राष्ट्रस्य कोविड्प्रतिरोधः एकमनसा एव - अमितशाहः।
नवदहली > कोविड्प्रतिरोधप्रवर्तनेषु राष्ट्रम् एकमनसा एव अग्रेसरत् वर्तते इति केन्द्रगृहमन्त्री अमितशाहः। ऐक्यस्यास्य संरक्षणेन कोविड्युद्धे विजयः सुनिश्चित एव इति सः अवदत्। आनुकूल्यसहितेन पञ्चमवारपिधानेन राष्ट्रं पूर्वस्थितिं प्राप्स्यति इत्यपि सः अभिप्रयत्। राज्यान्तरीयकर्मकराणां जीवनसमस्यासु केन्द्रसर्वकारस्य श्रद्धा अवश्यं वर्तते, कोविड्प्रतिरोधप्रवर्तनेषु राज्यैः सह पर्यालोच्य एव केन्द्रसर्वकारेण निर्णया: स्वीक्रियन्ते प्रख्याप्यन्ते च - अमितशाहः असूचयत्।