ग्रीन् लान्डं लक्ष्यीकृत्य अमेरिकायाः प्रक्रमः।
वाषिङ्टणः> वेनस्वेलायां यू एस् राष्ट्रस्य सैनिकप्रक्रमस्य अनन्तरं विश्वस्मिन् बृहत्तमं द्वीपं ग्रीन् लान्डं स्वायत्तीकर्तुं यत्नः यू एस् राष्ट्रेण प्रबलीक्रियते। यूरोपीयराष्ट्रस्य डेन्मार्कस्य अधीने वर्तमानः स्वयंशासनप्रदेशः भवति ग्रीन् लान्डः। एनं करस्थीकर्तुमुद्दिश्य डोनाल्ड ट्रम्पः चर्चां करोति, अवश्यं चेत् सैनिकप्रक्रमः अपि परिगण्यते इति च 'बी बी सी' माध्यमेन वृत्तान्तीक्रियते।
यू एस्, यूरोप्, रष्या इत्येतेषां मध्ये अस्ति ग्रीन् लान्डस्य स्थानम्। यू एस् तः ५००० कि मी दूरे उत्तर अत्लान्टिकसमुद्रे वर्तते। इतः रष्यामपि एतावद्दूरमस्ति। रष्यातः आक्रमणं भविष्यति चेत् यू एस् राष्ट्रस्य प्रत्याक्रमणाय अनुयुक्तं स्थानमिति ग्रीन्लान्डस्य प्राधान्यम्।