भीकरप्रवर्तनस्य अनुवर्तनं पाकिस्थानस्य सर्वनाशाय भविष्यतीति नरेन्द्रमोदी। 

ओदंपुरस्थं व्योमनिलयं प्राप्तवान् नरेन्द्रमोदी सैनिकैः सह सम्भाषणे। 

नवदिल्ली> यदि पाकिस्थानः भीकरप्रवर्तनम् अनुवर्तिष्यते तर्हि तत् तद्राष्ट्रस्य सर्वनाशाय भविष्यतीति भारतप्रधानमन्त्री नरेन्द्रमोदी असूचयत्। ओपरेशन् सिन्दूरम् इत्यस्यानन्तरं आदंपुरे व्योमसैनिकनिलयं सम्प्राप्य सैनिकान् अभिसम्बोधयन् भाषमाणः आसीत् नरेन्द्रमोदी। 

  पाकिस्थानेन विशीर्णमिति तैरभिमानितेषु भारतीयव्योमनिलयेषु अन्यतमं भवति पञ्चाबस्थं  आदंपुरम्। सैनिकनिलयः सर्वथा सुरक्षितः इति प्रमाणीकर्तुमपि आसीत् प्रधानमन्त्रिणः इदं प्रातःकालसन्दर्शनम्। 

  आदंपुरे प्राप्तवान् मोदीवर्यः 'एस् ४००' इति व्योमप्रतिरोधसंविधानम् अभिवाद्य सैनिकैः सह भाषणं कृत्वा तेषां पराक्रमशीलं, स्थिरोत्साहं च प्रकीर्तितवान्।

 विराट कोह्ली क्रिकट् निकषस्पर्धायाः निवृत्तवान्। 

एकदिने अनुवर्तिष्यते। 

नवदिल्ली> क्रिकट् आराधकानां वीरपुरुषः, भारतस्य क्रिकट् नायकेषु अनुत्तमः  विराट कोह्ली निकषस्पर्धायाः विरम्यते इति स्वयमुद्घोषितवान्। पूर्वमेव टि - २० अतः निवृत्तः सः परं एकदिनस्पर्धासु क्रीडिष्यति। 

  पराक्रमशाली, उत्साहवान्, जनप्रियः - त्रयमपि कोह्लेः उत्तमरीत्या अनुयुक्तं विशेषणं भवति। अधिकतमेषु निकषस्पर्धासु भारतदलं विजयपदमानीतवान् नायकः इति ख्यातिः कोह्लेः स्वकीयः अस्ति। ६० प्रतिद्वन्द्वेषु ४०विजयाः। सप्त युगलशतकस्य स्वामीअस्ति।

 UPI सेवा स्थगिता। उपयोक्तृजनानाम् अतिसम्मर्दः कारणम्।

   नवदिली> भारते यू पि ऐ नाम धनपरिवर्तनादिकी स्थगिता इति प्रतिवेद्यते। पे टि एम्, फोण् पे, गूगिल् पे इत्यादयः अनुप्रयोगाः अद्य सोमवासरे सायं कालादारभ्य स्थगिताः। नववादने सेवा पुनस्थापिता। विगते मार्चमासे लब्धगणनानुसारेण 1830 कोटि विनिमयाः कृताः सन्ति। फेब्रुवरिमासे विनिमयाः 1611 कोटि इत्यासीत्।

 "भीकरवादरूढमूला भूमिः सुरक्षिता नास्ति, भीकरवादिनः अनुगम्य आखेटनं करिष्यामहे; " – रक्षामन्त्री राजनाथसिंहः।

  "सिन्दूरं नष्टवतीनां कुटुम्बानां कृते सशस्त्रसेनया ओपरेषन् सिन्दूरम् इति प्रक्रमेण न्यायः प्रदत्तः" इति भारतस्य रक्षामन्त्री राजनाथसिंहः उक्तवान्। ब्रह्मोस्-शस्त्रप्रयोगः  शत्रूणां कृते स्पष्टतया  दत्तसन्देशः भवति इत्यपि सः निरूपितवान्। सम्पूर्णं राष्ट्रं भारतीयसैन्याय कृतज्ञतां प्रकाशयति।

"ओपरेषन् सिन्दूरम्" केवलं सैन्यकर्म न भवति, अपितु भारतस्य राजनैतिक -सामाजिक -संकल्पशक्तेः प्रतीकम् एव। रावलपिण्डिस्थं पाकिस्थानस्य सैनिककेंद्रं लक्ष्यीकृत्य आक्रमणं कृतम्।

"भीकरवादेन पीडितं भूमिप्रदेशे ते सुरक्षिताः इति चिन्तयन्ति चेत्, तत् न तथ्यम्। तथा नास्ति, यत्र यत्र ते भीकरवादिनः निवसन्ति, तत्र तत्र गत्वा तान् आखेटनं करिष्यामहे" इति राजनाथसिंहः उक्तवान्।

 पाकिस्थानस्य युद्धविरामलङ्घनम्; ड्रोणस्य  आक्रमणेन एकस्य सैनिकस्य वीरमृत्युः।

  युद्धविराम-सम्मतिः प्रवृत्ता। किन्तु कतिपयहोरायाः अनन्तरं  पाकिस्थानदेशेन तस्य उल्लङ्घनं कृतम्। पाकिस्थानेन कृतेन ड्रोणाक्रमणेन एकस्य भारतीयसैनिकस्य वीरमृत्युः अभवत्। एषः सैनिकः उधमपुर-नगरस्य सैन्यकेंद्रे रक्षणकर्तृरूपेण नियुक्तः आसीत्। भारतदेशः पाकिस्थानस्य वञ्चनक्रियाम् अपालपत्। आवश्यके सति प्रत्याक्रमणं करणीयम् इति सैन्यबलान् प्रति निर्देशः दत्तः।

    जम्मू-काश्मीरे अखनूर्, रजौरी, आर्.एस्. पुरा इत्यादिदेशेषु गभीरं षेल्-आक्रमणं जातम्। नग्रोट्थ-प्रदेशस्थे सैन्यकेन्द्रे अपि आतङ्कवादिनां आक्रमणम् अभवत्। सीमाप्रदेशेषु मुख्यकार्यालयाधिकारिभिः सह भारतस्य केन्द्रीय-गृहमन्त्रिणा विषयेऽस्मिन् चर्चा कृता। पञ्जाबराज्ये अमृत्सर-नगरे 'रक्तवर्ण-सूचना’ अपि घोषिता।

 एस् एस् एल् सि [केरले दशमीकक्ष्यायाः अन्तिमपरीक्षा] परीक्षापरिणामः - ९९. ५% विजयः। 

अनन्तपुरी> अतीतायाम् एस् एस् एल् सि परीक्षायां ९९. ५% विजयः। परीक्षां लिखितवत्सु ४,२६,६९७ छात्रेषु ४,२४५८३ छात्राः उपरिपठनाय अर्हतां लब्धवन्तः। शिक्षामन्त्री वि शिवन् कुट्टिः फलं प्रख्यापितवान्। 

  ६१,४४९ छात्राः सर्वेषु विषयेषु A+ लब्धवन्तः। गतवर्षापेक्षया दशसहस्राणाम् आकुञ्चनमभवत्। २३३१ विद्यालयाः १००% विजयं प्रापुः।

 दिनद्वयेन ६२ नगराणि लक्ष्यीकृत्य पाकिस्थानस्य ड्रोण् आक्रमणम्। 

भारतेन सर्वं विफलीकृतम्। 

जम्मु> गते दिनद्वये भारतस्य सीमाराज्यानां ६२ नगराणि लक्ष्यीकृत्य पाकिस्थानः अग्निशस्त्रयुक्तानि ड्रोण् यन्त्राणि उपयुज्य आक्रमणमकरोत्। किन्तु भारतस्य व्योमप्रतिरोधसंविधानमुपयुज्य सर्वं विफलीकृतम्। 

  गुरुवासरस्य रात्रौ ३६ स्थानानि, शुक्रवासरे २६ स्थानानि लक्ष्यीकृत्य आसीदाक्रमणम्। गुजरात्, जम्मु काश्मीरं, पञ्चाबः, राजस्थानम् इत्येतेषां सैनिककेन्द्राणि आसीत् पाकिस्थानस्य लक्ष्यम्। तुर्किनिर्मितानि ४०० ड्रोणानि एव उपयुक्तानि। प्रतिरोधस्य अंशतया पाकिस्थानस्य चत्वारि व्योमप्रतिरोधनिलयान् प्रति भारतेन प्रत्याक्रमणं कृतम्।

 पाकिस्थानस्य प्रकोपनमनुवर्तते। 

जनवासक्षेत्राणि लक्ष्यीकृत्य अग्निशस्त्राक्रमणं - द्वौ बालकौ मृतौ, त्रयः क्षताः। 

भुषुण्डिप्रयोगेण एकः सैनिकः वीरमृत्युं प्राप। 

श्रीनगरं> काश्मीरस्य जनाधिवासकेन्द्राणि लक्ष्यीकृत्य अपि पाकिस्थानस्य आक्रमणम्। काश्मीरे पूञ्च् क्षेत्रे कस्यचन विद्यालयस्य पृष्ठतः विद्यमानं गृहं प्रति पाकिस्थानस्य 'षेल्' पतित्वा द्वौ बालकौ हताविति विदेशकार्य सचिवेन विक्रम मिस्रिना स्थिरीकृतम्। विद्यालयः पिहितः इत्यतः महान् दुरन्तः अपनीतः। अन्यत्र चलतः कार् यानस्य उपरि पाकिस्थानस्य 'षेल्' पतित्वा एकपरिवारीयाः त्रयः आहताः। 

  काश्मीरस्थे उरि मण्डले पाकिस्थानेन कृते भुषुण्डिप्रयोगे एकः सैनिकः वीरमृत्युं प्राप। आन्ध्रप्रदेशीयः एम् मुरली नायिक् [२७] एव मृतः। 

 उरी, पूञ्च्, राजौरी इत्यादिभ्यः सीमास्थानेभ्यः सेनायाः निर्देशमनुसृत्य  जनाः सुरक्षितस्थानानि प्रति पलायन्ते।

२०२५ संवत्सरस्य भारत-मुद्रा नाम पुरस्कारेण  दामोदरन् नम्बिटिः सम्मानितः।

   तृश्शिवपेरूर्> संस्कृतस्य प्रचाराय भारतमखिलं भ्रमन् अनवरतं प्रयत्नं कृत्वा स्वं मार्गं स्फुटीकृतवान् आसीत् अशोकन् पुरनाट्टुकर। प्रभाषकः, पत्रकारः, अध्यापकश्च आसीत् अयं महोदयः। अस्य स्मृत्यर्थं संस्थापितः भारत-मुद्रा नाम पुरस्कारं संवत्सरेऽस्मिन् दामोदरन् नम्बिटिः प्राप्तवान्। अयं महोदयः सुज्ञातः चित्रकारः, ग्रन्थकारश्च भवति।

 11,111 रूप्यकाणां धनराशिः, प्रशस्तिपत्रम्, फलकं च पुरस्कारेऽस्मिन् अन्तर्भवति। गुरुवायूर्-देवस्वं-प्राधिकरणस्य अध्यक्षेण डा. वी.के. विजयेन पुरस्कारोऽयं समर्पितः। पी.के. राजेन अध्यक्षतां वहति स्म।

डॉ॰ सी.टी. फ्रान्सीसेन अशोकन् पुरनाट्टुकर महाभागस्य सुस्मरणं कृतम्। के.वी. गणेशेन पुरस्कारेण मानितस्य दामोदरन् नम्बिटिमहोदयस्य विशिष्टपरिचायकं कृतवान्। एन्. मोहनस्य 'इन्नलत्ते मष़' (मलयाळ भाषा) इति ग्रन्थम् अशेकन् महोदयेन 'ह्यस्तनी वृष्टिः' इत्याख्यया अनूदितम् आसीत्। ग्रन्थोऽयं  डॉ॰ टी. श्रीकुमारः, के रामदासाय समर्प्य प्रकाशितवान्। श्रीकुमारः केरळस्य कविकोकिलस्य प्रथितयशस्कस्य वैलोप्पिल्लि श्रीधरमेनोनस्य पुत्रः भवति। रामदासः अशोकन् पुरनाट्टुकर महोदयस्य पुत्रः च।

 एन्. राजगोपालः, डॉ॰ एस्.एन्. महेष् बाबुः, षाजुः पुतूर, श्रीलेखा, प्रभा वैक्कत्त्, विनायकः च कार्यक्रमे भाषणानि अकुर्वन्।

 विश्वसंस्कृतप्रतिष्ठानस्य ४५तमं राज्यस्तरीयसम्मेलनं श्व आरभ्य कोष़िक्कोट् जनपदे। 

कोष़िक्कोट्> संस्कृतभारत्याः केरलविभागस्य विश्वसंस्कृतप्रतिष्ठानस्य ४५तमं राज्यस्तरीयसम्मेलनं शनिवासरे रविवासरे च कोष़िक्कोट् जनपदे विधास्यति। सम्मेलनस्य उद्घाटनं शनिवासरे अपराह्ने केरलस्य राज्यपालः राजेन्द्र विश्वनाथ आर्लेकरः तोण्डयाटस्थे चिन्मयाञ्जली सभागारे करिष्यति। 

  प्रतिनिधिसम्मेलनं ११तमे दिनाङ्के शिक्षकसदने सम्पत्स्यति। संस्कृतसम्भाषण शिबिरं, वीथीनाटकं, विलम्बरपथसञ्चलनं, संस्कृतग्रन्थानां प्रदर्शनं, संघात्मकं भगवद्गीतापठनं, मनोरञ्जनकार्यक्रमाश्च  सम्मेलनस्य अंशतया भविष्यन्ति।

 सण्णि जोसफः केरल प्रदेश् कोण्ग्रस् अध्यक्षः। 

सण्णि जोसफः।

नवदिल्ली> के पि सि सि इति केरलराज्यस्य कोण्ग्रस् दलस्य अध्यक्षरूपेण विधानसभासदस्यः सण्णि जोसफः एव इति दलस्य  उन्नताधिकारसमित्या [हैकमान्ट्] विज्ञापितम्। विवादानाम् अनिश्चित्वानामन्ते आसीत् वर्तमानीनाध्यक्षं के सुधाकरमपनीय सण्णि जोसफस्य नियुक्तिः। 

  यू डि एफ् संविधानस्य अध्यक्षरूपेण अडूर् प्रकाशः नियुक्तः। पि सि विष्णुनाथः , ए पि अनिल्कुमारः, षाफि परम्पिल् इत्येते के पि सि सि इत्यस्य प्रवर्तकाध्यक्षरूपेण च नियुक्ताः।

 एस् एस् एल् सि परीक्षाफलम् अद्य। 

कोच्ची> केरले दशमकक्ष्याछात्राणां अन्तिमसामान्यपरीक्षा एस् एस् एल् सि इत्यस्य परिणामः अद्य ज्ञातुं शक्यते।  सायं त्रिवादने शिक्षामन्त्रिणा वि शिवन्कुट्टिना फलं विज्ञापयिष्यते। 

  सार्धचतुर्लक्षं छात्राः तेषां फलं जिज्ञास्यमानाः सन्ति। टि एछ् एस् एल्  सी, ए एछ् एस् एल्  सी इत्यनयोःपरिणामव्ज्ञप्तिरपि अनेन सह भविष्यति।

 कर्दिनाल् रोबर्ट् प्रोवो नूतनः मार्पापावर्यः। 

नूतनपापावर्यः विश्वासिजनान् अभिसम्बोधयति 

अमेरिकातः प्रथमः पापा; 'लियो १४तमः' इति नाम स्वीकृतम्। 

वत्तिक्कान सिटी>  आगोल कत्तोलिक्कासभायाः परमोन्नत आत्मीयाचार्यः - मार्पापा - चितः। कर्दिनाल् रोबर्ट फ्रान्सिस् प्रोवो कोण्क्लेव् इति गुप्तपरिषदः द्वितीयदिने २६७ तमः मार्पापारूपेण चितः। लियो चतुर्दशतमः इति सः परं आख्यायते। 

  गुरुवासरस्य रात्रौ ९. ४० वादने सिस्टैन् चाप्पल् देवालयस्य धूमनालिकया श्वेतधूमः बहिरागच्छत्। निमेषाणामनन्तरं कर्दिनाल् प्रोटोडीकन् पदीयः डोमनिक् माम्बोर्टी सेन्पीटेर्स् देवालयस्य वेदिकां सम्पाप्य विज्ञापितवान् - "अस्मभ्यं पापा लब्धः" । तदैव लियो १४ तमः वेदिकां सम्प्राप्तवान्। "संवादेन मेलनेन सेतुः निर्मातव्यः। सदापि शान्तिं पालयाम" इति नूतनपापावर्येण प्रथमः सन्देशः समर्पितः।

 भारतबंगलादेशयोः सीमनि चीनस्य उदग्रछायाग्राही।

  गुवाहती>भारत-बंगलादेशयोः सीमनि चीनस्य उदग्रछायाग्राही परित्यक्तवत् दृश्यते। श्रीभूमि नगरस्य समीपे चारबसार प्रदे शतः उदग्रछायाग्राही लब्धा। चीनेन निर्मिता भवति इयम्। आरक्षकैः अन्वेषण- प्रक्रमाः समारब्धाः।

 रोहित शर्मा निकषक्रिकट् इत्यस्मात् निवृत्तः। 

मुम्बई> भारतस्य क्रिकट्क्रीडादलस्य नायकः रोहित शर्मा निकषस्पर्धायाः निवृत्तवान्। टि - २० प्रकरणात् पूर्वमेव निवृत्तः सः एकदिनप्रकरणे अनुवर्तिष्यते। 

  निकषस्पर्धापरम्परासु रोहितशर्मणः निन्द्यमानानुष्ठानेभ्यः नायकपदम् अङ्गत्वमपि विनष्टं भवेदिति अभ्यूहे  जाते अस्ति तस्य निवृत्तिविज्ञप्तिः।

 'सिन्दूरं' भारतस्य सन्देशः। 

वार्ताहरसम्मेलनं कृतवत्यौ विङ् कमान्टर् व्योमिका सिंहः केणल् सोफिया खुरेषी च। 

नवदिल्ली> सिन्दूरम् इति कृतनामधेयः भारतस्य सैनिकप्रक्रमः भीकरतां विरुध्य राष्ट्रस्य सूक्ष्मतया विधत्तः सन्देशः भवति। पहल्गामभीकराक्रमणस्य प्रतिप्रहरस्य ओपरेशन् सिन्दूर् इति नाम्नि आक्रमणे हतपुरुषाणां विधवाभ्यः समर्पिता इयम् आदराञ्जलिः। भीकरैः निर्माजितानां २६ सिन्दूरतिलकानां प्रत्युत्तरम्! 

  वार्ताहरसम्मेलने विदेशकार्यसचिवेन सह सेनाप्रक्रमान् अधिकृत्य विवरणं दत्तवत्यौ  द्वे महिले - केणल् सोफिया खुरेषी तथा  विङ् कमान्डर् व्योमिका सिंहश्च विनष्टप्राणानां पत्नीनां कृते समर्पितादररूपेण श्लाख्येते।

 सिन्दूर शस्त्रप्रक्रमेण पाकिस्थानं  प्रकम्पितम्।

प्रत्याक्रमणेन पाकिस्थानस्य प्रकोपः, वीरवादः। 

एकः भटः वीरमृत्युं प्राप। 

नवदिल्ली> ओपरेषन् सिन्दूर् इति भारतस्य प्रतिप्रहरात् भयचकितं पाकिस्थानं प्रत्युषसि भारतं विरुद्ध्य षेल् नामकास्त्रस्य वर्षम् अकरोत्। पूञ्च् , रजौरि मण्डलेषु आसीत् षेल् शस्त्राक्रमणम्।

  भारतसेनायाः लान्स् नायिक् पदीयः दिनेष् कुमारः  वीरमृत्युं प्राप। अन्यः कश्चन सैनिकः तीव्रक्षतेन आतुरालयं प्राविशत्। पाकिस्थानस्य आक्रमणे १५ प्रदेशवासिनः जनाः हताः। 

 एतदन्तरे भारतं प्रति प्रतिप्रहरं करिष्यतीति  पाकिस्थानस्य प्रधानमन्त्री वीरवादं घोषितवान्।

 भीकरतां विरुध्य राष्ट्रस्य  प्रतिप्रहरः। 

'ओपरेशन् सिन्दूर्' - पाकिस्थानस्य भीकरकेन्द्रेषु भारतस्य शस्त्रोपचारः। 

+ २५ निमिषाः, ९  केन्द्राणि, ७० मरणानि। 

+ विशीर्णेषु भीकरपरिशीलनकेन्द्रेषु एकं 

बिन् लादनेन निर्मितम्। 

नवदिल्ली> पहल्गामभीकराक्रमणस्य १५ तमे दिने पाकिस्थानं प्रति भारतसैन्यस्य मर्मभेदकं प्रत्युत्तरम्। अद्य प्रत्युषसि १. ०५ वादनतः १. ३० वादनपर्यन्तं दीर्घिते सैनिकप्रक्रमे पाकिस्थानस्य काश्मीरस्थानि भीकराणां ९ परिशीलनकेन्द्राणि विनाशितानि। जनवासक्षेत्राणि अपनीय, केवलं भीकरशिबिराणि लक्ष्यीकृत्य कृते 'ओपरेशन् सिन्दूर्' इति कृतनामधेये शस्त्रप्रहरे ७० भीकराः हताः इति सेनाधिकारिभिः निगदितम्। 

  सैनिकप्रक्रमानन्तरम् आकारिते वार्ताहरसम्मेलने उपग्रहचित्राणां साह्येन प्रमाणैः सहितमासीत् सैन्याधिकारिणः उपस्थापनम्।

 नूतनमार्पापा 

वरिष्ठपुरोहितानां गूढपरिषत् [Conclave] अद्य आरभ्यते। 

भारतात् चत्वारः वैदिकश्रेष्ठाः। 

वत्तिक्कानं>  स्वर्गीयस्य फ्रान्सिस् मार्पापावर्यस्य अनुगामिनम् अधिगन्तुं ६९ राष्ट्रेभ्यः १३३ 'कर्दिनाल्' पदीयानां वरिष्ठपुरोहितानां गूढपरिषत्  [conclave]अद्य आरभ्यते। तदर्थं वत्तिक्काने सिस्टैन् चाप्पल् देवालयः सज्जः अभवत्। प्रादेशिकसमयानुसारं सायं ४. ३० वादने [भारतीयसमयः रात्रौ ८ वादने] परिषदारभ्यते।

  न्यूनाशीतिवयस्काः १३३ कर्दिनालपदीयाः गुप्तपरिषदि भागं करिष्यन्ति। तेषु भारतात् चत्वारः कर्दिनालाः सन्ति।

 भारतस्य जलं राष्ट्रेच्छानुसारम् उपयोक्ष्ये से-भारतस्य प्रधानमन्त्री।

        नवदिल्ली> पाकिस्तानाय जलं न दद्मः इति मोदिना उक्तम्। भारतस्थं जलं भारतस्य इच्छानुसारम् उपयोक्तुमेव भवति। सिन्धूनदीजल-व्यवस्थायाः जडीकरणविषये एव अयं परामर्शः।

 संस्कृतं समेषां भारतीयभाषाणां जननी - अमित शाहः। 

संस्कृतभारत्याः नेतृत्वे १००८ संस्कृतसम्भाषण शिबिराणि सम्पन्नानि। 

सम्भाषणशिबिराणां समाप्तिसमारोहे उद्घाटनभाषणं कुर्वन् अमित शाहः ।

नवदिल्ली> भारतस्य गृहमन्त्री अमित शाहः प्रोक्तवान् यत् संस्कृतभाषा प्रायेण समेषां भारतीयभाषाणां जननी भवति। दिल्ली विश्वविद्यालयस्य उत्तरपरिसरे संस्कृतभारत्या समायोजितस्य संस्कृतसम्भाषणशिबिरस्य समाप्तिसमारोहम् उद्घाटयन्  भाषमाणः आसीदयम्। यावत् संस्कृतं शक्तिमत् भविष्यति तावत् एकैका भारतीयभाषा प्रादेशिकभाषा च शक्तिमती भविष्यतीति तेन अनुप्रोक्तम्।

 भारत्याः विपुलं ज्ञानभण्डागारमधिकृत्य शाहमहेदयेन संस्मारितम्। योगः, गणितं, परिस्थिति विज्ञानं, व्याकरणम् इत्यादिषु संस्कृतस्य योगदानमनुत्तममिति तेनोक्तम्। 

  वस्तुतया संस्कृतमेवास्माकं मातृभाषा इति समारोहे विशिष्टातिथिरूपेण भागं कृतवती दिल्लीमुख्यमन्त्रिणी रेखा गुप्ता अवोचत्। संस्कृतस्य विज्ञानभण्डागारः अस्मान् विश्वगुरुं कर्तुं प्रभावशाली इति तया प्रोक्तम्। 

  संस्कृतभारत्याः नेतृत्वे दिल्लिविश्वविद्यालयस्य उत्तरपरिसरं केन्द्रीकृत्य १००८ संभाषणशिबिराणि प्रचालितानि यैः २५,००० सामान्यजनाः संस्कृतसंभाषणे प्रभवाः जाताः।

 राष्ट्रस्य रक्षासज्जीकरणं 

भारतं  सीमाराज्यानां जागरूकतां  निरदिशत्। 

व्याजशस्त्राभ्यासः [Moakdrill] बुधवासरे।

नवदिल्ली> पहल्गामभीकराक्रमणस्य अनन्तरं भारत-पाकिस्थानसीमायां संघर्षे वर्धिते रक्षासज्जीकरणं भारतेन सबलं कृतम्। युद्धसाध्यतामालक्ष्य सीमावर्तितराज्येभ्यः पूर्वसूचनाः दत्ताः। तेषु राज्येषु बुधवासरे  व्याजशस्त्राभ्यासं [Moakdrill] कर्तुम् आदेशः दत्तः। 

  व्याजशस्त्राभ्यासस्य स्वरूपम् एतावत् - 

+ व्योमाक्रमणस्य पूर्वसूचनाघोषस्य प्रवर्तनक्षमतायाः परिशोधनम्। 

+ आपत्कालीनावस्थाम् अभिमुखीकर्तुं सामान्यजनेभ्यः छात्रेभ्यश्च परिशीलनप्रदानम्। 

+ सुप्रधानप्रतिष्ठापनानां [Plants] संस्थानां च  आच्छादनाय सज्जीकरणानि कर्तव्यानि।

 आर्थिकसुस्थितौ भारतं जापानम् अतिक्रम्य चतुर्थश्रेणीं प्राप्तम्।

  २०२८ संवत्सरे भारतं विश्वसाम्पतिकमण्डले तृतीयं राष्ट्रं भविष्यति इति अन्ताराष्ट्र-नाणकनिधिः (IMF) वदति। अस्मिन् संवत्सरे चतुर्थस्थाने भारतं तिष्ठति इति अन्ताराष्ट्र नाणकनिधिः द्वारा प्रकाशिते 'वेल्ड् औट्लुक्' इत्यस्य प्रतिवेदने अस्ति। २०२४ तमस्य गणनानुसारं भारतं पञ्चमस्थाने आसीत्। अस्मिन् संवत्सरे चतुर्थश्रेणीं प्राप्नोति। २२२८ तमे जर्मनिम्अतिक्रम्य तृतीयंस्थानं प्राप्स्यति इति 'नाणकनिधिः प्रवचनं करोति।

 'तृशूर् पूरम्' उत्सवः श्वः। 

तृशूर्> दक्षिणभारते सुप्रसिद्धः 'तृशूर् पूरम्' इत्युत्सवः कुजवासरे विधास्यति। श्वः प्रातरारभ्य केरलीयाः केरले विनोदपर्यटनार्थं प्राप्तवन्तः विदेशीयाः च पूरनगरी इति प्रसिद्धं तृशूरस्थंं वटक्कुन्नाथमन्दिराङ्कणं  प्रवक्ष्यन्ति।

  श्वः दशवादनतः शताधिके वाद्यकाराः भागमूढ्यमानं पञ्चवाद्यादिकं वाद्यकलारूपं वादयन्ति। तदनन्तरं सायं चतुर्वादनतः 'कुटमाट्टं' नामकं नानावर्णोपेतछत्राणां परिवर्तनं सम्पत्स्यते। छत्रपरिवर्तनं तिरुवम्पाटि, पारमेक्काव् इति मन्दिरद्वयस्य नेतृत्वे ।.               नेतृत्वे एकैकस्मिन् पक्षे पञ्चदशगजवीराः प्रत्यभिमुखं तिष्टन्तः आनन्दोत्सवाय भिन्नवर्णछत्रप्रदर्शनं किल पर्वायते ।   ततः प्रत्युषसि नयनानन्दकरं स्फोटोत्सवश्च  सम्पत्स्यते।

 केरळ फिलिं क्रिट्टिक्स् पुरस्कारः 'एकाकी' चलन चित्राय।

       पुतुव फिलिंस् संस्थया निर्मितम् एकाकी नाम चलनचित्रम् २०२५ संवत्सरस्य केरळ फिलिं क्रिटिक्स् पुरस्कारायः चितम्। प्रसाद् पाऱप्पुऱम्, अय्यम्पुष़ हरिकुमारः, वैदिकः जोण् पुतुव च अस्य चलनचित्रस्य निदेशकाः रचयितारः च भवन्ति। २०२४ संवत्सरे केन्दीय चलनचित्रप्रमाणनायोगेन (Central board of film certification) प्रमाणीकृतानां चित्राणां मध्ये संस्कृतविभागे एव प्रथमस्थानं सम्प्राप्तम्। चलनचित्रेऽस्मिन् अभिनेता एकः एव इत्यस्ति सविशेषता।

 केरलस्य 'साक्षरताप्रवर्तका' पद्मश्रीसम्मानिता च के वि राबिया दिवंगता। 

मलप्पुरं> स्वजीवनं सहनस्य सामाजिकसेवायाश्च पर्यायरूपेण कृतवती साक्षरता-सामाजिकक्षेमप्रवर्तका के वि राबिया दिवं गता। ५९ वयस्का सा अर्बुदरोगहेतुना परिचर्यायाम्  आसीत्। बाल्यादारभ्य चक्रयुतासन्दे आसीत् तस्याः जीवनम्। 

 नवमकक्ष्यायां पठितवत्यां शरीरे उच्छोषिते मनस्स्थैर्येण जीवितविजयं प्राप्तवती। चक्राकारम् आसन्दमधिष्ठाप्य  अध्ययनादिकं निर्वक्ष्य बिरुदानन्तरबिरुदं सम्पादितवती। चक्रासन्देन चरन्ती १९९० तः केरलस्य साक्षरतान्दोलने भागं स्वीकृत्य दशशः निरक्षरान् जनान् वाचनस्य लेखनस्य च मार्गेण सञ्चाल्य विज्ञानप्रकाशमानीतवती। अन्येषु सामाजिकक्षेमप्रवर्तनेषु निस्स्वार्थसेवां प्रदाय सक्रिया अभवत्। 

  अचञ्चलमात्मविश्वासं पुरस्कृत्य २०२२ तमे वर्षे राष्ट्रस्य पद्मश्रीपुरस्कारेण राबियावर्या समादृता। नेहरु युवकेन्द्रपुरस्कारः, साक्षरतामिषन् पुरस्कारः, राष्ट्रिय युवजनपुरस्कारः, केन्द्रसर्वकारस्य महिलाशक्ति  पुरस्कारः इत्यादयः पुरस्काराः तया सम्प्राप्ताः। ३२ तमे वयसि अर्बुदरोगबाधिता सा निर्भयेन जीवितम् अग्रमनयत्। 

  बहवः प्रमुखाः तस्याः वियोगे अनुशोचितवन्तः। तिरूरङ्ङाटि स्थाने वर्तमाने आराधनालयस्थे श्मशाने  तस्याः शरीरं संस्कृतम्।

 आस्ट्रेलियायां 'लेबर् पार्टी' विजयमुपगच्छति।

आन्तणी आल्बनीस् एव प्रधानमन्त्री भविष्यति। 

सिडनी> आस्ट्रेलियायां सामाजिकनिर्वाचने प्रधानमन्त्री आन्तणी आल्बनीस् इत्यस्य नेतृत्वे विद्यमानं लेबर् पार्टीदलं विजयमुपगच्छति। संसदः १५१ अङ्गोपेतायाम् अधोसभायां ७८ स्थानेषु लेबर् पार्टी अग्रे वर्तते। विपक्षदलं लिबरल् पार्टी द्वितीयस्थाने अस्ति।

 दृश्यफलकस्य अनुस्यूतावलोकनेन देशस्थानां बालकेषु ५०% बालकेभ्यः हृस्वदृष्ट्यवस्थायाः सम्भावना।

चित्रं meta AI

   अत्यधिकं कालं अन्तर्जाल-पटलदर्शनेन कालयापनं कर्तुं अद्यतनबालकेभ्यः उत्साहः दृश्यते। एषः तेषां स्वास्थ्ये प्रतिकूलप्रभावं जनयति। 

    अतिपुष्टता, हृदयरोगः, मधुमेहः (विभागः-२) इत्येतेषां रोगाणां कारणत्वेन अयं स्वभावविशेषः एव इति पूर्वमेव वेदितः। किन्तु अधुना हृस्वदृष्टिः इत्यस्याः अवस्थायाः कारणम् अयमेव इति नवीनं ज्ञानं विशेषज्ञाः प्रकाशयन्ति।

   असोसियेषन् ओफ् कम्यूणिट्टी ओप्ताल्मोलजिस्ट् ओफ् इन्ट्या इत्यस्य वैद्याः एव विषयेऽस्मिन् अनुसन्धानं कृतवन्तः।

दृश्यफलकः - Screen 

 पाकिस्थानस्य पुनःप्रहरः।

आयातत्वं निरुद्धम्। 

नवदिल्ली> पहल्गामभीकराक्रमणस्य हेतुना पाकिस्थानात् सर्वेषाम् उत्पन्नानाम् भारतं प्रति आयातत्वम् सर्वकारेण निरुद्धम्। पाकिस्थानात् व्योम-स्थलमार्गैः प्राप्यमाणाः पत्र - भाण्डव्यवहाराश्च निश्चेतनीकृताः। पाकिस्थानीयमहानौकाः भारतस्य महानौकाश्रयेषु निरुद्ध्य महानौकमन्त्रालयस्य आदेशः बहिरागतः। 

  राष्ट्रसुरक्षां राष्ट्रस्य सामान्यतात्पर्यं चालक्ष्य एव निरोधः विहित इति वाणिज्यमन्त्रालयेन निगदितम्। नूतननिर्णयेन भारतात् पाकिस्थानस्य आयातायः शून्यं भविष्यति।

 अयोध्यायां रामपथे मांसमद्यानां विक्रयः निरुद्धः। 

अयोध्या> अयोध्या - फैसाबाद नगरद्वयं संयुज्यमानस्य रामपथनामकस्य सुप्रधानमार्गस्य १४ कि मी दूरपरिधौ मदिरामांसानां विक्रयं निरुध्य अयोध्यानगरसभायाः आदेशः बहिरागतः। 'पान्, गुड्का, बीडी, सिगार' इत्यादि प्रादेशिकनाम्नि कथ्यमानानां धूम-चर्वणाद्युन्मादकवस्तूनां प्रख्यातिविज्ञप्तिरपि [publicity]  निरुद्धः। 

  नगरस्य आत्मीयवातावतरणं सुस्थापनीयमिति अस्य लक्ष्यम्। चिरकालं यावदेव अयोध्यायां मद्यमांसादीनां विक्रयः नास्त्येव।

 पाकिस्थानाय चारवृत्तिः - राजस्थानवासी निगृहीतः।

जयपुरं> पाकिस्थानचारसंघटनं ऐ एस् ऐ इत्यस्मै चारवृत्तिं कृतवान् इत्यारोप्य राजस्थाने जयसाल्मीर् निवासी पठान खानः भारतीयगुप्तचरदलेन  निगृहीतः। २०१३ तः आरभ्य सीमायां निर्णायकवार्ताः सः ऐ एस् ऐ संस्थायै उपसंक्रमितवानिति सूच्यते। बहुवारं सः पाकिस्थानं गत्वा ऐ एस् ऐ कार्यवाहकैः सह भाषते स्म।  धनराशिं स्वीकृत्य एव चारवृत्तिं कृतवानिति अधिगतमस्ति।

 पहल्गामाक्रमणं पाकिस्थानस्य बोध्येन।

 श्रीनगरं> पहल्गाम आक्रमणे पाकिस्थानस्य भागभाक्त्वं दृढीकृत्य एन् ऐ ए संस्थायाः प्राथमिकावेदनम्। २६ पर्यटकानां जीवहानिविषये लष्कर् ई तोय्बा इति भीकरसंघटनस्य , ऐ एस् ऐ इति पाकिस्थानस्य गुप्तविभागः, पाकिस्थानसेना इत्येषां भागभाक्त्वं दृढीकृतम् इति आवेदनपत्रे अस्तीति सूच्यते। 

  आक्रमणे मुख्यभागभाक् हाषिम मूसा इति सुलैमान् नामधारी, अलि भाई इति कथ्यमानः तल्हा भाई इत्येतौ पाकिस्थाननागरिकौ इति प्रत्यभिज्ञातम्। 

  ऐ एस् ऐ संघटनस्य अधिकारी आसीत् भीकराणां नियन्ता इत्यपि आवेदने सूच्यते।

 ५३ संवत्सरेभ्यः पूर्वं विक्षिप्तस्य बहिराकाशवाहनस्य अंशः पृथ्वीम् उत्पतति। 

'कोस्मोस् ४८२' इत्यस्य अवतरणविभागः।

ए ऐ साह्येन चित्रितं कोस्मोस् ४८२ इति पेटकम्। 

 

फ्लोरिडा> १९७२ तमे वर्षे सोवियट् यूणियन् राष्ट्रेण शुक्रग्रहस्य पर्यवेषणाय विक्षिप्तस्य बहिराकाशपेटकस्य कश्चिदंशः बहिराकाशात् विसृष्टः सन् भूमिं प्रत्यागच्छतीति शास्त्रज्ञैः निगदितम्। मेमासस्य दशमे दिने एषः भूमेरन्तरिक्षं प्रवेक्ष्यतीति सूच्यते। तस्मिन् समये अन्यथा किमपि न भविष्यति तर्हि होरायां २४२ कि मी इति शीघ्रगत्या अयंपेटकांशः लोहखण्डः भूमौ निपतिष्यति। लण्टन-दक्षिणामेरिकयोर्मध्ये यत्रकुत्रापि पतितुं सम्भावना विद्यते। 

   सोवियट् यूणियन् राष्ट्रस्य शुक्रग्रहपर्यवेषणदौत्यस्य अंशतया विक्षिप्तस्य  कोस्मोस् ४८२' इत्यस्य उत्तरणांश एव भूमिं प्रत्यागच्छति। किन्तु इदं दौत्यं पराजितमासीत्। १९७९ तमे वर्षे आविश्वं सूच्यग्रे प्रतिष्ठितस्य 'स्कैलाब्' पेटकस्य स्मरणां जनयति अयं पेटकांशः।

 विष़िञ्ञं वाणिज्यमहानौकाश्रयं विश्वस्मै समार्पयत्। 

विषिञ्ञं अन्ताराष्ट्रनौकाश्रयं विश्वस्मै प्रधानमन्त्री नरेन्द्रमोदी समर्पयति।

अन्ताराष्ट्र समुद्रव्यापारमण्डले विष़िञ्ञं विश्वस्य केन्द्ररूपेण भविष्यतीति प्रधानमन्त्री। 

विष़िञ्ञम् [अनन्तपुरी]> ह्यः केरलस्य स्वप्नसाफल्यस्य दिनम्। राज्यस्य तथा राष्ट्रस्यापि विकासमुखत्वेन  भविष्यमाणः अन्ताराष्ट्र वाणिज्यमहानौकाश्रयः प्रौढगम्भीरे समारोहे राष्ट्राय विश्वस्मै च समर्पितः। शुक्रवासरे प्रभाते एकादशवादने प्रधानमन्त्री नरेन्द्रमोदी नौकाश्रयपरिसरे सज्जीकृतायां वेदिकायां पूर्णतया सुसज्जस्य नौकाश्रयस्य औद्योगिकमुद्घाटनं निरवहत्। 

  अन्ताराष्ट्र समुद्रव्यापारमण्डले विष़िञ्ञं नौकाश्रयः विश्वस्य केन्द्ररूपेण भविष्यतीति प्रधानमन्त्री प्रोक्तवान्। एतदर्थं राज्यप्रशासनेन सह सर्वात्मना यतिष्यते इति च तेन प्रोक्तम्। मुख्यमन्त्री पिणरायि विजयः अध्यक्षः अभवत्। राज्यपालः राजेन्द्र आर्लेकरः मुख्यातिथिरासीत्। 

  नौकाश्रयविभागस्य मन्त्री वि एन् वासवः, केन्द्रमन्त्रिणौ  जोर्ज् कुर्यः, सुरेष् गोपिः, जनप्रतिनिधी शशि तरूरः (लोकसभा), एम् विन्सेन्ट् (विधानसभा), अदानी ग्रूप् इत्यस्य अध्यक्षः गौतम अदानी इत्येते वेदिकायामुपविष्टाः आसन्।

 डो ए जयतिलकः केरलस्य सचिवप्रमुखरूपेण कार्यभारं स्वीकृतवान्। 

अनन्तपुरी> केरलस्य ५२ तमसचिवप्रमुखरूपेण डो ए जयतिलकः बुधवासरे कार्यभारं स्वीकृतवान्। 

  सेवायाः निवृत्तवत्याः सचिवप्रमुखायाः शारदा मुरलीधरस्य स्थाने भवति जयतिलकस्य पदलब्धिः।

 इस्रयेले वनाग्निः व्याप्यते। 

जरुसलेमः> इस्रयेलराष्ट्रे जरुसलेमस्य समीपे काननाग्निप्रकाण्डे दुरापन्ने आराष्ट्रम् आपत्कालीनता विज्ञापिता। दुरापदं प्रतिरोद्धुं सेना विन्यस्ता। 

  जीवहानिः न सूचितः। किन्तु धूमश्वसनेन २२ जनानां स्वास्थ्यं क्लिष्टं जातम्। ते परिचर्यायां वर्तन्ते। जरुसलेमस्य पश्चिमे भागे ३० कि मी प्रदेशमधिवसन्तः अपनीताः। 

  अग्निकाण्टशमनाय अन्ताराष्ट्रसमाजस्य साहाय्यं प्रधानमन्त्रिणा बञ्चमिन् नेतन्याहुना अभ्यर्थितम्। इटली , क्रोयेष्य इत्यादिभ्यः राष्ट्रेभ्यः विमानानि प्राप्स्यन्तीति नेतन्याहुना निगदितम्।

 जाति जनगणनायां केन्द्रसर्वकारः वशीभवति। 

सामाजिकजनगणनेन सह विधातुं मन्त्रिमण्डलस्य निर्णयः। 

नवदिल्ली> कोण्ग्रसदलादिभिः विपक्षीयदलैः चिरकालं यावदपेक्षिता जात्याधारितां जनगणनां कर्तुं केन्द्रसर्वकारस्य निर्णयः अभवत्। आगामिन्या  सामाजिकजनगणनया सह सम्पूर्णं जाति जनगणनमपि विधातुं गतदिने सम्पन्ने केन्द्रमन्त्रिमण्डलस्य उपवेशने निर्णीतम्। किन्तु आगामिनी सामाजिकजनगणना कदा भविष्यतीति सर्वकारेण न स्पष्टीकृतम्। 

  अन्तिमा जनसंख्यागणना २०११ तमे वर्षे सम्पन्ना। दशसु वर्षेषु क्रियमाणा जनगणना २०२१ तमे वर्षे कोविड्महामारेः व्यापनेन न विधत्ता।

 विष़िञ्ञं अभियोजना श्वः राष्ट्राय समर्पयिष्यते।

अनन्तपुरी> केरलस्य विकासोद्गमनाय कारणभूता विष़िञ्ञं वाणिज्यमहानौकाश्रयाभियोजना श्वः  प्रधानमन्त्रिणा नरेन्द्रमोदिना राष्ट्राय समर्पयिष्यते। शुक्रवासरे प्रभाते एकादशवादने अन्ताराष्ट्र महानौकाश्रयस्य औद्योगिकमुद्घाटनमेव प्रधानमन्त्रिणा निर्वक्ष्यते। एतावदाभ्यन्तरे महानौकाश्रयस्य प्रवर्तनं सम्पूर्णतया आरब्धमस्ति। 

  अद्य सायं अनन्तपुरीं प्राप्तवान् प्रधानमन्त्री राजभवने उषित्वा श्वः प्रभाते १०. ३० वादने विष़िञ्ञं प्राप्स्यति। ततः 'एम् एस् सि सेलस्टिनो' नामिकां मातृमहानौकां स्वीकरिष्यति। अनन्तरं महानौकाश्रयं सम्पूर्णं सन्दर्श्य उद्घाटनसमारोहे भागं करिष्यति। मुख्यमन्त्री,राज्यपालः, केन्द्र महानौकाश्रयमन्त्री, केरलीयाः केन्द्रमन्त्रिणः इत्यादयः समारोहेSस्मिन् भागं स्वीकरिष्यन्ति।

 नियन्त्रणरेखायां भुषुण्डिप्रयोगः - भारतेन पाकिस्थानाय तर्जनीभर्त्सनसूचनां प्रादात्।

     नियन्त्रणरेखायां प्रकोपनं विना अनवरतं गुलिकाप्रक्षेपणं कृतवते पाकिस्थानाय भारतेन पूर्वसूचनां प्रादात्। उभयराष्ट्रयोः उन्नतसैनिकाधिकारिणौ परस्परं दूरभाषिण्यां भाषणमकुरुताम्। पहल्गाम् भीकराक्रमणानन्तरं प्रतिदिनं  प्रचोदनां विना नियन्त्रणरेखायां गोलिकाक्षेपण स्थगनव्यवस्था  पाकिस्थानेन उल्लङ्खिता आसीत्। तदनुवर्त्य बुधवासरे भारतेन पाकिस्थानाय सुशक्ता तर्जनीभर्त्सन सूचनां प्रादात्।

 शिक्षकप्रशिक्षणकेन्द्रेण अभिमुखीकरणकार्यक्रमः आयोज्यते।

वार्ताहर:- कुलदीपमैन्दोला। 

    देशस्य उच्चशिक्षासंस्थासु सेवार्थं शिक्षकाणां प्रशिक्षणार्थं विश्वविद्यालयानुदानायोगस्य अधीनं "मालवीय-मिशन्-शिक्षकप्रशिक्षण-केन्द्रं" इत्यस्मिन् हेमवतीनन्दनगढ़वालविश्वविद्यालये, श्रीनगरगढ़वाले, उत्तराखण्डराज्ये,  २२ एप्रिल् २०२५ दिनाङ्कतः ३ मई २०२५ दिनांकपर्यन्तं अन्तर्जालमाध्यमेन राष्ट्रियशिक्षानीतिः २०२० इत्यस्मिन् केन्द्रित: अभिमुखीकरणकार्यक्रम: आयोज्यते।

   केन्द्रस्य कार्यवाहकनिदेशकः डॉ. राहुलकुंवरसिंहेन उक्तं यत् अस्मिन् कार्यक्रमे चतुर्षु राज्येषु स्थितानां त्रिंशत् शिक्षकाणां सहभागिता भविष्यति।

 काश्मीरे विनोदपर्यटनकेन्द्राणि पिनद्धानि। 

श्रीनगरं>  पहल्गाम भीकराक्रमणस्य अनुबन्धतया जम्मु-काश्मीरे वर्तमानेषु ८७ पर्यटनकेन्द्रेषु ४८ संख्यकानि  सर्वकारेण पिनद्धानि। किन्तु गुल्मार्गः, दाल् तटाकः इत्यादीनां सुरक्षाक्रमीकरणानि वर्धापितानि। 

  पहल्गामे आक्रमणं कृतवन्तः भीकराः इदानीमपि निलीनाः वर्तन्ते। भीकरान् सजीवं ग्रहीतुम्  आदेशः कृतः।

 अद्य विश्वश्रमिकदिनम्। 

कोच्ची> मेय् १ विश्वश्रमिकदिनत्वेन लोके सर्वत्र आमन्यते। इदानीन्तनकाले सामान्यजनैः अनुभूयमानाः प्रयेण सर्वे जनाधिपत्याधिकाराः संघटितश्रमिकवर्गस्य प्रयत्नफलेन जाताः। साप्ताहिकविरामदिवसः, अष्ट होराणां वृत्तिः, प्रौढजीवनावश्यकं वेतनं, स्वास्थ्यपरिरक्षानिगमः, सार्वत्रिकमतदानाधिकारः इत्यादीनि तेषु कानिचन भवन्ति। 

  अस्मिन् प्रकरणे अवधेयास्पदं यत् विश्वस्मिन् यत्रकुत्रापि न केवलं सामान्यजनानाम् अपि तु सम्पन्नवर्गस्यापि दैनन्दिनजीवनं श्रमिकाणां प्रयत्नफलाश्रितं भवति। भारतस्य अवस्थापि तादृशी। कार्षिक-निर्माण-स्वास्थ्य-स्वच्छताद्येषु मण्डलेषु वृत्तिं कुर्वतां कर्मकराणां सेवा निस्तुला वर्तते। सर्वेभ्यः श्रमिकेभ्यः 'सम्प्रतिवार्तायाः' मेय् दिनस्य शुभाशंसाः।