भारतीयलोकतन्त्रे प्रसारमाध्यमानां निर्णयात्मिका भूमिका अस्ति; पत्रकाराणां साहसं सम्मानयामि इति मोदी अवदत्।

नरेन्द्रमोदी | Photo: PTI 

        नवदेहली> प्रधानमन्त्री नरेन्द्रमोदी पत्रकारान् समयस्य महत्त्वं स्मारितवान्। देहल्याः भाजपा-मुख्यकार्यालये गुरुवासरे आयोजिते 'दीपावलीमिलन'-कार्यक्रमे सः पत्रकारान् सम्बोधितवान्। प्रसारमाध्यमानां कार्ये समयस्य अतीव महत्त्वम् अस्ति इति मोदी उक्तवान्। दूरदर्शनवार्ता भवतु, वृत्तपत्रं वा भवतु, निश्चितसमये कार्यं समापनीयम्। व्यक्तिभ्यः, संस्थाभ्यः, देशेभ्यः च समयः समानरूपेण भवति। 

        स्वातन्त्र्यानन्तरं भारतस्य विकसितराष्ट्रनिर्माणं देशस्य स्वप्नम् अस्ति। परन्तु इदानीं तस्य स्वप्नस्य साक्षात्काराय निश्चितः समयः निर्धारितः अस्ति। २०४७ तमे वर्षे स्वातन्त्र्यस्य शततमं वर्षम् आचरणात् पूर्वं सर्वे मिलित्वा भारतं विकसितराष्ट्रं कुर्युः इति सः अवदत्। भारतीयलोकतन्त्रे प्रसारमाध्यमानि निर्णयात्मिकां भूमिकां निर्वहन्ति, विभिन्नानां विचाराणां देशे पत्रकाराणां योगदानम् अमूल्यम् अस्ति इति च मोदी उक्तवान्।