'ओपरेषन् तूफान्' - द्वितीयचरणम् अद्य आरभ्य।
तूफान ग्रामसभा, जनजागरण समितयः।
अनन्तपुरी> राष्ट्रे विश्वस्मिन् च प्राधान्येन वीक्षमाणा केरलस्य उन्मादकनिर्मार्जनाभियोजना 'ओपरेषन् तूफान्' इत्यस्याः द्वितीयचरणं सोमवासरतः आरभ्यते इति राज्यगृहमन्त्रिणा रमेश चेन्नित्तला वर्येण निगदितम्। मादकवस्तुवितरणशृङ्खलानां भञ्जनाय मादक'माफिया'संघानाम् आर्थिकस्रोतजडीकरणाय च प्रथमसोपाने प्राधान्यं दत्तमिति तेन प्रोक्तम्। १०० दिनाभ्यन्तरे उपदशसहस्रं अपराधिनः निगृहीताः। मादकोपयोगः ३०% यावत् न्यूनीकृतः च।
द्वितीयचरणे, ये मादकवस्त्वधीनाः जाताः तेषां पुनरधिवासः कार्यः। उन्मादकविरुद्धान्दोलनं ग्रामस्तरमण्डलेषु [wards],गृहेषु, कर्मस्थानेषु च व्यापयितव्यः। तदर्थं ग्रामसभासु जनजागरणसमितीः रूपीकृत्य प्रवर्तनानि संयोजयितव्यानि।