केरलम्।
ग्रीष्मातपेन सह निर्वाचनातपः।
नरेन्द्रमोदी अद्य राज्ये; राहुलगान्धी श्वः। 
पालक्काट् नगरे लब्धे स्वीकरणे प्रधानमन्त्री नरेन्द्रमोदी 'चेण्टा'नामकं केरलीयवाद्यं वादयति।
कोच्ची> केरले सर्वत्र विधानसभानिर्वाचनस्य उत्साहः पारम्यमुपगच्छति। अद्यावधि राज्यनेतॄणां नेतृत्वे प्रथमिकस्तरप्रचरणम् आरोपणप्रत्यारोपणैः प्रचलदासीत्। परं देशीयनेतॄणां सान्निध्येन प्रचरणस्य द्वितीयसोपानं प्राविशत्।
भाजपा दलीयस्थानाशिनां प्रचरणाय प्रधानमन्त्री नरेन्द्रमोदी अद्य पालक्काट् तृशूर् जनपदद्वये वीथीप्रदर्शनेन महासम्मेलनेन च जनान् अभिसंबोधयति स्म। श्वः कोण्ग्रस् नेता राहुल गान्धी पत्तनंतिट्टाजनपदं प्राप्य बहुषु स्थानेषु यू डि एफ् स्थानाशिनां कृते प्रचरणं विधास्यति।
वामपक्षीयस्थानाशिनां कृते आर् जे डी दलस्य राष्ट्रियप्रवृत्यध्यक्षः तथा बिहारस्य विपक्षनेता तेजस्वी यादवः ३१ तमे दिनाङ्के केरलं प्राप्स्यति। दिनत्रयं त्रिषु जनपदेषु सः वामपक्षसख्यस्य स्थानाशिनां विजयाय प्रचरणं करिष्यति।