गुरूपदेशेन विधानसभासदस्यः याचकः अभवत्। 
पराग शाहः भिक्षुवेषे।
मुम्बई> कोटिशः रूप्यकाणाम् आर्थिकसञ्चयाधिकारादिभिः विराजमानः जनप्रतिनिधिः एकस्मिन् दिने भिक्षुकरूपेण वेषं धृत्वा जनमध्यं प्राविशत्।मलिनतरवस्त्रं धृत्वा सुस्मेरवदनः सन् स 'याचकः' वीथ्यां चचार। किन्तु कोSपि तं न प्रत्यभिजानाति स्म। जनाः तस्मै नाणकानि भोजनं च दत्तवन्तः। प्रमुखः भवननिर्माता, कोटीश्वरः तथा च घाट् कोपरमण्डलस्य भाजपा सदस्यः पराग् शाहः एव सः आधुनिकयाचकः।
स्वस्य आत्मीयगुरोः नम्रमुनेः उपदेशानुसारमासीत् भाजपासदस्यस्य एकदिवसीयम् इदं वेषपरिवर्तनम्। जैनधर्मविश्वासप्रकारेण अयं पुण्यमासः इत्यस्मात् जनानां जीवितक्लेशान् सङ्कटान् च अनुभूय विज्ञातुं जनमध्यमवतरतु इत्यासीत् गुरूपदेशः। "जनाः स्वस्मात् महत्वपूर्णाः इति प्रत्यभिज्ञानमभवत्" इति सः प्रत्यभिजानाति। ३३८३ कोटिरूप्यकाणां सम्पन्नः भवत्ययम्!