वेदिकारूपेण ज्ञायमानं जन्तरमन्तरं परं कला-सांस्कृतिककार्यक्रमाणां वेदिका भविष्यति। 

डिसम्बर् चतुर्थदिनाङ्कादारभ्य १०८ दिनानि यावत् दीर्घ्यमानस्य 'इन्डिया बिनाले' प्रदर्शनस्य मुख्यवेदिकारूपेण जन्तरमन्तरं केन्द्र सांस्कृतिकविभागेन निश्चितम्। 

  राष्ट्रराजधान्यां बहुजनान्दोलनाय प्रतिषेधाय च बहुकालैः यावत् उपयुज्यमानमिदं स्थानं सप्ताहद्वयात्पूर्वं प्रतिषेधस्थानानाम् आवलीतः केन्द्रप्रशासनेन निष्कासितमासीत्।

  १७२४ तमे वर्षे जयपुरं महारेजेन सवाय् जयसिंह द्वितीयेन स्थापितं ज्योतिश्शास्त्रनिरीक्षणकेन्द्रमस्ति जन्तर मन्तरम्। सूर्यस्य ग्रहाणां च स्थानं निर्णेतुं सहायकानि १३ ज्योतिश्शास्त्र-वास्तुविद्या उपकरणानि अत्र विद्यन्ते। खगोलानि निरीक्षितुं ग्रहाणां चलनं सूक्ष्मतया प्रवक्तुं च एतैरुपकरणैः शक्यते। 

 सुपर् एल् निनो प्रभावात् भारते ५५ सहस्रजनानां मरणशङ्का

नवदेहली> २०२६ तमे वर्षे आगमिष्यन् 'सुपर् एल् नीनो' (Super El Niño) प्रभावः भारते अत्यधिकं उष्णतातरङ्गं वातावरणपरिवर्तनं च जनयिष्यति इति एकस्मिन् वृत्तान्ते स्पष्टीकृतम्। 'क्लाइमेट् इम्पाक्ट्  लाब्' (Climate Impact Lab) इत्यस्याः संस्थायाः अध्ययने एषा सूचना दत्ता अस्ति।

अस्य अध्ययनस्य अनुसारम्, अस्य प्रभावस्य तीव्रतया आगामि-मार्च्-मासाभ्यन्तरे भारते प्रायः ५५,००० जनानाम् उष्णतायाः कारणात् मृत्युः भवितुम् अर्हति। आगामिषु षट्सु मासेषु जगति ३.५ लक्षाधिकान् जनान् एषा उष्णता बाधिष्यते, यत्र भारतम् अत्यधिक-सङ्कटापन्नेषु देशेषु अन्यतमम् अस्ति।

अत्यधिक-तापमानेन बाह्यक्षेत्रेषु कार्यं कुर्वन्तः जनाः, शीतलीकरण-सुविधाहीनाः सामान्याः नागरिकाः च अधिकं सङ्कटं प्राप्स्यन्ति। अतः अस्याः वातावरण-विपदः निवारणाय पूर्वमेव सज्जता-सुरक्षा-उपायाः स्वीकरणीयाः इति एतेन अध्ययनेन सूच्यते।

 इस्रयेल् निर्वाचनं

नेतन्याहू सख्यम् अग्रे गच्छति। 

जरुसलेमः> इस्रयेले संसद् निर्वाचनस्य ८६% मतगणनायां समाप्तायां वर्तमानीनप्रधानमन्त्रिणा बञ्चमिन् नेतन्याहुना नीयमानं सख्यं ५३ स्थानानि स्वायत्तीचकार।  आहत्य १२० स्थानानि वर्तन्ते। 

  प्रमुखविपक्षसख्याय ४८ स्थानानि अलभन्त। अरबदलेभ्यः १९ स्थानानि लब्धानि। किन्तु  प्रशासनरूपीकरणाय अपेक्षितम् अङ्गबलं प्राप्तुं केनापि सख्येन न शक्यते स्म।

 'अर्णब्' भूतलमस्पृशत् - आन्ध्रे त्रीणि मरणानि।

ओडीषायां च अतिवृष्टिः। १.८ लक्षं जनाः सुरक्षितस्थानं नीताः।

नव दिल्ली> वंगसमुद्रान्तराले जातः न्यूनमर्दः 'अर्णब' नामकचक्रवातेन रूपान्तरं प्राप्य मंगलवासरे रात्रौ  भूतलस्पर्शमकरोत्। आन्ध्रप्रदेशे महानाशमजायत। त्रयः मृताः। उपद्विशतं गृहाणि विशीर्णानि। आन्ध्रे ओडीषायां च १.८ लक्षं जनाः सुरक्षितस्थानं नीताः।  

  झार्खण्डः, छत्तीसगढः, तेलङ्कानं, पुतुच्चेरी, आन्डमान्-निकोबार् प्रदेशेषु दुरन्तनिवारणसेना विन्यस्ता।

 महिला क्रिकट् परम्परा - भारतस्य सम्पूर्णविजयः।

वडोदरा> सिम्बाब्वें विरुध्य महिलानाम् एकदिनक्रिकटपरम्परायां भारतस्य सम्पूर्णविजयः।  अन्तिमे तृतीये च प्रतिद्वन्द्वे अष्ट द्वारकाणां विजय एव भारतेन प्राप्तः। प्राप्ताङ्कसूचिका - सिम्बाब्वे ३९.५ क्षेपणचक्रेषु १३१ धावनाङ्कान् सम्पाद्य सर्वे बहिर्नीताः। भारतं तु १७ क्षेपणचक्रेषु द्वारकद्वयस्य विनष्टेन १३३। पूर्वं टि-20 परम्परा अपि भारतेन प्राप्ता आसीत्।

 सप्तदशवयस्केन चालितेन कार् यानघट्टनेन कुटुम्बनाथस्य मृत्युः। 

चत्वारः आरक्षकाधिकारिणः विलम्बिताः।

दुर्घटनाविधेयं यानं, मृतः जयबालकृष्णः च। 

# कार् यानस्य पञ्जीकरणं विलम्बिष्यते।

# १७ वयस्कस्य २५ तमवयः पर्यन्तम् अनुज्ञप्तिपत्रनिरासः।

# पितुः अतिरिक्तन्यायाधीशस्य उपरि अपराधः विहितः।

कोच्ची> नगरप्रान्ते सप्तदशवयस्केन कृते कार् यानदुर्घटनाविषये सर्वकारनिर्देशानुसारं आरक्षकविभागेन कर्कशप्रक्रमाः विधत्ताः। दुर्घटनायाः प्राथमिकान्वेषणे हानिरजायत इति उन्नताधिकारिणः प्रतिवेदनस्य आधारे चत्वारः आरक्षकाधिकारिणः निलम्बिताः। चेरानल्लूर् आरक्षकनिस्थानस्य CI, SHO, ASI, CPO पदीयाः सन्ति सेवायाः विलम्बिताः। 

  कार् यानस्य पञ्जीकरणं निरस्तुं प्रक्रमः यन्त्र वाहन विभागेन आरब्धः। तथा च १७ वयस्कः कुमारः तस्य २५ तमवयःपर्यन्तं चालनानुज्ञप्तिपत्रस्य निरासाय विहितः। 

  यदि अपक्ववयस्कः यन्त्रयानं प्रचाल्य दुर्घटनां कारयति तर्हि यानस्वामी रक्षिता वा अपराधी भविष्यतीति नियमानुसरणेन कुमारस्य पितुः अतिरिक्तन्यायाधिपस्य उपरि अपराधः विहितः। 

  अतीते रविवासरे प्रत्युषसि आसीत् दुर्घटना। माञ्ञालि निवासी जयबालकृष्णः आसीत् मृतः। आरक्षकाणां कृत्यविलोपे कुटुम्बस्य बहुजनस्यापि प्रक्षोभः एव कर्कशप्रक्रमानां प्रेरणा।

 कर्णाटके अन्तिमा मतदानावलिः प्रकाशिता।

९९.३२ लक्षं नामानि अपसृतानि। 

बङ्गलुरु> कर्णाटकराज्ये तीव्र मतदानावलीपरिष्करणस्य [एस् ऐ आर्] अन्ते अन्तिमा मतदानावलिः प्रकाशिता। ४,५५,००,०११ जनाः आवल्यां विद्यन्ते। एस् ऐ आर् प्रक्रियायाः पूर्वं ५,५४,३२,३१४ मतदानिनः आसन्। ९९,३२,३०३ नामानि आवल्याः तिरस्कृतानि।

  किन्तु ये अन्तिमावल्यां नान्तर्भवन्ति, तेषां form-6 प्रकारेण अपेक्षां  समर्पयितुं शक्यते इति मुख्यनिर्वाचनाधिकारिणा निगदितम्।

 तमिलनाट्।

तेनि जनपदस्थात् कारागृहात् १७  बन्धनस्धाः पलायिताः।

१३ निगृहीताः। 

चेन्नै> तममिलनाटे आण्टिप्पट्टि तेक्कं पाट्टा इत्यत्र जनपदीयकारगृहात् १७ कारागृहवासिनः सोमवासरे रात्रौ रक्षां प्राप्ताः। तेषु १३ कारागृहवासिनः अन्वेषणे मंगलवासरे उषसि एव निगृहीताः। चतुर्णां कृते अन्वेषणं केरले अपि अनुवर्तते। घटनायां नव कारागृहाधिकारिणः पदेभ्यः अल्पकालीनतया अपसृताः।

  कपटज्वरम् अभिनीय कारागृहाधिकारिणः समाहूय तान् आक्रम्य आसीत् कारागृहवासिनां रक्षाप्राप्तिः।

 विद्यालयकायिकोत्सवः

अत्लटिक् स्पर्धाः अद्य आरभन्ते।

कोष़िक्कोट्> केरले राज्यस्तरीय विद्यालयकायिकोत्सवे अत्लटिक् स्पर्धाः मंगलवासरे आरभन्ते। एन् ऐ टि क्रीडाङ्कणस्य नूतने 'सिन्तटिक्' मार्गे एव स्पर्धाः। 

  अद्य १४ स्पर्धासु विधिनिर्णयः भविष्यति। नूतने मार्गे कायिकाभिलेख्याः अधिकतया भविष्यन्ति वा इत्याकांक्षायां सन्ति कायिकप्रेमिणः।

SIR decisions were unanimous, the Election Commission informed the Supreme Court; the Commission also stated that they have not amended 'Form 6'

 निर्वाचनायोगस्य स्पष्टीकरणम्: ' फोर्म्६' इत्यस्मिन् संशोधनं न कृतम् इति।

​निर्वाचनायोगेन सर्वोच्चन्यायालयं प्रति स्पष्टीकृतं यत् प्रथमवारं मतार्हनामावल्यां नामसमावेशनाय प्रयुज्यमाने समर्पणीयपत्रिका - 'फोर्म् ६' इत्यस्मिन् अस्मद्द्वारा न किमपि हानोपादानं कृतम् अस्ति इति। तस्मिन् तादृशं संस्करणं कर्तुं केवलं केन्द्रीयसरकारस्य एव अधिकार: अस्ति इति आयोगेन अवगतम्।

​विशेष-गहन-पुनरीक्षण-सम्बद्धा: (SIR) सर्वे निर्णया: मुख्य-निर्वाचन-आयुक्तेन ज्ञानेशकुमारेण अन्यै: निर्वाचन-आयुक्ताभ्यां च मिलित्वा सर्वसम्मत्या एव गृहीता:, न तु कश्चन व्यक्तिगतरूपेण निर्णय: कृतः इति आयोगेन अवबोधितम्।

​मूल-'फोर्म् ६' इत्यस्मिन् परिवर्तनं न कृतम्, अपितु केवलम् आवेदनेन सह प्रस्तुतस्य विशेष-घोषणापत्रस्य (Declaration) विषये एव चर्चा जाता, तत्तु 'फोर्म् ६' इत्यस्य संशोधनं न भवति इति आयोगेन प्रतिपादितम्।

​समाचारपत्राणां वार्तानाम् आधारेण एव याचिकाकर्तृभि: आरोप: कृत: इति कारणेन विधिदृष्ट्या समाचारपत्रवार्ता: प्रमाणरूपेण स्वीकार्य्यं न भवन्ति। अत: एता: याचिका: निरसनीया: इति आयोगेन सर्वोच्चन्यायालय: प्रार्थित:।

English|Hindi 📰 

 अपक्ववयस्केन चालितस्य कार् यानस्य घट्टनेन कुटुम्बनाथः मृतः।

दुर्घटनां कृतं कार् यानं।

कोच्ची> १७ वयस्केन न्यायाधिपुत्रेण चालितस्य  आडम्बरकार् यानस्य घट्टनेन द्विचक्रिकायात्रिकः कुटुम्बनाथः मृतः। एरणाकुलं जनपदे परवूर् निवासी जयबालकृष्णः [५५] एव हतभाग्यः। अपराधारोपिताय १७ वयस्काय मतिपुरःसररहितेन नरहत्यापराधं प्रकल्य प्रातिभाव्यं दत्तमपि प्रतिषेधे शक्ते आरक्षकैः  नरहत्यापराधः स्थापितः।

मृतः जयबालकृष्णः।

  एरणाकुलं चेरानल्लूर् 'कण्टयिनर् मार्गे' रविवासरे प्रत्युषसि द्विवादने आसीत् दुर्घटना। नगरप्रान्ते चिटूर् इत्यत्र चायापणिकः अस्ति हतभाग्यः जयबालकृष्णः। आपणं पिधाय स्वगृहं प्रत्यागच्छन्नासीत्। कार् यानस्य स्वामी कश्चन अतिरिक्तन्यायाधीशः  (Additional Judge) अस्ति। तस्य १५ वयस्कः पुत्रः एकेन कार् यानं चालितवानासीत्। रक्षितारः अज्ञात्वा गुप्तेन यानचालनाय प्रस्थितवान्। 

 यानचालनाय अनुज्ञापत्राय [License] पर्याप्तं वयः येषां नास्ति तादृशाः यानचालनेन दुर्घटनाः जनयति इति विषयः आशङ्कां जनयति।

 फ्रान्से बहुजनानां वीथीप्रतिषेधः। 

पारीसः> वर्धमानजीवितव्ययं विरुध्य प्रतिषेधाय सहस्रशः जनाः पुनरपि राष्ट्रस्य विभिन्नप्रदेशेषु वीथिषु सम्मिलितवन्तः। प्रक्षोभकान् विसर्जयितुं आरक्षकसेनया 'अश्रुजनकवायुः' [Tear gas] प्रयुक्तः। १३० तः अधिके जनाः विभिन्नस्थानेभ्यः निगृहीताः।

 हरिद्वारे अष्टादश संस्कृतमहोत्सवस्य राज्यस्तरीयायाः संस्कृतस्पर्धायाः समापनम्, विजेतृछात्रेभ्यः पुरस्कारवितरणम् च सम्पन्नम्।

संस्कृतस्य प्रचारप्रसाराय सर्वकारः व्यापकस्तरे कार्यं करोति — मदनकौशिकः

        हरिद्वारम्> उत्तराखण्डसंस्कृतसंस्थानेन (उत्तराखण्डसर्वकारः), हरिद्वारद्वारा आयोजितस्य अष्टादशस्य संस्कृतमहोत्सवस्य अन्तर्गतं राज्यस्तरीयायाः संस्कृतस्पर्धायाः (२०२६–२७) द्वितीयदिने विविधासु स्पर्धासु समापनसमारोहः पुरस्कारवितरणकार्यक्रमश्च हरिद्वारस्य भूपतवालास्थिते महाजनभवने सम्पन्नः। कार्यक्रमस्य शुभारम्भः सर्वैः अतिथिभिः दीपप्रज्वालनेन कृतः।

        उत्तराखण्डसंस्कृतसंस्थानस्य उपाध्यक्षः डॉ. नवीनचन्द्रपन्तः, संस्थानस्य सचिवः मुख्यसमन्वयकश्च प्रो. विनयकुमारविद्यालङ्कारः, वित्ताधिकारिणी मायादेवी तथा शोधाधिकारी राज्यसमन्वयकश्च डॉ. हरीशचन्द्रगुरुराणी इत्येते संयुक्तरूपेण मञ्चासीनानाम् अतिथीनां माल्यार्पणेन स्मृतिचिह्नप्रदानेन च स्वागतं कृतवन्तः।

 तन्त्रविद्यापीठे आचार्यपुरस्काराः समर्पिताः।

सि जि विजयकुमारः संस्कृतपुरस्कारेण सम्मानितः।

तन्त्ररत्नबिरुदानि प्रदत्तानि।

डो सि जि विजयकुमारः संस्कृतपुरस्कारं स्वीकरोति।

आलुवा> तन्त्रविद्यापीठस्य अस्य संवत्सरस्य आचार्यपुरस्काराः प्रौढे कार्यक्रमे समर्पिताः। 'मार्गदर्शकमण्डलं' सभायाः राज्यस्तरीयसचिवमुख्यः सत्स्वरूपानन्द सरस्वति स्वामिनः पुरस्कृतान् विशिष्टान् आदृतवन्तः। 'कोचिन् षिप् यार्ड्' संस्थायाः भूतपूर्वाध्यक्षः मधु एस् नायर् एकैकस्य कृते प्रशंसापत्रं पुरस्कारफलकं च समार्पयत्।

 तन्त्रशास्त्रमण्डले दीयमानः तान्त्रिकाचार्यः ब्रह्मश्री 'कल्पुष़ा दिवाकरन् नम्पूतिरि' स्मारक आचार्यपुरस्काराय ब्रह्मश्री पुटयूर् पाण्डुरङ्गन् नम्पूतिरि महाभागः अर्हः अभवत्।

ब्रह्मश्री वेष़प्परम्प परमेश्वरन् नम्पूतिरि महाभागस्य नाम्नि वैदिक संस्कृतिक्षेत्रे दीयमानः आचार्यपुरस्कारः कोम्पङ्कुलं विष्णु अक्कित्तिरिप्पाट्' वर्याय समार्पयत्। कालटी श्रीशंकराचार्य संस्कृतविश्वविद्यालयस्य पय्यन्नूर् प्रादेशिककेन्द्रे व्याकरणविभाध्यक्षः भवति विष्णु वर्यः। 

  संस्कृत भाषाप्रचारणाय दीयमानं ब्रह्मश्री के पि सि नारायणन् भट्टतिरिप्पाट् स्मारकाचार्यपुरस्कारं संस्कृतपण्डितः डो सि जि विजयकुमारः स्वीकृतवान्।  उज्जयिनीस्थ महर्षि पाणिनि संस्कृत विश्वविद्यालयस्य भूतपूर्वः कुलपतिः अस्ति विजयकुमारवर्यः। दशाब्दैः संस्कृतभाषायाः प्रचारणाय (मुख्यतया संस्कृतभारतीद्वारा) अकादमिकाभिवृद्धये च दत्तं सुदीर्घां सेवां पुरस्कृत्य अस्ति तस्मै पुरस्कारः। 

 २०२५ तमे वर्षे अध्ययनं   पूर्णतामेत्य उत्तीर्णेभ्यः पञ्चभ्यः युवकाचार्येभ्यः तन्त्ररत्नं, वेदविभूषणं, आचार्य [संस्कृत साहित्यं] इत्येतानि बिरुदानि च प्रदत्तानि।

 केरले वृष्टिः तीव्रायते।

अद्य त्रिषु जनपदेषु रक्तजागरूकता; अनध्ययनम्। 

अनन्तपुरी> केरलराज्ये अनुवर्तमाना वृष्टिः तीव्रायते इति केन्द्र ऋतु विज्ञीनीय विभागेन निगदितम्। कोष़िक्कोट्, वयनाट्, मलप्पुरं जनपदेषु रविवासरे रक्तजागरूकता उद्घोषिता। एषु जनपदेषु 'मद्रसा', निजीयशिक्षास्थानानि अभिव्याप्य अनध्ययनं विज्ञापितम्। 

  पत्तनंतिट्टा, कोट्टयं, कण्णूर्, पालक्काट्, एरणाकुलं तृश्शूर् जनपदेषु ओरञ्जजागरूकता घोषिता। इतरेषु पीतजागरूकता अस्ति।

 यमनतीरे लग्नाः उल्लासनौकास्थाः सर्वे भारतीयाः सुरक्षिताः।

दुबाय्> यमने समुद्रतीरसमीपे लग्नायाम् उल्लासनौकायां वर्तमानाः १४ भारतीययात्रिकाः अपि सुरक्षिताः इति भारतीयस्थानपतिकार्यालयेन निगदितम्। एते इदानीं यमने होदैदाप्रदेशे वर्तन्ते, तेषां क्षेमाय प्रवर्तनानि आयोज्यन्ते इति च कार्यालयेन स्पष्टीकृतम्।

  रक्तसमुद्रे यूखार् द्वीपसमीपे सौदीसेनया भारतस्य उल्लासनौका आक्रान्ता इति हूतिवक्त्रा आरोपितमासीत्। नौकास्थाः १४ भारतीयाः  अस्माभिरेव रक्षिताः इति ते अभिमानितवन्तः च। किन्तु घटनापृष्ठतः वर्तमानं वास्तविकं किमिति  स्पष्टीकरणीयमिति  कार्यालयेन निगदितम्।

 पैतृकसंरक्षणमालक्ष्य भारताय कर्म कर्तव्यम् - मधु एस् नायर्। 

कल्पुष़ा दिवाकरन् नम्पूतिरि जयन्तिसम्मेलनं सम्पन्नम्।

आचार्यस्मृतिमेलनं मधु एस् नायर् उद्घाटयति।

आलुवा> आलुवा तन्त्रविद्यापीठस्य स्थापकाचार्यः तन्त्रशास्त्रविशारदः तन्त्रशास्त्रबृहस्पतिः स्वर्गीयः ब्रह्मश्री कल्पुष़ा दिवाकरन् नम्पूतिरिप्पाट्  इत्यस्य ११३तमं जन्मदिनं विविधैः कार्यक्रमैः समामानितम्। आचार्यस्मृतिसम्मेलनस्य उद्घाटनं  कोच्चि महानौकाश्रयस्य (Cochin Ship Yard) भूतपूर्वः प्रबन्धनिदेशकः [Managing Director] एवम् अध्यक्षश्च मधु एस् नायर् कृतवान्। 

  विवेकानन्दस्वामिनः सूक्तैः भारतीयपैतृकं संस्मारितवान् मधुवर्यः अस्माकं पैतृकसंरक्षणं मुख्यतया लक्ष्यीकृत्य राष्ट्रसेवानिर्भरं कर्म कर्तव्यमिति सदस्यान् उद्बोधयामास। "स्वधर्मं निधनं श्रेयः" इत्यार्षवचनस्य माहात्म्यं वृत्तिमण्डले संस्थापयितव्यमिति सः उद्बोधितवान्। 

  मार्गदर्शक मण्डलस्य राज्यस्तरीयकार्यदर्शिप्रमुखः सत्स्वरूपानन्द सरस्वति स्वामिनः अनुग्रहभाषणमकरोत्। अन्त्यजाग्रजभेदभावनां विना समाजहिताय तन्त्रशास्त्रम् अध्येतव्यमिति सः अवोचत्। ब्राह्मण्यं कर्मणैव प्राप्तव्यमिति 'जन्मना जायते शूद्रः' इति सूक्तं व्याख्याय स्वामी उद्बोधयामास।

 तन्त्रविद्यापीठस्य उपप्राचार्यः एवं कल्पुष़ा आचार्यस्य वत्सलशिष्यः च ब्रह्मश्री चेङ्ङोत्त् श्रीनिवासन् पोट्टी आचार्यम् अनुस्मृतवान्। यतिसमानजीवनं नीतवान् कर्मयोगी आसीत् कल्पुष़ा दिवाकरन् नम्पूतिरिप्पाट् महाशयः इति तस्य जीवनरीतिं प्रस्तूय श्रीनिवासवर्यः उक्तवान्। 

  शबरिगिरि धर्मशास्तृमन्दिरस्य तथा मालिकप्पुरं मन्दिरस्य च नियुक्तमुख्यार्चकयोः सान्निध्यमपि जयन्तिदिनस्य शोभां प्रावर्धत। तन्त्रविद्यापीठस्य मुख्यरक्षाधिकारिणः प्रोफ पि एम् गोपिवर्यस्य आध्यक्षे  आयोजिते सम्मेलने विद्यापीठस्य कार्यदर्शी एम् पि सुब्रह्मण्य शर्मा स्वागतभाषणं, क्रियाध्यक्षः एन् बालमुरलिः कृतज्ञतावचनं चाकरोत्।

 Latest news Latest news

 ओम् प्रकाश माथुरः शपथं कृतवान्।

ओ पि माथुरः शपथवाचनं करोति। 

अनन्तपुरी> केरलस्य २९ तम राज्यपालरूपेण ओम् प्रकाश माथुरः शपथवाचनं कृतवान्। लोकभवने सम्पन्ने कार्यक्रमे उच्चन्यायालयस्य मुख्यन्यायाधिपः न्यायाधीशः सौमन सेनः शपथमकारयत्। राज्यपालनियुक्तिरूपः राष्ट्रपतेः आदेशः राज्यस्य मुख्यसचिवेन विश्वनाथ सिन्हेन वाचितः।

  सिक्किमस्य मुख्यमन्त्री प्रेम सिंह तमाङः विशिष्टातिथिः आसीत्। सिक्किमस्य राज्यपालः आसीत् राजस्थाने पाली जनपदीयः  माथुरवर्यः। 

  कार्यक्रमे मुख्यमन्त्री वी डी सतीशः, सभापतिः तिरुवञ्चियूर् राधाकृष्णः, इतरे मन्त्रिणः, संसद् सदस्याः, विधानसभासामाजिकाः इत्यादयः भागं कृतवन्तः।

 अरुणाचले भारत-चीनसंघर्षः।

नव दिल्ली> अरुणाचलप्रदेशे एल् ए सि इति यथार्थनियन्त्रणरेखायां भारतचीनयोर्मिथः पुनरपि संघर्षः। जूलाय् मासादारभ्य अत्र विविधस्थानेषु संघर्षः प्रचलन्नस्तीति भारत-टिबट् सीमारक्षकदलस्य [ITBP] निदेशकमुख्यः शत्रुजित कपूरेण स्पष्टीकृतम्।।

  पूर्वीयसीमायाः संघर्षावस्थामधिकृत्य प्रथमम् आधिकारिकदृढीकरणं भवति शत्रुजित कपूरस्य प्रस्तावः। सेनायाः सांवत्सरीये अनुमोदनकार्यक्रमे आसीदयं निर्णायकप्रस्तावः।

 केरलम्। 

राज्यस्तरीय विद्यालयकायिकोत्सवः २५ दिनाङ्कतः।

कुट्टुः 

कोष़िक्कोट्> केरलराज्यस्य ६८ तमः विद्यालयीयकायिकोत्सवः ओक्टोबर् २५ तमदिनाङ्कादारभ्य ३१ दिनाङ्कपर्यन्तं कोष़िक्कोट् जनपदे सम्पत्स्यति। १ संवत्सरेभ्यः परमेव कोष़िक्कोट् जनपदस्य आतिथेयत्वम्। 

  एन् ऐ टि संस्थायाः क्रीडाङ्कणं मुख्यवेदी भविष्यति। जनपदे विभिन्नस्थानेषु दश वेदिकाः कायिकोत्सवाय चिताः सन्ति। 

  २४ तमे सायं चतुर्वादने मुख्यमन्त्री वी डी सतीशः कायिकमेलायाः उद्घाटनं करिष्यति। ओलिम्प्यन् पी टी उषा दीपशिखाप्रोज्वलनं करिष्यति। १४ जनपदेभ्यः कायिकताराणि, परिशीलकाः, उद्योगस्थाश्च १५,००० जनाः भागं करिष्यन्ति। 'कुट्टु' नामकः कलभ अस्ति भाग्यचिह्नम्।