इन्धनक्लेशे भारतस्य आश्वासः।
द्वे विदेशमहानौके सेन्धने मङ्गलुरु प्राप्ते।
मङ्गलुरु समीपं प्राप्ता पिक्सिस् पयनियर् महानौका।
मङ्गलुरु> पश्चिमेष्यासंघर्षस्य मध्ये भारताय समाश्वासं प्रदन्ती वार्ता। असंस्कृततैलेन्धनं तथा पाकवायुं च वहत्यौ द्वे पण्यमहानौके मङ्गलुरु नौकाश्रयं प्राप्तवत्यौ। ९६,००० टण मितं असंस्कृततैलं वहन्ती रूसीयमहानौका 'अक्वा टैटन्' नामिका शनिवासरे, एवं ४७,२३६ टण मितं पाकवातयुक्ता 'पिक्सिस् पयनियर्' इति कथ्यमाना अमेरिकीयमहानौका रविवासरे च मङ्गलुरु नौकाश्रयस्य समीपं प्राप्तवत्यौ।मार्चमासस्य अन्तिमसप्ताहे तिस्रः तैलमहानौकाः च भारतं प्राप्स्यन्ति।