'ओपरेषन् षेरुवाली' अन्तिमपादे।
श्रीनगरं> 'ओपरेषन् षेरुवाली' इति कृतनामधेयं भीकराणां कृते संयुक्तसेनायाः अन्वेषणम् अन्तिमपादं प्रविष्टमिति सेनया निगदितम्। रजौरि वनप्रदेशे कस्यांश्चित् गुहायां निलीयमानाः भीकराः संगृहीतप्रायाः वर्तन्ते। रक्षां प्राप्तुं किमपि रन्ध्रमलब्ध्वा ते लग्नाः इति सेनाधिकारिभिरुक्तम्। त्रयः भीकराः सन्तीति मन्यते।
रजौरी काननान्तर्भागे निलीनान् भीकरान् निगृहीतुं गते शनिवासरे आसीत् जम्मु-काश्मीरस्य आरक्षणसेना, सि आर् पि एफ् इत्येताभ्यां मिलित्वा अन्वेषणमारब्धम्। अन्वेषणाय 'ओपरेषन् षेरुवाली' इति नाम कृतं च। गतरात्रौ अपि भुषुण्डिप्रयोगः सम्पन्नः।