सर्वोच्चन्यायालये पञ्च नूतनाः न्यायाधिपाः पदं प्राप्ताः।
नवदिल्ली> सर्वोच्चन्यायालये नूतनतया नियुक्ताः पञ्च न्यायाधिपाः सोमवासरे पदं स्वीकृतवन्तः। न्यायमूर्तिनः पङ्कज मित्तलः, सञ्जयकरोलः, पि वि सञ्जयकुमारः, अह्सनुदीन् अमानुत्तुल्ला, मनोज मिश्रः इत्येते मुख्यन्यायाधिपस्य डि वै चन्द्रचूडस्य समक्षं शपथवाचनं कृतवन्तः। अनेन सर्वोच्चन्यायालयस्य न्यायाधिपानां संख्या ३२ अभवत्। पदद्वयमवशिष्यते।