नेपाले वर्गीयसंघर्षः - त्रयः मृताः। 

काठ्मण्डुः> नेपालस्य भारतसीमाप्रदेशे प्रवृत्ते वर्गीयसंघर्षे त्रयः जनाः मृत्युमुपगताः। जनाः अक्रममार्गं परित्यज्य ऐक्यं शान्तिं च पुनःस्वीकुर्युः इति नेपालस्य प्रधानमन्त्री बलेन्द्र शाहः अभ्यर्थितवान्। 

  गते रविवासरे कोशि प्रान्ते देवगञ्ज् इत्यत्र आरब्धः संघर्षः क्रमेण समीपजनपदेष्वपि व्यापृतः। विभिन्नजातिद्वयेन एकस्मिन् समये आयोजितयोः कार्यक्रमयोः उच्चभाषिणी, धर्मचिह्नानि, पताकाः इत्यादीनाम्  उपयोगसंबन्धे विवादे द्वयोः प्रतिद्वन्द्वः एव परं व्यापकाक्रमेषु हत्यायां च पर्यणमयत्।

 भारतेन सह स्पर्धितुं ब्रसीलः। 

ओक्टोबर् तृतीयदिनाङ्के कोल्कोत्तायाम्। 

नवदिल्ली> ब्रसीलस्य पादकन्दुकदलः भारतदलेन सह सौहृदस्पर्धायै भारतमागच्छति। ओक्टोबर् तृतीयदिनाङ्के कोल्कोत्तायां साल्ट् लेक् क्रीडाङ्कणे भवेत् क्रीडा। 

 पञ्चवारं विश्वविजयीभूतः ब्रसीलः प्रथमतया एव भारते क्रीडति। भारतेन प्रतिद्वन्द्वमानः प्रबलतमः प्रतियोगी भवति ब्रसीलः। फिफायाः श्रेणीकरणमनुसत्य ब्रसीलः पञ्चमस्थाने भारतं १३८ तमस्थाने चास्ति। ब्रसीलस्य लक्षशः आराधकैः विद्यमाने भारते क्रीडितुं सन्दर्भः सविशेषरूपेण कल्प्यते इति ब्रसील् पादकन्दुकसमित्या निगदितम्।

 राष्ट्रमण्डलक्रीडा।

भारतस्य चरित्रोपलब्धिः - १०,००० मी धावने गुल्वीर सिंहस्य रजतम्। 

गुल्वीर सिंहः। 

ग्लास्गौ> राष्ट्रमण्डलक्रीडायां [CW Games] कायिकक्रीडासु भारतक्रीडकस्य चरित्रोपलब्धिः। दशसहस्रमीटर् धावनस्पर्धायां  गुल्वीर सिंहः रजतपदकं सम्प्राप्यमाणः प्रथमः  भारतीयः इति विश्वकीर्तिम् अवाप। आस्ट्रेलियायाः केय्रो बिन्सणः सुवर्णं,ऐसिल् ओफ् मान् इति राष्ट्रस्य डेविड् मुल्लार्के नामकः कांस्यपदकं च प्राप्तवान्। 

  महिलाविभागे भारोद्वहनस्पर्धायां ६९ किलो विभागे भारतीया हर्जीन्दर् कौर् रजतपदकं प्राप्तवती। इदानीं भारतं सुवर्णद्वयं, सप्त रजतानि, त्रीणि कांस्यानि चोपलभ्य नवमस्थाने वर्तते।

 केरले आगामिषु चतुर्दिनेषु तीव्रवृष्टिः। 

अद्य त्रिषु जनपदेषु ओरञ्जजागरूकता; वयनाटे अध्ययनविरामः।

प्रतीकात्मकचित्रम्।

अनन्तपुरी> गतेषु कतिपयदिनेषु केरले लभ्यमाना वृष्टिः आगामिषु चतुर्षु दिनेषु आकेरलं व्याप्य तीव्रा भविष्यतीति केन्द्रपर्यावरणविभागेन निगदितम्। अद्य कोष़िक्कोट्, कण्णूर्, वयनाट् जनपदेषु ओरञ्जजागरूकता उद्घोषिता। वयनाट् जनपदस्थानां सर्वेषां विद्यालयानां अध्ययनविरामः जनपदाधिकारिणा प्रख्यापितः। आगामिदिनेषु वर्षाः केरले सर्वत्र तीव्रतया व्यप्स्यन्ते।

  बुधवासरे तिरुवनन्तपुरं, कोल्लम्, आलप्पुष़ा जनपदान् विहाय ८ जनपदेषु पीतजागरूकता उद्घोषिता। अनन्तरदिनेषु प्रायेण सर्वेषु जनपदेषु अतितीव्रा वृष्टिः भविष्यतीति प्रवचनमस्ति। पर्वतप्रान्तप्रदेशान् अधिवसन्तः भूस्खलनादिषु दुष्प्रभावेषु जागरणीयाः भवेयुः। सुरक्षितस्थानानि प्राप्तुं सज्जाः भवेयुः इति ऋतुविज्ञानीयविभागेन निगदितम्। समुद्रे मत्स्यबन्धनाय चतुर्णां दिनानां निरोधः अपि विहितः।

 'वन्दे मातरा'वहेलनं दण्ड्यापराधः

विधेयकं राज्यसभया अनुमोदितम्। 

नवदिल्ली>  'जनगणमन' इति राष्ट्रियगानस्य इव तत्तुल्यं पदं राष्ट्रियगीताय वन्दे मातरगानाय अपि प्रदास्यमानं "राष्ट्रियबहुमति अनादरपरिष्करण विधेयकं" राज्यसभया अनुमोदितम्। आम् आद्मी पार्टी इति दलं विना सर्वेषां विपक्षीयदलानां बहिर्गमनस्य अनन्तरं शब्दाभिमतेन आसीत् विधेयकस्य विजयः। वन्दे मातरगानस्य अपमानने वत्सरत्रयस्य कारागारवासः वा शुल्कदण्डः द्वयमपि वा विधीयमानरीत्या अस्ति विधेयकस्य परिष्करणम्।

 अद्य गुरुपूर्णिमा।

आभारतं विभिन्नाः कार्यक्रमाः। 

कोच्ची> अद्य   आभारतं व्यासपूर्णिमादिनत्वेन अर्थात् गुरुपूर्णिमा दिनत्वेन आघुष्यते। आषाढमासस्य शुक्लपौर्णमीदिनं विश्वगुरोः वेदव्यासाचार्यस्य जन्मदिनत्वेन आमन्यते। 

   विद्यालयेषु इतरसंस्थासु च गुरुवन्दनादिभिः कार्यक्रमैः गुरुपूर्णिमा आघुष्यते। केवलं ज्ञानप्रकाशनं विना जीवनविजये गुरूणां मार्गदर्शनं प्रोत्साहनं च प्राधान्यमर्हति। तादृशचिन्ता अपि कार्यक्रमेषु अन्तर्भवन्ति।

 राष्ट्रमण्डलक्रीडाः।

प्रथमस्थाने आस्ट्रेलिया। भारतम् अष्टमस्थाने।

ग्लास्गौ> सामन्तराष्ट्रमण्डलक्रीडासु [Common Wealth Games] पञ्च दिनेषु अतीतेषु आस्ट्रेलियाराष्ट्रं प्रथमस्थानमवहति। २८ सुवर्णानि, १३ रजतानि, २० कांस्यपदकानि च अभिव्याप्य  आहत्य ६१ पदकानि आस्ट्रेलियया सम्प्राप्तानि। द्वितीयस्थाने इङ्गलाण्टः अस्ति। १० सुवर्णानि, १७ रजतानि, १२ कांस्यानीति क्रमेण ३९ पदकानि। आहत्य २७ पदकैः कानडा तृतीये स्थाने वर्तते।

  भारतस्य स्थानम् अष्टमम् अस्ति। सुवर्णद्वयं, पञ्च रजतानि,त्रीणि कांस्यानि च भारतेन प्राप्तानि।

 जापाने भूकम्पः; सुनामी सूचना।

भूकम्पे विशीर्णा व्यापारशाला।

टोक्यो> जापानराष्ट्रस्य दक्षिणद्वीपे क्युषू नामके तीव्रः भूकम्पः अजायत। मापिन्यां ७.१ अङ्किते भूकम्पे एकः मृतः। पञ्चाशदधिके जनाः आहताः। 

  मङ्गलवासरे अपराह्णे आसीत् भूकम्पः। समुद्रतटप्रदेशेषु सुनामीपूर्वसूचना उद्घोषिता। सार्धैकलक्षं जनाः सुरक्षितस्थानं नीताः। 

  प्रदेशे द्वित्राणि दिनानि यावत् पुनरपि भूचलनस्य साध्यता अस्ति। 'बुल्लट्' रेल्, प्रादेशिक रेल् यानसेवाः अल्पकालिकतया स्थगिताः। 'असो कुमामोतो' विमाननिलयश्च पिहितः।

 केरलीयसंस्कृतशिक्षकस्य व्यतिरिक्ता संस्कृतशिक्षापद्धतिः राष्ट्रियस्तरे श्रद्धाम् आवहति। 

'मन् की बात' कार्यक्रमे प्रधानमन्त्रिणः प्रशंसा।

अभिलाष् टि प्रतापः 'अक्षरकन्दुकपत्रम्' उपयुज्य कक्ष्यां चालयति। 

कोच्ची> दशाब्दाधिककालं यावत् संस्कृतशिक्षणक्षेत्रे नूतनानि विभिन्नानि च प्रवर्तनानि आविष्कृत्य संस्कृतभाषाध्यापनं प्रचरणं च कुर्वन् संस्कृतशिक्षकः अभिलाष् टि प्रतापः पुनरपि राष्ट्रियश्रद्धाम् आवहति। फिफा विश्वचषकस्पर्धायाः उत्साहं स्वांशीकृत्य तत्  छात्रेषु संक्रामयितुं तद्वारा संस्कृताध्ययनं ललितम् उत्साहपूर्णं च कर्तुं तेन आविष्कृता 'अक्षरकन्दुकं' नाम पद्धतिः प्रधानमन्त्रिणः नरेन्द्रमोदिनः प्रशंसामवाप। प्रधानमन्त्रिणः गते मनोगतम्  [मन की बात] इति प्रतिमासकार्यक्रमे आसीत् अक्षरकन्दुकमधिकृत्य मोदिवर्यस्य परामर्शः। 

  केरले एरणाकुलं जनपदे 'चिट्टूर् सेन्ट् मेरीस्' माध्यमिकविद्यालये अध्यापकः अस्ति अभिलाष् टि प्रतापः। संस्कृतम् इत्येतत्  केवलं पाठपुस्तकभाषारूपेण अपरिकल्पयन्, समाजजीवनस्य अंशरूपेण परिकल्प्य छात्राणां समाजस्य च हिताय प्रयोजकीकर्तुं बहूनि प्रवर्तनानि अभिलाषवर्येण उपस्थापितानि। कायिक-पर्यावरणसंरक्षण-भारतपैतृक-कला एवं संस्कृतिविषयाधिष्ठिताः परियोजनाः संस्कृतभाषां प्रति संयोज्य तेन आविष्कृताः प्रवृत्तिपथमानीताः च। "संस्कृतं सामाजिकहिताय" इत्येव तस्य शिक्षणप्रवर्तनानां मुखमुद्रा।

अक्षरकन्दुकपत्राणि। 

 'अक्षरकन्दुकं' योजनायां  संस्कृताक्षराणां पदानां च अयत्नावबोधनाय  पादकन्दुकक्षेत्रं प्रति संयोज्य अनुरूपाणां पदानाम् आकर्षकाणि  सूचनापत्राणि [Posters] घोषणाफलकानि [Placards] च  चित्राणां साहाय्येन निर्मितानि। छात्रेषु पादकन्दुके भाषापठने च युगपत् तात्पर्यं जनयितुं एतत् प्रवर्तनम् सहायकम् अभवदिति अभिलाषवर्येण प्रोक्तम्। "क्रीडामः पादकन्दुकं, पठाम संस्कृतम्" इत्याशयम् आधारीकृत्यैव इयं पद्धतिः आविष्कृता इति सः अवोचत्। 

  केरल संस्कृत अध्यापक फेडरेषन् नामकसंघटनस्य एरणाकुलं जनपदाध्यक्षः चास्ति अभिलाषः। तस्य पत्नी शारी सि एस् अपि इतरस्मिन् माध्यमिकविद्यालये संस्कृतशिक्षिका भवति। तयोः अपत्यद्वयं विद्येते - नामतः अथर्वः, आत्रेयी च। 

Latest newsLatest news

 आरक्षकातिक्रमः नाङ्गीकरणीयः - सर्वोच्चन्यायालयः।

नवदिल्ली> प्रक्षोभस्य नाम्नि आरक्षकसेनायाः अतिक्रमः, दण्डप्रयोगादिकं नीतियुक्तं न भवतीति सर्वोच्चन्यायालयेन सूचितम्। शान्तियुक्तः प्रतिषेधः सर्वेषामधिकारः अस्ति। लोकतन्त्रप्रक्रियासु स्वयमेव निष्ठा पालनीया इति च मुख्यन्यायाधिपः सूर्यकान्तवर्यः अवदत्। 'नीट्' प्रश्नपत्रचोरणं विरुध्य आराष्ट्रम् आयोजितमान्दोलनं विरुध्य आरक्षकसेनया कृतान् अतिक्रमान् विरुध्य समर्पिताः अभियाचिकाः मङ्गलवासरे अभिश्रोतुं निश्चित्य आसीत् मुख्यन्यायाधिपस्य प्रस्तावः। 

  प्रत्युत, प्रतिषेधकैः आक्रमणाधीनानाम् आरक्षकपरिवाराणां याचिकाः अपि श्रोक्ष्यन्ते इति तेन स्पष्टीकृतम्। व्यक्तिभ्यः प्राणाः एव महान्तः इति सः अवोचत्।

 टि-२० क्रिकट्

सिम्बाब्वे विरुध्य भारतस्य सम्पूर्णविजयः।

वैभव सूर्यवंशी परम्परायाः श्रेष्ठक्रीडकः। 

तृतीयस्पर्धायां सूर्यवंशिनः कन्दुकताडनम्। 

हरारे> परम्पराद्वयस्य नष्टपरिहाररूपेण तिस्रः अपि स्पर्धाः विजित्य सिम्बाब्वेदलं विरुध्य टि-२० क्रिकट्परम्परायां भारतस्य सम्पूर्णविजयः। तृतीयस्पर्धायां ३५ धावनाङ्कानामेव भारतदलस्य आधिकारिकविजयः। अनेन स्पर्धात्रयमपि विजित्य भारतं परम्परां स्वायत्तीचकार। 

  प्रथमं कन्दुकताडनं कृतवान् भारतदलः ४९ कन्दुकैः ८१ धावनाङ्कान् प्राप्तवतः प्रारम्भकक्रीडकस्य वैभव सूर्यवंशिनः वैभवम् आधारीकृत्य २० क्षेपणचक्रेषु ५ ताडकानां विनष्टे १९२ धावनाङ्कान् सम्पादयामास। प्रतिताडने सिम्बाब्वेदलेन  सप्त ताडकानां विनष्टे केवलं १५७ धावनाङ्कान् सम्पादयामास। सूर्यवंशी एव क्रीडायाः परम्परायाश्च श्रेष्ठक्रीडकः।

 प्रवेशपरीक्षासंविधानं समग्रेण पुनःसंघटिष्यते - प्रधानमन्त्री।

नन्दन् निलेकनी नेतृत्वमावक्ष्यति। 

नवदिल्ली> गतदिने प्रधानमन्त्रिणा नरेन्द्रमोदिना दृश्यचलनसन्देशेन प्रस्तुतं यत् राष्ट्रस्य सर्वाः स्पर्धापरीक्षाव्यवस्थाः समग्रतया पुनःसंघटिष्यन्ते। 'सर्वाः प्रवेशनपरीक्षाः पूर्णतया विश्वासोपेताः, साङ्केतिकविद्याधिष्ठिताः, सुतार्याः च कर्तुं निर्णयः कृतः। तदर्थं साङ्केतिकविद्याविशारदः आधारसंविधानस्य मुख्यशिल्पी नन्दन् निलेकनी इत्यस्य नेतृत्वे कर्मसमितिः रूपीकृता' - मोदिवर्यः इन्स्टग्राममाध्यमेन प्रोक्तवान्। 

  इस्रो संस्थायाः पूर्वीयाध्यक्षः एस् सोमनाथः। ऐ बी संस्थायाः पूर्वाध्यक्षः तपन देखा, ऐ ऐ टि चेन्नई  इत्यस्य निदेशकः वि कामकोटिः, पूर्वीया शिक्षासचिवा अनिता कर्वालः, 'लजिस्टिक्' कुशलः अमृत लाल मीणा इत्येते परिष्करणसमित्यां सदस्याः भवन्ति।

 राष्ट्रमण्डलक्रीडायां भारताय प्रथमं सुवर्णम्। 

भारोद्वहने मीरा बाय् चानू वर्यायै 'हाट्रिक्' सुवर्णम्। 

मीराबाय् चानू। 

ग्लास्गो> राष्ट्रमण्डलक्रीडायां [Common Wealth Games] भारोद्वहनस्य ४८ किलो विभागे भारतगणस्य मीरा बाय् चानू सुवर्णं प्राप्तवती। आहत्य [snach - 85 kg + clean & jerk] १९० किलो भारम् उद्वाह्य विश्वकीर्तिमवाप च। अनुस्यूततया तृतीयसुवर्णपदकमेव अनया प्राप्तम्। २०१८, २०२२ क्रीडायामपि सा अस्मिन् विभागे सुवर्णं प्राप्तवती आसीत्। 

  पुरुषाणां ६० किलो विभागे भारतस्य ऋषिकान्त सिहः रजतपदकं प्राप्तवान्। आहत्य २६४ किलो भारं सः उदवहत्। 

  मीरा बाय् चानूं ऋषिकान्तं च स्वकीयोपलब्ध्यै प्रधानमन्त्री, राष्ट्रपतिः, उपराष्ट्रपतिः च अभ्यनन्दयन्। क्रीडायाः 'अत्लटिक्स्' स्पर्धाः सोमवासरे आरभ्यन्ते।

 सौदीं विरुध्य हूतिनः आक्रमणम्। 

सना> सौदी अरेबियायाः रक्तसमुद्रतीरे वर्तमाने नौकाश्रयनगरे जिसान् इत्याख्ये यमनस्थाः हूतिविभागाः आक्रमणमकुर्वन्। 'अराम्को' इत्यस्य तैलसंस्करणशालासु अन्यतमा आक्रमणे अग्निबाधिता। येमनस्य होदैदा नौकाश्रये विधत्तमाक्रमणं सौद्या कृतम् इत्यारोप्य आसीत् आक्रमणम्।

 टि-२० परम्परा भारतेन प्राप्ता।

द्वितीयस्पर्धायां ९० धावनाङ्कानां विजयः। 

इषान किषन् कन्दुकताडनमध्ये।

हरारे> नायकः श्रेयस् अय्यरः संघश्च आश्वस्तः। अयर्लाान्टे इङ्गलण्टे च परम्परानष्टेन अपहास्यस्य भारतसंघस्य सिम्बाब्वे राष्ट्रे टि-२० क्रिकट् प्रतिद्वन्द्वे विजयमधुरः परम्पराप्राप्तिश्च। शनिवासरे सम्पन्ने द्वितीये  प्रतिद्वन्द्वे सिम्बाब्वेदलं ९० धावनाङ्कैः पराजित्य स्पर्धात्रयात्मिका परम्परा [२-०] भारतेन स्वायत्तीकृता। 

  प्रथमं कन्दुकताडनं कृतवान् भारतसंघः २० क्षेपणचक्रेषु ५ ताडकानां विनष्टे २१९ धावनाङ्कान् सम्पादयामास। प्रत्युत्तरताडने सिम्बाब्वेदलः १२९ धावनाङ्कैः सर्वे बहिर्नीताः। भारताय ईशान कृष्णः (८१), तिलक वर्मा (६०*) च अर्धशतकं प्राप्तवन्तौ। ईशान कृष्णः श्रेष्ठक्रीडकः अभवत्।

 प्रह्लादजोशी केन्द्रीयशिक्षामन्त्री

Pralhad Joshi

      ​नवदेहली> धर्मेन्द्रप्रधानस्य त्यागपत्रानन्तरं सर्वकारेण प्रह्लादजोशी नूतनकेन्द्रीयशिक्षा मन्त्री इति घोषितः। सम्प्रति खाद्य-सार्वजनिकवितरण-विभागयोः मन्त्रिरूपेण सेवां कुर्वन् प्रह्लादजोशी, स्वस्य वर्तमानभारैः सह शिक्षा मन्त्रालयस्य अधिकभारम् अपि वक्ष्यति।

​      सीजेपी (CJP) दलस्य विपक्षस्य च आन्दोलने तीव्रीभूते सति केन्द्रीयशिक्षा मन्त्री धर्मेन्द्रप्रधानः त्यागपत्रं दत्तवान्। सः प्रधानमन्त्रिणे नरेन्द्रमोदिने त्यागपत्रं प्रेषितवान्। आन्दोलनकारिणां मुख्ययाचनासु धर्मेन्द्रप्रधानस्य त्यागपत्रम् अन्यतमम् आसीत्। प्रधानः त्यागपत्रं न दद्यात् इति केन्द्रीयसर्वकारस्य स्थितिः आसीत्। किन्तु प्रधानस्य त्यागपत्रं विना न निवर्तिष्यामः इति आन्दोलनकारिभिः निश्चये कृते सर्वकारः अवनतः अभवत्। तदनन्तरमेव नूतनकेन्द्रीयशिक्षा मन्त्रिरूपेण प्रह्लादजोशी घोषितः।

For English/Hindi Version click Read More 👇

 एन् टि ए पुनःसंघटितम्। 

४७ उद्योगस्थाः विसृष्टाः। 

नवदिल्ली>  प्रश्नपत्रप्रस्रवणविवादस्य आधारे एन् टि ए संस्था [National Testing Agency] केन्द्रप्रशासनेन पुनःसंघटिता। प्रश्नपत्रचोरणे भागभाजः इति अधिगताः ४५  कार्यनिर्वाहकाः स्थानभ्रष्टाः अभवन्। बहिर्नीतानां कतिपयानाम् अधिकारिणामुपरि नियमप्रक्रमाय व्यवस्था कृता चवर्तते।

 बङ्गलादेशस्य राष्ट्रपतिः मुहम्मद षहाबुद्दीनः स्थानं त्यक्तवान्। 

धाक्का> बङ्गलादेशस्य राष्ट्रपतिः मुहम्मद षहाबुद्दीनः [७६] त्यागपत्रं समर्पितवान्। कालपरिधिः वर्षद्वये अवशिष्टे अस्ति स्थानत्यागः। बह्व्यः स्वास्थ्यसमस्याः एव स्थानत्यागस्य हेतुरूपेण सूच्यन्ते। किन्तु प्रधानमन्त्रिणः तारिख रह्मानस्य सर्वकारस्य राष्ट्रपतौ अतृप्तिः अस्वारस्यं च कारणत्वेन प्रसूच्यते। 

  भूतपूर्वप्रधानमन्त्रिणी षैख् हसीना इत्येषां प्रति सौमनस्येन व्यवह्रियमाणः राष्ट्रपतिः शासनपक्षः बङ्गलादेश् नाषणलिस्ट् पार्टी इत्यस्मै अनभिमतः आसीत्। १९७१ तमवर्षस्य बङ्गलादेश विमोचनसंग्रामस्य मुख्यः भटः तथा भूतपूर्वः न्यायाधीशश्च षहाबुद्दीनः २०२३ तमे वर्षे एप्रिल् मासे  राष्ट्रपतिरूपेण कार्यभारं स्वीकृतवान्। तदा षैख् हसीनायाः प्रशासनमासीत्।

 अर्जन्टीनायाः पादकन्दुकक्रीडकः मेस्सी सद्यः क्रीडायाः न विरमते। 

     ब्यूणस् ऐरिस्> मेस्सी सद्यः पादकन्दुक क्रीडायाः न विरमते। केचन मासाः यावत् अर्जन्टीनासंघेन साकं मेस्सी अनुवर्तिष्यति इति प्रतिवेदनम्। शीघ्रविरामः संघं बाधिष्यते इति कारणेनैव मेस्सी एतादृशनिर्णयः स्वीकृतः इति अर्जन्टीनायाः वार्तामाध्यमाः प्रतिवेदयन्ति। किन्तु आगामिननि विश्वचषके भागं स्वीकर्तुं सम्भावना नास्ति इत्यपि सूचयति।

For English/Hindi Version click Read More 👇

 राष्ट्रमण्डलक्रीडा उद्घाटिता। 

मीरा बाय् चानु लव्लिना बोल्ग् ओहैल् च भारतध्वजम् अवहताम्। 

कोमण् वेल्त् क्रीडासमारोहे भारतसंघः। 

ग्लास्गौ> २३ तमा साम्राज्यसम्बद्धराष्ट्रक्रीडा [Common Wealth Games] स्कोट्लान्डे ग्लास्गौ नगरे राज्ञा चाल्स् तृतीयेन उद्घाटिता। गतरात्रे सार्धदशवादने आसन् उद्घाटनकार्यक्रमाः। राज्ञी कामिला, ब्रिटनस्य प्रधानमन्त्री आन्डी बर्हामः, इत्यादयः कार्यक्रमे भागं स्वीकृतवन्तः। 

  उद्घाटनसमारोहे  भारतस्य ओलिम्पिक्स् पदकजेत्र्यौ  मीरा बाय् चानु लव्लिना बोल्ग् ओहैल् च राष्ट्रध्वजम् ऊढवत्यौ। भारताय १२६ क्रीडकाः स्पर्धन्ते। 

  आहत्य ७५ राष्ट्राणि कायिकक्रीडामहोत्सवे भागं गृह्णन्ति। १० क्रीडाप्रकरणानां २१५ विभागैः त्रिसहस्राधिकानि कायिकताराणि वैभवप्रदर्शनाय स्कोट्लान्डे सम्मिलिताः सन्ति। 

  पूर्वं ब्रिटीषसाम्राज्यस्य सामन्तराष्ट्राणि अन्तर्भाव्य आरब्धा कायिकक्रीडा अस्ति  कोमण् वेल्त् गयिंस् [Common Wealth Games]। तस्याः २३ तमं संस्करणमस्ति एतत्। आगस्ट् द्वितीये दिनाङ्के समाप्स्यते।

 भारत-सिम्बाब्वे टि-२०

प्रथमस्पर्धायां भारतस्य विजयः। 

वैभव सूर्यवंशिने अर्धशतकं प्राप्यमाणः कनिष्ठतमः इति विश्वकीर्तिः।

हरारे> सिम्बाब्वे विरुध्य प्रथमे टि-२० प्रतिद्वन्द्वे भारतस्य सप्त द्वारकाणां विजयः। अनुस्यूततया षण्णां पराजयानाम् अनन्तरमेव विश्ववीराणामयं विजयः! 

  भारतगणे कनिष्ठतमः क्रीडकः वैभव सूर्यवंशी १९ कन्दुकेभ्यः ५० धावनाङ्कान् सम्प्राप्य अर्धशतकं प्राप्यमाणः कनिष्ठतमः क्रीडकः इति विश्वकीर्तिम् अवाप। 

  प्राप्ताङ्कसूचिका - सिम्बाब्वे २० क्षेपणचक्रेषु १२५/७, भारतं - १३.२ क्षेपणचक्रेषु १२६/३।

 सी जे पी प्रक्षोभविषये प्रधानमन्त्रिणः प्रथमः प्रकाशप्रस्तावः।

गते अर्धरात्रे वीडियो सन्देशः।

प्रक्षोभविषये प्रधानमन्त्री दृश्यलेखप्रस्तावं करोति। 

नवदिल्ली>  जन्तर मन्तरे अनुवर्तमाने सी जे पी संघटनस्य नीट् परीक्षाप्रकरणमधिकृत्य प्रक्षोभविषये प्रधानमन्त्री नरेन्द्र मोदी इदं प्रथमतया प्रकाशप्रस्तावं कृतवान्। गुरुवासरस्य अर्धरात्रे दृश्योल्लेखेन [video] सामाजिकमाध्यमद्वारा प्रकाशिते सन्देशे नीट् परीक्षाप्रकरणे इतोSप्यधिकं कर्कशप्रक्रमा‌ः स्वीकरिष्यन्ते इति प्रस्तुतम्। 

  अपराधिनां यथायुक्तं तीव्रदण्डं विधातुं द्रुतगतिन्यायालयः स्थापितः। केन्द्र उच्चशिक्षासचिवः विनीत जोषी निष्कासितः। तत्स्थाने नरेश पालः नियुक्तः। विद्यालय शिक्षासचिवरूपेण टि के अनिल् कुमारः नूतनेन नियुक्तः। एवं केन्द्रशासनस्य १२ उन्नताधिकारिणः स्थानभ्रष्टाः जाताः। 

  किन्तु प्रधानमन्त्रिणः वीडियोसन्देशे शिक्षामन्त्रिणं धर्मेन्द्रप्रधानमधिकृत्य मौनं दीक्षितवान् इत्यतः सि जे पी पक्षतः विपक्षदलेभ्यश्च विमर्शः जातः।

For English/Hindi Version click Read More 👇

 पश्चिमेष्या संघर्षः रक्तसमुद्रं व्याप्नोति। 

हूतिसंघेन सौदी अरेबियायाः द्वे महानौके आक्रान्ते। 

हूतिविमतानाम् आक्रमणे अग्निबाधिता सौदीमहानौका।

केय्रो> यू एस्-इरानयोः युद्धेन पश्चिमेष्या कलुषिते वृत्ते संघर्षः रक्तसमुद्रं व्याप्नोति।  येमने वर्तमानाः इरानम् अनुकूलयन्तः हूतिविमताः रक्तसमुद्रेण गच्छन्त्यौ सौदी अरेबियायाः द्वे तैलेन्धनमहानौके विरुध्य  गुरुवासरे आक्रमणमकुर्वन्। महानौकाद्वयमपि अग्निबद्धमभवत्। 

  अस्य मासस्य १३ तमे दिनाङ्के यमनस्य राजधान्यां सनायाम् अन्ताराष्ट्रविमाननिलयं प्रति आक्रमणमभवत्। तस्य पृष्ठतः सौदी आसीत् इत्यारोप्य हूतिविमतविभागेन मिसैल् शस्त्राक्रमणं कृतम्। रक्तसमुद्रस्थे 'बाब् एल् माण्टब्' इत्यस्मिन् समुद्रसङ्कोचे सौदीं विरुध्य नाविकोपरोधः विहितः। तदनन्तरम् आपन्नं प्रथमं महानौकाक्रमणं भवति गुरुवासरे जातम्।

 असमे जलोपप्लवः - ४१ मरणानि।

गुवाहाटी> कतिपयदिनैः अनुवर्तमानया अतिवृष्ट्या असमराज्ये ११ जनपदेषु आपन्ने जलोपप्लवे ४१ जनाः मृत्युमुपगताः। ६. ५ लक्षं जनाः विविधप्रदेशेषु लग्नाः भवन्ति। 

  राज्ये मुख्यनद्यः जलाप्लाविताः प्रवहन्ति। दुरन्तबाधितप्रदेशाः मुख्यमन्त्रिणा हि

मन्द बिश्व शर्मणा सन्दृष्टाः।

 प्रश्नपत्रचौर्यम्: दिल्ली-उच्चन्यायालयेन द्रुतगतिन्यायालयम् अविष्कृतम्

​     दिल्ली> नीट् (NEET) परीक्षायाः प्रश्नपत्रचौर्यप्रकरणे प्रधानमन्त्रिणः प्रख्यापनानन्तरं दिल्ली-उच्चन्यायालयेन द्रुतगतिन्यायालयः (Fast Track Court) रचितः। न्यायाधीशः अनु ग्रोवर् बलिगा अस्य द्रुतगतिन्यायालयस्य विशेषन्यायाधीशः भविष्यति। एतत्सम्बन्धि विज्ञापनं दिल्ली-उच्चन्यायालयेन प्रकाशितम्। २०२४-तमस्य सार्वजनिकपरीक्षाधिनियमस्य (Public Examinations Act 2024) अन्तर्गत-मागताः सर्वे अपराधाः अनेन द्रुतगतिन्यायालयेन विचारिष्यन्ते। अयम् द्रुतगतिन्यायालयः दिल्लीस्थे 'रोस् आवेन्यू' न्यायालयसमुच्चये कार्यरतः भविष्यति। प्रधानमन्त्री नरेन्द्रमोदी अद्य प्रभाते एव अस्य द्रुतगतिन्यायालयस्य विज्ञापमकरोत्।

 जर्मनी, फ्रान्स्, इट्टली - पादकन्दुकदलेभ्यः नूतनाः परिशीलकाः। 

यथाक्रमं यर्गन् क्लोपः, सिनदिन् सिदानः, पेप् गार्डियोला ।

गार्डियोला,    सिदानः,        यर्गन् क्लोपः 

> फिफा विश्वचषकस्पर्धायाः निर्णायकचरणे [knockout] बहिर्गतस्य जर्मनीगणस्य नूतनपरिशीलकरूपेण यर्गन् क्लोप् नामकः नियुक्तः। 'लिवर् पूल्', 'बोरुसिया डोर्ट् मुण्ड्' इत्येतयोः पादकन्दुकगणयोः परिशीलनेन तेभ्यः  'चैम्पियन्स् लीग्', प्रिमियर् लीग् इत्यादीनि अष्ट किरीटानि सम्प्रापयितुं वैभववानस्ति ५९ वयस्कः क्लोप् वर्यः। 

फ्रान्सदलस्य परिशीलकस्थानम् अलङ्कर्तुं भूतपूर्वः नायकः सिनदिन् सिदानः आगच्छति। औद्योगिकोद्घोषणम् आगामिसप्ताहे भविष्यति। १४ वर्षाणि यावत् फ्रान्सगणस्य परिशीलकस्य दिदियर् दषोम् इत्यस्य अनुगामी अस्ति सिदानः। 

 अतीतेषु त्रिषु विश्वचषकेषु योग्यताचक्रं तर्तुं अशक्तः आसीत् इट्टलीगणः। अतः वर्तमानीनः परिशीलकः गन्नारो गट्टुसो नामकः स्थानमत्यजत्। गणस्य पूर्वप्रभावं प्रत्याहर्तुं योग्याय परिशीलकाय अन्वेषणं स्पेयिनदेशीयः पेप् गार्डियोला इत्यमुं प्रप्तमस्ति। वेतनविषये अनुकूलनं भवेत्तर्हि सः इट्टलीं प्राप्स्यति।

 कोमण् वेल्त् गयिस्। 

भारतात् १२६ अंगोपेतः गणः। 

स्पर्धाः शुक्रवासरे आरभ्यन्ते। 

ग्लास्गो> कोमण् वेल्त् गयिस् इत्यभिधेयाः क्रीडास्पर्धाः शुक्रवासरे समारभ्यन्ते।  स्कोट्लान्ट राष्ट्रे ग्लास्गो नगरस्थे हैड्रो क्रीडाङ्कणं भवति मुख्यवेदी। भारतात् १२६ अंगोपेतः क्रीडकानां गणः ग्लास्गोनगरं सम्प्राप्तः। 

  प्रासक्षेपकः नीरज चोप्रः, दीर्घप्लवकः एं श्रीशङ्करः, अन्साबाबु[अत्लटिक्स्], साजन् प्रकाशः [प्लवनम्], मीरा बाय् चानू [भारोद्वहनं] इत्यादयः मुख्यक्रीडकाः भवन्ति।

 फ्रान्से ऊनपञ्चदशवयस्कानां सामाजिकमाध्यमनिरोधः।

पारीसः> ऊनपञ्चदशवयस्काः बालकाः सामाजिकमाध्यमानाम् उपयोगं निरुध्यमानः  नियमः फ्रान्स संसदा  अनुमोदितः। आगामि अध्ययनवर्षादारभ्य [सेप्टम्बर्] अयं नियमः प्रबलो भविष्यति। 

  बालकान् अन्तर्जालीयवञ्चनागर्तेभ्यः रक्षितुं तेषां मानसिकस्वास्थ्यं संरक्षितुमेवायं प्रक्रमः। सामाजिकमाध्यमोपयोगेन सह सम्बन्ध्य यूरोप्यन् यूणियन् राष्ट्रेषु समग्रनिरोधम् आयोज्यमानं प्रथमराष्ट्रमस्ति फ्रान्सः। 

  रक्षितारः राष्ट्रस्थाः बालाधिकारप्रवर्तकाश्च नियमममुं स्वागतीचक्रुः। बहूनां कौमारवयस्कानाम् आत्महत्यायाः कारणं डिजिटल् विषयाः इत्यारोप्य 'टिक् टोक्' इत्यादिवेदिकां विरुध्य बहवः फ्रञ्चपरिवाराः अपराधारोपान् समर्पितवन्तः आसन्। 

  फ्रान्से ५०% कौमारवयस्काः प्रतिदिनं २ - ५ होराः पेशलदूरवाणिषु यापयन्तीति राष्ट्रस्य स्वास्थ्यनिरीक्षणाभिकर्तुः निरीक्षणं वर्तते। १२ - १७ वयस्केषु  बालकेषु ९०% अन्तर्जालीयसेवायै दिनं प्रति पेशलदूरवाणीः  इपयुज्यन्ते। एषु ५८% बालकाः सामाजिकमाध्यमानि उपयुज्यन्ते। 

  बालकान् कौमारकान् च संरक्षितुं यूरोपभूखण्डस्य प्रयत्नेषु फ्रान्सः मार्गदर्शको भविष्यतीति राष्ट्रपतिना इम्मानुवल् मक्रोणेन प्रोक्तम्।

 सि जे पी आन्दोलनं तीव्रायते। 

संसद् पथसञ्चलनाय दशसहस्रशः, आरक्षकमर्दनम्। 

 मेट्रो निस्थानानि पिधाय प्रशासनस्य प्रतिरोधः।

जन्तर मन्दरे युवकानां प्रतिषेधः। 

नवदिल्ली> 'नीट्' प्रश्नपत्राणां परिस्रवणविषये सि जे पी [क्रोकोच् जनता पार्टी] संघटनस्य नेतृत्वे आरब्धम् आन्दोलनं दिल्ल्यां तीव्रं रूपमावहति। सोमवासरे संसद् मन्दिरं प्रति आयोजिते पथसञ्चलने दशसहस्रशः युवकाः छात्राश्च भागं कृतवन्तः। किन्तु मार्गमध्ये पथसञ्चलनं सुरक्षासेनया दिल्ली आरक्षकसेनया च प्रतिरुद्धम्। प्रक्षोभकान् प्रतिनिवर्तयितुं मर्दनप्रक्रमाः कृताः। 

  आन्दोलनं विविधैः विपक्षीयैः राजनैतिकदलैः समर्थितमित्यतः आन्दोलनं देशीयविषयरूपेण परिणमत च। संसदः सभाद्वये च प्रकरणमिदं विपक्षदलैः उन्नीतम्। 

  शिक्षामन्त्रिणः धर्मेन्द्रप्रधानस्य स्थानत्यागाय सिजेपीसंघटनेन प्रक्षोभः प्रबलः कृतः। आरक्षकसेनया विनाश्य अपनीता जन्तर मन्तरस्था आन्दोलनवेदिका गतरात्रावेव प्रक्षोभकैः पुनर्निर्मीता। सीजेपीनेतृभिः सह चर्चायै प्रशासनं सन्नद्धमिति केन्द्रमन्त्रिणा जे पी नड्डावर्येण निगदितम्।

 कोमण्वेल्त् गयिंस् श्वः आरभ्यते। 

नवदिल्ली> कोमण्वेल्त् राष्ट्राणां क्रीडाः नाम्ना 'कोमण्वेल्त् गयिंस्' गुरुवासरे स्कोट्लान्ट् राष्ट्रे ग्लास्को इत्यत्र समारप्स्यन्ते। १३ प्रकरणेषु भारतात् १२६ कायिकताराणि भागं करिष्यन्ति। 

  २०२२ तमे वर्षे बर्मिङ्गामे सम्पन्नायां क्रीडायां २२ सुवर्णपदकानि अभिव्याप्य ६१ पदकैः भारतं चतुर्थस्थानं प्राप्तवदासीत्। क्षेत्रक्रीडा [अत्लटिक्स्], मल्लयुद्धं [Boxing], भारोद्वहनम् इत्येतानि एव भारतस्य मुख्यपदकप्रतीक्षाप्रकरणानि।

 आन्डी बेण् हमः ब्रिटनस्य नूतनः प्रधानमन्त्री।

आन्डी बेण् हामः। 

     लण्टनं> ब्रिटनस्य नूतनः प्रधानमन्त्रिरूपेण लेबर् पार्टी इत्यस्य नेता आन्डी बेण् हमः [५६] कार्यभारं स्वीचकार। २०२४ तमे वर्षे अधिकारं प्राप्तः लेबर् पार्टीनेता स्टामरः २०२६ जूण् मासे स्वस्य स्थानत्यागम् उद्घोषितवान्। तदनन्तरम् आयोजिते मेकर् फील्ड् उपनिर्वाचने लब्धः अपूर्वविजयः बेण् हामं प्रधानमन्त्रिपदमनयत्। 

  वर्षत्रयमेव बेण् हामाय अवशिष्टः शासनकालः। २०२९ तमे राष्ट्रे सामाजिकनिर्वाचनं सम्पत्स्यते। २०१६ तमे वर्षे सम्पन्ने 'ब्रेक्सिट्' हितपरिशोधनात्परं ब्रिटनं राजनैतिकास्थिरतां भजते। अतीतेषु दश वर्षेषु अधिकारं प्राप्नुवन् सप्तमः प्रधानमन्त्री भवति आन्डी बेण् हामः।

 पेरम्बूर्-निर्वाचन- प्रकरणे मुख्यमन्त्रिणे विजय् महोदयाय मद्रास्-उच्चन्यायालयस्य सूचना अभवत्।

​     चेन्नै> पेरम्बूर्-विधानसभाक्षेत्रात् विजयं सिद्धवन्तं तमिळनाडु-राज्यस्य मुख्यमन्त्रिणं विजय् जोसफं प्रति मद्रास्-उच्चन्यायालयः निर्वाचनयाचिकायाम् एकां सूचनां (Notice) प्रेषितवान्। मुख्यमन्त्रिणा सह अन्येभ्यः प्रत्यर्थिभ्यः अपि सूचनां दातुम् आदिष्टवान् न्यायालयः, तस्य अग्रिमं वादश्रवणं सप्ताहद्वयानन्तरं करिष्यति।

​डी.एम्.के. दलस्य प्रत्याशी आर.डी. शेखरः एतां याचिकां प्रस्तुतवान्। विजय्येन समर्पित-शपथपत्रे तस्य सम्पति-सम्बद्धानां तथा च अभियोग-सम्बद्धानां (cases) विवरणानां पूर्णतया प्रकटीकरणं न कृतम्, तथैव निर्वाचनव्ययस्य विवरणेषु महती विषमता अस्ति इति याचिकायां मुख्यः आरोपः अस्ति। अतः पेरम्बूर्-क्षेत्रे विजयस्य निर्वाचनं निरस्तं क्रियताम् इति याचिकया प्रार्थितम्।