एष्यन् कायिकवीरतास्पर्धा 

भारतं द्वितीयस्थाने। 

दीर्घदूरधावने गुल् वीरसिंहः अभिलेखेन सुवर्णं प्राप्तवान्। 

सुवर्णपतकं प्राप्तवन्तौ पूजासिंहः, गुल वीरसिंहः, तथा राष्ट्रीयाभिलेखेन रजत प्राप्तवती पारुल् चौधरी च।

गुमी> दक्षिणकोरियायां गुमीनगरे सम्पत्स्यमानायाम् एष्यन् कायिकवीरतास्पर्धापरम्परायां शुक्रवासरे भारतेन त्रीणि सुवर्णपतकानि सम्प्राप्तानि। दीर्घदूरधावकः गुल वीरसिंहः पुरुषाणां पञ्चसहस्रं मीटर् धावने एष्यन् क्रीडाभिलेखनेन [Meet record] प्रथमः भूत्वा सुवर्णपतकं सम्प्राप्तवान्। अनेन अस्यां क्रीडायां तेन सुवर्णद्वयं लब्धम्। 

  महिलानाम् उत्कूर्दने [high jump] पूजा सिंहः, स्पर्धासप्तके [Heptathlon] नन्दिनी अगसरा च सुवर्णं प्राप्तवती। 

   अष्ट सुवर्णानि, सप्त रजतानि, त्रीणि कांस्यानि इति क्रमेण आहत्य अष्टादश पतकैः भारतं द्वितीयस्थाने वर्तते। प्रथमस्थाने १५ सुवर्णानि अभिव्याप्य २६ पतकैः चीनराष्ट्रमस्ति।

 अतिवृष्टिदुष्प्रभावेन केरले ह्यः अष्ट मरणानि। 

सप्ताहे २६ मरणानि; कोटिशः रूप्यकाणां विनाशः।

केरले प्रलयसमाने अतिवृष्टिदुष्प्रभावे लग्नं परिवारः रक्षासेनया अभयस्थानं नीयते। 

अनन्तपुरी> केरलराज्य गतसप्ताहेन अनुवर्तमानेन घोरवर्षेण आहत्य षड्विंशति जनाः मृत्युमुपगताः। शुक्रवासरे राज्यस्य विविधस्थानेषु अष्ट जनाः मृताः। विष़िञ्ञं प्रदेशात् मत्स्यबन्धनाय गतवन्तः नव धीवराः समुद्रे मत्स्यबन्धननौकोत्प्लुतेन अप्रत्यक्षाः अभवन्। 

 राज्यमशेषे निम्नप्रदेशाः जलनिमग्नाः जाताः। शतशः परिवाराः अभयस्थानानि नीताः। शतशः वासगृहाणि भग्नानि जातानि। 

  अतिवृष्ट्या सह प्रचण्डवातस्य च दुष्प्रभावेण बहुत्र विद्युत् स्थगिता। यातायातानि निश्चलीभूतानि। केदाराणि जले निमज्य द्विशतकोट्यधिकरूप्यकाणां कृषिनाशोSभवदिति कृषिविभागेन निगदितम्। 

  अद्य त्रिषु जनपदेषु रक्तजागरूकता निर्दिष्टा। अन्येषां जनपदानां 'पीत'जागरूकता निर्दिष्टा। शनिवासरतः वृष्ट्याः तीव्रता आकुञ्चिष्यते इति पर्यावरणविभागेन सूच्यते।

 विश्वविजेत्र्यौ महिले। 

पटवातनौकया विश्वप्रदक्षिणं कृतवद्भ्यां 'भारतस्य धीरपुत्रिभ्यां' उज्वलं स्वीकरणम्।

तरणी इति पटवातनौकायां विश्वप्रदक्षिणं कुर्वन्त्यौ रूपा दिल्ना च। 

 

गोवा> विश्वविजेतृरूपेण द्वे युवमहिले गोवायां समुद्रतीरं प्राप्तवत्यौ। राष्ट्ररक्षामन्त्री ते अभिवाद्य हस्तदानेन स्वीकरोति। अनन्तरं महिलाशक्तिमधिकृत्य मन्त्रिणः नाविकाधिकारिणां च  प्रशंसावाक्यानि! 

    नौसेनायाःतरणीति पवनचालितनौकायां समुद्रसञ्चारेण  भूमिं प्रदक्षणीकृत्य द्वे अपि गुरुवासरे सायं गोवायाः तटे अवातरताम्। नौसेनायां लफ्टनन्ट् कमान्डर् पदीये केरलीया के दिल्ना तमिलनाट् राज्यीया ए रूपा च एतादृशसाहसिककृत्याय उद्युक्तवत्यौ। एते भारतस्य धीरपुत्र्यौ इति रक्षामन्त्रिणा राजनाथसिंहेन प्रशंसितम्। 

  गतवर्षे ओक्टोबर् द्वितीये दिनाङ्के  गोवातः एतयोः समुद्रयात्रा आरब्धा। मासाष्टभिः एते चतुर्भिः भूखण्डैः, त्रिभिः समुद्रैः , त्रिभिः भूकोटिभिः च पञ्चाशत् सहस्रं किलोमीटर् दूरं पावनचालितनौकया यात्रां कृतवत्यौ। 

  गोवाराज्यस्य मुख्यकार्यदर्शी डो वि कान्डवेलुः, सायुधसेनायाः स्वास्थ्यसेवा निदेशिका वैस् अड्मिरल् पदीया आरती सरिनः, दक्षिण नाविक कमान्ड् अधिकारी वैस् अड्मिरल् पदीयः वि श्रीनिवासः, प्रशस्तः पटवातनौकासञ्चारी अभिलाष् टोमी इत्यादयः प्रमुखाः स्वीकरणसमारोहे भागं कृतवन्तः।

 जम्मु काश्मीरे द्वौ लष्करभीकरौ निगृहीतौ। 

श्रीनगरं> जम्मु काश्मीरस्य षोपियानप्रदेशात् आयुधसञ्चयेन द्वौ लष्कर् ई तोय्बाभीकरौ सीमारक्षासेनया निगृहीतौ। द्वौ ए के ५६ शतघ्निनौ, द्वे 'ग्रनेड्' नामकस्फोटके, इतराणि स्फोटकसम्भाराणि च निगृहीतानि।

 पण्यमहानौकायाः दुर्घटना राज्यमहाविपत्। 

अनन्तपुरी>  आरबसमुद्रे कोच्ची तीरसमीपं एम् एस् सि - एल्सा ३ इति पण्यमहानौकायाः निमज्जनेन जाता दुर्घटना राज्यस्तरीयविपद्रूपेण राज्यप्रशासनेन विज्ञापिता। दुर्घटनया ये उपजीवनरहिताः अभवन् तेषां धीवराणां परिवारेभ्यः सहस्ररूप्यकाणि तथा षट् किलोमितं  निःशुल्कान्नपरिमाणं च दातुं निर्णयः जातः। मुख्यमन्त्रिणा पिणरायि विजयेन ह्यः समाकारिते वार्ताहरसम्मेलने  आसीदिदम् उद्घोषणम्।

 भारतेन सह चर्चायै सज्जमिति पाकिस्थानम्।

शहबास शरीफः। 

टेह्रान्> काश्मीरं, जलोपभोगः, व्यापारः इत्यादीनां दीर्घकालीयसमस्यानां परिहाराय भारतेन सह चर्चायै सज्जमिति पाकिस्थानस्य प्रधानमन्त्री शहबास शरीफः प्रोक्तवान्। तेन कृते इरानसन्दर्शने राष्ट्रपतिः मसूद पेसेष्की इत्यनेन सह विधत्ते वार्ताहरसम्मेलने भाषमाणः आसीत् शहबासः। पाकिस्थानं शान्तिमभिलषतीति तेनोक्तम्। 

  भारतेन सह संघर्षे पाकिस्थानम् अनुकूलितवत् तुर्कीराष्ट्रं सम्पश्यानन्तरमासीत् शहबासस्य इरानं प्रति  प्राप्तिः।

 वंगसमुद्रान्तराले न्यूनमर्दः - अतिवृष्टिरनुवर्तिष्यते।

अनन्तपुरी> वंगसुद्रान्तराले नूतनतया न्यूनमर्दः जातः इत्यतः पञ्च दिनानि यावत् केरले तथा  तमिलनाटस्य कतिपयप्रदेशेषु च अतिवृष्टिः अनुवर्तिष्यते इति केन्द्रपर्यावरणविभागेन निगदितम्। 

  केरले अद्य चतुर्षु जनपदेषु राक्तजागरूकता निर्दिष्टा। इतरेषु जनपदेषु 'ओरञ्ज्' जागरूकता च।

 काश्मीरस्य सीमाप्रदेशेषु विद्यमानेषु भारतप्रान्तेषु अनुकृत्यभ्यासः  आयोक्ष्यते। 

  नवदिल्ली> ओपरेषन् सिन्दूरं समाप्य सप्ताहान्तरं काश्मीरस्य सीमाप्रदेशेषु विद्यमानेषु भारतप्रान्तेषु अनुकृत्यभ्यासः ( moc drill ) आयोक्ष्यते। 

हरियाणासर्वकारः २२ (द्वाविंशतिः) जनपदेषु ओप्परेषन् षील्ड् इति नामनि अनुकृत्यभ्यासः आयोक्ष्यते इत्यस्ति प्रतिवेदनम्। मेय् मासस्य एकोनत्रिंशत् दिनाङ्के भवति कार्यान्वयनम्।

 नूतनरीत्या गासायां साहाय्यवितरणं समारब्धम्। 

प्रतिकूलतया हमासः। 

डेयर् अल् बला> गासायाम् इस्रयेलस्य अङ्गीकारेण नूतनं साह्यवितरणसम्प्रदायः प्रवर्तनमारब्धः। अमेरिक्कायाः अनुग्रहेण प्रवर्तमानस्य 'जि एछ् एफ्' [The Gassa Humanitarian Foundation] इत्यस्य संघटनस्य नियन्त्रणे भवतीदं साह्यवितरणम्। 

  निश्चितस्थानेषु वितरणकेन्द्राणि स्थापयित्वा निश्चितकालाय भक्ष्यवस्तूनि शुचित्वपालनसम्भारान् च प्रतिपरिवाराय ददाति। वितरणकेन्द्राणि इस्रयेलसैन्यस्य निरीक्षणे भविष्यन्ति। 

  संयुक्तराष्ट्रसंघटनस्य प्रतिकूलतामतीत्य जि एछ् एफ् संघटनेन चत्वारि केन्द्राणि सोमवासरे आरब्धानि। किन्तु एतानि इस्रयेलसैनिकशिबिराणां समीपे एव।

  नूतनसंविधानेन सह सहकारिता न कार्या इति हमासेन पालस्तीनीयाः निर्दिष्टाः। गासीयान् बलात्कारेण अन्यत्र नेतुमुद्यमः भवत्येष इति हमासीयः आरोपयति। २३लक्षं गासीयेभ्यः भक्षणप्रदानाय एतत्संविधानमपर्याप्तमिति तेषाम् आरोपणम्।

 एष्यीयकायिकक्रीडा

गुल् वीरसिंहस्य सुवर्णपतकम्। 

१०,०००मीटर् धावने सुवर्णं प्राप्तवान् गुल वीरसिंहः। 

गुमी> दक्षिणकोरियायां गुमिनगरे आरब्धायाम् एष्यीयकायिकक्रीडायां प्रथमे दिने भारतस्य सुवर्णशोभा। पुरुषाणां दशसहस्रमीटर् मिते धावनप्रतिद्वन्द्वे उत्तरप्रदेशीयः गुल् वीरसिंहः प्रथमस्थानं प्राप्तवान्। २८ मिनिट् ३८. ६३ सेकन्ड् समयं स्वीकृत्य आसीत् तस्य सुवर्णप्राप्तिः। रजत-कांस्यपतके जापानक्रीडकाभ्यां प्राप्ते।

  २० कि मी  पदचलनस्पर्धायां तमिलनाटनिवासी सेर्विन् सेबास्ट्यनः  भारताय कांस्यपतकं प्राप्तवान्। एकहोराधिक २१ मिनिट् १३. ९० सेकनिड् समयः चलनसमाप्त्यर्थं तेन स्वीकृतः।

 दक्षिणपूर्वेष्याराष्ट्रेेषु कोविड्रोगः व्याप्यते। 

भारते  कोविड्बाधिताः सहस्रमतीताः। 

नवदिल्ली> एष्याभूखण्डस्य दक्षिणपूर्वीयराष्ट्रेषु कोविड् वैराणुः व्याप्यते इति केन्द्रस्वास्थ्य-कल्याणमन्त्रालयेन निगदितम्। भारते कोविड्बाधितानां संख्या नवाधिकसहस्रमभवत्। 

  राष्ट्रे अधिकतमं कोविड्बाधिताः केरले वर्तन्ते  - त्रिंशदधिकचतुश्शतम्। महाराष्ट्रं - २०९, दिल्ली - १०४, गुजरात् - ६९, कर्णाटकं -४७ इत्येवं इतरेषु राज्येषु कोविड्बाधिताः। राजस्थानं, यू पि, वंगराज्येष्वपि कोविड्बाधा दृश्यते। किन्तु राष्ट्रे अष्टादशवयस्कातीताः सर्वे प्रतिरोधवाक्सिनं स्वीकृतवन्तः इत्यतः आशङ्कायाः स्थानं नास्तीति स्वास्थ्यमन्त्रालयेन सूच्यते।

 एष्यन् कायिकक्रीडा दक्षिणकोरियायां समारब्धा। 

गुमी> एष्यायाः कायिकस्पर्धापरम्परा दक्षिणकोरियायां गुमी इत्यत्र  कुजवासरे समारब्धा। पञ्चदिनात्मिकायाम् अस्यां वीरताप्रदर्शनस्पर्धायां भारतात् नवपञ्चाशत् क्रीडकाः भागं कुर्वन्ति। विश्ववीरतास्पर्धायाः भागभाक्त्वम् एतां परम्परामाश्रीयते इति एष्याकीडायाः प्राधान्यम्।

 "भीकरतां विरुध्य अग्रे चरन्तु" - पाकिस्थानीयान् प्रति मोदिनः आह्वानम्। अहम्मदाबादः> ये स्वराष्ट्रे भीकरतां प्रवर्धयन्ति तान् विरुध्य युगपत् अग्रे चरन्तु इति भारतस्य प्रधानमन्त्री नरेन्द्रमोदी पारिस्थानजनतां प्रति आह्वयत्। गुजराते  पाकिस्थानस्य सीमा कच्छ् इत्यत्र भुज् प्रदेशे पञ्चाशत् सहस्राधिक कोटिरूप्यकाणां विविधाः परियोजनाः उद्घाटयन् भाषमाणः आसीत् नरेन्द्रमोदी। 

 "भीकरता इति युष्माकं सर्वकारस्य सैन्यस्य च धनागममार्गः अस्ति। एतत् प्रतिरुध्य प्रवर्तिष्यते तर्हि सुखेन सन्तोषेण च शान्तिपूर्णं जीवनं साध्यमस्ति। नो चेत् अस्माकं  नालिकाशस्त्राणि अभिमुखीक्रियन्ताम्' -  प्रधानमन्त्री संस्मारितवान्।

  भारतमद्य विश्वस्मिन् चतुर्थे आर्थिकशक्तौ सम्पन्ने युष्माभिः किं लब्धमिति पाक्जनतायाः दारिद्र्य-निरक्षरत-जीवनसङ्कटारक्षितावस्थादिकमुद्दिश्य   नरेन्द्रमोदी अपृच्छत्। 'ओपरेषन् सिन्दूरं' पाकिस्थानाय प्रबोधनमिति मोदिना स्मारितम्।

 महानौकानिमज्जनम्

३४ वस्तुधारकाणि कोल्लं समुद्रतटं सम्प्राप्तानि।

कोल्लं तटे प्राप्तेषु धारकेषु अन्यतमम्। 

कोल्लं> शनिवासरे कोच्चिसमीपे आरबसमुद्रे निमग्नायाः एम् एस् सि एल् सि -३ नामिकायाः  महानौकायाः बहिर्गतानि ४० वस्तुधारकेषु [containers] ३४ संख्याकानि कोल्लं समुद्रतीरं सम्प्राप्तानि। जनपदाधिकारिणः नेतृत्वे आरक्षकसंघः इतरे अधिकारिणश्च स्थानं प्राप्य अनन्तरप्रक्रमान् स्वीकृतवन्तः। 

  कोल्लं जनपदस्थेषु चवरा, परिमणं, शक्तिकुलङ्ङरा प्रदेशस्थेषु तीरेषु आसन् वस्तुधारकाणि प्राप्तानि। धीवराणां साहाय्येन आरक्षकैः तानि सुरक्षितस्थानं नीतानि। कतिपयेषु धारकेषु शुष्काणि चायपत्राणि [Green Tea], मुद्रणार्थमुपयुज्यमानानि कागदभाण्डानि [News print roll], वस्त्राणि च आसन्निति निगद्यते।

 वर्षाकालदुष्प्रभावः - केरले षट् मरणानि। 

व्यापकनाशः। 

कोच्ची> केरले द्वित्राणां दिनानाम् अतिवृष्टिकारणात् षट् जनाः मृत्युमुपगताः। सर्वत्र व्यापकतया कष्टनष्टानि जातानि। 

  अतितीव्रवृष्ट्या चण्डवातेन च खण्डितात् विद्युत्पंक्तितः विद्युताघातेन कोष़िक्कोटे द्वौ छात्रसोदरौ, मलप्पुरं जनपदे कश्चन उच्चतरछात्रश्च अकालमृत्युं प्रापुः। वैद्युतपङ्क्तिः प्रभञ्ज्य जले पतितमासीत्। वटकरप्रदेशे चलन्त्याः द्विचक्रिकायाः उपरि केरवृक्षं पतित्वा ६४ वयस्कः मृतः। 

  कोष़िक्कोट् प्रदेशे जलपूर्णां कुल्यां पतित्वा तमिलनाट् निवासी मृतः। इटुक्की जनपदे वृक्षखण्डं पतित्वा मध्यप्रदेशीया मृत्युमुपगता। 

  आकेरलं बहुत्र वृक्षप्रपातेन बहूनि भवनानि विशीर्णानि। मृत्प्रपातेन गतायातसुविधा स्थगिता।

 केरलमभिव्याप्य चतुर्षु राज्येषु उपनिर्वाचनं विज्ञापितम्। 

मतदानं जूण् १९ ; मतगणना  जूण् २३। 

नवदिल्ली> राष्ट्रस्य पञ्चसु विधानसभामण्डलेषु जूण् मासस्य एकोनविंशे दिनाङ्के उपनिर्वाचनं विधातुं केन्द्रनिर्वाचनायोगेन निर्णीतम्। व्यवहारनियमः प्राबल्यमागतः। 

 गुजराते काडि, विसवदरम् इति मण्डलद्वये, केरलं, पञ्चाबः, पश्चिमवंगः इत्येतेषु राज्येषु यथाक्रमं निलम्बूरं, लुधियाना, कालिगञ्च् इति  एकैकस्मिन् मण्डले च उपनिर्वाचनं विधास्यति। मतगणना त्रयोविंशे दिनाङ्के भविष्यति।

 आरबसमुद्रे वाणिज्यमहानौका न्यमज्जत्। आशङ्कायां केरलतीरः।

महानौकायाः २४ कर्मकराः नौसेनया रक्षिताः।

आरबसमुद्रे निमज्जा महानौका शनिवासरे अवसर्पितावस्थायाम्।

 

कोच्ची> केरलतीरात् अष्टत्रिंशत् 'नोटिकल् मैल्' दूरे आरबसमुद्रे लैबीरियाराष्ट्रस्य स्वामित्वे वर्तमाना पण्यमहानौका 'एम् एस् सि एल्सा - ३' नामिका समुद्रे निमज्जा। महानौकायाः आहत्य २४ कर्मकरानपि भारतस्य नौसेना संरक्ष्य कोच्चीमानयत्। 

  तूत्तुकुटी - विष़िञ्ञं - कोच्ची - मङ्गलुरु समुद्रमार्गेण सामान्येन सेवां क्रियमाणा महानौका भवत्येषा। महानौकायाम् आहत्य त्रिचत्वारिंशदधिक षट्शतं [६४३] धारकाणि  [containers] आसन्। तेषु दुर्घटनाकारकाणि रासवस्तूनि , तैलेन्धनानि च अन्तर्भवन्तीति सूच्यते। अतः   अनन्तपुरीतः कोष़िक्कोट्पर्यन्तं समुद्रतीरः  आशङ्कायां वर्तते। शनिवासरे महानौकायाम् अवसर्पितायां ४० धारकाणि समुद्रम् उत्पात्य स्यन्दन्ते स्म। १२ धारकेषु हानिकराणि रासवस्तूनि सन्ति। महानौकायाः इन्धनं समुद्रे व्यापृतं वर्तते। अतः एषु प्रदेशेषु  मत्स्यबन्धनं निरुद्धमस्ति।

 वर्षाकालः निश्चितकालात्पूर्वमेव सम्प्राप्तः। 

अनन्तपुरी> अतिवृष्ट्या चण्डवातेन समं दक्षिणपश्चिमवर्षाकालः [मणसूण् वाताधिष्ठितवर्षाः] व्यवस्थितसमयात् अष्टदिनेभ्यः पूर्वं केरलं सम्प्राप। दिनद्वयम् अतितीव्रवृष्टेः सम्भावना विद्यते इति पर्यावरणविभागेन निगदितम्। त्रिंशद्दिनाङ्कपर्यन्तं महती वृष्टिर्भविष्यति। 

  रविवासरे मलप्पुरं, कोष़िक्कोट्, कण्णूर्, कासरगोड् जनपदेषु राक्तजागरूकता निर्दिष्टा। इतरेषु जनपदेषु ओरञ्चजागरूकता अपि विहिता।

 राहुल गान्धी जम्मु काश्मीरं सन्दृष्टवान्। 

पूञ्च् निवासिनां कृते आश्वासवचनानि प्रदत्तानि। 

पूञ्च् प्रदेशस्थैः छात्रैः सह राहुल गान्धी । 

जम्मु काश्मीरं> पाकिस्थानस्य आक्रमणे ये वासस्थानानि विनाश्य सङ्कटमनुभवन्ति, ये व्रणिताः जाताः तान् समाश्वासयितुं राष्ट्रस्य विपक्षनेता राहुल गान्धी गतदिने जम्मु काश्मीरस्य सीमाग्रामान् सन्दृष्टवान्। 

  पाकिस्थानस्य अग्निशस्त्राक्रमणात् भयचकितान् पूञ्च् निवासिनः  बालकान् राहुलः समाश्वासितवान्। द्वौ छात्रौ अभिव्याप्य अष्टविंशति जनाः अत्र मृताः। उपसप्ततिजनाः क्षताः जाताः। तान्  विपक्षनेता आश्वासवाक्यैः स्वप्रेमं प्रकाशितवान्।

 शुभमान् गिलः निकषक्रिकट् दलस्य नायकः। 

शुभमान् गिलः। 

मुम्बई> भारतस्य निकषक्रिकट् दलस्य नायकरूपेण श्रेष्ठक्रीडकः शुभमान् गिलः नियुक्तः। मुख्यनिर्णेता अजित् अगार्करः नियुक्तिमुद्घोषितवान्। 

  निकषस्पर्धायाः निवृत्तस्य रोहित शर्मणः स्थाने अस्ति गिलस्य नियुक्तिः। जूण् विंशे  दिनाङ्के आरभ्यमाणायाम्  इङ्लाण्टं विरुध्य निकषस्पर्धापरम्परायां गिलस्य नेतृत्वे भारतं क्रीडिष्यति। 

  ऋषभपन्तः उपनायको भविष्यति। अष्टादशाङ्गोपेतं दलमपि विज्ञापितम्।

  हार्वर्ड्-विश्वविद्यालये विदेशीयविद्यार्थिनां प्रवेशं निरुद्ध्य ट्रम्पस्य प्रशासनम्।

   ट्रम्प्-शासनस्य नवीनया नीत्या हार्वर्ड्-विश्वविद्यालये अध्ययनं कुर्वन्तः विदेशीयाः छात्रेभ्यः प्रवेशं लब्धुं न शक्नुवन्ति। भारतदेशात् अपि आगतान् छात्रान् इयं नीतिः प्रबाधते।

  अमेरिकादेशे तेषां छात्र-वीसाधिकारः नष्टः भविष्यति चेत् तैः अन्यस्मिन् संस्थायां स्थानपरिवर्तनं करणीयम् इति सूचना अपि प्रदत्ता। अमेरिकस्य गृहमन्त्रालयस्य अनुसारं, हार्वर्ड्-विश्वविद्यालयः यहूदविद्वेषं चीनदेशस्य कम्युनिष्ट्-पार्टीसंगं च प्रोत्सहयति इत्यपवादाः अपि दत्ताः। 

  ट्रम्प्-शासनम् आदेशं दत्तवन् यत् हार्वर्ड्-विश्वविद्यालयेन तत्र विद्यमानानां सर्वेषां विदेशीय विद्यार्थिनां विवरणानि त्रिदिनेभ्यः अन्तः समर्पयितव्यानि। हार्वर्ड्-विश्वविद्यालयः स्पष्टीकरणं दत्तवान् यत् एषा नीतिः न विधिसम्मता, अपि तु वैयक्तिकप्रतिकारस्य रूपेण कृतः अन्यायः। शासनस्यायं निर्णयः सहस्रशः छात्रान् प्रबाधते इति।

 पोलण्ट् कायिकक्रीडा

नीरज चोप्राय रजतम्। 

वार्सा> पोलण्टराष्ट्रे जानुस् कुसोसिन्की कायिकक्रीडास्पर्धासु कुन्तप्रक्षेपणे भारतस्य नीरज चोप्रः रजतपतकं सम्प्राप्तवान्। तस्य षष्ठे उद्योगे ८४. १४ मीटर् दूरं प्रक्षिप्य एव द्वितीयस्थानलब्धिः। प्रथमस्थानं जर्मनेः जूलियन् वेबर् प्राप। ८६. १२ मीटर् सः प्रक्षिप्तवान्। 

 गतसप्ताहे दोहायां डयमण्ट् लीग् कायिकक्रीडायां नीरजः ९०. २३ मीटर् प्रक्षिप्य द्वितीयस्थानं प्राप्तवान् आसीत्। तादृशं प्रागत्भ्यं प्रदर्शयितुं पोलण्टे तेन न शक्यते स्म।

 गासायां लक्षशः जनाः दौर्भिक्षामनुभवन्ति। 

युद्धविरामाय इस्रयेलस्य उपरि संपीडनम्। 

गासा सिटी> गासां संगृहीतुं इस्रयेलेन युद्धे अनुवर्तिते लक्षशः जनाः भोज्यवस्तूनि अभिव्याप्य अवश्यवस्तुभ्यः महान्तं क्लेशमनुभवन्ति। भोज्यानि पानजलानि च अलब्ध्वा बालकाः मृतप्रायाः वर्तन्ते। महिलानां शिशूनां च रोगप्रतिरोधशक्तिः विनष्टा। 

  मार्चमासतः गासायाम् इस्रयेलेन सम्पूर्णोपरोधः विधत्तः इत्यस्मादेव जनानां सङ्कटस्य हेतुः। नवसहस्रं बालकाः इदानीं पोषकाहारस्य क्षयेन परिचर्यायां वर्तन्ते इति यूणिसेफ् संस्थया सूच्यते। किन्तु तादृशाः ७१,००० बालकाः सन्तीति अन्यया संस्थया सूच्यते।

 केरले अतितीव्रवर्षः भविष्यति। 

जनपदद्वये रक्तजागरूकता, नवसु जनपदेषु ओरञ्च् जागरूकता।

अनन्तपुरी> मण्सूण् वर्षाकालस्य प्रारम्भतया केरले अतितीव्रवर्षः कल्पितः। शनिवासरे कण्णूर् कासरगोड् जनपदयोः अतितीव्रवर्षस्य  रक्तजागरूकता उद्घोषिता। अनन्तपुरीमभिव्याप्य नवसु जनपदेषु ओरञ्च् जागरूकता प्रख्यापिता। 

  इतःपर्यन्तं आकेरलं तीव्रवर्षः अनुभूयते। वर्षदुष्प्रभावे द्वौ मृत्यू अभवताम्। बहुत्र झंझावातेन कष्टनष्टानि अजायन्त।

 संयुक्तराष्ट्रसंघे भारतस्य कठोरं प्रत्युत्तरम् ‘पाकिस्थानः भीकरवादिनः रक्षति’ इति आरोपः।

   संयुक्तराष्ट्रसंघे पाकिस्थानस्य प्रतिनिधिना सिंधुनदी-जलसन्धिं उद्धृत्य "जलम् जीवनम् अस्ति, न तु युद्धाय आयुधम्" इत्युक्ते, भारतः तीव्रं प्रत्युत्तरं प्रदत्तवान्।

    भारतेन उक्तम् - पाकिस्थानः दिर्घकालादारभ्य प्रायेण- भीकरप्रवर्ततेन भारतं पीडयति। मुम्बई-आक्रमणं, पुलवामा-हिंसा च एतस्य स्पष्टानि प्रमाणानि। भारतस्य विकासं विघ्नं कर्तुम् एव पाकिस्थानस्य प्रयत्नः। भीकारान् प्रति आश्रयं दत्त्वा, पाकिस्थानः  तान् रक्षति, अपितु सामान्यजनानपि तेषां समं पश्यति। अतः, जन-संरक्षणे येषां दृष्टिः विकृतः, तेषां सामान्यजनरक्षणस्य विषये वक्तुम् अर्हता नास्तीति भारतस्य प्रतिनिधिः संयुक्तराष्ट्रसंघे अवदत्।

 नूतनीकृतानि १०३ रेल् निस्थानानि राष्ट्राय समर्पितानि। 

नवदिल्ली> अमृत भारताभियोजनायाम् अन्तर्भाव्य नूतनीकृतानि १०३ रेल् निस्थानानि प्रधानमन्त्री नरेन्द्रमोदी राष्ट्राय समार्पयत्। 

  अभियोजनायाः प्रथमसोपानमेव गुरुवासरे उदघाटयत्। अधिकतमानि निस्थानानि उत्तरप्रदेशे विद्यन्ते - १९। केरलात् त्रीणि निस्थानानि नूतनीकृतानि -वटकरा, चिरयिन्कीष़्,माहि। आराष्ट्रं १३३७ रेल् निस्थानानि नूतनीकरिष्यन्ति।

 यू एसे द्वौ इस्रयेलीयौ स्थानपतिकार्यकर्तारौ [Embassy Officers] भुषुण्डिप्रयोगेण मृतौ। 

वाषिङ्टणः> अमेरिकायां वाषिङ्टणे जूतीयवस्तुप्रदर्शनालयस्य  [Museum] समीपं इस्रयेलस्य स्थानपतिकार्यालयस्य द्वौ अधिकारिणौ भुषुण्डिप्रयोगेण मृतौ। प्रादेशिकसमयानुसारेण बुधवासरे सायमासीदियं दुर्घटना। यू एसे जूतसमुदायेन आयोजिते कार्यक्रमे भागमूढ्वा निवृत्तान् चतुरः लक्ष्यीकृत्य  भुषुण्डिप्रयोगः कृतः। गासायाम् इस्रयेलस्य सैनिकाक्रमणस्य भूमिकायामासीत् आक्रमणम्। 

  अपराधीति सन्दिह्यमानः षिकागोनिवासी एलियास् रोड्रिग्स् नामकः त्रिंशत् वयस्कः निगृहीतः।

 कन्नडसाहित्यकारी बानु मुष्ताख् बुक्कर् पुरस्कारेण समादृता।

बानु मुष्ताखः बुक्कर् पुरस्कारेण। 

लण्टनं> कन्नडसाहित्यकारी सामाजिक प्रवर्तका नियमवादिनी च बानु मुष्ताख् अस्य वर्षस्य बुक्कर् अन्ताराष्ट्रपुरस्कारेण समादृतवती। तस्याः १२ कथानां समाहारः 'हार्ट् लाम्प्' इत्यस्य ग्रन्थस्य आङ्गलभाषानुवादमवलम्ब्य कन्नडभाषायै इदंप्रथमतया इयं पुरस्कारलब्धिः।

 छत्तीसगढे प्रतिद्वन्द्वः 

२७ मावोवादिनः निहताः। 

एकस्य सुरक्षाभटस्य वीरमृत्युः।

नारायणपुरं> छत्तीसगढस्य बस्तरक्षेत्रे सुरक्षासेनया सह जाते प्रतिद्वन्द्वे २७ मावोवादिनः निहताः। हतेषु मावोवादिनः समुन्नतनेता बसवराजः [६०] अन्तर्भवतीति सूच्यते। 

 संघट्टने छत्तीसगढस्य आरक्षकसेनायाः 'डि आर् जि' विभागस्य एकः भटः वीरमृत्युं प्राप।

 केरले +२ परीक्षापरिणामः अद्य ज्ञायते। 

अनन्तपुरी> उच्चतर - कर्माधिष्ठित उच्चतरविद्यालयानां [Higher secondary - Vocational Higher secondary schools] द्वितीयवर्षपरीक्षाणां परिणामम् अद्य सायं त्रिवादने शिक्षामन्त्री वि शिवन्कुट्टिः  उद्घोषयिष्यति। सार्धचतुर्लक्षं विद्यार्थिनः फलाकांक्षिणः वर्तन्ते।

 दिल्ल्याम्  अत्युष्णस्य पश्चात् धूलीवातः वृष्टिः च।

   दिल्ल्यां मासेषु अत्युष्णस्य विरामः-  वातावरणे झटिति जातः  व्यत्यासः जनान् पीडयति। धूलीवातः वृष्टिः च अधिकं क्लेशम् उत्पादयत्। ह्यः प्रातः ४०° इत्यासीत् तापमानः। सायं काले धूलीवातः शक्ता वृष्टिः च अभवताम्। होरायां ४१ - ७९ कि.मी वेगेन आसीत् वातः। सायं ७:४५ - ८:३० समयेषु दिल्लीप्रदेशेषु सामान्येन सर्वत्र वातः ववौ।

 पाक्भीकरतानाच्छादनाय 

'नयतन्त्रशस्त्रक्रिया' समारब्धा। 

नवदिल्ली> पाकिस्थानस्य भीकरतासंवर्धननयम् अधिकृत्य ३३ राष्ट्राणि प्रति विवृणोतुं  सप्तसंख्याकस्य भारतीयसंसद् प्रतिनिधिसंघस्य सन्दर्शनपर्यटनं समारब्धम्। 

  शिवसेनादलस्य श्रीकान्त एकनाथ षिन्डे वर्येण नीयमानः संघः अद्य यू ए ई राष्ट्रं प्रस्थितः। मेय् ३१ दिनाङ्कपर्यन्तं दीर्घितायां यात्रायां यू ए ईम् विना कोङ्गो सियेरा लियोण् लैबीरिया इत्येतानि राष्ट्राणि संघेन सन्द्रक्ष्यन्ते।

 महाराष्ट्रे ५६ जनाः कोविड् बाधिताः।

मुम्बई> महाराष्ट्रे सप्ताहद्वयेन कोविड्वैराणुबाधितानां संख्या ५६ अभवत्। केरलं तमिलनाडु राज्यद्वये अपि अनेके  कोविड्बाधिताः वर्तन्ते। राष्ट्रमशेषं २५७ कोविड् प्रकरणानि प्रस्तुतानि सन्तीति केन्द्र स्वास्थ्यमन्त्रालयेन निगदितम्। 

  भारतं विना चीनः, सिङ्गपुरं, होङ्कोङ् राष्ट्रेष्वपि कोविड् प्रकरणानि अधिकतया वर्तन्ते।

 भारतीयः आणवशास्त्रज्ञः डो एम् आर् श्रीनिवासः दिवंगतः। 

ऊट्टी> राष्ट्रस्य प्रमुखः अणुशास्त्रज्ञः आणवोर्जकम्मीशन् संस्थायाः पूर्वाध्यक्षः च डो एम् आर् श्रीनिवासः [मालूर् रामस्वामि श्रीनिवासः - ९५] ऊट्टिस्थे भवनात् दिवंगतः।

  १९३० तमे वर्षे बङ्गलुरौ भूजातः एम् आर् श्रीनिवासः १९५५ तमे वर्षे आणवोर्जविभागे उद्योगस्थः अभवत्। ततः डो होमि जे भाभावर्येण सह सेवायां राष्ट्रस्य प्रथमम् 'आणव रियाक्टर्' अप्सरायाः निर्माणे भागं स्वीचकार। संवत्सरेषु अतीतेषु राष्ट्रस्यआणवनयरूपीकरणे मुख्यांशं वहति स्म। १९८७ तमे वर्षे भारताणवोर्ज आयोगस्य अध्यक्ष अभवत्। 

 Nuclear power corporation of India इत्यस्य प्रथमः अध्यक्ष आसीत्। राष्ट्रस्य पद्मश्री पद्मविभूषण पुरस्काराभ्यां समादृतः। अस्य अन्त्येष्टिक्रियाः गुरुवासरे वेल्लिङ्टणे विधास्यन्ति।

 विख्यातः ज्योतिश्शास्त्रज्ञः डो जयन्त नार्लिकरः दिवंगतः। 

पूनै> होय्लि-नार्लिकर गुरुत्वाकर्षणसिद्धान्तेन अन्ताराष्ट्रप्रसिद्धिमाप्तवान् भारतीयः ज्योतिश्शास्त्रज्ञः डो जयन्त नार्लिकरः दिवंगतः। कुजवासरस्य प्रत्युषसि पूणैस्थे स्वभवने आसीत् अन्त्यम्। ८६ वयस्कः आसीत्। 

  केंब्रिड्ज् विश्वविद्यालये सर् फ्रेड् होय्ली इत्यनेन शास्त्रज्ञेन सह प्रपञ्चस्य उत्पत्तिमधिकृत्य विविधानि गवेषणानि डो जयन्तः कृतवान्। 'होय्लि-नार्लिकर गुरुत्वाकर्षणसिद्धान्तम्' इति नूतनं सिद्धान्तं प्रपञ्चोत्पत्तेः  नूतनसिद्धान्तत्वेन अङ्गीकृतम्। 

  १९३८ तमे वर्षे महाराष्ट्रे लब्धजन्मा जयन्त नार्लिकरः १९६५ तमे वर्षे पद्मभूषणपुरस्कारेण समादृतः। २००४ तमे पद्मविभूषणं च तेन लब्धम्।

 गासायाम् इदानीन्तन अवस्था असहनीया। इस्रायेलं प्रति क्रयविक्रयचर्चां समाप्य यु के स्थानपतिः प्रत्याहूतः।

   लण्डन्> गासायां शताधिकजनानां जीवहानेः कारणभूतेन नूतनाक्रमणेन  इस्रायेलं विरुध्य अन्ताराष्ट्रियस्तरे सम्मर्दः सुदृढः अभवत्। इस्रायेलस्य मिथः क्रयविक्रयचर्चा समापिता इति यु के राष्ट्रेण प्रतिवेदिता। इस्रायेलस्य दूतः प्रत्याहूतः च।

 सर्वेषां अभयं दातुं भारतं किं वा धर्मशाला?

१४० कोटि जनाः निवसन्त्यत्र - सर्वोच्च न्यायालयः

    भारते अभयं प्रार्थितस्य श्रीलङ्कादेशीयस्य याचिकां तिरस्कृत्य भारतस्य सर्वोच्चन्यायालयेन एवम् अवदत् यत् सर्वान् विदेशीयान् स्वीकर्तुं भारतं धर्मशाला न। १४० कोटि जनाः  निवसन्त्यत्र। एल् टी टी नाम निरोधितसंघटनेन सह बन्धः अस्ति इति दृष्ट्वा २०१८ तमे निग्रहीतस्य श्रीलङ्कादेशीयस्य याचिका एव न्यायालयेन तिरस्कृता। 

    २०१८ तमे न्यायालयेन दशवर्षात्मकस्य कारावासाय दण्डितः आसीत् एषः।  २०२२ मद्रास् उच्चन्यायालयेन दण्डः ७ वर्षः इति न्यूनीकृतः।  दण्डकालानन्तरं भरतात्  बहिः गन्तव्यम् इति न्यायालयेन आदिशत् च। नियमानुसारेण पारपत्रेण भारते आगतः, भार्या अपत्यानि भारते स्थिरवासं कुर्वन्तः सन्ति  अतः तस्मै भारते वासाय अनुज्ञा आवश्यकी इति याचिकायां सूचितवान्। किन्तु सर्वोच्चन्यायालयेन याचिका तिरकृता। 

 परिस्थितिसंरक्षणाय निष्किञ्चनोन्नमनाय च मार्पापावर्यस्य उद्घोषणम्। 

स्थानारोहणानन्तरं मार्पापावर्यः जनान् अभिवादयति। 

लियो १४ तमः मार्पापारूपेण अवरोधितः।

वत्तिकान सिटी> परिस्थितिचूषणं निष्किञ्चनजनानां पार्श्ववत्करणं च समापयियव्यमिति नूतनमार्पापा लियो १४ तमः उदघोषयत्। रविवासरे सम्पन्नस्य स्थानारोहण समारोहस्य अंशतया विधत्ते दिव्यबलिकार्यक्रमे भाषमाणः आसीत् पापावर्यः। 'पारीस् पर्यावरण सन्धेः' अपसृतस्य यू एस् राष्ट्रस्य उपराष्ट्रपतिः जे डि वान्सम् अभिव्याप्य अनेकान् विश्वनेतृजनान् लक्षद्वयं विश्वासिजनान् च साक्षीकृत्य आसीत् पापावर्यस्य सन्देशः। 

  ईश्वरप्रेमसाक्षात्काराय सर्वविभागजनानामपि अधिकारः अस्तीति पापावर्यः अवोचत्। युक्रेन-गासायुद्धमपि तेन परामृष्टम्।

 द्वौ ऐ एस् भीकरौ मुम्बई विमाननिलयात् निगृहीतौ। 

मुम्बई> ऐ एस् इति आगोलभीकरसंघटनेन सहवर्तमानौ द्वौ  एन् ऐ ए संस्थया मुम्बई विमाननिलयात् निगृहीतौ। डयपर्वाला इति कथ्यमानः अब्दुल्ला फयास् षेकः, तल्ह खानः इत्येतौ वर्षद्वयेन एन् ऐ ए संस्थया मार्गमाणौ आस्ताम्। 

  २०२३ तमे वर्षे पूनेय्याम् ऐ ई डि स्फोटकं निर्माय परीक्षितमित्यस्मिन् प्रकरणे अपराधिनौ एतौ इन्डोनेष्यायां निलीयमानौ आस्ताम्।

 चक्रवातः - यू एसे विंशत्यधिकानि मरणानि। 

वाषिङ्टणः> यू एस् राष्ट्रस्य दक्षिणराज्येषु शुक्रवासरे रात्रौ महान् चक्रवातः प्रभावितः। विंशत्यधिकाः जनाः विनष्टप्राणाः जाताः। ५००० अधिकानि भवनानि विशीर्णानि। 

   केन्टक्की राज्ये १४ जनाः मृत्युमुपगताः। मिसौरी राज्ये सेन्ट् लूयि नगरे ५ मरणानि जातानि। लक्षं गृहेषु विद्युत् स्थगिता। रक्षाप्रवर्तनानि अनुवर्तन्ते।

 लियो १४ तम पापावर्यस्य स्थानारोहणसमारोहः अद्य। 

वत्तिक्कानं> कातोलिका क्रिस्तीयसभायाः आगोलपरमात्मीयाचार्यस्य लियो १४ तम मार्पापावर्यस्य स्थानारोहणसमारोहः अद्य प्रातः दशवादने [भारती।समयानुसारं मध्याह्ने १. ३०] सेन्ट् पीटेर्स् देवालयाङ्कणे आरभ्यते। 

 'धीवरकङ्कणस्य अङ्कवस्त्रस्य' च धारणमेव समारोहस्य प्रधानकार्यक्रमः।  मेय् अष्टमे दिनाङ्के आसीत् कर्दिनाल् रोबर्ट फ्रान्सिस् प्रेवो नामकः  नूतनपापारूपेण चितः।

 ज्ञानपीठपुरस्कारः समर्पितः। 

राष्ट्रपतिः रामभद्राचार्याय पुरस्कारं समर्पयति। 

नवदिल्ली> २०२३ तमवर्षस्य ज्ञानपीठपुरस्कारं  संस्कृतपण्डिताय जगद्गुरु रामभद्राचार्याय राष्ट्रपतिः द्रौपदी मुर्मू समर्पितवती। सुप्रसिद्धः उरुदुकविः हिन्दीगानरचयिता चलच्चित्रकारः गुल्सार् वर्यश्च ज्ञानपीठपुरस्कारेण समादृत अपि स्वास्थ्यविषयकारणेन सः न प्राप्तवान्। 

  नवदिल्ल्यां विज्ञानभवने आयोजिते कार्यक्रमे आसीत् पुरस्कारसमर्पणम्।

 बृहन्नयतन्त्रपदक्षेपेन भारतम्। 

पाक्भीकरताम् अनाच्छादयितुं सप्तसंघाः ५० राष्ट्राणि सन्दर्शयन्ति। 

नवदिल्ली> भीकराणां कृते सर्वविधसाहाय्यं दीयमानस्य पाकिस्थानप्रशासनस्य व्यवहारान् विश्वराष्ट्राणां पुरतः अनाच्छादयितुं बृहत्तरं नयतन्त्रपदक्षेपं स्वीकरोति भारतम्। पाकिस्थानाय ऐ एम् एफ् संस्थया दीयमानं द्रव्यसाह्यं भीकरप्रवर्तनाय एव उपयुज्येत इति वादमुन्नीय आर्थिकसाह्यनिरोधाय भारतेन यतितम्। तदनुबन्धतया संसदः सर्वपक्षयुक्तान् संघान् विदेशराष्ट्राणि प्रेषयितुं निश्चितम्। नयतन्त्राधिकारिणः वनितासदस्याः च प्रतिसंघं भविष्यन्ति। १० -१२ दिनानि यावत् संघस्य विदेशपर्यटनं भविष्यति।

 १३ प्रकारस्य अर्बुदस्य प्रतिरोधाय पादचरणम् औषधं, - नवीनम् अध्ययनम्।

  त्रयोदशप्रकारस्य अर्बुदव्याधेः परिहाराय नवीनतमम् अध्ययनं दर्शयति यत् प्रतिदिनं पादचरणं कृत्वा अर्बुद (Cancer) रोगं न्यूनं कर्तुं शक्यते इति। इदम् अनुसन्धानम् ओक्सफोर्ड् विश्वविद्यालयस्य वैज्ञानिकैः यु के देशस्य ८५,००० जनानां स्वास्थ्यविवरणानि विश्लेष्य कृतम्। षट् वर्षपर्यन्तम् निरन्तरं पठनं कृत्वा पश्चात्, वैज्ञानिकाः निगमनम् इदं प्राप्तवन्तः यत्  येन प्रतिदिनं पादाभ्यां चरति चेत् तेनैव अर्बुदः  न्यूनी भविष्यति इत्युच्यते। 

  अध्ययनस्य अनुसारं, प्रतिदिनं ७,००० पादचरणानि करोति चेत् अर्बुदस्य व्यापनशीलः प्रतिशतं एकादश (११%) इति न्यूनं भविष्यति, यदा ९,००० पादचरणानि क्रियते तर्हि रोगस्य व्यापनशीलः प्रतिशतं षोडश (१६%) इति न्यूनं भवति।   

  वैज्ञानिकाः सूचयन्ति यत् दीर्घकालात् उपवेशनस्य स्थाने मन्दगत्याः शारीरिकक्रियाः अपि रोगः न्यूनीकर्तुं सहायकं भवति। विशेषतया, यकृत्, श्वसनकोशः, वृक्का, गर्भाशयः, 'कोलन्', शिरः-कण्ठः, गर्भाशयः स्तनम् इत्यादि प्रदेशेषु व्याधिः पादचारणेन परिशुष्यते इति अध्ययनं सूचयति।

 प्रासक्षेपणे नीरजः ९०.२३ मीटर् लक्ष्यं प्राप्तवान्। 

नीरजः स्पर्धामध्ये। 

दोह> खत्तरे सम्पद्यमाने दोह डयमण्ड् लीग् अत्लटिक्स्' स्पर्धायां भारतस्य नीरज चोप्रः प्रासक्षेपणे ९०.२३ मीटर् क्षिपित्वा द्वितीयस्थानं प्राप्तवान्। जर्मनीयः क्रीडकः जूलियन् वेबरः ९१. ०६ मी क्षिप्त्वा प्रथमस्थानं सम्प्राप्तवान्। 

 नूतनः परिशीलकः चेको स्लावियः यान् सेलन्सि इत्यस्य शिक्षणे अस्ति नीरजस्य नूतनस्थानलब्धिः। प्रासक्षेपे  ९० मीटर् तरितवान् प्रथमो भारतीयः भवति नीरज चोप्रः। एष्यायां तृतीयः च।

 तुर्कीराष्ट्रेण सह व्यापारव्यवहारान् बहिष्कृत्य भारतीयव्यापारिणः।

मुम्बई> भारत-पाकिस्थानयोः संघर्षे तुर्की, असर बैजान् राष्ट्रद्वयं पाकिस्थानेन सह अनुकूल्यं प्राकट्य साह्यमकरोत् इत्यस्मात् कारणात् तेन  राष्ट्रद्वयेन सह व्यापारव्यवहाराः पूर्णतया भारतीयव्यारारिभिः बहिष्कृताः। २४ राज्यानां व्यापारिसंघटनानां 'Confederation of All India Traders' नामकेन संघटनेन अयं निर्णयः। 

  एष्याभूखण्डस्य बृहत्तमं फल-शाकाविपणनकेन्द्रं दिल्लीस्थम् 'आसादपुर् मण्डि, वाषीस्थं 'ए पि एम् सि' इत्येताभ्यां तुरकीतः आप्पिल् फलस्य आयातः निरुद्धः इति निगदितम्।

 त्रयः लष्करभीकराः निगृहीताः। 

बद्गामः> लष्कर् ई तोय्बा इति निरुद्धभीकरसंघटने प्रवर्तमानाः त्रयः भीकराः जम्मु काश्मीरस्थात् बद्गामात्  आरक्षकैः निगृहीताः। मुसमिल् अहम्मदः, इस्पात पण्डिट्, मुनीर् अहम्मदः इति तेषां नामानि। एकः भुषुण्डी, कतिपय बोम्बाः इत्याद्यायुधानि अपि निगृहीतानि।

 पृथिव्याः अन्तःस्थितं महाधनम् ।  1,70,000 संवत्सरपर्यन्तं पर्याप्तं हैड्रोजनस्य स्रोतांसि इति अध्ययनम्।

  पृथिव्याः गर्भभागे रूपीकृताः स्वाभाविकाः हैड्रोजन-सञ्चयाः वैश्विकम् इन्धन-आवश्यकतां 1,70,000 (सप्तति सहस्राधिक एक लक्षं) वर्षाणि यावत् उपयोक्तुं समर्थाः स्युः इति नवीनम् अध्ययनम् सूचयति।

   विश्वस्य अनेकप्रदेशेषु विशेषतया अमेरिकादेशस्य त्रिंशतधिक-राज्येषु एवं प्रकारस्य हाइड्रोजन्-स्रोतांसि सन्तीति अध्ययनम् दर्शयति। एतदनुसन्धानम् ओक्सफोर्ड्-विश्वविद्यालयस्य भू-रसायनविभागाध्यक्षस्य प्रोफेसर् क्रिस् बलन्टैन्  इत्यस्य नेतृत्वेन कृतम्।। Nature Reviews Earth and Environment इत्यस्यां  प्रख्यातायां वैज्ञानिक-पत्रिकायाम् एषः शोधः प्रकाशितः अस्ति।

   पाषाणानि जलम् च मिलित्वा याः स्वाभाविकाः रासायनिकक्रियाः जाताः, ताभ्यः हैड्रोजनस्य उत्पत्तिः भवति। एते नैसर्गिकानि हैड्रोजन् स्रोतांसि कार्बण्-रहितस्य ऊर्जस्य दिशायाम् अस्मान् नेष्यन्ति। अल्पकालात् पूर्वमेव अल्बेनियायाः पश्चिम-अफ्रिकायाः च प्रदेशयोः क्रोमियम्-खननक्रियासु सत्सु,पृथिव्याः अधस्तले विशालः हाइड्रोजन्-सञ्चयः अस्ति इत्यपि ज्ञातम्। इदम् अध्ययनम् भाविष्यस्य हरित-ऊर्जानीतये महत्त्वपूर्णम् एकं द्वारम् उद्घाटयिष्यति।

 पाकिस्थानेन गृहीतः सीमारक्षाभटः विमोचितः। 

भारतेन निग्रहीतः पाकिस्थानीयभटोऽपि मोचितः।

  नवदिल्ली> पञ्चाबस्थे भारत-पाकिस्थानसीमामण्डलात् वाग-अट्टारिप्रदेशात् पाकिस्थानेन निगृहीतः भारतीयः सीमारक्षणभटः भारताय प्रत्यर्पितः। पश्चिमवंगस्य हूग्ली निवासी पूर्णं कुमार शाहः एव विमोचितः। तथा च राजस्थानस्य सीमायाः भारतसेनया निगृहीतः पाकिस्थानीयः अपि विमोचितः।

सि बि एस् सि दशमकक्ष्यापरीक्षायां 600 अङ्केषु 599 अङ्काः रितिका प्राप्तवती।

   अस्मिन् संवत्सरस्य सि बि एस् सि परीक्षायां दशम्यां कक्ष्यायां रितिका नामिका बालिका ५९९ अङ्कान् प्राप्तवती। आहत्य ६०० अङ्केषु आसीत् परीक्षा। केरळेषु अनन्तपुरी जिल्लायां वसति एषा। कवटियार् क्रैस्ट् नगर् केन्द्रीयविद्यालयस्य छात्रा भवति इयम्। क्रमानुगतम् अध्ययनम् एव भवति अस्य विजयरहस्यम् इति सा अवदत्। विद्यालये यत् पाठयति तत् तस्मिन्नेव दिने सा पठति स्म। तादृश स्वभावविशेषः-विजयप्राप्त्यर्थम् उपकारकम् असीत् इत्यपि तया उक्तम्।

 ड्रोण् पातनाय भारतस्य भार्गवास्त्रम्। 

भुवनेश्वरं> ड्रोण् यन्त्राणि उपयुज्य क्रियमाणानि आक्रमणानि प्रतिरोद्धुं भारतस्य ह्रस्वदूराग्नेयास्त्रस्य - भार्गवास्त्रस्य - परीक्षणे विजयप्राप्तिः। ओडीशायां गोपालपुरी 'फयरिंग् रेञ्च्' इत्यत्र 'आर्मी एयर् डिफन्स्' [AAD] संस्थायाः वरिष्ठोद्योगवृन्दस्य सान्निध्ये आसीत् इदं परीक्षणम्। निश्चितसंख्याकानि ड्रोण् यन्त्राणि युगपत् भञ्जयितुं एकेनैव भार्गवास्त्रेण शक्यते।

 बी आर् गवाय् वर्यः भारतस्य मुख्यन्यायाधिपरूपेण शपथं कृतवान्। 

बी अर् गवाय् वर्यस्य शपथसमारोहः। 

नवदिल्ली> भारतस्य ५२ तम मुख्यन्यायाधिपरूपेण न्यायाधीशः बी आर् गवाय् वर्यः ह्यः राष्ट्रपतेः द्रौपदी मुर्मू वर्यायाः सविधे शपथं कृत्वा कार्यभारं स्वीकृतवान्। सत्यशपथसमारोहानन्तरं मुख्यन्यायालयं सम्प्राप्तवान् सः तत्रत्ययोः महात्मा गान्धी, डा बी आर् अम्बदकरः इत्येतयोः प्रतिमयोः पुष्पार्चनां कृतवान्। 

   बुद्धधर्मानुयायी प्रथमः भारतमुख्यन्यायाधिपो भवति न्याय.  भूषण रामकृष्ण गवाय् वर्यः।नवम्बर् २३ पर्यन्तं तस्य सेवाकालः भविष्यति।

 लष्करनेतारमभिव्याप्य त्रयः भीकराः निहताः। 

श्रीनगरं> जम्मु काश्मीरस्य षोपियाने सुरक्षासेनया सह प्रतिद्वन्द्वे लष्कर् ई तोय्बा संघटनस्य नेता इतरौ द्वौ भीकरौ च निहताः। 

   भीकराः प्रदेशे निलीयमाना‌ः इति सूचनानुसारं सेनया कृतस्यान्वेषणस्य अंशतया आसीत् प्रतिद्वन्द्वः। लष्करस्य कमान्डरः षाहिद् कुट्टे , अदनान षाफी, अज्ञातनामा इतरः च निहताः।

 मण्सूण् कालवर्षः आन्डमानं सम्प्राप्तम्। 

केरले २७ तमे दिनाङ्के। 

अनन्तपुरी> दक्षिण अन्तमान् समुद्रः, उत्तर अन्तमान् समुद्रः, दक्षिणवंगस्य अन्तरालः इत्यादिषु स्थानेषु कालवर्षः सम्प्राप्त इति केन्द्र पर्यावरणविभागेन निगदितम्। केरले  दक्षिणपश्चिमकालवर्षः मेमासस्य २७ दिनाङ्कं यावत् सम्पत्स्यते।

 भीकरप्रवर्तनस्य अनुवर्तनं पाकिस्थानस्य सर्वनाशाय भविष्यतीति नरेन्द्रमोदी। 

ओदंपुरस्थं व्योमनिलयं प्राप्तवान् नरेन्द्रमोदी सैनिकैः सह सम्भाषणे। 

नवदिल्ली> यदि पाकिस्थानः भीकरप्रवर्तनम् अनुवर्तिष्यते तर्हि तत् तद्राष्ट्रस्य सर्वनाशाय भविष्यतीति भारतप्रधानमन्त्री नरेन्द्रमोदी असूचयत्। ओपरेशन् सिन्दूरम् इत्यस्यानन्तरं आदंपुरे व्योमसैनिकनिलयं सम्प्राप्य सैनिकान् अभिसम्बोधयन् भाषमाणः आसीत् नरेन्द्रमोदी। 

  पाकिस्थानेन विशीर्णमिति तैरभिमानितेषु भारतीयव्योमनिलयेषु अन्यतमं भवति पञ्चाबस्थं  आदंपुरम्। सैनिकनिलयः सर्वथा सुरक्षितः इति प्रमाणीकर्तुमपि आसीत् प्रधानमन्त्रिणः इदं प्रातःकालसन्दर्शनम्। 

  आदंपुरे प्राप्तवान् मोदीवर्यः 'एस् ४००' इति व्योमप्रतिरोधसंविधानम् अभिवाद्य सैनिकैः सह भाषणं कृत्वा तेषां पराक्रमशीलं, स्थिरोत्साहं च प्रकीर्तितवान्।

 विराट कोह्ली क्रिकट् निकषस्पर्धायाः निवृत्तवान्। 

एकदिने अनुवर्तिष्यते। 

नवदिल्ली> क्रिकट् आराधकानां वीरपुरुषः, भारतस्य क्रिकट् नायकेषु अनुत्तमः  विराट कोह्ली निकषस्पर्धायाः विरम्यते इति स्वयमुद्घोषितवान्। पूर्वमेव टि - २० अतः निवृत्तः सः परं एकदिनस्पर्धासु क्रीडिष्यति। 

  पराक्रमशाली, उत्साहवान्, जनप्रियः - त्रयमपि कोह्लेः उत्तमरीत्या अनुयुक्तं विशेषणं भवति। अधिकतमेषु निकषस्पर्धासु भारतदलं विजयपदमानीतवान् नायकः इति ख्यातिः कोह्लेः स्वकीयः अस्ति। ६० प्रतिद्वन्द्वेषु ४०विजयाः। सप्त युगलशतकस्य स्वामीअस्ति।

 UPI सेवा स्थगिता। उपयोक्तृजनानाम् अतिसम्मर्दः कारणम्।

   नवदिली> भारते यू पि ऐ नाम धनपरिवर्तनादिकी स्थगिता इति प्रतिवेद्यते। पे टि एम्, फोण् पे, गूगिल् पे इत्यादयः अनुप्रयोगाः अद्य सोमवासरे सायं कालादारभ्य स्थगिताः। नववादने सेवा पुनस्थापिता। विगते मार्चमासे लब्धगणनानुसारेण 1830 कोटि विनिमयाः कृताः सन्ति। फेब्रुवरिमासे विनिमयाः 1611 कोटि इत्यासीत्।

 "भीकरवादरूढमूला भूमिः सुरक्षिता नास्ति, भीकरवादिनः अनुगम्य आखेटनं करिष्यामहे; " – रक्षामन्त्री राजनाथसिंहः।

  "सिन्दूरं नष्टवतीनां कुटुम्बानां कृते सशस्त्रसेनया ओपरेषन् सिन्दूरम् इति प्रक्रमेण न्यायः प्रदत्तः" इति भारतस्य रक्षामन्त्री राजनाथसिंहः उक्तवान्। ब्रह्मोस्-शस्त्रप्रयोगः  शत्रूणां कृते स्पष्टतया  दत्तसन्देशः भवति इत्यपि सः निरूपितवान्। सम्पूर्णं राष्ट्रं भारतीयसैन्याय कृतज्ञतां प्रकाशयति।

"ओपरेषन् सिन्दूरम्" केवलं सैन्यकर्म न भवति, अपितु भारतस्य राजनैतिक -सामाजिक -संकल्पशक्तेः प्रतीकम् एव। रावलपिण्डिस्थं पाकिस्थानस्य सैनिककेंद्रं लक्ष्यीकृत्य आक्रमणं कृतम्।

"भीकरवादेन पीडितं भूमिप्रदेशे ते सुरक्षिताः इति चिन्तयन्ति चेत्, तत् न तथ्यम्। तथा नास्ति, यत्र यत्र ते भीकरवादिनः निवसन्ति, तत्र तत्र गत्वा तान् आखेटनं करिष्यामहे" इति राजनाथसिंहः उक्तवान्।

 पाकिस्थानस्य युद्धविरामलङ्घनम्; ड्रोणस्य  आक्रमणेन एकस्य सैनिकस्य वीरमृत्युः।

  युद्धविराम-सम्मतिः प्रवृत्ता। किन्तु कतिपयहोरायाः अनन्तरं  पाकिस्थानदेशेन तस्य उल्लङ्घनं कृतम्। पाकिस्थानेन कृतेन ड्रोणाक्रमणेन एकस्य भारतीयसैनिकस्य वीरमृत्युः अभवत्। एषः सैनिकः उधमपुर-नगरस्य सैन्यकेंद्रे रक्षणकर्तृरूपेण नियुक्तः आसीत्। भारतदेशः पाकिस्थानस्य वञ्चनक्रियाम् अपालपत्। आवश्यके सति प्रत्याक्रमणं करणीयम् इति सैन्यबलान् प्रति निर्देशः दत्तः।

    जम्मू-काश्मीरे अखनूर्, रजौरी, आर्.एस्. पुरा इत्यादिदेशेषु गभीरं षेल्-आक्रमणं जातम्। नग्रोट्थ-प्रदेशस्थे सैन्यकेन्द्रे अपि आतङ्कवादिनां आक्रमणम् अभवत्। सीमाप्रदेशेषु मुख्यकार्यालयाधिकारिभिः सह भारतस्य केन्द्रीय-गृहमन्त्रिणा विषयेऽस्मिन् चर्चा कृता। पञ्जाबराज्ये अमृत्सर-नगरे 'रक्तवर्ण-सूचना’ अपि घोषिता।

 एस् एस् एल् सि [केरले दशमीकक्ष्यायाः अन्तिमपरीक्षा] परीक्षापरिणामः - ९९. ५% विजयः। 

अनन्तपुरी> अतीतायाम् एस् एस् एल् सि परीक्षायां ९९. ५% विजयः। परीक्षां लिखितवत्सु ४,२६,६९७ छात्रेषु ४,२४५८३ छात्राः उपरिपठनाय अर्हतां लब्धवन्तः। शिक्षामन्त्री वि शिवन् कुट्टिः फलं प्रख्यापितवान्। 

  ६१,४४९ छात्राः सर्वेषु विषयेषु A+ लब्धवन्तः। गतवर्षापेक्षया दशसहस्राणाम् आकुञ्चनमभवत्। २३३१ विद्यालयाः १००% विजयं प्रापुः।

 दिनद्वयेन ६२ नगराणि लक्ष्यीकृत्य पाकिस्थानस्य ड्रोण् आक्रमणम्। 

भारतेन सर्वं विफलीकृतम्। 

जम्मु> गते दिनद्वये भारतस्य सीमाराज्यानां ६२ नगराणि लक्ष्यीकृत्य पाकिस्थानः अग्निशस्त्रयुक्तानि ड्रोण् यन्त्राणि उपयुज्य आक्रमणमकरोत्। किन्तु भारतस्य व्योमप्रतिरोधसंविधानमुपयुज्य सर्वं विफलीकृतम्। 

  गुरुवासरस्य रात्रौ ३६ स्थानानि, शुक्रवासरे २६ स्थानानि लक्ष्यीकृत्य आसीदाक्रमणम्। गुजरात्, जम्मु काश्मीरं, पञ्चाबः, राजस्थानम् इत्येतेषां सैनिककेन्द्राणि आसीत् पाकिस्थानस्य लक्ष्यम्। तुर्किनिर्मितानि ४०० ड्रोणानि एव उपयुक्तानि। प्रतिरोधस्य अंशतया पाकिस्थानस्य चत्वारि व्योमप्रतिरोधनिलयान् प्रति भारतेन प्रत्याक्रमणं कृतम्।

 पाकिस्थानस्य प्रकोपनमनुवर्तते। 

जनवासक्षेत्राणि लक्ष्यीकृत्य अग्निशस्त्राक्रमणं - द्वौ बालकौ मृतौ, त्रयः क्षताः। 

भुषुण्डिप्रयोगेण एकः सैनिकः वीरमृत्युं प्राप। 

श्रीनगरं> काश्मीरस्य जनाधिवासकेन्द्राणि लक्ष्यीकृत्य अपि पाकिस्थानस्य आक्रमणम्। काश्मीरे पूञ्च् क्षेत्रे कस्यचन विद्यालयस्य पृष्ठतः विद्यमानं गृहं प्रति पाकिस्थानस्य 'षेल्' पतित्वा द्वौ बालकौ हताविति विदेशकार्य सचिवेन विक्रम मिस्रिना स्थिरीकृतम्। विद्यालयः पिहितः इत्यतः महान् दुरन्तः अपनीतः। अन्यत्र चलतः कार् यानस्य उपरि पाकिस्थानस्य 'षेल्' पतित्वा एकपरिवारीयाः त्रयः आहताः। 

  काश्मीरस्थे उरि मण्डले पाकिस्थानेन कृते भुषुण्डिप्रयोगे एकः सैनिकः वीरमृत्युं प्राप। आन्ध्रप्रदेशीयः एम् मुरली नायिक् [२७] एव मृतः। 

 उरी, पूञ्च्, राजौरी इत्यादिभ्यः सीमास्थानेभ्यः सेनायाः निर्देशमनुसृत्य  जनाः सुरक्षितस्थानानि प्रति पलायन्ते।

२०२५ संवत्सरस्य भारत-मुद्रा नाम पुरस्कारेण  दामोदरन् नम्बिटिः सम्मानितः।

   तृश्शिवपेरूर्> संस्कृतस्य प्रचाराय भारतमखिलं भ्रमन् अनवरतं प्रयत्नं कृत्वा स्वं मार्गं स्फुटीकृतवान् आसीत् अशोकन् पुरनाट्टुकर। प्रभाषकः, पत्रकारः, अध्यापकश्च आसीत् अयं महोदयः। अस्य स्मृत्यर्थं संस्थापितः भारत-मुद्रा नाम पुरस्कारं संवत्सरेऽस्मिन् दामोदरन् नम्बिटिः प्राप्तवान्। अयं महोदयः सुज्ञातः चित्रकारः, ग्रन्थकारश्च भवति।

 11,111 रूप्यकाणां धनराशिः, प्रशस्तिपत्रम्, फलकं च पुरस्कारेऽस्मिन् अन्तर्भवति। गुरुवायूर्-देवस्वं-प्राधिकरणस्य अध्यक्षेण डा. वी.के. विजयेन पुरस्कारोऽयं समर्पितः। पी.के. राजेन अध्यक्षतां वहति स्म।

डॉ॰ सी.टी. फ्रान्सीसेन अशोकन् पुरनाट्टुकर महाभागस्य सुस्मरणं कृतम्। के.वी. गणेशेन पुरस्कारेण मानितस्य दामोदरन् नम्बिटिमहोदयस्य विशिष्टपरिचायकं कृतवान्। एन्. मोहनस्य 'इन्नलत्ते मष़' (मलयाळ भाषा) इति ग्रन्थम् अशेकन् महोदयेन 'ह्यस्तनी वृष्टिः' इत्याख्यया अनूदितम् आसीत्। ग्रन्थोऽयं  डॉ॰ टी. श्रीकुमारः, के रामदासाय समर्प्य प्रकाशितवान्। श्रीकुमारः केरळस्य कविकोकिलस्य प्रथितयशस्कस्य वैलोप्पिल्लि श्रीधरमेनोनस्य पुत्रः भवति। रामदासः अशोकन् पुरनाट्टुकर महोदयस्य पुत्रः च।

 एन्. राजगोपालः, डॉ॰ एस्.एन्. महेष् बाबुः, षाजुः पुतूर, श्रीलेखा, प्रभा वैक्कत्त्, विनायकः च कार्यक्रमे भाषणानि अकुर्वन्।

 विश्वसंस्कृतप्रतिष्ठानस्य ४५तमं राज्यस्तरीयसम्मेलनं श्व आरभ्य कोष़िक्कोट् जनपदे। 

कोष़िक्कोट्> संस्कृतभारत्याः केरलविभागस्य विश्वसंस्कृतप्रतिष्ठानस्य ४५तमं राज्यस्तरीयसम्मेलनं शनिवासरे रविवासरे च कोष़िक्कोट् जनपदे विधास्यति। सम्मेलनस्य उद्घाटनं शनिवासरे अपराह्ने केरलस्य राज्यपालः राजेन्द्र विश्वनाथ आर्लेकरः तोण्डयाटस्थे चिन्मयाञ्जली सभागारे करिष्यति। 

  प्रतिनिधिसम्मेलनं ११तमे दिनाङ्के शिक्षकसदने सम्पत्स्यति। संस्कृतसम्भाषण शिबिरं, वीथीनाटकं, विलम्बरपथसञ्चलनं, संस्कृतग्रन्थानां प्रदर्शनं, संघात्मकं भगवद्गीतापठनं, मनोरञ्जनकार्यक्रमाश्च  सम्मेलनस्य अंशतया भविष्यन्ति।

 सण्णि जोसफः केरल प्रदेश् कोण्ग्रस् अध्यक्षः। 

सण्णि जोसफः।

नवदिल्ली> के पि सि सि इति केरलराज्यस्य कोण्ग्रस् दलस्य अध्यक्षरूपेण विधानसभासदस्यः सण्णि जोसफः एव इति दलस्य  उन्नताधिकारसमित्या [हैकमान्ट्] विज्ञापितम्। विवादानाम् अनिश्चित्वानामन्ते आसीत् वर्तमानीनाध्यक्षं के सुधाकरमपनीय सण्णि जोसफस्य नियुक्तिः। 

  यू डि एफ् संविधानस्य अध्यक्षरूपेण अडूर् प्रकाशः नियुक्तः। पि सि विष्णुनाथः , ए पि अनिल्कुमारः, षाफि परम्पिल् इत्येते के पि सि सि इत्यस्य प्रवर्तकाध्यक्षरूपेण च नियुक्ताः।

 एस् एस् एल् सि परीक्षाफलम् अद्य। 

कोच्ची> केरले दशमकक्ष्याछात्राणां अन्तिमसामान्यपरीक्षा एस् एस् एल् सि इत्यस्य परिणामः अद्य ज्ञातुं शक्यते।  सायं त्रिवादने शिक्षामन्त्रिणा वि शिवन्कुट्टिना फलं विज्ञापयिष्यते। 

  सार्धचतुर्लक्षं छात्राः तेषां फलं जिज्ञास्यमानाः सन्ति। टि एछ् एस् एल्  सी, ए एछ् एस् एल्  सी इत्यनयोःपरिणामव्ज्ञप्तिरपि अनेन सह भविष्यति।

 कर्दिनाल् रोबर्ट् प्रोवो नूतनः मार्पापावर्यः। 

नूतनपापावर्यः विश्वासिजनान् अभिसम्बोधयति 

अमेरिकातः प्रथमः पापा; 'लियो १४तमः' इति नाम स्वीकृतम्। 

वत्तिक्कान सिटी>  आगोल कत्तोलिक्कासभायाः परमोन्नत आत्मीयाचार्यः - मार्पापा - चितः। कर्दिनाल् रोबर्ट फ्रान्सिस् प्रोवो कोण्क्लेव् इति गुप्तपरिषदः द्वितीयदिने २६७ तमः मार्पापारूपेण चितः। लियो चतुर्दशतमः इति सः परं आख्यायते। 

  गुरुवासरस्य रात्रौ ९. ४० वादने सिस्टैन् चाप्पल् देवालयस्य धूमनालिकया श्वेतधूमः बहिरागच्छत्। निमेषाणामनन्तरं कर्दिनाल् प्रोटोडीकन् पदीयः डोमनिक् माम्बोर्टी सेन्पीटेर्स् देवालयस्य वेदिकां सम्पाप्य विज्ञापितवान् - "अस्मभ्यं पापा लब्धः" । तदैव लियो १४ तमः वेदिकां सम्प्राप्तवान्। "संवादेन मेलनेन सेतुः निर्मातव्यः। सदापि शान्तिं पालयाम" इति नूतनपापावर्येण प्रथमः सन्देशः समर्पितः।

 भारतबंगलादेशयोः सीमनि चीनस्य उदग्रछायाग्राही।

  गुवाहती>भारत-बंगलादेशयोः सीमनि चीनस्य उदग्रछायाग्राही परित्यक्तवत् दृश्यते। श्रीभूमि नगरस्य समीपे चारबसार प्रदे शतः उदग्रछायाग्राही लब्धा। चीनेन निर्मिता भवति इयम्। आरक्षकैः अन्वेषण- प्रक्रमाः समारब्धाः।

 रोहित शर्मा निकषक्रिकट् इत्यस्मात् निवृत्तः। 

मुम्बई> भारतस्य क्रिकट्क्रीडादलस्य नायकः रोहित शर्मा निकषस्पर्धायाः निवृत्तवान्। टि - २० प्रकरणात् पूर्वमेव निवृत्तः सः एकदिनप्रकरणे अनुवर्तिष्यते। 

  निकषस्पर्धापरम्परासु रोहितशर्मणः निन्द्यमानानुष्ठानेभ्यः नायकपदम् अङ्गत्वमपि विनष्टं भवेदिति अभ्यूहे  जाते अस्ति तस्य निवृत्तिविज्ञप्तिः।

 'सिन्दूरं' भारतस्य सन्देशः। 

वार्ताहरसम्मेलनं कृतवत्यौ विङ् कमान्टर् व्योमिका सिंहः केणल् सोफिया खुरेषी च। 

नवदिल्ली> सिन्दूरम् इति कृतनामधेयः भारतस्य सैनिकप्रक्रमः भीकरतां विरुध्य राष्ट्रस्य सूक्ष्मतया विधत्तः सन्देशः भवति। पहल्गामभीकराक्रमणस्य प्रतिप्रहरस्य ओपरेशन् सिन्दूर् इति नाम्नि आक्रमणे हतपुरुषाणां विधवाभ्यः समर्पिता इयम् आदराञ्जलिः। भीकरैः निर्माजितानां २६ सिन्दूरतिलकानां प्रत्युत्तरम्! 

  वार्ताहरसम्मेलने विदेशकार्यसचिवेन सह सेनाप्रक्रमान् अधिकृत्य विवरणं दत्तवत्यौ  द्वे महिले - केणल् सोफिया खुरेषी तथा  विङ् कमान्डर् व्योमिका सिंहश्च विनष्टप्राणानां पत्नीनां कृते समर्पितादररूपेण श्लाख्येते।

 सिन्दूर शस्त्रप्रक्रमेण पाकिस्थानं  प्रकम्पितम्।

प्रत्याक्रमणेन पाकिस्थानस्य प्रकोपः, वीरवादः। 

एकः भटः वीरमृत्युं प्राप। 

नवदिल्ली> ओपरेषन् सिन्दूर् इति भारतस्य प्रतिप्रहरात् भयचकितं पाकिस्थानं प्रत्युषसि भारतं विरुद्ध्य षेल् नामकास्त्रस्य वर्षम् अकरोत्। पूञ्च् , रजौरि मण्डलेषु आसीत् षेल् शस्त्राक्रमणम्।

  भारतसेनायाः लान्स् नायिक् पदीयः दिनेष् कुमारः  वीरमृत्युं प्राप। अन्यः कश्चन सैनिकः तीव्रक्षतेन आतुरालयं प्राविशत्। पाकिस्थानस्य आक्रमणे १५ प्रदेशवासिनः जनाः हताः। 

 एतदन्तरे भारतं प्रति प्रतिप्रहरं करिष्यतीति  पाकिस्थानस्य प्रधानमन्त्री वीरवादं घोषितवान्।

 भीकरतां विरुध्य राष्ट्रस्य  प्रतिप्रहरः। 

'ओपरेशन् सिन्दूर्' - पाकिस्थानस्य भीकरकेन्द्रेषु भारतस्य शस्त्रोपचारः। 

+ २५ निमिषाः, ९  केन्द्राणि, ७० मरणानि। 

+ विशीर्णेषु भीकरपरिशीलनकेन्द्रेषु एकं 

बिन् लादनेन निर्मितम्। 

नवदिल्ली> पहल्गामभीकराक्रमणस्य १५ तमे दिने पाकिस्थानं प्रति भारतसैन्यस्य मर्मभेदकं प्रत्युत्तरम्। अद्य प्रत्युषसि १. ०५ वादनतः १. ३० वादनपर्यन्तं दीर्घिते सैनिकप्रक्रमे पाकिस्थानस्य काश्मीरस्थानि भीकराणां ९ परिशीलनकेन्द्राणि विनाशितानि। जनवासक्षेत्राणि अपनीय, केवलं भीकरशिबिराणि लक्ष्यीकृत्य कृते 'ओपरेशन् सिन्दूर्' इति कृतनामधेये शस्त्रप्रहरे ७० भीकराः हताः इति सेनाधिकारिभिः निगदितम्। 

  सैनिकप्रक्रमानन्तरम् आकारिते वार्ताहरसम्मेलने उपग्रहचित्राणां साह्येन प्रमाणैः सहितमासीत् सैन्याधिकारिणः उपस्थापनम्।

 नूतनमार्पापा 

वरिष्ठपुरोहितानां गूढपरिषत् [Conclave] अद्य आरभ्यते। 

भारतात् चत्वारः वैदिकश्रेष्ठाः। 

वत्तिक्कानं>  स्वर्गीयस्य फ्रान्सिस् मार्पापावर्यस्य अनुगामिनम् अधिगन्तुं ६९ राष्ट्रेभ्यः १३३ 'कर्दिनाल्' पदीयानां वरिष्ठपुरोहितानां गूढपरिषत्  [conclave]अद्य आरभ्यते। तदर्थं वत्तिक्काने सिस्टैन् चाप्पल् देवालयः सज्जः अभवत्। प्रादेशिकसमयानुसारं सायं ४. ३० वादने [भारतीयसमयः रात्रौ ८ वादने] परिषदारभ्यते।

  न्यूनाशीतिवयस्काः १३३ कर्दिनालपदीयाः गुप्तपरिषदि भागं करिष्यन्ति। तेषु भारतात् चत्वारः कर्दिनालाः सन्ति।

 भारतस्य जलं राष्ट्रेच्छानुसारम् उपयोक्ष्ये से-भारतस्य प्रधानमन्त्री।

        नवदिल्ली> पाकिस्तानाय जलं न दद्मः इति मोदिना उक्तम्। भारतस्थं जलं भारतस्य इच्छानुसारम् उपयोक्तुमेव भवति। सिन्धूनदीजल-व्यवस्थायाः जडीकरणविषये एव अयं परामर्शः।

 संस्कृतं समेषां भारतीयभाषाणां जननी - अमित शाहः। 

संस्कृतभारत्याः नेतृत्वे १००८ संस्कृतसम्भाषण शिबिराणि सम्पन्नानि। 

सम्भाषणशिबिराणां समाप्तिसमारोहे उद्घाटनभाषणं कुर्वन् अमित शाहः ।

नवदिल्ली> भारतस्य गृहमन्त्री अमित शाहः प्रोक्तवान् यत् संस्कृतभाषा प्रायेण समेषां भारतीयभाषाणां जननी भवति। दिल्ली विश्वविद्यालयस्य उत्तरपरिसरे संस्कृतभारत्या समायोजितस्य संस्कृतसम्भाषणशिबिरस्य समाप्तिसमारोहम् उद्घाटयन्  भाषमाणः आसीदयम्। यावत् संस्कृतं शक्तिमत् भविष्यति तावत् एकैका भारतीयभाषा प्रादेशिकभाषा च शक्तिमती भविष्यतीति तेन अनुप्रोक्तम्।

 भारत्याः विपुलं ज्ञानभण्डागारमधिकृत्य शाहमहेदयेन संस्मारितम्। योगः, गणितं, परिस्थिति विज्ञानं, व्याकरणम् इत्यादिषु संस्कृतस्य योगदानमनुत्तममिति तेनोक्तम्। 

  वस्तुतया संस्कृतमेवास्माकं मातृभाषा इति समारोहे विशिष्टातिथिरूपेण भागं कृतवती दिल्लीमुख्यमन्त्रिणी रेखा गुप्ता अवोचत्। संस्कृतस्य विज्ञानभण्डागारः अस्मान् विश्वगुरुं कर्तुं प्रभावशाली इति तया प्रोक्तम्। 

  संस्कृतभारत्याः नेतृत्वे दिल्लिविश्वविद्यालयस्य उत्तरपरिसरं केन्द्रीकृत्य १००८ संभाषणशिबिराणि प्रचालितानि यैः २५,००० सामान्यजनाः संस्कृतसंभाषणे प्रभवाः जाताः।

 राष्ट्रस्य रक्षासज्जीकरणं 

भारतं  सीमाराज्यानां जागरूकतां  निरदिशत्। 

व्याजशस्त्राभ्यासः [Moakdrill] बुधवासरे।

नवदिल्ली> पहल्गामभीकराक्रमणस्य अनन्तरं भारत-पाकिस्थानसीमायां संघर्षे वर्धिते रक्षासज्जीकरणं भारतेन सबलं कृतम्। युद्धसाध्यतामालक्ष्य सीमावर्तितराज्येभ्यः पूर्वसूचनाः दत्ताः। तेषु राज्येषु बुधवासरे  व्याजशस्त्राभ्यासं [Moakdrill] कर्तुम् आदेशः दत्तः। 

  व्याजशस्त्राभ्यासस्य स्वरूपम् एतावत् - 

+ व्योमाक्रमणस्य पूर्वसूचनाघोषस्य प्रवर्तनक्षमतायाः परिशोधनम्। 

+ आपत्कालीनावस्थाम् अभिमुखीकर्तुं सामान्यजनेभ्यः छात्रेभ्यश्च परिशीलनप्रदानम्। 

+ सुप्रधानप्रतिष्ठापनानां [Plants] संस्थानां च  आच्छादनाय सज्जीकरणानि कर्तव्यानि।

 आर्थिकसुस्थितौ भारतं जापानम् अतिक्रम्य चतुर्थश्रेणीं प्राप्तम्।

  २०२८ संवत्सरे भारतं विश्वसाम्पतिकमण्डले तृतीयं राष्ट्रं भविष्यति इति अन्ताराष्ट्र-नाणकनिधिः (IMF) वदति। अस्मिन् संवत्सरे चतुर्थस्थाने भारतं तिष्ठति इति अन्ताराष्ट्र नाणकनिधिः द्वारा प्रकाशिते 'वेल्ड् औट्लुक्' इत्यस्य प्रतिवेदने अस्ति। २०२४ तमस्य गणनानुसारं भारतं पञ्चमस्थाने आसीत्। अस्मिन् संवत्सरे चतुर्थश्रेणीं प्राप्नोति। २२२८ तमे जर्मनिम्अतिक्रम्य तृतीयंस्थानं प्राप्स्यति इति 'नाणकनिधिः प्रवचनं करोति।

 'तृशूर् पूरम्' उत्सवः श्वः। 

तृशूर्> दक्षिणभारते सुप्रसिद्धः 'तृशूर् पूरम्' इत्युत्सवः कुजवासरे विधास्यति। श्वः प्रातरारभ्य केरलीयाः केरले विनोदपर्यटनार्थं प्राप्तवन्तः विदेशीयाः च पूरनगरी इति प्रसिद्धं तृशूरस्थंं वटक्कुन्नाथमन्दिराङ्कणं  प्रवक्ष्यन्ति।

  श्वः दशवादनतः शताधिके वाद्यकाराः भागमूढ्यमानं पञ्चवाद्यादिकं वाद्यकलारूपं वादयन्ति। तदनन्तरं सायं चतुर्वादनतः 'कुटमाट्टं' नामकं नानावर्णोपेतछत्राणां परिवर्तनं सम्पत्स्यते। छत्रपरिवर्तनं तिरुवम्पाटि, पारमेक्काव् इति मन्दिरद्वयस्य नेतृत्वे ।.               नेतृत्वे एकैकस्मिन् पक्षे पञ्चदशगजवीराः प्रत्यभिमुखं तिष्टन्तः आनन्दोत्सवाय भिन्नवर्णछत्रप्रदर्शनं किल पर्वायते ।   ततः प्रत्युषसि नयनानन्दकरं स्फोटोत्सवश्च  सम्पत्स्यते।