नरेन्द्रमोदिने इन्डोनेष्यायां  हृद्यं स्वीकरणम्। 

मोदिनं इन्डोनेष्यायाः राष्ट्रपतिः स्वीकरोति। मोदिनः विमानं इन्डोनेष्यायुद्धविमानानि अनुगच्छन्ति। 

जकार्ता> त्रिराष्ट्रसन्दर्शनस्य अंशतया सोमवासरे इन्डोनेष्यां प्राप्तवन्तं भारतस्य प्रधानमन्त्रिणं नरेन्द्र मोदिनम् इन्डोनेष्यायाः राष्ट्रपतिः प्रबोवो सुबियान्तो वर्यः विमाननिलयं प्राप्य स्वीकृतवान्। तत्र सन्निहितस्य भारतीयजनसञ्चयस्य कण्ठेभ्यः "भारतमाता की जय्" "मोदी मोदी--" आह्वानानि उद्गतानि। इन्डोनेष्यायाः परम्परागतकलारूपाणि मोदिनः स्वीकरणार्थं सज्जीकृतानि आसन्। यदा नरेन्द्र मोदिनः विमानं इन्डोनेष्यायाः व्योमसीमां प्राविशत् ततः आरभ्य इन्डोनेष्यायाः युद्धविमानानि अन्वगच्छन् च।

 अयोध्या धनापहरणम्।

चम्पत्त रायिनः त्यागपत्रं स्वीकृतम्।

अयोध्या> अयोध्या राममन्दिरे भक्तजनैः समर्पितानां धनराशेः अपहरणविषयमालक्ष्य समर्पितं, मन्दिरपरिपालनन्यासस्य मुख्यकार्यदर्शिनः चम्पत्त रायिनः तथा न्याससदस्यः अनिल मिश्रा इत्यस्य च त्यागपत्रं  सोमवासरे सम्पन्ने न्यासोपवेशने अङ्गीकृतम्। न्यासाध्यक्षस्य नित्यगोपालदासस्य आध्यक्षे सम्पन्ने उपवेशने नव स्थिरसदस्याः भागं ग्रहीतवन्तः।

 चरितम् अनुवृत्य नोर्वे। 

 ब्रसीलं प्रभञ्ज्य चतुर्थांशे। 

एर्लिङ् हालण्टः। 

न्यूयोर्क्> गतरात्रौ न्यू जर्सी क्रीडाङ्कणे सम्पन्ने षोडशगणीयचक्रस्य अन्यतमे प्रतिद्वन्द्वे पञ्चवारं विश्वचषकवीरतापदं प्राप्तवन्तं ब्रसीलगणं १ - २ इति लक्ष्यप्रकारे प्रभञ्ज्य नोर्वे चतुर्थांशचक्रं प्राविशत्। नोर्वेगणस्य श्रेष्ठक्रीडकस्य 'एर्लिङ् हालण्ट'स्य लक्ष्ययुगलमेव नोर्वेविजयस्य आधारः। स्थानेतरादेशत्वेन आगतस्य नेय्मरस्य लक्ष्यमासीत् ब्रसीलस्य समाश्वासः। परस्परस्पर्धाचरित्रे अद्यावधि नोर्वेदलं पराजापयितुं ब्रसीलः न शशाक। 

  क्रीडायाः प्रथमार्धे उभाभ्यामपि दलाभ्यां सविक्रमक्रीडा प्रदर्शिता अपि लक्ष्यजालं न कम्पितम्। १३ तमे ब्रसीलस्य दौर्भाग्यः आरब्धः। ब्रसीलानुकूलाय लब्धः दण्डप्रहारः ब्रूणो गिमारसेन कृतोSपि नोर्वेदलस्य लक्ष्यरक्षकेण और्जन् नेय्लान्ट् इत्येषः  उत्प्लुत्य रक्षितवान्। विश्वचषकस्य चरित्रे ४० वर्षाणामाभ्यन्तरे प्रथमा दण्डप्रहारनिष्फलता!

  द्वितीयार्धे अन्यस्थानीयेन आगतः नोर्वे क्रीडकः आन्ड्रियास् षेन् ड्रूपः क्रीडागतिं परिवर्तितवान्। तस्य साहाय्येन नोर्वेदलस्य सविक्रमक्रीडकः एर्लिंग हालण्टः ७९, ८९ निमिषद्वेये अत्युज्वलं लक्ष्यद्वयं सम्प्राप्तवान्। अनेन हालण्टः अस्मिन् विश्वचषके सप्त लक्ष्याणि सम्पाद्य मेसी, एम्बापे वर्ययोः समशीर्षः जातः। नोर्वे २-० इति अग्रे। 

  ६९ तमे निमिषे अन्यस्थानीयेन आगतः ब्रसीलस्य श्रेष्ठक्रीडकः नेय्मरः ९०+९तमे  निमिषे लब्धेन दण्डप्रहारेण लक्ष्यमवाप्तः अपि स्वदलं रक्षितुं तन्नपर्यप्तमभवत्। ब्रसीलस्य दौर्भाग्यं पूर्णं जातम्।

क्रीडान्त्ये क्रीडाङ्कणे पराजयेन विलपन् नेय्मरः।

 येमने हूतयः १४ सैनिकान् जघ्नुः। 

एडन्> येमनराष्ट्रे आधिकारिकसर्वकारस्य सैन्यस्य १५ भटाः हूतिनामकसायुधसंघस्य आक्रमणे हताः। 'होदैदा'नगरसमीपं हय्स् जनपदस्थे जबल् दुबास् इत्यत्र आसीत् आक्रमणम्। २३ सैनिकाः संघट्टने व्रणिताः। समीपकाले यमने वृत्तं अतीवरक्तरूषिताक्रमणम् अस्त्येतत् इति ए एफ् पि इति वार्तासंस्थया वृत्तान्तीकृतम्।

 फ्रान्सः चतुर्थांशे; प्रतिद्वन्द्वी मोरोक्को।

लक्ष्यसम्पादने एम्बाप्पे मेसेः समः।

किलियन् एम्बापे। 

डालस्> पराग्वे दलीयानां शारीरिकप्रहराणि, ३९ डिग्री तापं चातिक्रम्य फ्रान्सः प्रतियोगिनं १-० इति लक्ष्यक्रमेण पराजित्य विश्वचषकपादकन्दुकस्पर्धायाः चतुर्थांशचक्रं प्राविशत्। ७० तमे निमिषे लब्धं दण्डप्रहारं [Penalty kick] जालं प्रवेशितवान्  नायकः किलियन् एम्बाप्पे एव फ्रान्सस्य विजयशिल्पी। 

  अस्मिन् विश्वचषके एम्बाप्पेवर्यस्य सप्तमं लक्ष्यकन्दुकम् अस्तीदम्। अनेन लक्ष्यसंग्रहणे लयोलण् मेसेः समः अभवत्। आहत्य विश्वचषकलक्ष्येषु १९ संख्याकं प्राप्य मेसेः लक्ष्यैकस्मात्  पृष्ठतः अस्ति। षट्भिः  विश्वचषकैः   अस्ति मेसीवर्यस्य २० लक्ष्यप्राप्तिः। किन्तु २७ वयस्कः एम्बाप्पे त्रिभिः विश्वचषकैः १९ लक्ष्याणि सम्पादितवान्।

 केरले तीव्रवृष्टिः भविष्यति।

अनन्तपुरी> केरले कोष़िक्कोट्, कण्णूर्, कासरगोड् जनपदेषु अतितीव्रवृष्टिः स्यादिति केन्द्रीय ऋतुविज्ञानीयविभागेन निगदितम्। अतः एषु जनपदेषु सोमवासरे मङ्गलवासरे च ओरञ्जजागरूकता घोषिता। इतरेषु जनपदेषु पीतजागरूकता निर्दिष्टा। नवमदिनाङ्कपर्यन्तम् आकेरलं महती वृष्टिः भविष्यति।

 अयोध्यासमर्पितधनापहरणम्।

निर्णायकोपवेशनं श्वः। 

अयोध्या> राममन्दिरे भक्तजनैः समर्पितानां सुवर्ण-रजत-मुद्रादिधनानाम् अपहरणविवादस्य आधारे श्रीराम जन्मभूमितीर्थ मन्दिरपालनन्यासस्य [Temple Trust] प्रथमोपवेशनं सोमवासरे अपराह्णे त्रिवादने सम्पत्स्यते। न्यासाध्यक्षस्य महन्त् गोपाल दासस्य आश्रमे अस्ति उपवेशनम्। 

  पञ्चसंख्याकानि प्रकरणानि चर्चिष्यन्ते। पूर्वीयकार्यदर्शिप्रमुखः चम्पत् रायि, पूर्वसदस्यः अनिल मिश्रः  इत्यनयोः  स्थानत्यागपत्रमधिकृत्य भवेत् प्रथमा चर्चा। 

  राममन्दिरस्य शासननिर्वहणस्य कार्यक्षमता, २०२५-२६ वर्षस्य आयव्ययानाम् अवलोकनम् इत्यादीनि चर्च्यविषयेषु सन्ति।

 नरेन्द्रमोदिनः त्रिराष्ट्रसन्दर्शनं श्वः आरभ्यते। 

नवदिल्ली> राष्ट्रसुरक्षा, व्यापारः, समुद्रसुरक्षा इत्यादिषु भारतेन सह सहयोगं लक्ष्यीकृत्य प्रधानमन्त्री नरेन्द्र मोदी इन्डोनेष्या, आस्ट्रेलिया, न्यूसिलान्टः इत्येतानि राष्ट्राणि सम्पश्यति। जूलाय् षष्ठदिनाङ्कतः ११ तमदिनाङ्कपर्यन्तमेव सन्दर्शनम्। 

  ४० वर्षेभ्यः परमेव कश्चन भारतप्रधानमन्त्री न्यूसिलान्टं सम्पश्यति।

 भारत-इङ्लाण्ट् टि-२० परम्परा।

भारतस्य पराजयः। 

सूर्यवंशिनः प्रथमक्रीडा। 

माञ्चस्टर्> अन्ताराष्ट्रक्रिकट्स्पर्धायां भारताय क्रीड्यमानः न्यूनतमवयस्कः इति प्रशोभया वैभव सूर्यवंशी क्रीडितवानपि  भारतम् इङ्लाण्टेन  पराजितम्। द्वितीये टि-२० प्रतिद्वन्द्वे चतुर्भिः द्वारकैः आसीत् भारतस्य पराजयः। 

  प्रथमं कन्दुकताडनं कृतवान् भारतगणः २० क्षेपणचक्रेषु सप्त ताडकानां विनष्टे १९० धावनाङ्कान् सम्पादयामास। इदंप्रथमतया भारतस्य क्रीडावसनं धृत्वा सञ्जू सांसणस्य स्थाने प्रारम्भताडनं कृतवान् वैभव सूर्यवंशी १० कन्दुकेभ्यः १४ धावनाङ्कान् सम्पाद्य बहिर्नीतः। तस्य प्रकटने षट्कद्वयमासीत्। अनन्तरं नायकः श्रेयस् अय्यरः (३७ धावनाङ्काः), इषान किषनः (४९), अभिषेक शर्मा (४३) च भारतस्य प्रमुखाः सम्पादकाः। किन्तु प्रत्त्युत्तरक्रीडायाम् इङ्लाण्टः जेकब् बतलः (७६*), हारी ब्रूकः (३९),टों बान्टणः (३९) इत्येतेषाम् अतुल्यविक्रमे विजयलक्ष्यं प्राप।

 भारतीयक्रिकट् नभोमण्डले नूतनसूर्योदयः। 

वैभव सूर्यवंशी भारताय प्रथमतः क्रीडितवान्।

वैभव सूर्यवंशी । 

सच्चिन् टेण्डुल्करस्य कीर्तिमानम् अतिक्रान्तम्। 

माञ्चस्टर्> भारतीयवरिष्ठक्रिकट्गणस्य परं नूतनः ऊर्जवैभवः। अन्ताराष्ट्र क्रिकट् स्पर्धासु भारताय प्रथमतया क्रीडन् न्यूनतमवयस्कः इति प्रशस्तिः कौमारतारे वैभवसूर्यवंशिनौ प्रतिष्ठाप्यते। शनिवासरे माञ्चस्टर् क्रीडाङ्कणे इंगलान्टं विरुध्य सम्पन्ने द्वितीये टि-२० प्रतिद्वन्द्वे क्रीडितवान्। 

  १५ वर्षाणि ९९ दिनानि चास्ति सूर्यवंशेः वयः। १९८९ तमे वर्षे पाकिस्थानं विरुध्य निकषस्पर्धायां  सच्चिन् टेण्डुल्करे इदंप्रथमतया क्रीडिते तस्य वयः १६ वर्षाणि २०५ दिनानि चासीत्। 

  अन्ताराष्ट्र क्रिकट् समित्याः [ICC] पूर्णसदस्यत्वोपेतराष्ट्रेभ्यः इदंप्राथम्येन क्रीडन् कनिष्ठतमः द्वितीयो भवति वैभव सूर्यवंशी। पाकिस्थानस्य हसन् रासाभिधेयः भवति प्रथमस्थानीयः। तदा तस्य वयः १४ वर्षाणि २२७ दिनानि चासीत्। बिहारे तेजपुरं निवासीयस्य सूर्यवंशिनः अतीते ऐ पि एल् स्पर्धासु वैभवः एव राष्ट्रीयगणप्रवेशाय मार्गः अभवत्।

 मोरोको चतुर्धांशे। 

टेक्सस्> फिफा विश्वचषकस्य प्रथमे प्रचतुर्धांशप्रतिद्वन्द्वे आतिथेयं कानडादलं पराजित्य मोरोको चतुर्धांशं प्राविशत्। उत्तररहितेन लक्ष्यकन्दुकत्रयेण अस्ति मोरोकोदलस्य विजयः। असदीन् उनाहि नामकः लक्ष्यद्वयं प्राप्तवान्। सूफियाने रहीमि नामकः तृतीयं लक्ष्यं प्राप्तवान् च।

 फिफा विश्वचषकः।

प्रचतुर्धांशचक्रम् अद्य आरभ्यते। 

प्रथमस्पर्धायां कानडा - मोरोको। 

टेक्सस्> विश्वचषकपादकन्दुकं पूर्वचतुर्धांशस्य उत्साहं प्रविशते। ४८ स्पर्धागणाः २६ गणा इति आकुञ्चति। 

  प्रथमप्रतिद्वन्द्वे आतिथेयराष्ट्रं कानडा मोरोको प्रति स्पर्धते। शनिवासरे रात्रौ १०. ३० वादने अस्ति स्पर्धा। रविवासरे प्रत्युषसि २. ३० वादने फ्रान्सः पराग्वेदलं प्रति द्वन्द्वते।

 अयोध्यामन्दिरधनापहरणम्।

अपहरणदृश्यानि बहिरागतानि। 

नवदिल्ली> उत्तरप्रदेशे अयोध्यायां रामलल्लामन्दिरे समर्पणराशिम् अपह्रियमाणानि सि सि टि वी दृश्यानि अन्वेषणसंस्थया अधिगतानि। तानि बहिरागतानि च। 

  सविशेषान्वेषणसंस्थया [एस् ऐ टि] निगृहीतेषु अष्ट जनेषु पञ्च, भण्डारराशेः गणनावसरे धनं तेषां वसनेषु पादावरणेषु निलीय संस्थापनस्य दृश्यानि अधिगतानि। राममन्दिरात् २०० मीटर् मितं दूरे वर्तमानस्य समर्पितधनगणनकेन्द्रस्य  - नाम्ना Pilgrim Facilitation Centre - ४५ दिनानां सि सी टि वि दृश्यानि एव परिशोधितानि। निगृहीतैः व्यवहृतेषु स्थानेषु कृते परिशोधने आरक्षकैः मुद्राभाण्डानि अधिगतानि। निगृहीतात् अविनाश् शुक्ला इत्यस्मात् २०. ३९ लक्षं, करुणेश पाण्डे इत्यस्मात् १८. ०७ लक्षं, अनुकल्प मिश्रात् १६. ८२ लक्षं, लवकुश मिश्रात् १४. २५ लक्षं राम शंकर मिश्रात् ७. ३२ लक्षं चम्पत् रायि इत्यस्य यानचालकात् रामशंकरयादवात् एकलक्षं च रूप्यकाणि - इत्यस्ति अधिगतसंख्यानां विवरणम्। एतदतिरिच्य ११ ग्राम् मितं सुवर्णं, ३७४ ग्रां रजतं, ११२१ यू एस् डोलराणि च गृहीतानि।

 आयत्तुल्ला खमेनीवर्यस्य अन्त्यशुश्रूषाः अद्य आरभ्यते। 

आयत्तुल्ला खमेनी। 

दुबाय्> पश्चिमेष्यायुद्धस्य प्रथमदिने यू एस्-इस्रयेलाभ्यां हतः इरानस्य परमोच्चात्मीयनेता आयत्तुल्ला खमेनी इत्यस्य अन्त्यकर्माणि शनिवासरे आरभ्यते। संस्कारशुश्रूषाकार्यक्रमाः षट् दिनानि सन्ति। 

  इरानस्य राजधानीनगरे टेहराने खोमनगरे इराखस्थे कर्बलाप्रदेशे च खमीनेः मृतदेहं वहन्ती विलापयात्रा सम्पत्स्यते। इरानस्थे मषदनामके जन्मनगरे भवेत् तस्य अन्त्यविश्रान्तिः। 

 खमेनीवधानन्तरं युद्धं तीव्रं जातं कालदैर्घ्यं चाभवदित्यतः एव अन्त्यकर्मसु विलम्बो जातः।

 किन्तु खमीनेः अन्त्यश्रूषाकार्यक्रमेषु तस्य पुत्रः तथा वर्तमानीनः परमोच्चनेता च आयत्तुल्ला मोज्ताबा खमेनी न भागं करिष्यति। इस्रयेलस्य वधभीषां सुरक्षाकार्ये आशङ्कां चालक्ष्य एवायं निर्णय इति इरानीयपरमोच्चनेतुः भारतप्रतिनिधिः आयत्तुल्ला हक्कीम् इलाही इत्यनेन निगदितम्।

 फिफा विश्वचषकः।

केप वर्दे साभिमानं     पराजितम्।

स्वेदनिस्रावणेन अर्जेन्टीना प्रचतुर्धांशचक्रे।

मियामी> अत्यन्तमुत्साहोज्वले आकाङ्क्षानिर्भरे अधिकसमयं दीर्घिते च प्रतिद्वन्द्वे अर्जेन्टीना ३-२ इति लक्ष्यकन्दुकप्रकारेण केप वर्देदलं पराजित्य प्रचतुर्धांशचक्रं प्राविशत्। शक्तियुक्तं प्रतिद्वन्द्व्य आफ्रिकीयदलस्य साभिमाननिवृत्तिः।

प्रारम्भत एव शक्तं प्रतिरोधं विधत्तं केप वर्दे दलं प्रति अर्जेन्टीनायाः लक्ष्यप्रहाराय (goal shot) १५ तमनिमेषपर्यन्तं प्रतीक्षमाणाः अभवन्, आराधकाः। २९ तमे निमिषे मेस्सेः लक्ष्येण अर्जेंटीना अग्रे आगता। ५९ तमे निमिषे केपवर्देदलस्य डी दुवार्टे इत्यनेन लक्ष्यं प्रत्यर्पितम्। एवं समस्थितौ निश्चितसमयः समाप्तः। अस्मिन् विश्वचषके अर्जन्टीनायाः प्रथमसमस्थितिः! 

  अधिकसमये ९२ तमे निमिषे अर्जन्टीनायाः मार्टिनसेन द्वितीयं लक्ष्यमवाप्तम्। तत्तु १०३ तमे निमिषे केप वर्देस्य सिड्नी काब्रन् इत्यनेन प्रतिसमर्पितम्। आकांक्षाजनका समस्थितिः! विजयलक्ष्याय उभाभ्यामपि दलाभ्यां तीव्रं युद्धं कृतम्। १११ तमे निमिषे केप वर्दे दलस्य डिने बोर्गस् इत्यस्य स्वयंकृतानर्थेन अर्जन्टीना तृतीयं लक्ष्यं सम्प्राप्य पूर्वचतुर्थचक्रं प्रविवेश। 

  प्रथमविश्वचषके असाधारणवैभवं प्रकटितवन्तः केप वर्दे क्रीडकाः आराधकानां प्रशंसामुपलभ्य एव निवृत्ताः।

 केरलम्। 

"ओपरेषन् तूफान्" अभियोजनया ३० कोटीनां निरोधितोन्मादकवस्तूनि निगृहीतानि। 

ओपरेषन् तूफानस्य अंशतया निगृहीतानि उन्मादकवस्तूनि। 

अनन्तपुरी>  उन्मादक'माफिया'संघस्य उन्मूलनाशं लक्ष्यीकृत्य  केरलराज्ये मासैकस्मात् पूर्वम् आरब्धा ओपरेषन् तूफान् नाम अभियोजनाप्रचण्डवातः  सगौरवं वाति। एकमासाभ्यन्तरे ३० कोटिरूप्यकाणां निरोधितानि उन्मादकवस्तूनि निगृहीतानि। ५३५३ प्रकरणानि पञ्जीकृत्य ५७३६ अपराधिनः निगृहीताः। 

  ३७९२ किलोमितं 'गञ्जा' नामकं मादकं निगृहीतम्। १२.६७०९ ग्रां मेताफिटमिन्, ३७७६ ग्रां हाषिष् तैलं, ६५७.२१९ ग्रां ब्रौण् षुगर्, ३१.२३ ग्रां हेरोयिन्, ११ LSD stamp, २५.२३ ग्रां ओपियं, ४२८ गञ्जा सस्यानि इत्यादीनि उन्मादकवस्तूनि केरलस्य विभिन्नप्रदेशेभ्यः निगृहीतानि। 

 ये मादकवस्तूपभोगाधीनाः जाताः तान् प्रबोधेन पुनरधिवासेन च समाजस्य मुख्यपथमानेतुं प्रयत्नः करणीयः इति राज्यगृहविभागस्य लक्ष्यम्।

 महाप्रतापवता सह वीरबालस्य युद्धम् श्वः प्रत्युषसि। 

अर्जेन्टीना - केप् वर्दे प्रतिद्वन्दः। 

केप् वर्दे गणस्य लक्ष्यरक्षकः वोसीञ्ञा। 

मियामी> पादकन्दुकनभसि महाबलाढ्यः प्रतापशाली उज्वलप्रशोभवान् भवति लयोणल् मेस्सेः अर्जन्टीनादलः। विश्वचषकपादकन्दुकवेदिकां प्रति प्रथमप्रवेशे एव वीर्यशौर्यपराक्रमैः पादकन्दुकप्रणयिनाम् अद्भुतादरान् स्वीक्रियमाणः वीरबालः अस्ति केप् वर्दे इति आफ्रिकीयदलः। तयोः स्पर्धा जूलाय् चतुर्थस्य प्रत्युषसि ३.३० वादने [भारतीयसमयः] मियामी क्रीडाङ्कणे सम्पत्स्यते। अर्जेन्टीनायाः अधीशत्वेन सह केप वर्देदलस्य समरवीर्ये उज्वलोत्साहोपेतक्रीडा एव आराधकैः प्रतीक्ष्यते। 

  जे गणस्य (J group) अजय्येन वीरपदेन अस्ति अर्जन्टीनायाः knock out प्रवेशः। प्रतिद्वन्दिभ्यः ८ लक्ष्याणि  प्रदाय केवलं लक्ष्यैकं स्वीकृत्य आधिकारिकविजयः। लयोणल् मेस्सेः प्रतापः लक्ष्यसम्पादने अभङ्गुरमनुवर्तते च। मेसेः विश्वकीर्तिमानस्य अभिवर्धनं कांक्षन्ति आराधकाः। 

  किन्तु केवलं पञ्चलक्षं जनसंख्योपेतात् द्वीपराष्ट्रात् इदंप्रथमतया पादकन्दुकविश्वचषकमञ्चे रंगप्रवेशं कृतवान् केप् वर्दे दलः एच्छ् गणस्य (H group)द्वितीयस्थानमवाप्य अपसारणचरणं [Elimination round] प्राप। प्रकारान्तरेण कथ्यते चेत् अर्जेन्टीना इव 'अपराजितः' भवति केप् गणः। गणीयप्रतियोगितासु सर्वासु समस्थितिं परिपाल्य एव द्वितीयस्थानप्राप्तिः। पराजयः नाभवत्। त्रिषु प्रतिद्वन्द्वेषु आहत्य लक्ष्यद्वयस्य वशंगतः; द्वे लक्ष्ये प्राददात् च। उरुग्वेदलं प्रति २-२ समस्थितौ आसीदिदम्। अन्ययोः द्वयोः प्रतिद्वन्द्वयोः लक्ष्यरहितसमस्थितिः च। 

  प्रतिरोध एव केपगणस्य शक्तिः। ४० वयस्कस्य लक्ष्यरक्षकस्य [goalkeeper] 'वोसीञ्ञा' वर्यस्य वैभवे एव केपराष्ट्रस्य प्रतीक्षा।

Latest newsLatest news

 '८६' आफ्रिकायाः दुरन्तसंख्या!

यू एस्> फिफा विश्वचषके ८६  काचन दुरन्तसंख्या इति आफ्रिकीयक्रीडादलैः चिन्त्यते चेत् न्यायतः नाद्भुतम्। knock out इति निर्णायकस्पर्धासु डि आर् कोङ्गो, सेनगल्, ऐवरीकोस्ट् इत्येतेषाम् आफ्रिक्कीयदलानां पराजयस्य निर्णयः ८६ तमे निमिषे आसीत्। ह्यः सेनगलं  विरुध्य बल्जियस्य लुकाकु इत्यनेन प्रथमा लक्ष्यप्राप्तिः ८६ तमे निमिषे आसीत्। कोङ्गों विरुध्य हारि केय्नेन इङ्गलान्टस्य विजयलक्ष्यं ८६ तमे निमिषे! तावत्पर्यन्तं सेनगलः २-० इति लक्ष्यक्रमेण अग्रे आसीत्। 

   कोंगो ७० निमेषाधिकं यावत् अग्रतां संस्थाप्य आसीत् हारि केयन् वर्यस्य लक्ष्यद्वयं (७५, ८६)।

   ऐवरी कोस्टदलं प्रति नोर्वे दलस्य एर्लिंग हालण्टः ८६ तमे निमिषे लक्ष्यं प्राप्तवान्। प्रथमं लक्ष्यं प्राप्तं नोर्वेदलं विरुध्य ऐवरीदलम्  अमद् डियीलो इत्यनेन समस्थितिं [७४ तमे निमिषे] प्राप्तवदपि ८६ तमे निमिषे हालण्टः विजयक्ष्यं प्राप्तवान्।

Latest news Latest news

 फिफा विश्वचषकः।

बल्जियमः पूर्वचतुर्धांशे।

यू एस्> क्रीडायाः ८५ तमनिमेषं यावत् २-० इति लक्ष्यसम्पादनेन पूर्वचतुर्धांशप्रवेशं दृढीकृतवन्तं सेनगलदलं प्रतिलोम्य उज्वलं प्रत्यागमनं कृतवान् बल्जियमदलः ३-२ इति लक्ष्यक्रमेण प्रचतुर्धांशचक्रं प्राविशत्।

  क्रीडायाः २४, ५१ तमयोः निमिषयोः प्राप्तेन लक्ष्यद्वयेन सेनगलः अग्रतां प्राप्तवानासीत्।  ५६ तमे निमिषे बल्जियमेन कृतेन स्थानेतरादेशत्वद्वयेन ते क्रीडायां नूतनमुत्साहम् ऊर्जं च स्वीचक्रुः। ततः ८६ तमे निमिषे रोमेलु लुकाकु इत्यनेन आश्वासलक्ष्यं प्राप्य ८९ तमे निमिषे नायकः यूरी टीलमन्स् इत्यनेन समस्थितिं च बल्जियमः  सम्प्राप। 

  अनन्तरम् अधिकसमयं दीर्घितस्य प्रतिद्वन्द्वस्य क्षतिपरिहारसमये [injury time] नायकेनैव स्वदलस्य तृतीयलक्ष्यमपि सम्पादितम्। तथा अत्यन्तमुद्वेगभरिते उत्साहजनके च प्रतिद्वन्द्वे लक्ष्यद्वयस्य पृष्ठतः स्थितः बल्जियमः त्रीणि लक्ष्याणि प्रतिकृत्य सेनगलं पराजित्य प्रचतुर्धांशचक्रं प्राविशत्।

 युक्रैने रष्यायाः व्योमाक्रमणं - २० मरणानि।

रष्यया कृते आक्रमणे भग्नः भवनसमुच्चयः। 

 

कीव्> युक्रैनस्य राजधानीनगरे कीवे रष्यया कृते व्योमाक्रमणे २० जनाः हताः। नवत्यधिके व्रणिताश्च। बुधवासरे रात्रौ आरब्धमाक्रमणं गुरुवासरस्य प्रभातपर्यन्तं अनुवृत्तम्। रष्यायाः तैलसम्भरणशालाः प्रति युक्रैनेन कृतस्य आक्रमणस्य प्रतिक्रिया इति रष्यायाः सैनिकाधिकारिभिः उक्तम्। 

  कीवनगरस्य उपत्रिंशत् स्थानेषु आक्रमणमभवत्। विंशत्यधिके वासकेन्द्राणि भग्नानि। कतिपयभवनसमुच्चयेषु अग्निबाधा आपन्ना। ७४ दीर्घदूरमिसैलशस्त्राणि, २४ बालिस्टिकमिसैलशस्त्राणि, ४९६ ड्रोणानि च रष्यया प्रयुक्तानि। 

  बुधवासरे रात्रौ युक्रैनः रष्यायाः बृहत्तमं कामपि तैलशुद्धीकरणशालां  आक्रामत्। अत्र अग्निबाधा वृत्तान्तीकृता।  अपि च रष्यायाः सैनिकप्रक्रमाय  उपयुज्यमानः रेल् सेतुः अपि युक्रेनेन आक्रान्तः।

 वि बी जी रांजी परियोजना आरब्धा। 

विरुद्धवादैः बहूनि राज्यानि। 

नवदिल्ली> 'विकसित भारत-गारन्टी फोर् रोज़गार् आन्ड् आजीविका मिषन्' [Vikasit Bharath Garentee for Rosegar and Aheevika Mission]नामिका केन्द्रसर्वकारस्य अभियोजना बुधवासरे समारब्धा। ग्रामीणमण्डले सामान्यश्रमिकानां महिलानां आर्थिकस्थिरताम् उत्पादयितुम् आरब्धायाः महात्मा गान्धी  ग्रामीण कर्मदृढीकरणाभियोजनायाः स्थाने आरब्धा अस्तीयं योजना। १२५ कर्मदिनानि अस्यां दृढीकरोति। पूर्वम् एतत् १०० कर्मदिनानि आसन्। 

 किन्तु विपक्षीयराज्यसर्वकाराणां प्रतिषेधः नूतनाभियोजनां प्रति जातः। आहत्य व्ययस्य ४०% राज्यसर्वकारैः ऊढव्यमिति नूतनव्यवस्था। महात्मागान्धी अभियोजनायां १०% आसीत्। ९०% केन्द्रस्य भागः आसीत्। इदानीं ६०% एव। विपक्षीयसर्वकारैः सह भाजपा दलेन शास्यमाने बिहारे मध्यप्रदेशराज्ये च प्रतिषेधः उन्नीयते। केन्द्रप्रशासनांशस्य न्यूनता एव प्रतिषेधहेतुः।

उन्मादकवस्तून् विरुद्धय केरलेषु तूफान 

विद्यार्थिनः सन्देशवाहकाः अभवन्

        केरलस्य विद्यालयाः अपि मन्दमन्दम् उन्मादकवस्तूनाम् उपयोगः भविष्यति इति समाजस्य दुखस्था ज्ञात्वा सर्वकारेण ओपरेषन् तूफ़ान ख्यापितम्। अस्य भागतया केरलस्य विविध विद्यालयेषु उन्मादकवस्तून् विरुध्य प्रतिज्ञा स्वीकृता।

     MTUP तृक्कुन्नप्पुष विद्यालये तादृशरीत्या विभिन्नः कार्यक्रमः समभवत्। विद्यालय छात्राः जनानां बोधाय मार्गेषु वीथीनृत्तम् (flash mob) अकुर्वन्। इदानीं सामाजिकमाध्यमेषु छात्राणां कार्यक्रममधिकृत्य चर्चाः प्रचलन्ति।

 भारतं पाकिस्थानं च कारागारबद्धानाम् आवलिः मिथः समार्पयताम्। 

नवदिल्ली> भारतीयविदेशकार्यमन्त्रालयेन निगदितं यत् भारतं पाकिस्थानं च कारागारबद्धानां नागरिकाणां धीवराणां चावलिं परस्परं हस्तान्तरम् अकुर्वताम्। भारतेन अत्र कारागारे बद्धानां ३८६ पाकिस्थानीयनागरिकाणां ५३ धीवराणां च आवलिः पाकिस्थानाय समर्पिता। पाकिस्थानेन ५२ भारतीयनागरिकाणां १९८ धीवराणां च नामावलिः भारताय दत्ता च। 

 २००८ तमे वर्षे उभाभ्यामपि राष्ट्राभ्यां व्यवस्थापितं सन्धिमनुसृत्य प्रतिवर्षं जनुवरी १,  जूलाय् १ दिनाङ्कद्वये सन्दिग्धसाहचर्ये निगृह्य कारागारे बन्धितानां नागरिकाणां धीवराणां च नामावलिः परस्परं समर्पितव्या अस्ति। एतदनुसृत्य एवायं प्रक्रमः। दण्डकालपरिधिं समाप्य पाकिस्थानकारागृहे वर्तमानाः ये भारतीयनागरिकाः धीवराश्च सन्ति, तेषां विमोचनं अचिरेणैव कार्यमिति भारतेन अपेक्षितम्।

 जापानस्य प्रधानमन्त्री भारते।

अद्य मोदिना सह मेलनम्। 

जापानस्य प्रधानमन्त्रिणं सनाय् तकाय्चीवर्यां केन्द्रमन्त्री जितेन्द्रसिंहः स्वीकरोति।  

नवदिल्ली> जापानस्य प्रधानमन्त्री सनाय् तकाय्ची वर्या बुधवासरे सायं भारतं सम्प्राप। गुरुवासरे  दशवादने राष्ट्रपतिभवने तकाय्चि वर्यायै औद्योगिकं स्वीकरणं दास्यति। ततः ११.३० वादने दिल्ल्यां हैदराबादहौस् मध्ये उभयोरपि प्रधानमन्त्रिणोः उभयपक्षचर्चा विधास्यते। परस्परसहयोगाय विविधेषु सन्धिषु हस्ताक्षरीकरणं भविष्यति।

 प्रधानमन्त्रिपदस्वीकरणानन्तरं तकाय्ची वर्यायाः प्रथमं भारतसन्दर्शनं भवत्येतत्। जूलाय् तृतीयदिनाङ्कपर्यन्तं भारते भविष्यति। ह्यः भारतस्य शास्त्रसाङ्केतिकमन्त्री जितेन्द्र सिंहः विमाननिलये जापानप्रधानमन्त्रिणं स्वीचकार।

 मिसोराम‌े एस् ऐ आर् - 

४६,००० नामानि मतदानावल्याः बहिः। 

 ऐसोल्> मिसोरामराज्यस्य एस् ऐ आर् प्रक्रमे सम्पूर्णे ४६,१९१ मतदानिनः मतदानावल्याः निष्कासिताः। राज्यस्य joint chief electoral officer पदीयेन एत्तल् रोत्तङ् पुयी नामकेन उक्तमिदम्। निष्कासितेषु २१,२९० जनाः मृताः, ८,३५२ जनाः नाधिगताः,  १३,९९२ जनाः स्थानान्तरं गताः २२४५ नामानि युगलीकृताः इति च तेन निगदितम्। 

   मेय् मासस्य २० तमे दिनाङ्के आरब्धा तीव्र-मतदानावलीपरिष्करणप्रक्रिया [एस् ऐ आर्] रविवासरे सम्पूर्णा अभवत्। ८,२८,८७७ मतदायकाः एव राज्ये वर्तिष्यन्ते। संक्षिप्तावलिः जूलै चतुर्थे दिनाङ्के प्रकाशयिष्यति।

 पश्चिमेष्या सन्दिग्धता। 

तर्कवितर्काः नयतन्त्रचर्चया परिहर्तव्याः इति इरानं प्रति भारतम्। 

नवदिल्ली> पश्चिमेष्यायां वर्तमानीनावस्थाः अधिकृत्य भारतस्य प्रधानमन्त्री नरेन्द्र मोदी इरानस्य राष्ट्रपतिः मसूद पेसष्कियानः च मिथः दूरवाणीद्वारा सम्भाषितवन्तौ। विवादाः  राष्ट्रैः सह परस्परचर्चाभिः  नयतन्त्रव्यवहारैः चैव परिहर्तव्याः इति भारतस्य दृढमतं मोदिवर्यः पुनरवोचत्। 

 पश्चिमेष्यायां शाश्वतशान्तेः पुनःसंस्थापनाय निरन्तरपरिश्रमाः अपेक्षिताः इति प्रोक्तवान् मोदिवर्यः निर्बाधं महानौकायातायातसुविधा व्यापारसुरक्षा च दृढीकरणीया इति स्पष्टीकृतवान्।

 अपराजितत्वं प्रमाणीकृत्य फ्रान्सः पूर्वचतुर्धांशचक्रे।

स्वीडनं विरुध्य लक्ष्यद्वयं सम्पादितवान् किलियन् एम्बापे। 

न्यूयोर्क्> न्यू जेर्सी क्रीडाङ्कणे गतरात्रौ सम्पन्ने प्रतिद्वन्द्वे फ्रान्सदलः स्वीडनं ३-० इति लक्ष्यकन्दुकक्रमेण पराजित्य विश्वचषकपादकन्दुकस्पर्धायाः पूर्वचतुर्धांशचक्रं प्रविशत्। गणीयस्पर्धासु त्रीनपि प्रतिद्वन्दिनः प्रभञ्ज्य स्वीकीयम् अपराजितत्वं पुनरपि प्रमाणीकृत्य अस्ति एतस्य 'षोडशगण'प्रवेशः [Round of 16]। पूर्वचतुर्धांशचक्रे पराग्वे अस्ति फ्रान्सस्य प्रतियोगी।

  फ्रान्सस्य नायकः किलियन् एम्बापे लक्ष्यकन्दुकसंग्रहणे लयोणल् मेसीं प्रति प्रतिद्वन्द्वते। ह्यः लक्ष्यद्वयसम्पादनेन अस्मिन् विश्वचषके ६ लक्ष्याणि संगृह्य मेस्सिना सह प्राप्तवान्। विश्वचषके आहत्य १८ लक्ष्यकन्दुकानि सम्प्राप्य मेस्सेः पृष्ठतः तिष्ठति। 

  क्रीडायाः ४५, ७४ तमनिमिषयोः आसीत् स्वीडनं विरुध्य एम्बापेः लक्ष्यप्राप्तिः। ५३ तमे निमिषे बी बार्कोला नामकः स्वीडनाय लक्ष्यकन्दुकं प्राप्तवान्।

 राष्ट्रस्य पेट्रोलियसञ्चयं वर्धापयितुं प्रक्रमाः आरब्धाः। 

मुम्बई> राष्ट्रस्य ऊर्जविभागे मुख्यस्थानं वहन्तं पेट्रोलियसञ्चयं वर्धापयितुं प्रक्रमाः आरब्धाः। ओडीषायां चान्दिखोल्, मध्यप्रदेशे बिना, राजस्थाने बिकानेर् इत्येतेषु स्थानेषु  नूतनानि त्रीणि सञ्चयकेन्द्राणि निर्मातुं, तथा कर्णाटके मंगलुरु, पातूर् इत्यनयोः स्थानयोः   सञ्चयनव्याप्तिं वर्धापयितुं च सर्वकारेण उद्दिश्यते। राष्ट्रे ४० दिनानि यावत् यथेष्टम् उपयोक्तुं असंस्कृततैलस्य सञ्चयं सज्जीकर्तुमेव लक्ष्यम्।

 फिफा विश्वचषकः।

जर्मनी, नेतर्लान्टः च बहिर्नीतौ। 

यू एस्> त्वरितलक्ष्यवेधनपर्यन्तं [Penalty shoot out] दीर्घितया क्रीडया पादकन्दुकक्षेत्रे शक्तिमन्तौ द्वौ दलौ निर्णायकचक्रात् बहिर्नीतौ - जर्मनी, नेतर्लान्टः च। जर्मनी पराग्वां प्रति, नेतर्लान्टः मोरोकोदलं प्रति च पराजितवन्तौ। पराग्वा, मोरोको च पूर्वचतुर्धांशचक्रं प्राविशताम्।

 केरले अतिवृष्टिजागरूकता।

श्वः जनपदद्वये शैक्षिकविरामः। 

कोच्ची> बुधवासरे आकेरलम् अतिवृष्टिजागरूकता उद्घोषिता। कण्णूर् कासरकोड जनपदयोः श्वः ओरञ्जजागरूकता अस्ति। अस्मिन् जनपदद्वये अपि बुधवासरे 'प्रोफषणल्' कलालयान् अभिव्याप्य सर्वेषां शैक्षिकसंस्थानां वृत्तिविरामः घोषितः। किन्तु परीक्षा अभिमुखम् इत्येतयोः परिवर्तनं नास्ति।

 यूरोपे अत्युष्णः। 

१५०० मरणानि; महान् क्लेशः। 

अत्युष्णे प्रवृत्ते पारीसे दृश्यम्। 

पारीस्> यूरोपभूखण्डे उष्णतरङ्गस्य दुष्प्रभावः वर्धायते। सप्ताहैकेन बहुषु यूरोपीयराष्ट्रेषु १५०० जनाः अत्युष्णपीडया मृत्युंगताः। केवलं फ्रान्से १३०० जनाः मृताः। 

  जर्मनी, ब्रिटनं, स्पेयिन्, इट्टली इत्यादिषु राष्ट्रेषु तापमानः ४० डिग्रीमिताधिकं प्राप्तः। कतिपयराष्ट्रेषु बडवाग्निः अनुभूयते। डान्यूस्, पो इत्याद्यः नद्यः शुष्काः जाताः। फ्रान्से विद्यालयाः पिहिताः। सप्ताहद्वयं यावदपि अत्युष्णमनुवर्तिष्यते इति तत्रत्येन ऋतुविज्ञानीयविभागेन निगदितम्।

 महिलानां दीर्घप्लुतिस्पर्धायाम् नूतना अनन्यप्रथमप्राप्तिः।

केरलस्य आन्सी सोजन् वर्या २२ वर्षैः पुरातनं राष्ट्रियकीर्तिमानं बभञ्ज।

आन्सी सोजन्।

 

भुवनेश्वरं> ओडीशायां भुवनेश्वरे सम्पन्नायाम्  अन्ताराज्यीय वरिष्ठकायिकवीरताप्रदर्शनस्पर्धायां  [Interstate Senior Athletic Championship] महिलानां दीर्घप्लुतिविभागे [long jump] केरलस्य आन्सी सोजन् वर्यया नूतना अनन्यप्रथमप्राप्तिः आलिखिता। ६. ८८ मीटर् प्लवनं कृत्वा २२ संवत्सरैः पुरातनं केरलीयमहिला अञ्जु बोबी जोर्ज् इत्यस्याः ६. ८३ इति राष्ट्रकीर्तिमानमेव पुरावृत्तं कृतम्। 

  तृश्शूर जनपदनिवासिनी आन्सी  गतमासे झार्खण्डे सम्पन्ने Federation cup Athletics Championship इत्यस्मिन् ६. ७५ मीटर् प्लुत्वा सुवर्णं प्राप्तवती। एकमासानन्तरं तत्तु राष्ट्रकीर्तिमानत्वेन परिणमत। इदानीं एष्यन् गयिंस् दीर्घप्लुते रजतपतकजेत्री अस्ति। 

  सेप्तंबरमासे सम्पद्यमाने एष्यन् गयिंस् दीर्घप्लुते भागं कृत्वा सुवर्णपतकं प्राप्तव्यमिति अभिलाषः इति आन्सी उक्तवती। आगामिवर्षे विश्ववीरता अस्ति। तदर्थं परिशीलनमपि कार्यम्।

 असमे अरुणाचल प्रदेशे च प्रलयदुष्प्रभावः। 

आकस्मिकप्रलयः, भूस्खलनम्,  अनेके तिरोभूताः, महान्तः कष्टनष्टाः।

अरुणाचलप्रदेशे दुरापन्नः भूविच्छेदः। 

इटानगरं> असम-अरुणाचलप्रदेशराज्यद्वये महती कठोरा च वृष्टिः अनुभूयते। सोमवासरे दुरापन्ने आकस्मिकप्रलये अरुणाचलस्थेषु  केई पन्योर्,, पापुं पारे, पूर्वसियाङ् इत्यादिषु जनपदेषु उपत्रिंशत् स्थानेषु मृत्प्रपाताः कतिपयस्थानेषु भूविच्छेदाः च दुरापन्नाः। भूविच्छेदात् जाते आकस्मिकप्रलये बहूनि भवनानि क्षेत्राणि च विशीर्णानि। नव जनाः तिरोभूताः। वीथयः भग्नाः इत्यतः वायुसेना एव मुख्यतया रक्षाप्रवर्तनं करोति। 

  असमे षट्सु जनपदेषु महत्या वृष्ट्या जलोपप्लवः जातः। २०,००० जनाः सुरक्षितस्थानं नीताः। रेल् मार्गाः बहुत्र जलनिमग्नाः अभवन्।

 ब्रसील-जापानयोः स्पर्धायां ब्रसीलस्य विजयः।

हूस्टणः> ब्रसील-जापानयोः निर्णायके प्रतिद्वन्द्वे ब्रसीलः एकं विरुध्य लक्ष्यकन्दुकद्वयेन  जापानम् अभिभाव्य पूर्वचतुर्धांशं प्रविवेश। 

  द्वितीयार्धस्य अधिकसमयस्य अन्त्यनिमिषे गब्रियेल् मार्टिल्ली इत्यनेन प्राप्तेन लक्ष्यकन्दुकेनैव ब्रसीलः  विजयपथं  प्राप।

 जेम्स वेब् अन्तरिक्ष-दूरदर्शिनी पुनरपि विस्मितं कृतवती।

 

जेम्स वेब् अन्तरिक्ष-दूरदर्शिनी (JWST) यन्त्रेण द्वादशशतकोटिवर्षेभ्यः प्राक् परस्परं विलीयमानाः षड् आकाशगङ्गाः अन्विष्टाः। 'TGSSJ1530+1049' इति नामिका इयं आकाशगङ्गा-सङ्कुलिता भविष्ये एकां बृहदाकाराम् आकाशगङ्गां निर्मास्यति। अत्र तीव्रवेगेन नक्षत्राणां निर्माणमपि प्रचलति इति संशोधकाः वदन्ति।

विश्वस्य आदिकालीन-इतिहासस्य एकं दुर्लभं वातायनम् उद्घाट्य जेम्स वेब् अन्तरिक्ष-दूरदर्शिनी पुनरपि वैज्ञानिकजगत् विस्मितं कृतवती। महाविस्फोटात् (Big Bang) अनन्तरं प्रायः १८० कोटिवर्षेषु व्यतीतेषु, अर्थात् द्वादशशतकोटिवर्षेभ्यः प्राक्, षड् आकाशगङ्गाः परस्परं विलीयमानाः आसन् इति एतत् दुर्लभं दृश्यं वैज्ञानिकाः दृष्टवन्तः। भविष्ये एताः सर्वाः मिलित्वा विश्वस्य बृहत्तमासु आकाशगङ्गासु अन्यतमां निर्मास्यन्ति इति संशोधकानाम् अनुमानम् अस्ति।

 केरले वर्षाकालः शक्तायते। 

कोच्ची> सप्ताहद्वयस्य विरामानन्तरं केरले वर्षाकालः शक्तिं प्राप्नोति। अतीते दिनत्रये समेषु जनपदेषु शक्ता वृष्टिः अभवत्। आगामिदिनेष्वपि वृष्टिः कठिना भविष्यति। सर्वेषु जनपदेषु ओरञ्च् वा पीत जागरूकता उद्घोषिता। पर्वतप्रान्तप्रदेशान् अधिवसन्तः जागरूकाः भवेयुः इति ऋतुविज्ञानीयविभागेन निगदितम्।

 कराचीमध्ये भीकराक्रमणम्। 

४ सैनिकाः हताः; ६ भीकराः मृताः। 

कराची> पाकिस्थाने सीमारक्षणसेनायाः कराचीशिबिरं प्रति विधत्ते भीकराक्रमणे चतुर्णां सैनिकानां प्राणहानिः। षट् भीकराः सैनिकैः व्यापादिताः, एकः निगृहीतश्च। 

  शनिवासरे रात्रौ आसीत् इयं घटना। स्फोटकवस्तूपेतेन वाहनेन प्राप्ताः भीकराः मुख्यकवाटं भञ्जयित्वा अन्तः प्रविष्टाः। टि टि पी इति भीकरसंघटनस्य उपविभागः नाम्ना 'जमा अत् उल् अह्रार्' घटनायाः उत्तरदायित्वं स्वीचकार।

 वेनस्वेलायै भारतस्य साहाय्यहस्तः - 'ओपरेषन् अमिस्टाड्'।

ओपरेषन् अमिस्टाड् दौत्यसंघः। 

नवदिल्ली> युगलभूकम्पेन स्तब्धायै वेनस्वेलायै ७२ होराभ्यन्तरे भारतस्य साहाय्यहस्तः। 'ओपरेषन् अमिस्टाड्' [Operation Amistad] इति कृतनामधेयस्य  दौत्यस्य अंशतया द्वे सी - ७ विमाने १४,००० कि मी दूरं डयित्वा कारकासनगरं प्रापतुः। विमानेSस्मिन् ३५ टण् मितं दुरन्ताश्वासवस्तूनि, ९ वैद्यकसहितः ४१ अंगोपेतः चिकित्सासंघः, सैनिकक्षेत्रीयातुरालयः इत्यादीनि अन्तर्भवन्ति। 

  आधुनिकसौविध्योपेते सुवाह्ये [portable] आतुरालये ICU, X Ray यन्त्राणि इत्यादीनि सन्ति। एकस्मिन् समये २०० जनानां परिचर्यां विधातुं शक्यते।

 फिफा विश्वचषकः।

कोलम्बिया - पोर्चिगलस्पर्धा समस्थितौ। 

लक्ष्यस्थानपालकौ कुशलौ। 

मियामी> भारतसमयक्रममनुसत्य रविवासरस्य प्रभाते विधत्ता कोलम्बिया-पोर्चुगल् प्रतियोगिता लक्ष्यकन्दुकरहितसमस्थितौ समाप्ता। 'के' गणस्य अन्तिमस्पर्धा आसीदियम्। आद्यन्तं चटुले उत्साहपूर्णे च प्रतिद्वन्द्वे अलक्ष्याः लक्ष्योपेताः च प्रहराः [shots] बहवः पक्षद्वयेनापि कृताः अपि किमपि लक्ष्यकन्दुकं नाजायत। लक्ष्यस्थानपालकौ [goal keeper] एव अत्र क्रीडाकुशलौ। 

  डीगो कोस्टा पोर्चुगलस्य, कामिलो वर्गासः कोलम्बियाया‌ः च लक्ष्यस्थानपालकौ आस्ताम्। गणे सप्तभिः प्राप्ताङ्कैः कोलम्बिया प्रथमस्थानं, ५ प्राप्ताङ्कैः पोर्चुगलः द्वितीयस्थानं च वहति। आगामिन्यां  निर्णायकप्रतियोगितायां पोर्चुगलः क्रोयेष्यया सह, कोलम्बिया घानादलेन सह च स्पर्धिष्यते।

 आगामिसप्ताहे जापानस्य प्रधानमन्त्री भारते।

नवदिल्ली> जापानस्य प्रधानमन्त्री सनाये तकायिच्ची वर्या त्रिदिनात्मकसन्दर्शनाय आगामिसप्ताहे भारतं प्राप्स्यति। १६ तमस्य भारत-जापानयोः सांवत्सरीयोच्चशिखरस्य अंशतया जुलाई प्रथमदिनाङ्कतः तृतीयदिनाङ्कपर्यन्तं भवेत् सन्दर्शनम्। व्यापार-निक्षेप-देशरक्षा इत्यादिमण्डलेषु सहयोगं प्रबलीकर्तुमेव शिखरमेलनम्।

 फिफा विश्वचषकः।

अर्जेंटीनायाः अनायासविजयः; गणवीरः।

 विश्वचषके मेस्सेः १९ तमं  लक्ष्यकन्दुकम्।

जोर्दानं प्रति स्पर्धायां लयोणल् मेस्सी।

टेक्सस्> अमेरिकायां टेक्सस् नगरस्थे डल्लस् क्रीडाङ्कणे रविवासरस्य प्रभाते (भारतीयसमयः) सम्पन्ने अर्जेन्टीना-जोर्दानयोः प्रतिद्वन्द्वे जोर्दानं एकं विरुध्य त्रिभिः लक्ष्यकन्दुकैः पराजित्य अर्जन्टीना अनायासविजयेन गणवीरतां प्राप। क्रीडायाः ६५ तमे निमिषे स्थानोपवेशनत्वेन [substitute] आगतः लयोणल् मेस्सी अस्मिन् विश्वचषके स्वकीयं षष्ठं लक्ष्यकन्दुकं सम्पादयामास। अपि च, विश्वचषकस्पर्धासु आहत्य १९ तमं लक्ष्यकन्दुकं सम्प्राप्य अधिकार्जकः [top scorer] इति स्वस्यैव अनन्यथाप्रथमप्राप्तिं सः नवीकृतवान् च। 

  ८० तमे निमिषे आसीत् मेस्सेः लक्ष्यकन्दुकम्। ततः पूर्वं जियोवनी लो सेल्डो नामकः १९ तमे निमिषे, लौटारो माल्टिनस् नामकः ३० तमे निमिषे च  अर्जन्टीनायै लक्ष्यकन्दुके प्राप्तवन्तौ। ५५ तमे निमिषे जोर्दानस्य क्रीडाकुशलः मूसा अल् तमारिः आश्वासलक्ष्यकन्दुकं सम्पादयामास। 

  'जे' (J) गणस्य वीरतां प्राप्तः अर्जेन्टीना संघः निर्णायकचक्रे जूलाय् तृतीय दिनाङ्के केप् वर्दे दलेन सह स्पर्धिष्यते।

 डो यू पि राजीवः वि एस्  एस् सि निदेशकः। 

डो यू पि राजीवः। 

अनन्तपुरी>  विक्रं साराभायि बहिराकाश केन्द्रस्य [VSSC] नूतननिदेशकरूपेण डो. यू पि राजीवः कार्यभारं वक्ष्यति। इदानीं सः VSSC मध्ये R&D विभागे सहनिदेशकः [Assosiate Director] अस्ति। ISRO संस्थायाः प्रायेण समेषु चरित्रोपलब्धिषु सः नेतृत्वसमानं भागम्  ऊढवानस्ति। 

  केरले कोल्लं जनपदे पत्तनापुरं प्रदेशे लब्धजन्मा राजीवः केरलतः यन्त्रविद्यां समाप्य बंगलूरतः यन्त्रविज्ञाने विद्यावारिधिपदं [PhD]च प्राप्तवान्। तस्य  पत्नी डो आशा पी नायर् वर्या अपि वि एस् एस् सि संस्थायां वरिष्ठा शास्त्रज्ञा अस्ति।

Latest news

 वेनस्वेला भूकम्पः

मरणानि १५००; ६८ लक्षं जनाः कार्यसङ्कटे।

 बृहती मानवसन्दिग्धता इति यू एन्।

भूकम्पे विशीर्णेषु भवनसमुच्चयेषु एकम्। 

ला ग्वयिरा>  वेनस्वेलाराष्ट्रे दुरापन्नेन युगलभूकम्पेन तत्रत्याः ६८ लक्षं जनाः क्लेशबाधिताः जाताः इति संयुक्तराष्ट्रसभायाः निरीक्षणम्। राजधान्यां कारकसे २० लक्षं जनाः भूकम्पबाधिताः वर्तन्ते। 

  विद्यालय-आतुरालय-कार्यालयसंस्थाः अभिव्याप्य बहूनि भवनानि वासगृहाणि च भग्नानि। एतत्तु बृहत्याः मानवसन्दिग्धतायाः कारणमभवत्। बुधवासरे दुरापन्ने भूकम्पे सार्धसहस्रं जनाः मृताः इति आधिकारिकं विवरणम्। ३३६० जनाः व्रणिताः। ५०,००० जनाः तिरोभूताः वर्तन्ते। रक्षाप्रवर्तनानि अभङ्गुरेण प्रचलन्ति इत्यतः मृत्युसंख्या वर्धिष्येत। बहवः विदेशीयाः अपि भूकम्पे मृताः तिरोभूताः वा वर्तन्ते इति दृढीकृतमस्ति।

 पश्चिमेष्या पुनरपि संघर्षभरिता। 

पुनः यू एस्-इरानयोः प्रतिद्वन्द्वः। 

वाषिङ्टणः> शान्त्युपस्थापनचर्चाम् अन्तिमं कर्तुं प्रक्रमेषु पुरोगम्यमानेषु यू एस्-इरानयोः मध्ये पुनरपि आक्रमणप्रत्याक्रमणानि जातानि। ओमानस्य तीरस्था पण्यमहानौका इरानेन आक्रान्ता इत्यारोप्य यू एसेन इरानस्य सेनाकेन्द्राणि विरुध्य शुक्रवासरे आक्रमणं विधत्तम्। 

 प्रत्युत्तररूपेण शनिवासरे यू एसस्य गल्फराष्ट्रस्थानि सेनाशिबिराणि इरानेन आक्रान्तानि।

 तमिलचलच्चित्राभिनेता भाग्यराजः निर्यातः। 

चेन्नै> तमिलचलच्चित्रमण्डले दृश्यकथा,निदेशः, अभिनयः इत्यादिभिः विस्मयं कृतवान् अनुगृहीतप्रतिभाशाली भाग्यराजः (७३) कालयवनिकां ययौ। शनिवासरे प्रभाते हृदयाघातेन चैन्नैस्थे आतुरालये आसीत्तस्यान्त्यम्।

  २५ चलच्चित्राणां निदेशकत्वं कृतवान् भाग्यराजः ७५ तः अधिकेषु चलच्चित्रेषु अभिनीतवान्। बह्व्यः दृश्यकथाः तेन विरचिताः। संगीत-चित्रसंयोजननिर्वहणेषु च सः अनितरसाधारणं प्रागत्भ्यं प्रकटयामास। 

  भाग्यराजस्य अभिलाषानुसारेण तस्य नेत्रे नगरस्थाय आतुरालयाय दत्ते। अन्त्येष्टिकर्माणि अद्य मध्याह्ने चेन्नैस्थे विद्युत्श्मशाने सम्पत्स्यन्ते।

 'ओपरेशन् सिन्दूरम्' - वीरमृत्युमुपगताः ६ सैनिकाः। 

एकसंवत्सरस्यानन्तरं नामानि बहिरागतानि। 

नवदिल्ली> पहल्गामे भीकराक्रमणस्य प्रतिप्रक्रमरूपेण पाकिस्थानस्य भीकरकेन्द्रेषु भारतेन विधत्ते ओपरेशन् सिन्दूरं नामके सैनिकप्रक्रमे वीरमृत्युमुपगतानां  ६ सैनिकानां नामानि केन्द्रप्रशासनेन प्रथमतया बहिः प्रकाशितानि। दिल्लीस्थे राष्ट्रिय युद्धस्मारके   त्यागचक्रम् इति संज्ञया व्यवह्रियमाणे बलिचक्रे एतेषां नामानि आलेखितानि। पञ्च स्थलसेनाधिकारिणाम् एकस्य व्योमसेनाधिकारिणश्च नामान्येव प्रकाशितानि। 

  सुबेदार् मेजर् पवन कुमारः, भुषुण्डिकः [rifle man] सुनिल् कुमारः, लान्स् नायिक् दिनेश् कुमारः, मूद् मुरलीनायिक् हविल् दार् सुनिल् कुमार सिंहः, वायुसेनायां सुरेन्द्रकुमारः इत्येते वीरमृत्युं प्रापुः। एषु मुरली नायिक् अग्निवीरः आसीत्। 

  २०२५ एप्रिल् २२ तमे दिनाङ्के पहलगामे बैसरण् अधित्यकायां दुरापन्ने भीकराक्रमणे २६ विनोदयात्रिकाः हताः आसन्। मेय् सप्तमे दिनाङ्के पाकिस्थानस्थानि भीकरकेन्द्राणि भारतेन प्रत्याक्रान्तानि।

 केरलतः ६ बङ्गलादेशीयनागरिकाः ग्रहीताः। 

एरणाकुलं> कतिपयवर्षाणि यावत् कोच्चीनगरस्य समीपे तृप्पूणित्तुराम् अनधिकृतत्वेन  अधिवसन्तः षट् बङ्गलादेशीयनागरिकाः आरक्षकविभागस्य सविशेषदलेन निगृहीताः। एषु ५ युवकाः इतरः १७ वयस्कः कुमारश्च। 

  त्याज्यवस्तूनि [scrap] संगृह्य उपजीवनं कुर्वन्तः एते तृप्पूणित्तुरासमीपे एरूर् प्रदेशे गृहद्वये भाटकरूपेण वसन्तः आसन्। एतान् अनन्तरदिने न्यायालयं उपस्थाप्य शेषप्रक्रमाः विधास्यन्ते इति आरक्षकाधिकारिणा निगदितम्।

 अयोध्या धनापहरणम्

अष्ट जनाः निगृहीताः। 

मन्दिरपालनन्यासस्य कार्यदर्शिप्रमुखः चम्पत् रायी, इतरः न्याससदस्यः च स्थानं त्यक्तवन्तौ। 

अयोध्या> उत्तरप्रदेशे अयोध्यायां राममन्दिरात् भक्तैः समर्पितः धनराशिः  अमूल्यवस्तूनि च अपहृतानीति विषये मन्दिरसेवकान् नव जनान् अपराधिनः कृत्वा अयोध्या आरक्षकदलेन प्रकरणं पञ्जीकृतम्। तेषु अष्ट जनाः निगृहीताः। इतरः  एकः निलीनः वर्तते। 

  न्याससदस्यस्य कृष्णमोहनस्य परिदेवनस्य तथा  क्रमभङ्गारोपणम् अन्वेष्टुं यू पि सर्वकारेण नियुक्तस्य 'एस् ऐ टि' संङ्घस्य च आवेदनस्य आधारे एव अपराधप्रकरणं पञ्जीकृतम्। अपराधिभ्यः ७९. ८ लक्षं रूप्यकाणि अधिगतानीति आरक्षकदलेन निगदितम्। 

  प्रत्युत, धनापहरणस्य धार्मिकोत्तरदायित्वं स्वीकृत्य मन्दिरपालनन्यासस्य कार्यदर्शिप्रमुखः चम्पत् रायी, १५ न्याससदस्येषु अन्यतमः अनिल मिश्रः च स्थानं त्यक्तवन्तौ। चम्पत रायी विश्व हिन्दुपरिषत् संघटनस्य उपाध्यक्षः च अस्ति।

 फिफा विश्वचषकः।

स्कोट्लान्टं प्रति ब्रसीलस्य उज्वलविजयः 

नैमरः प्रत्यागतः।

नैमर्। 

मयामी> सि गणस्य [C group] तृतीये अन्तिमे च प्रतिद्वन्द्वे स्कोट्लान्टं विरुद्ध्य ब्रसीलस्य उज्वलविजयः - (३-०)। विनीष्यस् जूनियर् लक्ष्यकन्दुकद्वयं सम्पादितवान्। मात्यू कुन्या तृतीयं लक्ष्यं प्राप्य दलस्य अजय्यतां स्पष्टीचकार। ब्रसीलदलः गणवीरतया अपसारणचक्रं [knock out] प्राविशत्।

  आराधकाणाम् आकाङ्क्षाविरामं विधाय  ब्रसीलस्य विश्वोत्तरक्रीडकः नैमरः अस्मिन् प्रतिद्वन्द्वे क्रीडां चकार। ब्रसील-स्कोट्लान्टयोः स्पर्धा ७६ तमे निमिषे आगते आसीत् मात्यू कुन्यस्य स्थाने नैमरस्य पुनःप्रवेशः। ९८१ दिनानां   निवृत्तेः अनन्तरमेव नैमरः ब्रसीलीयगणवेषं धरति। २०२३ ओक्टोबर् १८ तमे दिनाङ्के विश्वचषकस्य योग्यताचक्रे उरुग्वेदलं विरुध्य क्रीडायां प्रतियोगिनां कुक्रीडया व्रणितः सन् निवृत्तः आसीत्।

 वाणिज्यिक एल् पी जी वितरणे नियन्त्रणं निरस्तम्। 

नवदिल्ली> पश्चिमेष्यायुद्धभूमिकायां भारते गार्हिकेतर पाकवायुगोलकवितरणे विधत्तं नियन्त्रणं सर्वकारेण अपाकृतम्। सन्दिग्धतायाः प्राक् कथमासीत् तथा एव वितरणव्यवस्था पुनःस्थापिता।

 विष़िञ्ञं नौकाश्रये सहस्रतमा पण्यमहानौका सम्प्राप्ता।

अनन्तपुरी> केरलस्य विष़िञ्ञं पण्यनौकाश्रये वर्षद्वयेन सहस्रं पण्यमहानौकाः सम्प्राप्य विश्वस्मिन् मुख्यनौकाश्रयेषु अन्यतमः जातः। जूण् २४ तमे एम् एस् सि लूसियाना इति महानौका सहस्रतमा महानौका अभवत्। एतत्कालाभ्यन्तरे २१. १३ लक्षं टि यू मितं भाण्डकानां [Containers] विनिमयः सम्पन्नः।

 वेनस्वलायां बृहद्भूकम्पः। 

१६४ मरणानि, उपसहस्रं आहताः।

बहूनि भवनानि भग्नानि। 

वेनस्वलायां दुरापन्नस्य भूकम्पस्य दृश्यम्।

कारक्कास> दक्षिणामेरिकीयराष्ट्रे वेनस्वलायां गुरुवासरे उषसि जाते महति युगलभूकम्पे बृहन्नाशः अभवत्। प्राथमिकवृत्तान्तमनुसृत्य १६४ जनाः मृताः। उपशतं जनाः आहताः जाताः। 

 एकनिमिषाभ्यन्तरे भूकम्पद्वयं दुरापन्नम्। प्रथमकम्पनस्य ७. १ अङ्कितम्। ३९ क्षणानन्तरं जातः भूकम्पः मापिन्या ७. ५ अङ्कितम्। कारक्कासप्रान्तात् १६८ कि मी दूरे आसीत् प्रभवकेन्द्रम्। सपादशतकाभ्यन्तरे जातः महान् भूकम्पः अस्ति एषः इति यू एस् भौमगवेषणसंस्थया निगदितम्। 

  वेनस्वलाम् अतिरिच्य कोलम्बिया, करीबियद्वीपाः, अरूबा इत्येषु राष्ट्रेष्वपि भूकम्पस्य दुष्प्रभावः जातः।

 विश्वासात् मुख्यः नियमः - केरलस्य उच्चन्यायालयः। 

व्यक्तिनाम्नि प्रतिज्ञावाचनं कृतवतां २१ तद्देशीयसंस्थासदस्यानां शपथः असाधुः कारितः। 

कोच्ची> जनप्रतिनिधिभिः शपथवाचनाय भारतीयशासनसंविधानमेव अनुसन्धातव्यम् इति केरलस्य उच्चन्यायालयेन आदिष्टम्। सदस्यस्थानारोहणवेलायां जनप्रतिनिधिभिः सत्यप्रतिज्ञा  ईश्वरनाम्नि वा दृढप्रतिज्ञा वा करणीया इति भारतस्य नीतिसंहितायां केरलस्य पञ्चायत्तीराज-नगरशासननियमेषु च एवमेव निर्दिष्टम्। तस्य विरुद्धतया व्यक्तीनां, बलिदानिनां, प्रादेशिकदेवतानां च नाम्नि कृता प्रतिज्ञा असाध्वी इति न्यायाधिपेन पि वि कुञ्ञिकृष्णेन स्पष्टीकृतम्। 

  अनन्तपुरी महानगरे २० भाजपा सदस्याः प्रादेशिकदेवतानां बलिदानिनां च नाम्नि, पालक्काट् जनपदे वटक्कञ्चेरि ग्रमसभायां कोण्ग्रससदस्यः भूतपूर्वमुख्यमन्त्रिणः उम्मन् चाण्टि वर्यस्य च नाम्नि कृताः प्रतिज्ञाः निरस्य कृते आदेशे अस्ति न्यायाधिपस्य स्पष्टीकरणम्।

   ततः अनम्तपुर्यां १९ महानगरसभासदस्याः सायं पुनरपि साधुरीत्या सत्यप्रतिज्ञां कृतवन्तः। एकः सदस्यः कारागृहे वर्तते।

 बिश्वनाथ सिन्हा केरलस्य नूतनः मुख्यसचिवः।

अनन्तपुरी>  इदानीं राज्यस्य गृहविभागे अतिरिक्तमुख्यसचिवरूपेण [Additional Chief Secretary] सेवां क्रियमाणं बिश्वनाथ सिन्हां आगामि मुख्यसचिवरूपेण नियोक्तुं केरलस्य मन्त्रिमण्डलेन निर्णीतम्। अस्मिन् मासे ३० तमे दिनाङ्के वर्तमानीनः मुख्यसचिव‌ः ए जयतिलकः सेवानिवृत्तो भविष्यति। तत्स्थाने अस्ति बिश्वनाथस्य नियुक्तिः। 

  १९९२ ऐ ए एस् गणीयः बिश्वनाथ सिन्हा बिहारराज्यीयः अस्ति। केरले बहुषु विभागेषु सचिवपदं वहति स्म।

 भारत-यू एस् व्यापारचर्चा आरब्धा। 

नवदिल्ली> भारत-यू एसोर्मध्ये वाणिज्यसन्धिमालक्ष्य अन्तिमचर्चा मङ्गलवासरे दिल्ल्यां समारब्धा। यू एसस्य व्यापारप्रतिनिधिः जेय्मी सण् ग्रीर् केन्द्रवाणिज्यमन्त्री पीयूष गोयलः च मिथः एव चर्चां कुर्वतः।

 महती वृष्टिः

अरुणाचले आकस्मिकप्रलयः - एका मृता। 

पञ्च तिरोभूताः। 

दिस्पुरं> अरुणाचलप्रदेशे जातया महत्या वृष्ट्या दुरापन्ने आकस्मिकप्रलये एका मृता। शिक्षिका निर्मला गुप्ता नामिका [३५] एव मृता। पञ्च जनाः तिरोभूताः, १७ जनाः आहताः इति अधिकृतैः उक्तम्। १८ गृहाणि भग्नानि। प्रदेशे व्यापकः विनाशः अभवत्।

 फिफा विश्वचषकः।

विमर्शकाणां वक्त्रं पिदधीत CR7।

क्रिस्टियानो रोनाल्डो ।

हूस्टणः> अतीतायां क्रीडायां नष्टचेतन इव आचरितवान् इति आराधकानां प्रतियेगिनां च विमर्शनैः वाक्ताडनमनुभूतवान्  क्रिस्टियानो  रोनाल्डो  नामकः  गतरात्रौ सर्वेभ्यः भृष्टमुत्तरं दत्तवान्। CR7 इति आराधकैः आह्वयमानः पोर्चुगलदलनायकः उस्बकिस्थानं विरुध्य प्रतियोगितायां लक्ष्यकन्दुकद्वयं सम्प्राप्य  प्रतिद्वन्दिनं ५-० इति उज्वलविजयाय नेतृत्वमावहच्च। अतीतेषु ६ विश्वचषकेषु अनुस्यूततया लक्ष्यकन्दुकसम्पादनम्  इति चरित्रोपलब्धिश्च अस्य नाम्नि रचिता।

  रोनाल्डो वर्यस्य लक्ष्ययुगलं ६, ३९ निमिषयोः आसीत्। पोर्चुगलस्य क्रीडकौ सुनो  मेन्डिस् (१७), रफायेल् लियावो (८७) च इतरौ लक्ष्यभेदकौ। पञ्चमं लक्ष्यं तु उस्बकिस्थानीयस्य स्वयंकृतानर्थम् ( ६०) आसीत्। आद्यन्तम् क्रीडाधिपत्यं पोर्चुगलस्य आसीत्। किन्तु एकस्मिन्नवसरे पोर्चुगलस्य लक्ष्यकन्दुकजाले  उस्बकिस्थानेन कृतं लक्ष्यभेदनं दोषारोपात् निरस्तं च।

 पादकन्दुकसिंहस्य अद्य ३९ तमं जन्मदिनम्।

लयोणल् मेस्सी परिवारेण सह।

> विश्वचषकपादकन्दुकस्पर्धायाम् लक्ष्यकन्दुकप्राप्तौ अनन्यथाप्राथम्यप्राप्तेः मधुरास्वादेन सह अद्य लयोणल् मेस्सीवर्यः [Loinal Messi] जन्मदिनमधुरमपि आस्वदते। बुधवासरे - जूण् २४ - मेस्सीवर्यस्य ३९ तमं जन्मदिनमस्ति। योर्गे मेसी-सीलिया कुसीटिनी दम्पत्योः चतुर्षु अपत्येषु तृतीयः लयोणल् मेसी १९८७ जूण् २४ तमे दिनाङ्के अर्जन्टीनायां रोसारियो प्रदेशे भूजातः। त्रयोदशे वयसि स्पेयिनस्य बार्सलोणा पादकन्दुकसमित्यां सदस्यः अभवत्। तत्तु मेसीवर्यस्य कायिकोन्नतेः वर्धनस्य कारणमभवत्। षष्ठे पादकन्दुकविश्वचषकमहोत्सवे क्रीडन् मेसीवर्यः सोमवासरस्य रात्रौ आस्ट्रियां विरुध्य प्रतिद्वन्द्वे लक्ष्यद्वयं सम्पाद्य Top scorer पदं प्राप्तवान्। बाल्यकालसखी 'अन्टणोल्ला रक्कूसो' नामिका अस्ति तस्य पत्नी। त्रीणाम्  अपत्यानां पिता भवति मेस्सी।

 फिफा विश्वचषकः।

फ्रान्स्, नोर्वे च निर्णायकचरणं प्रापतुः। 

किलियन् एम्बापे। 

अल्जीरियायाः प्रथमविजयः। 

यू एस्> विश्वचषकपादकन्दुकस्पर्धायाम् उज्वलविजयेन फ्रान्स्, नोर्वे दलौ निर्णायकचरणं [knock out] प्रापतुः। फ्रान्सः प्रत्युत्तररहितैः त्रिभिः लक्ष्यकन्दुकैः इराखं पराजापयत। नोर्वे तु द्वयं विरुध्य त्रीणि लक्ष्याणि सम्पाद्य सेनगलम् अभ्यभवावयत्। जोर्दानं पराजित्य अल्जीरिया प्रथमविजयं सम्प्राप - [२-१]। 

फ्रान्सस्य क्रीडकः किलियन् एंबापे, नोर्वीयक्रीडकः एर्लिंग हालण्टः च युगलक्ष्यं सम्पादितवन्तौ। एंबापे विश्वचषके १६ क्रीडाभ्यः १६ लक्ष्यकन्दुकानि सम्पाद्य जैत्रयात्रा अनुवर्तते। लक्ष्यसमाहरणे लयणल् मेसी १८ लक्ष्यैः अस्य अग्रे वर्तते।

 भारतं प्रति ११ महानौकाः होर्मुस् सन्ततेरुः। 

नवदिल्ली> युद्धविरामाय सन्धिपत्रे यू एस्-इरानयोः हस्ताक्षरीकरणस्य अनन्तरं भारताय तैलेन्धनं वहन्त्यः ११ महानौकाः होर्मुस् समुद्रसंकोचं सन्ततेरुः इति विदेशकार्यमन्त्रालयेन निगदितम्। भारतीयध्वजं वहन्त्यः १० महानौकाः इदानीमपि गल्फसमुद्रे वर्तन्ते इत्यपि मन्त्रालयवक्तृभिः निगदितम्।

 १३१ पद्मपुरस्काराः समर्पिताः।

द्रौपदी मुर्मू वर्यायाः महानटः मम्मूट्टिः पद्मपुरस्कारं स्वीकरोति। 

 

नवदिल्ली>  अस्य वर्षस्य पद्मपुरस्कारान् चरणद्वयेन राष्ट्रपतिः द्रौपदी मुर्मू समार्पयत्। पुरस्कारसमर्पणस्य  द्वितीयचरणं ह्यः नवदिल्ल्यां सम्पन्नम्। प्रथमचरणं मेय् २५ तमे दिनाङ्के आसीत्। 

  टेन्निस् क्रीडाकुशलः विजय अमृतराजः, गायिका अल्का याग्निक्, अमेरिकायां भारतीयवैद्यकः दत्तात्रेय नूरी, केरलस्य चलच्चित्राभिनेता मम्मूट्टिः, वेल्लाप्पल्लि नटेशः  इत्यादयः पद्मभूषणपुरस्कारान् स्वीचक्रुः। निवृत्तः न्यायाधिपः के टि तोमसः, पि नारायणः इत्यादयः पद्मविभूषणपुरस्कारं स्वीकृतवन्तः। क्रिकट् क्रीडकः रोहित शर्मा, अभिनेता माधवः, नर्तकी कलामण्डलं विमला मेनोन् इत्यादयः पद्मश्रीपुरस्कारान् च मुर्मू वर्यायाः स्वीचक्रुः।

 लख्नावि महान् अग्निप्रकाण्डः।

१५ जनाः दग्धाः। 

लख्नौः> उत्तरप्रदेशस्य राजधानीनगरस्थे अलिगञ्जे 'अनिमेषन्' परिशीलनकेन्द्रे दुरापन्ने महति अग्निप्रकाण्डे १५ जनाः दारुणेन मृताः। परिशीलनकेन्द्रे वर्गे भागं कृतवन्तः छात्राः एव मृतेषु भूरिशः। सप्त जनाः आहताः। 

 सोमवासरे अपराह्णे आसीत् स्तरत्रयोपेते भवनसमुच्चये अग्निबाधा। उच्चस्तरे बाधिता अग्निः नीचस्तरं व्याप्तः। भवनात् उत्प्लुत्य एव बहवः आहताः।

 ब्रिट्रनस्य प्रधानमन्त्री केयर् स्टामरः स्थानं तत्याज।

लण्टनं> ब्रिट्रनस्य प्रधानमन्त्रिपदात् लेबर् पार्टीति प्रशासनपक्षस्य नेतृस्थानाच्च केयर् स्टामरः त्यागपत्रं समर्पितवान्। २०१६ तमे वर्षे संपन्नात् 'ब्रेक्सिट्' नामकात् हितशोधनात् परं राजनैतिकास्थिरतां निपतिते ब्रिटने १० वर्षाभ्यन्तरे स्थानत्यागं कुर्वन् सप्तमः प्रधानमन्त्री भवति केयर् स्टामरः। 

  मेय् मासे सम्पन्ने तद्देशनिर्वाचने लेबर् पार्टी बृहतं प्रत्याघातं अभिमुखीकरोति स्म। सेप्टंबरमासात् पूर्वं राष्ट्रस्य नूतनप्रधानमन्त्री, लेबर् पार्टेः नूतननेता च भवेदिति मन्यते।

 फिफा विश्वचषकः।

अर्जेन्टीना विजिता।

मेसेः चरित्रोपलब्धिः। 

लियोणल् मेसी। 

टेक्सास्>  आस्ट्रियां विरुध्य अर्जन्टीनायाः स्वेदप्रवाहिते प्रतिद्वन्द्वे एकपक्षीयेन लक्ष्यकन्दुकद्वयेन अर्जेन्टीना 'नोकौट्' चक्रं प्राविशत्। लियोणल् मेसेः पादाभ्यामेव लक्ष्यद्वयमपि प्रासूत। अनेन मेसिवर्यः विश्वचषके १८ लक्ष्यकन्दुकानि सम्पाद्य नूतनं अनन्यप्रथमप्राप्तित्वम् अलभत। मिरोस्लोव क्लोस इत्यस्य उपलब्धिरेव मेसिना भग्ना। 

  आस्ट्रियादलस्य अनन्यसाधारणं प्रतिरोधं छेत्तुम् अर्जेन्टीनया बहुस्वेदः प्रवाहितः। क्रीडायाः ३५ तमे निमेषे आसीत् प्रथमलक्ष्यकन्दुकम्। द्वितीयाय द्वितीयार्धस्य दुर्घटनास्थगितपरिहारकालस्य [injury time] अन्तिमनिमिषं यावत् प्रतीक्षते स्म।

आगामि वर्षात् सङ्गणकाधारिता स्नातकपूर्वस्तरीया राष्ट्रियार्हताताप्रवेशपरीक्षा।

प्रश्नपत्रचौर्यकरणवार्ता अनृता।

वार्तं विरुद्ध्य नियमप्रक्रमाः स्वीकरिष्येति NTA।

AI चित्रम्

नवदिल्ली> वैद्यकीयप्रवेशार्थं प्रवर्त्यमानायां स्नातकपूर्वस्तरीयायां राष्ट्रियार्हता-प्रवेशपरीक्षायां महत्त्वपूर्णं परिवर्तनं कर्तुं राष्ट्रियपरीक्षणाभिकरणं (NTA) सज्जतां करोति। वर्तमानकाले कागदाधारितां परीक्षाम् आगामिवर्षात् सङ्गणकाधारिता अन्तर्जालिकपद्धत्यां परिवर्तयितुं प्रक्रियामारभतेति महानिदेशकः अभिषेक सिंहेन न्यवेदयत्।

एतद्विषये उच्चस्तरीयसमितेः प्रस्तावं केन्द्रशासनमन्वमन्यत। तस्मात्कारणात् प्रक्रिया शीघ्रं समारब्धा। अपरत्र पुनर्परीक्षायाः प्रश्नपत्रं टेलिग्राममाध्यमेन

 राममन्दिरे दानराशेः अपक्रमः।

मन्दिरपालनन्याससदस्याः अयोध्यायां भवितव्याः इति एस् ऐ टि।

अयोध्या> अयोध्यायां राममन्दिरे भक्तजनानां दानराशिषु बृहदपक्रमः जातः इत्यारोपणे अन्वेषणम् अभिमुखीक्रियमाणाः रामजन्मभूमि मन्दिरपरिपालनसंस्थायाः धुरन्धराः मन्दिरसेवकाः च अयोध्यायामेव भवितव्याः इति सविशेषान्वेषणसंघेन [SIT] निर्दिष्टम्। 

  रामलल्लाय [बालरामाय] भक्तैः समर्पितानि कनकरजतरत्नानि अपहृतानीति सूच्यते। एतेषां समर्पणसूचनाप्रमाणानानं विषये सुतार्यता न दृष्टा। २०० कोटितः १४०० कोटिरूप्यकाणां भ्रष्टाचारः कृतः इत्येव आरोपः। २०२५ जनुवरि फेब्रुवरिमासयोः महाकुम्भमेलकाले स्यात् अपक्रमः इति सूच्यते। तस्मिन् काले भक्तानां समर्पणानि उच्चरीत्या आसन्।

 फिफा विश्वचषकः।

जर्मनी, स्पेयिनदलयोः विजयः। 

लामिन् यमालः। 

यू एस्> विश्वचषकपादकन्दुकस्पर्धायाम्  अनुस्यूततया द्वितीय जयेन जर्मनीदलं षडङ्कैः 'नोक् औट्' (knock out) नामकमनन्तरचक्रं प्राविशत्। ऐवरीकोस्ट् दलम् एकं विरुध्य लक्ष्यकन्दुकद्वयेन पराजित्य अस्ति जर्मनेः द्वितीयचक्रप्रवेशः। 

  ह्यः रात्रौ सम्पन्ने अन्यस्मिन् प्रतिद्वन्द्वे स्पेयिनदलं सौदी अरेबियायाः उपरि एकपक्षीयैः चतुर्भिः लक्ष्यकन्दुकैः उज्वलं विजयं सम्प्राप। स्पेयिनस्य युवक्रीडकः लामिन् यमालः लक्ष्यकन्दुकवर्षस्य प्रारम्भं कृतवान्। ततः मैक्कल् ओयर् सबालः लक्ष्यद्वयं सम्पाद्य स्पेयिनस्य अधीशत्वम् उद्घोषितवान्। इतरं लक्ष्यकन्दुकं प्रतिद्वन्द्विनः स्वयंकृतानर्थमस्ति।