झार्खण्डे विधानसभानिर्वाचनस्य प्रथमसोपानम् अद्य।
१० राज्येषु ३१ मण्डलेषु उपनिर्वाचनमपि अद्यैव।
नवदिल्ली> झार्खण्डराज्यस्य ४३ विधानसभामण्डलेषु अद्य निर्वाचनं सम्पद्यते। पञ्च मन्त्रिणः अभिव्याप्य ६८३ स्थानाशिनः अद्य जनविधिं काङ्क्षन्ते। तेषु प्रमुखः भूतपूर्वः मुख्यमन्त्री चम्पाय् सोरनः भवति। जे एम् एम् दलं परित्यज्य भा ज पा दलीयरूपेण अस्ति तस्य स्थानाशित्वम्। तस्य प्रतियोगी तु गतवारे भा ज पादलस्थानाशित्वेन स्पर्धितवान् गणेशमहाली अस्ति!
झार्खण्डं विना दशसु राज्येषु ३१ विधानसभामण्डलेष्वपि उपनिर्वाचनानि अद्य सम्पद्यन्ते। प्रभाते सप्तवादनतः सायं षट्वादनपर्यन्तं मतदानप्रक्रिया भविष्यति। मतगणना २३ तमे दिनाङ्के सम्पत्स्यते।