कानडा प्रधानमन्त्री भारते। 

विभिन्नक्षेत्रेषु भागांशसन्धयः हस्ताक्षरीकृताः। 

हैदराबादहौसे मार्क कार्णी - मोदिनोः मेलनम्। 

नवदिल्ली> संवत्सरद्वयस्य परस्परास्वारस्यं विस्मृत्य भारत-कानडयोर्मध्ये  ऊर्ज-रक्षा-आर्थिक-शैक्षिकमण्डलेषु परस्परसाहाय्यसन्धयः हस्ताक्षरीकृताः। गतदिने कानडायाः प्रधानमन्त्री मर्क् कार्णी इत्यनेन सह भारतस्य प्रधानमन्त्री नरेन्द्रमोदी नवदिल्ल्यां हैदराबाद हौस् इत्यत्र कृतायाः चर्चायाः अनन्तरं परस्परसहयोगस्य अनुकूलता सम्पन्ना।

  सन्धिमनुसृत्य कानडाराष्ट्रात् भारताय दीर्घकालं यावत्  'यूरेनियं' नामकस्य  धातोः दानाय कृतः सन्धिः तेषु प्राधान्यमर्हति।  एतत्तु भारतस्य ऊर्जमण्डले बृहत्परिणामाय कारणं भविष्यति। २. ६ बिल्यण् डोलर् मितमूल्ययुक्तं सन्धिं केन्द्रसर्वकारस्य आणवोर्जविभागः कनेडियसंस्था कामेको नामिका च मिथः हस्ताक्षरं कृतम्। 

  उच्चस्तरीय शैक्षिकमण्डलमभिव्याप्य विभिन्नक्षेत्रेषु परस्परसहयोगार्थं अष्ट अभिसन्धयः हस्ताक्षरीकृताः। १६ संवत्सराणि यावत् चर्च्यमानः समस्तः आर्थिकभागभाक्त्वसन्धिरपि अस्मिन् वर्षे एव साक्षात्कर्तुं निर्णयोSभवत्।

  '

 पश्चिमेष्यासंघर्षस्य प्रत्याघातः - तैलेन्धनमूल्यम् उद्गच्छति। 

मुम्बई>  पश्चिमेष्यायां संघर्षे तीव्रे आगोलविपण्याम् असंस्कृत तैलेन्धनस्य मूल्यम् उद्गच्छति। इरानस्य परमोच्चनेतुः आयत्तोल्ला खमेनीवर्यस्य हत्यानन्तरं सोमवासरे असंस्कृत तैलेन्धनस्य मूल्ये १०% मितस्य वर्धनमभवत्। अन्ताराष्ट्रिय व्यवहाराङ्कनस्य [Bench mark]  'ब्रेन्ट् क्रूड्' इत्यस्य मूल्यं अयोभाण्डं [Barrel] प्रति ८२ डोलर् मितं वर्धितम्। दिनेनैकेन ९. १३ डोलरस्य वर्धनम्! 

  अन्ताराष्ट्रियतैलेन्धनगमनागमने निर्णायकप्रभावेन वर्तमानायां 'होर्मुस्' सामुद्रधुन्यां तिस्रः तैलमहानौकाः आक्रमणाधीना‌ः इति वृत्तान्तेनैव तैलविपणी ज्वालयते। इरानस्य दक्षिणपार्श्वे वर्तमानेन होर्मुस् सामुद्रिकसङ्कोचेन महानौकाः न गन्तव्याः इति इरानस्य जागरूकतानिर्देशः वर्तते च। अपि च, सौदि अरेब्यायाः बृहत्तमा तैलसंस्करणशाला 'आराम्को' इत्यस्याः रास् तनूरा नामके स्थाने   ड्रोण् आक्रमणमभवदिति वार्ता अस्ति। तैलसंस्करणशालायाः प्रवर्तनं स्तब्धमिति सौद्या निगदितं च। पश्चिमेष्यराष्ट्राणि विरुध्य इरानेन कृतेन आक्रमणेन तैलविपण्याम् अतिक्लेशं भविष्यतीति सूच्यते।

 केरलम्। 

मुण्टक्कै-चूरल् मला ग्रामस्य पुनर्जनिः। 

सर्वकारेण कृतस्य वयनाट् पुरपत्तनस्य समुद्घाटनं सम्पन्नम्।

वयनाट्दुरन्तातिजीवितानां कृते केरलसर्वकारेण निर्मितस्य भवनसमुच्चयः। 

 प्रथमचरणे १७८ भवनानां कुञ्चिकादानं आधिकारिकप्रमाणपत्रसमर्पणेन सह निरवहत्। 

कल्पट्टा> २०२४ जूलै ३० तमे दिनाङ्के दुरापन्ने भूविच्छेदे प्रलये च नामापि अनवशिष्य नाशितस्य वयनाट् जनपदस्थस्य मुण्टक्कै-चूरल् मला प्रदेशस्य पुनर्जनिः गतदिने समभवत्।  भवनरहितानां ग्रामवासिनां कृते निर्मितस्य पुरपत्तनस्य   [Township] प्रथमचरणस्य समुद्घाटनं मुख्यमन्त्रिणा पिणरायि विजयेन कृतम्। कल्पट्टानगरसमीपे 'एल्सण् एस्टेट्' [Elson Estate] मध्ये संरचिते नगरसंस्थापने उद्दिष्टेषु  ४१० भवनेषु १७८ भवनानां निर्माणं सर्वथा पूर्तीकृत्य तावतां गुणभोक्तॄणां कृते कुञ्चिकादानं तथा स्थानस्य स्वामित्वाधिकारपत्राणां समर्पणं च रविवासरे सम्पन्नम्। 

  प्रतिपरिवारं सप्त 'सेन्ट्' मितं भूमिः तस्यां सहस्रचतुरश्रपादमितं भवनं च लभते। प्रतिभवनं प्रग्रीवं,महानसः, शयनकक्षद्वयं,स्वागतकक्षः, पठनप्रकोष्ठः, शौचालयः ,सम्भरणकक्षः च विद्यन्ते। भवनेषु एप्रिल् मासे वासम् आरब्धुं शक्यते।

 आयत्तोल्ला खमीनी हतः। 

इरानस्य प्रतीकारे गल्फे ४ मरणानि। 

टेहरानः> इरानस्य सर्वोच्चनेता आयत्तोल्ला अली खमीनी (८६) यू एस्-इस्रयेलयोः संयुक्ताक्रमणे हतः। राजनगरे टेहराने  खमीनेः वासस्थानं कार्यालयं चाभिव्याप्य वर्तमानं भवनसमुच्चयं प्रति शनिवासरे प्रभाते १०. ३० वादने विधत्तेन व्योमाक्रमणेन आसीत् तस्य निहननम्। 

  इरानस्य रक्षामन्त्री असीस् नासिर सादे, सेनामुख्यः अब्दुल् रहीम मौसवी, खमीनेः उपदेष्टा अली शम्खानी, इरानस्य Revolutionary Guard Core (IRGC) इत्यस्य नेतृमुख्यः मुहम्मद पाक्पुर् इत्येते च मृताः इति इरानराष्ट्रेण दृढीकृतम्। 

  इरानराष्ट्रस्य नीतिन्यायव्यवस्थायाः सर्वाधिकारी, सेनाविभागानां नेतृमुख्यः, धार्मिककार्यविभागस्य च मुख्याध्यक्षः इत्येवं रूपेण  परमोन्नतनेता इति स्थानम् अलंकुर्वन्नासीत् आयत्तोल्ला अली खमीनी। १९८९ तमे वर्षे आसीत्तस्य स्थानारोहणम्। 

  खमीनेः निर्याणे इरानेन ४० दिनात्मकं राष्ट्रीयदुःखाचरणं, सप्त दिनानां सामाजिकविरामश्च उद्घोषितः। 

  खमीनेः हत्यायां राष्टस्य प्रतिकारः भविष्यतीति  इरानस्य 'ऐ आर् जी सी' इत्यनेन प्रख्यापितम्। दुबाय् [यू ए ई], दोहा [खत्तर्], मनाम [बहरिन्], कुवैट् इत्यादिषु गल्फराष्ट्रेषु विधत्ते आक्रमणे चत्वारः मृताः। नैकानि भवनानि विशीर्णानि जातानि।

 टि-२० विश्वचषकः।

सञ्जु सांसणः अग्रे अनयत् [९७*/५०]।

विजयेन भारतं प्रपूर्वान्त्ये।

विन्डीसं ५ द्वारकैः पराजापयत। 

विन्डीसं विरुध्य भारतस्य विजयानन्तरं सञ्जू सांसणः। 

कोल्कोत्ता> सञ्जू सांसण् नामकस्य केरलीयस्य क्रिकट् क्रीडकस्य अत्युज्वलः कल्पनावैभवः! भारताय विजये अनिवार्ये तस्य ताडनवैभवेन [५० कन्दुकैः ९७* धावनाङ्काः] टि-२० विश्वचषकस्य सूपर् ८ प्रतिद्वन्द्वे वेस्ट् इन्डीसदलं पञ्च द्वारकैः पराजित्य भारतं पूर्वान्त्यचक्रं प्राविशत्। सञ्जू सांसणः क्रीडाप्रवीरः जातः।

  प्राप्ताङ्कसूचिका - विन्डीसः २० क्षेपणचक्रेषु १९५/४। भारतं १९. २ क्षेपणचक्रेषु १९९/५। गुरुवासरस्य पूर्वान्त्यस्पर्धायां भारतं इङ्गलाण्टेन सह स्पर्धिष्यते। बुधवासरे सम्पत्स्यमाने प्रथमे पूर्वान्त्यप्रतिद्वन्द्वे दक्षिणाफ्रिक्का-न्यूसिलान्टयोः स्पर्धा भविष्यति।

 आन्ध्रप्रदेशे स्फोटकनिर्माणशालायां स्फोटनं - २१ जनाः मृताः।

वेट्ल पालं> आन्ध्रप्रदेशे काकिनटा जनपदे वेट्ल पालम् इत्यत्र स्फोटकनिर्माणशालायां दुरापन्ने महास्फोटने २१ जनाः मृताः। अष्ट जनाः तीव्रतया तप्ताः जाताः। शनिवासरे मध्याह्ने आसीत् दुर्घटना। 

  तत्रत्याः श्रमिकाः एव मृताः। मृतान् प्रत्यभिज्ञातुं डि एम् ए परिशोधनमावश्यकमिति सूच्यते। राज्यस्य बृहत्तमा दुर्घटना एषा इति कथ्यते। दुर्घटनायां प्रधानमन्त्री नरेन्द्रमोदी, गृहमन्त्री अमित शाहः इत्यादयः अनुशोचितवन्तः। मृतानां परिवाराय धनसाह्यम् उद्घोषितम्।

 इराने यू एस्-इस्रयेलयोः आक्रमणम्। 

इराने बोम्बाक्रमणे विद्यालयः नाशितः; ८५ बालिकाः हताः। इरानस्य प्रतिप्रहरे गल्फराष्ट्राणि आक्रमितानि। 

टेहराने दुरापन्नं स्फोटनम्। 

टेह्रानः> आणवपरियोजनां त्यक्तुं न सज्जते इत्यारोप्य इरानराष्ट्रं प्रति अमेरिकायाः सहयोगेन इस्रयेलः व्योमाक्रमणमकरोत्। प्रादेशिकसमयानुसारं शनिवासरे प्रभाते ८. १५ वादने आसीत् आक्रमणम्। राजधानी टेहरानः, इसफहान्, खोम्, कराज्, केर्मन् षाह् इत्यादिस्थानेषु महास्फोटनानि जातानि। 

  दक्षिणेराने बालिकानाम् 'एलिमेन्टरि' विद्यालये बोम्बानि पतित्वा ८५ बालिकाः मृत्युमुपगताः। ९३  छात्राः व्रणिताः। 

  यू एसस्य पश्चिमेष्यायां वर्तमानान् निलयान् विरुध्य इरानस्य अग्निशस्त्राक्रमणम् अभवत्। बहरिन्, अबुदाबी, दुबाय्, कुवैट्, रियाद् [सौदि अरेब्या], सिरिया, इराख् इत्येतेषु प्रदेशेषु बोम्बस्फोटनानि जातानि। अनेके हताः इति सूच्यते।

      प्रधानमन्त्री नरेंद्रमोदीः चतुर्दश-वर्षीयाभ्यः कन्याभ्यः राष्ट्रव्यापिनं ह्यूमन्-पापिलोम-वैराणु (HPV) सूच्यौषधाभियानं प्रारब्धवान्।

२८ फ़ेब्रुवरी २०२६ तमे दिने अजमेर-नगरे मानव-पापिलोम-वैराणु (HPV) सूच्यौषध-अभियानस्य उद्घाटन-समये प्रधानमन्त्री नरेंद्र-मोदीस्य उपस्थितौ एकया परिचारिकया कन्यायै HPV-टीका प्रदत्ता। चित्रम्-: ANI/DPR PMO.

     राजस्थान-राज्यस्य अजमेर-नगरस्य कायड्-प्रदेशे आयोजिते कार्यक्रमे गर्भाशय-अर्बुद-रोग-निवारणार्थं अयं अभियानः प्रधानमन्त्रिणा नरोन्द्रमोदिना औपचारिकरूपेण उद्घाटितः। तस्मिन् अवसरे अनेकाभ्यः कन्याभ्यः सूच्यौषधं प्रदत्तम्, तथा प्रधानमन्त्री लाभार्थिभिः सह संवादं कृतवान्।

    अधिकारिणां वक्तव्यानुसारं “गार्डसिल् ४” (Gardasil 4) इति एक-मात्रा-युक्तं HPV- सूच्यौषधम् उपयुज्यते। अनेन सूच्यौषधप्रयोगेण गर्भाशय-ग्रीवार्बुदस्य कारणभूतेभ्यः HPV -१६ ,१८ , ६ तथा ११ -प्रकारेभ्यः वैराणुभ्यः संरक्षणं करोति

षोडश अष्टदश षट् तथा एकादश

 इराने इस्रयेलस्य व्योमाक्रमणम्। टेहराने नैकानि स्फोटनानि। 

मध्येष्या कलुषायते। 

आक्रमणम् अमेरिकायाः सहयोगेनेति सूच्यते। 

अयत्तोल्ला खमीनी सुरक्षितस्थानं नीतः। 

इस्रयेले आपत्कालीनावस्था उद्घोषिता। जागरूकतानिर्देशः।

Latest news

 १३३ अफ्गानीयभीकराः हताः इति पाकिस्थानम्। 

काबूल्> सीमान्तरितभीकरवादस्य प्रत्युत्तरम् इति वादरूपेण अफ्गानिस्थाने वर्तमानेषु तालिबानस्य सैनिकनिलयेषु पाकिस्थानं बोम्बवर्षमकरोत्। आक्रमणे १३३ भीकराः हताः द्विशताधिके जनाः व्रणिताः  इति पाकिस्थानसेनया अभिमानितम्। पाकिस्थानस्य सैनिकस्थानानि विरुध्य अफ्गानसेनया कृतस्य आक्रमणस्य प्रत्युत्तरमासीत् पाकिस्थानस्य बोम्बाक्रमणम्।

 दिल्ली। 

दिल्ली मद्यनीतिक्रमप्रकरणं 

अरविन्द केज्रिवालः सहापराधिनश्च अपराधविमुक्ताः। 

अपराधविमुक्तविध्यनन्तरं माध्यमानां पुरतः भाषमाणः केज्रिवालः विकाराधीनः जायते।

नवदिल्ली> आम् आद्मी पार्टी [ए ए पी] इति राजनैतिकदलस्य अस्तित्वप्रतिसन्धेः कारणभूते मद्यनयप्रकरणे भूतपूर्वः दिल्लीमुख्यमन्त्री अरविन्द केज्रिवालः, भूतपूर्वः उपमुख्यमन्त्री मनीष सिसोदिया, बी आर् एस् दलनेत्री के कविता इत्यादयः २३ अपराधिनः निरपराधिनः इति आदिश्य सविशेषनीतिपीठेन  विनिर्मुक्ताः। 

  अपराधिषु एकस्मिन्नपि नाम्नि सि बी ऐ संस्थया आरोपिताः अपराधाः प्रथमदृष्ट्या अपि नावस्थाप्यन्ते इति सविशेषन्यायालयस्य न्यायाधिपः जितेन्द्र सिंहः प्रस्तुतवान्। सि बी ऐ संस्था न्यायालयस्य निशितविमर्शविधेया अभवत्।

 मार्गसुरक्षायाः ५०० दिनानि - छात्राः एव सुरक्षाकर्म कृतवन्तः।

  आलप्पुष़> विद्यालयस्य छात्राः मार्गसुरक्षां कुर्वन्ति। आलप्पुष़ जिलायां विद्यमानायाः सेन्ट् तेरेसास् उच्चविद्यालयाधिकारिभिः वर्षत्रयेभ्यः पूर्वं स्वेच्छया योजनेयम् आरब्धा आसीत्। पश्चात्  'सुरक्षितमार्गः' इति प्रसिद्धा  SEMS School of Engineering इति संस्थायाः नेतृत्वे प्रचाल्यमानायां योजनायां संलग्ना अभवत् । इदानीम् इयं योजना कर्मकुशलतायाः ५०० दिनानि प्राप्तानि। वार्तां ज्ञात्वा आलप्पुष़ जनपदस्य अधिकारी अलक्स् वर्गीस् IAS विद्यालयम् अभिनन्दितुम् आगतवान् । विद्यालयस्य कृते अभिनन्दनफलकं दत्तवान् च। कार्यक्रमे शैक्षिकजनपदस्य अध्यक्षः (DEO) अब्दुल् सलां KAS भागं स्वीकृतवान्। 

    केरलस्य विविधविद्यालयेषु योजनेयं प्रचाल्यते। अस्याः योजनायै आर्थिकसाहाय्यं कुट्टूकारन् इति वाहनव्यापारसंस्थायाः CSR राशीतः लभते। 

 'इन्स्टग्रामे' अनुगामिसंख्यायां नरेन्द्रमोदी अग्रतमस्थाने। 

नवदिल्ली> इन्स्टग्रामनामके  सामाजिकमाध्यमे प्रधानमन्त्रिणः नरेन्द्रमोदिनः अनुगामिनां [Followers] संख्या दशकोटितः अतीता। विश्वस्मिन् इन्स्टग्रामे अधिकतमतया अनुगामियुक्तः विश्वनेता भवति नरेन्द्रमोदी। ४. ३२ कोटि अनुगामिभिः यू एस् राष्ट्रपतिः डोनाल्ड ट्रम्पः द्वितीयस्थाने वर्तते। तृतीयस्थाने इन्डेनेष्यायाः राष्ट्रपतिः प्रबोवो सुबियान्तो अस्ति - १.५ कोटि। 

  भारतीयराजनैतिकनेतॄणां मध्ये अपि मोदिवर्यः प्रथमस्थाने अस्ति। द्वितीयस्थाने उत्तरप्रदेशस्य मुख्यमन्त्री योगी आदित्यनाथः वर्तते- १.६१ कोटि अनुगामिनः। १.२६ कोटि अनुयायिभिः विपक्षनेता राहुल गान्धी तृतीयस्थाने अस्ति।

 टि-२० सूपर्८।

सिम्बाब्वेदलं विरुध्य भारतस्य विजयः। 

विजयानन्तरं भारतदलाङ्गाः परस्परम् अभिनन्दन्ति। 

चेन्नै> पूर्वान्त्यचक्रप्रवेशस्य प्रतीक्षां प्राकट्य सूपर् ८ चक्रे सिम्बाब्वेदलं विरुध्य भारतस्य उज्वलविजयः। टि-२० विश्वचषकस्य निर्णायके प्रतिद्वन्द्वे ७२ धावनाङ्कैः आसीत् भारतस्य विजयः। 

  भारताय अभिषेक शर्मा [५५] हार्दिक पाण्ड्यश्च [५०*] अर्धशतकं प्राप्तवन्तौ। हार्दिक पाण्ड्यः क्रीडाप्रवीरोSभवत्। सिंबाब्वे क्रीडकः ब्रियान बेन्नटः ९७ धावनाङ्कैः अबाह्यः जातः अपि दलं पराभूतम्। सूपर् ८ मध्ये क्रीडाद्वये अपि पराजितं दलं टि-२० विश्वचषकात् बहिर्गतं च। 

  प्राप्ताङ्कसूचिका - प्रथमं कन्दुकताडनं कृतवत् भारतं २० क्षेपणचक्रेषु द्वारकचतुष्टयं विनश्य २५६ धावनाङ्कान् सम्प्राप। प्रत्युत्तरे सिम्बाब्वे २० क्षेपणचक्रेषु १८४/६।

 टि-२० विश्वचषकः।

दक्षिणाफ्रिका पूर्वान्त्यचक्रे। 

अहम्मदाबादः> टि-२० विश्वचषकस्य सूपर् ८ क्रीडायाः अन्यस्मिन् प्रतिद्वन्द्वे वेस्ट् इन्डीसं पराजित्य दक्षिणाफ्रिका पूर्वान्त्यचक्रं प्राविशत्। १७७ धावनाङ्कानां विजयलक्ष्येण कन्दुकताडनं कृतवत् दक्षिणाफ्रिकादलं २३ कन्दुकेषु अवशिष्टेषु एकस्य ताडकस्य विनष्टे लक्ष्यं प्राप। नव द्वारकाणां अनायासविजयेन पूर्वान्त्यप्रवेशः लब्धः। दक्षिणाफ्रिकानायकः एय्डन् मार्क्रमः ४६ कन्दुकैः ८२ धावनाङ्कान् सम्पादितवान्।

 ईस्टर्दिने श्रीलङ्कायां भीकराक्रमणं 

गुप्तान्वेषणविभागस्य भूतपूर्वः मुख्याधिकारी निगृहीतः।

कोलम्बो> २०१९ तमे वर्षे ईस्टर् दिने श्रीलङ्कायां दुरापन्नां भीकराक्रमणपरम्पराम् अनुबन्ध्य श्रीलङ्कायाः गुप्तान्वेषणविभागस्य भूतपूर्वमुख्याधिकारी मेजर् जनरल् सुरेष् साले इत्याख्यः  कोलम्बोमध्ये आरक्षाधिकारिभिः निगृहीतः। भीकराक्रमणाय गूढालोचनां कृतवान्, साह्यं प्रेरणां च दत्तवान् इत्येवं निगृहणस्य हेतुः।

 भारतप्रधानमन्त्रिणः इस्रयेले हृद्यं स्वीकरणम्। 

नरेन्द्रमोदी केवलं न सुहृत् अपि तु सोदरः।

नरेन्द्रमोदिने इस्रयेलविमाननिलये दत्तं स्वीकरणम्। 

जरुसलेमः> भारतस्य प्रधानमन्त्री नरेन्द्रमोदी दिनद्वयसन्दर्शनाय इस्रयेलराष्ट्रं प्राप्तवान्। बुधवासरे बेन् गुरियोण् विमाननिलयं प्राप्तवन्तं मोदिनम् इस्रयेलस्य प्रधानमन्त्री बञ्चमिन्  नेतन्याहुः सभार्यः रक्तकम्बलं विस्तार्य स्वीकृतवान्। नरेन्द्रमोदी न केवलं सुहृत् , अपि तु सोदरः चेति नेतन्याहुः प्रस्तुतवान्। 

  नववर्षाभ्यन्तरे नरेन्द्रमोदिनः द्वितीयम् इस्रयेलसन्दर्शनं भवत्येतत्। परम्परागतस्वीकरणानन्तरं द्वौ प्रधानमन्त्रिणौ ह्रस्वचर्चां कृतवन्तौ। उभयपक्षसौहृदं प्रबलीकर्तुं नैकानि कार्याणि चर्चितवन्तौ इति मोदिवर्यः 'एक्स्' माध्यमेन प्रस्तुतम्। 

  तदनन्तरम् इस्रयेलसंसदं नरेन्द्रमोदी अभिसम्बोधनं कृतवान्। २०२३ ओक्टोबर् सप्तमदिनाङ्के हमासेन इस्रयेले कृतं "पैशाचिकं भीकराक्रमणं" मोदिना अपलपितम्। गासायाम् अनुवर्तमानं शान्तिप्रयत्नम् अनुमोदितवान् प्रधानमन्त्री नरेन्द्रमोदी पालस्तीनसमस्या परिगणनीया इत्यपि प्रोक्तवान्।

 टि-२० विश्वचषकः।

इङ्लाण्टः पूर्वान्त्यचक्रे।

कान्डी> अनुस्यूततया द्वितीयविजयेन इङ्लाण्टः टि -२० विश्वचषकस्य पूर्वान्त्यचक्रं प्रविष्टवत् प्रथमदलमभवत्। पाकिस्थानं द्वारकद्वयेन पराजित्य एव पूर्वान्त्यचक्रप्रवेशः दृढीकृतः। पाकिस्थानं  विरुध्य इङ्गलाण्टस्य नायकः हारी ब्रूकः शतकं प्राप्तवान्।   सूपर् ८ इत्यस्य प्रथमस्पर्धायाम् इङ्गलाण्टः  श्रीलङ्कां पराजापयत।

 केरलम्। 

राज्यनाम परं 'केरलम्'।

नामपरिष्करणाय केन्द्रप्रशासनस्य अङ्गीकारः। 

नवदिल्ली> केरलराज्यस्य नामधेयः केरला [Kerala] इत्यस्य स्थाने केरलम् [Keralam] इति परिष्कर्तुं कतिपयवर्षाणि यावत् केरलसर्वकारस्य परिदेवनाय केन्द्रमन्त्रिमण्डलस्य अङ्गीकारः। २०२४ जूण्मासे केरलविधानसभया ऐककण्ठ्येन अनुमोदितमुपक्षेपमेव केन्द्रमन्त्रिमण्डलेन अङ्गीकृतम्। प्रधानमन्त्रिणः नूतने कार्यालये 'सेवातीर्था'भिधाने समाकारितस्य प्रथम मन्त्रिमण्डलस्य प्रथमनिर्णयः  आसीदयम्।

 रक्तदुर्गसमीपं स्फोटनभीषा 

अष्ट भीकराः निगृहीताः। 

नवदिल्ली> दिल्ल्यां बृहद्भीकराक्रमणाय आसूत्रणं कृतमिति सन्देहे अष्ट जनाः सुरक्षानियोक्तृभिः निगृहीताः। एषु केचन बङ्गलादेशीयाः भवन्ति। पाकिस्थानस्थस्य ऐ एस् ऐ इत्यस्य बङ्गलादेशम् आस्थानीकृत्य प्रवर्तमानस्य केषांचन भीकरसंघटनानां च निर्देशानुसारं निगृहीताः गूढालोचनां कृतवन्तः इति अन्वेषणसंस्थानां प्राथमिकाधिगमनम्। 

  षट् जनाः तमिलनाटतः एव निगृहीताः। द्वौ दिल्लीतः निगृहीतौ। रक्तदुर्गसमीपं स्फोटनं कर्तुं आसूत्रणं कृतमिति परिपृच्छानन्तरं अन्वेषणसंस्थया निगदितम्। लष्कर् ई तोय्बा भीकरसंघटनेन भारतस्थानि धार्मिककेन्द्राणि लक्ष्यीक्रियन्ते इति गुप्तसूचना आसीत्।

 जम्मु-काश्मीरे प्रतिद्वन्द्वः 

त्रयः भीकराः व्यापादिताः। 

जम्मु> जेय्षे मुहम्मद् इति पाकिस्थानीयभीकरसंघटनस्य त्रयः भीकराः सुरक्षासेनया सह संघट्टने हताः। किष्त्वार् जनपदे रविवासरे प्रभाते आसीत् प्रतिद्वन्द्वः। मृतशरीराणि प्रत्यभिज्ञातुमशक्यरूपेण दग्धावस्थायामासन्। एषु एकः जेय्षे मुहम्मदस्य कमान्डर् पदीयः सेय्फुल्लााभिधानः भवतीति  सूच्यते। 

  भारतसेना, आरक्षकसेना, सि आर् पि एफ् इत्येतेषां संयुक्तान्वेषणे आसीत् भीकराणां हत्या। ए के ४७ शतघ्नीद्वयमभिव्याप्य अनेकानि आयुधानि च अधिगतानि। अस्मिन् वर्षे अद्यावधि जम्मुक्षेत्रे सप्त भीकराः सेनया व्यापादिताः।

 एस् ऐ आर् नूतनमतदान्यावलिः प्रकाशिता। 

नवसु राज्येषु १. ७०कोटि मतदानिनां न्यूनता।

नवदिल्ली> नवसु राज्येषु केन्द्रप्रशासनप्रदेशेषु च समग्रमतदान्यावलीपरिष्करणं पूर्तीकृत्य नूतना मतदान्यावलिः प्रकाशिता। आहत्य मतदानिनां संख्यायां १. ७० कोटि मतदानिनां न्यूनता दृश्यते। 

  केरलं, गुजरात्, पुदुच्चेरी, लक्षद्वीपः, राजस्थानं, छत्तीसगढ, अन्तमान् निकोबार्, मध्यप्रदेशः, गोवा  राज्येषु केन्द्रप्रशासनप्रदेशेषु च परिष्कृतमतदान्यावल्याम् आहत्य मतदानिनां संख्या १९. ७५ कोटि अस्ति। एस् ऐ आर् इत्यस्मात्पूर्वं आहत्य संख्या २१. ४५ कोटि आसीत्।

 मलेष्यादेशे प्रकाशमान-मार्गरेखाः स्थापिताः,  अनन्तरम् अद्भुतात्मकः प्रकाशः आगतः।

   मलेष्यादेशे अन्धकारेऽपि प्रकाशमानाः मार्गरेखाः स्थापिताः, याः ग्राम्य-राजमार्गेषु विद्युत्सुविधां विना एव दीप्तिं प्रसारयन्ति। वाहनचालकाः तासु अत्यन्तं संतुष्टाः अभवन्।

   मलेष्यादेशस्य सेलाङ्गोर-प्रान्ते सेमेनीय्-प्रदेशस्य समीपे  मार्गे २०२३ वर्षस्य अन्त्यभागे रात्रौ वाहनचालकेभ्यः आश्चर्यकारिणी दृश्यता अभवत्। मार्गरेखाः स्वयमेव प्रकाशन्ते स्म। न तु दीपस्तम्भानां प्रकाशेन, न वा वाहनदीपप्रभायाः प्रतिस्फुरणेन, अपि तु मार्गपृष्ठात् एव। एताः रेखाः दिने सूर्यप्रकाशं सञ्चिन्वन्ति, ततः रात्रौ शनैः शनैः तम् प्रकाशं विमुञ्चन्ति।

    २४५ मीटर्-दीर्घः अयं मार्गखण्डः, मलेष्यादेशस्य सार्वजनिक-निर्माण-विभागस्य (JKR) हुलु-लाङ्गत्-जनपद-शाखया जालन् सुंगै ललाङ्ग तथा जालन् सुंगै टेकाली इत्येतयोः मध्ये स्थापितः। एषः देशे प्रथमः प्रकाश-संचयी (फोटो-ल्यूमिनेसेंट्) मार्गरेखानां प्रयोगः आसीत्। एषा प्रौद्योगिकी, या दीर्घकालं मार्ग-सुरक्षा-विमर्शेषु पारम्परिक-रङ्गरेखानां तथा मार्ग-कीलकानां विकल्परूपेण चर्चिता आसीत्, मलेष्यादेशस्य ग्राम्य-प्रदेशेषु प्रकाश-सुविधा-अभावजनितां वास्तविकां समस्यां निराकर्तुं समर्था अभवत्। देशे सहस्रशः किलोमीटर-दीर्घाः ग्राम्यमार्गाः अल्पप्रकाशयुक्ताः सन्ति, तथा प्रतिसंवत्सरं षट्सहस्राधिकाः जनाः मार्ग-दुर्घटनासु प्राणान् वियोजन्ति।

 महिला एष्याचषकक्रिकट्

भारतस्य किरीटप्राप्तिः। 

श्रेष्ठक्रीडिकापदं प्राप्तवती तेजल् हसाब्निस्। 

बाङ्कोक्क्> महिलानां 'रैसिङ् स्टार्स् एष्या कप् क्रिकट्' [Rising stars Asia cup cricket] नामिकायां क्रिकट् स्पर्धायां भारतस्य 'ए' दलं किरीटं सम्प्राप। अन्त्यस्पर्धायां बङ्गलादेशस्य 'ए' दलं ४६ धावनाङ्कैः पराजित्य आसीत् किरीटप्राप्तिः। 

  प्राप्ताङ्कसूचिका - भारतं २० क्षेपणचक्रेषु १३४/७। बङ्गलादेशः १९. १ क्षेपणचक्रेषु ८८ धावनाङ्कैः सर्वाः बहिर्नीताः। ३४ कन्दुकैः ५१ धावनाङ्कान् सम्पाद्य अपराजिता जाता भारतक्रीडिका तेजल् हसाब्निस् श्रेष्ठक्रीडिकापदं प्राप्तवती।

 कर्णाटकम्। 

छात्राणां समर्थचलदूरवाण्युपयोगनिरोधः परिगण्यते। 

बङ्गलुरु> ऊनषोडशवयस्काणां छात्राणां सामर्थ्योपेतचलदूरवाण्याः [Smartphone] उपयोगं निरोद्धुं कर्णाटकसर्वकारेण उद्दिश्यते इति मुख्यमन्त्री सिद्धरामय्यः प्रोक्तवान्। छात्रेषु वर्धमानः सामाजिकमाध्यमानां सामर्थ्ययुक्तदूरवाणीनां च उपयोगः तेषां व्यक्तित्वादि गुणान् प्रतिकूलतया बाधते इति सः प्रावोचत्। विषयेSस्मिन् विशारदानाम् उपदेशः अपेक्षितः।