'ब्लू बेर्ड्' विक्षेपणं विजयप्रदम्। 

चेन्नै> इस्रो संस्थायाः पुनरपि अभिमाननिमेषः। यू एस् राष्ट्रम् आस्थानत्वेन वर्तमानस्य 'ए एस् टि स्पेस् मोबाइल्' इत्यस्य आशयविनिमयोपग्रहः ब्लू बेर्ड् - ६ इत्यमुं भ्रमणपथं प्रापयित्वा ऐ एस् आर् ओ नूतनचरितं रचयामास। श्रीहरिक्कोट्टा सतीश् धवान् केन्द्रात् बुधवासरे प्रभाते ८. ५५ वादने ६५०० किलोमितं भारयुक्तम् उपग्रहं वहती एल् वी एम् ३ नामिका विक्षेपिणी  आकाशं प्रति उदगच्छत्। १६ निमेषैः उपग्रहः भूमेः ५२० कि मी दूरस्थं भ्रमणपथं प्राप च। 

  भारतीयबहिराकाशमण्डलस्य सुप्रधानं पदक्षेपः भवत्ययं विक्षेप इति प्रधानमन्त्रिणा नरेन्द्रमोदिना प्रस्तुतम्।

 १२ राज्य-केन्द्रशासनप्रदेशानां SIR मतदायकावलिः प्रसिद्धीकृता। 

नवदिल्ली> केन्द्रनिर्वाचनायोगस्य नेतृत्वे १२ राज्य-केन्द्रशासनप्रदेशेषु  आरब्धा तीव्रमतदायकावलिपरिष्करणप्रक्रिया समाप्ता। केरलं, पश्चिमवंगः, राजस्थानं, गोवा, तमिलनाट्, गुजरात्, मध्यप्रदेशः, छत्तीसगढ्, बिहारम् इत्येतेषु राज्येषु पोण्टिच्चेरी, लक्षद्वीपः, अन्तमानः इत्येतेषु केन्द्रशासनप्रदेशेषु च मासैकस्मात् पूर्वमारब्धायाः SIR प्रक्रियायाः अनन्तरं आवलिः प्रसिद्धीकृता। 

  प्रतिराज्यं लक्षशः जनाः आवलीतः बहिर्गतवन्तः। मृताः, अनधिगताः, वासपरिवर्तनं कृतवन्तः, एकस्मिन्नेव समये आवलीद्वये अन्तर्भूताः इत्यादीनि एव बहिर्गमनस्य कारणानि। 

 ये मतदानावलीतः नान्तर्भूताः तेषां नामानि युक्तप्रमाणानाम् आधारे अन्तर्भावयितुं जनवरी २२ तम दिनाङ्कपर्यन्तं व्यवस्था  अस्ति।

 भारत-श्रीलङ्का महिला टि २०

द्वितीये प्रतिद्वन्द्वे भारतस्य उज्वलविजयः। 

षफाली वर्मा 

विशाखपत्तनं> श्रीलङ्कां विरुध्य भारतस्य महिलानां टि २० क्रिकट्स्पर्धापरम्परायाः द्वितीये प्रतिद्वन्द्वे सप्त द्वारकेषु अवशिष्टेषु भारतस्य उज्वलविजयः। स्फोटकात्मकं कन्दुकताडनं प्रकटितवत्याः षेफाली वर्मणः पाटवस्य आधारे अस्ति अयं विजयः। ३४ कन्दुकैः ६९ धावनाङ्कान् सम्प्राप्य अजय्यतां परिपालिवती प्रारम्भक्रीडिका षेफाली भवति श्रेष्ठक्रीडिका। 

  प्रथमं कन्दुकताडनं कृतवता श्रीलङ्कादलेन २० क्षेपणचक्रेषु नव द्वारकाणां विनष्टे १२८ धावनाङ्काः सम्पादिताः। अनुक्रीडां कृतवता भारतदलेन ११.५ क्षेपणचक्रेषु केवलं  द्वारकत्रयस्य  विनष्टेन १२९ धावनाङ्कान् सम्पाद्य लक्ष्यं प्राप्तम्। अनेन पञ्चस्पर्धात्मिकायां परम्परायां भारतं २ - ० इति क्रमेण अग्रे तिष्ठति। अवशिष्टाः तिस्रः स्पर्धाः अनन्तपुर्यां सम्पत्स्यन्ते।

 डिट्वा दुरन्तः - श्रीलङ्कायै भारतस्य ४५ कोटि डोलर्मितस्य साहाय्यभाण्डः। 

कोलम्बो> डिट्वा चक्रवातस्य दुष्प्रभावेण दुरापन्ने प्रलये विनाशितायै श्रीलङ्कायै ४५ कोटि डोलर्मितस्य साहाय्यभाण्डः भारतेन प्रख्यापितः। प्रधानमन्त्रिणः नरेन्द्रमोदिनः सविशेषदूतरूपेण विदेशकार्यमन्त्रिणा एस् जयशङ्करेण कृते श्रीलङ्कासन्दर्शने अस्ति साहाय्योद्घोषणम्। 

  ३५ कोटि डोलर् अपहारोपेतं [with discount] एल् ओ सि प्रकारेण [Line Of Credit]  १० कोटि डोलर् उपायनरूपेण [grant] च दीयते। लङ्काप्रशासनेन सह चर्चां कृत्वा भाण्डस्य अन्तिमाङ्गीकारं  स्वीकरिष्यति। निश्चितराशिं यावत् आवश्यानुसारं ऋणरूपेण स्वीकर्तुं प्रत्यर्पयितुं शक्यमाना ऋणसुविधा अस्ति एल् ओ सि।

 सप्तदिनाभ्यन्तरे द्विवारं बङ्गलादेशस्य उन्नतनयतन्त्रोद्योगी भारतेन आहूतः।

 नवदिल्ली> बङ्गलादेशस्य भारतस्य च मिथः नयतन्त्रबन्धे दूषिते सन्दर्भेऽस्मिन् बङ्गलादेशस्य उन्नत नयतन्त्रोद्योगी  रियास् हमीदुल्लः सप्त दिनाभ्यन्तरे द्वितीयवारं भारतेन पुनराहूतः। पूर्वं जनुवरि १७ तमे दिनाङ्के रियासः विदेशकार्यमन्त्रालयेन आहूतः आसीत्। धाक्कायां भारतस्य उन्नत-नयतन्त्र-कार्यालयस्य सुरक्षां संबन्ध्य आशङ्कां प्रकटयितुम् एव आसीत् आह्वानम्। मङ्गलवासरे भारतस्य उन्नतकार्यनियुक्तः प्रणय् वर्मा बङ्गलादेशेन आहूतः आसीत्। भारते बङ्गलादेशस्य नयतन्त्रकार्यालयस्य सुरक्षाम् अधिकृत्य आशङ्कां प्रकटयितुम् एव सः आहूतः।

 ऊन१९ एष्याचषक क्रिकट्

पाकिस्थानं किरीटं प्राप। 

भारतं पराजयत।

दुबाय्> ऊननवदशवयस्कानाम् एष्याचषक क्रिकट् स्पर्धायाः  अन्तिमे प्रतिद्वंद्वे भारतं १९१ धावनाङ्कैः पराजित्य पाकिस्थानदलः किरीटं प्राप। प्रथमचरणे पाकिस्थानं ५० क्षेपणचक्रेषु ३४७ धावनाङ्कान् सम्पादयामास। भारतस्य प्रतिक्रीडा १५६ धावनाङ्केषु समाप्ता।

 महिला टि-२० 

प्रथमप्रतिद्वन्द्वे भारतस्य विजयः। 

जमीमा रोड्रिगसः। 

श्रीलङ्कां ८ द्वारकैः पराजयत। जमीमा रोड्रिगसे अर्धशतकम्। 

विशाखपत्तनं> श्रीलङ्कां विरुध्य महिलानां टि-२० क्रिकट् स्पर्धापरम्परायाः प्रथमे प्रतिद्वन्द्वे भारतस्य अनायासविजयः। अष्ट द्वारकाणां विजयं सम्प्राप्य १ - ० इति रीत्या भारतम् अग्रे तिष्ठति। 

  प्रथमं कन्दुकताडनं कृतवत्यः श्रीलङ्कीयमहिलाः २० क्षेपणचक्रेषु ६ क्रीडिकान् परित्यज्य १२१ इति न्यूनसंख्याकं धावनाङ्कान् सम्पादितवत्यः। प्रत्युत्तरताडने भारतीयमहिलाः १४. ४ क्षेपणचक्रेषु द्वे क्रीडिके त्यक्त्वा १२२ धावनाङ्कान् सम्पाद्य लक्ष्यं प्राप्तवत्यः। जमीमा रोड्रिगसः अर्धशतकं प्राप्तवती - ४४ कन्दुकैः ६९ धावनाङ्काः।

 एल् वि एम् - ३ विक्षेपः श्वः। 

चेन्नै> अमेरिकायाः ए एस् टि स्पेस् मोबाइल् इत्यस्य 'ब्लू बेर्ड् -६' नामकेन उपग्रहेण सह भारतस्य एल् वि एम् - ३  विक्षेपिणी विक्षेपाय सज्जा अस्ति। बुधवासरे प्रभाते ८.२४ वादने श्रीहरिक्कोट्टास्थात् सतीष्धवान् बहिराकाशकेन्द्रात् विक्षेपणं सम्पत्स्यति। भारतात् विक्षेपणं क्रियमाणः बृहत्भारयुक्तः उपग्रहः भवति ६. ५ टण् भारयुक्तं ब्लू बेर्ड्। 

 टेलिकोम् संस्थायाः प्रोन्नतस्तंभान् विद्युत्सन्देशवाहकान् च विना साधारणजङ्गमदूरवाणीः प्रति 'ब्रोड् बान्ट् इन्टर्नेट्' सेवाप्राप्तिरिति अस्योपग्रहस्य लक्ष्यम्।

 भारत-न्यूसिलान्टयोर्मध्ये निश्शुल्कव्यापारः उद्घोषितः। 

नवदिल्ली> भारत- न्यूसिलान्टराष्ट्रयोर्मध्ये शुल्करहितं व्यापारं साधयितुं  स्वतन्त्रव्यापारसन्धिः हस्ताक्षरीकृतः। भारतात् आयातानां कृते न्यूसिलान्टः १००% करलाघवत्वं प्रदास्यति। आगामि १५ वर्षेषु न्यूसिलान्टः भारते १. ८ कोटि रूप्यकाणां निक्षेपमपि  करिष्यति। 

  न्यूसिलान्टतः क्रियमाणानां ९५% निर्यातानां भारते निश्शुल्कव्यापारम् अनुमोदिष्यति। मासत्रयाभ्यन्तरे हस्ताक्षरीक्रियमाणः सन्धिः सप्त वा अष्ट मासाभ्यन्तरे प्रवृत्तिपथमागमिष्यति।

 टि २० परम्परा भारतेन प्राप्ता। 

अहमदाबादः> दक्षिणाफ्रिकां विरुध्य टि २० परम्परायाः पञ्चमम् अन्तिमं च प्रतिद्वन्द्वं विजित्य भारतं परम्परां प्राप। दक्षिणाफ्रिकां ३० धावनाङ्कैरेव पराजयत। प्राप्ताङ्कसूचिका - भारतं २० क्षेपणचक्रेषु २३१/५। दक्षिणाफ्रिका २०१/८।

 दीर्घदूररेल्यात्राशुल्कं वर्धापितम्। 

नवदिल्ली> दीर्घदूररेल् यानेषु यात्राशुल्कमानं रेल् यानमन्त्रालयेन वर्धापितम्। २१५ किलोमीटर् दूरादधिकयात्रायै साधारणचीटिकानां एक पैसा प्रति किलोमीटर्, इतरेषां वातानुकूलितारक्षितस्तराणां पैसाद्वयं प्रति किलोमीटर् इति प्रकारेण वर्धनमस्ति। ५०० किलोमीटर् यात्रायै ५० रूप्यकाणां वर्धनं भविष्यति। 

  डिसम्बर् २६ तमतः वर्धापितं चीटिकामानं प्रबलं भवेत्। ६०० कोटिरूप्यकाणि अधिकायः प्रतीक्षते। रेल्मार्गविकासानुसारं व्ययोSपि वर्धते इत्यत एव यात्राशुल्कस्य वर्धनमिति मन्त्रालयेन स्पष्टीकृतम्।

 बङ्गलादेशे पाक्चारसंघटनं मुष्टिं बध्नाति। 

भारतविरुद्धतासृष्टिः लक्ष्यम्। 

बङ्गलादेशे भारतहैकम्मीषन् कार्यालयं प्रति विधत्तः प्रतिषेधः। 

नवदिल्ली> किञ्चित्कालानन्तरं बङ्गलादेशः पुनरपि राजनैतिकास्थिरतां नीयते। तादृशीमवस्थां चूषयित्वा पाकिस्थानस्य चारसंघटनम् ऐ एस् ऐ नामकं तत्र भारतविरुद्धमनोभावान् प्रवर्धयितुं कुत्सितप्रवर्तनानि आरभत इति भारतस्य गुप्तान्वेषणसंस्थया जागर्तिसूचना दत्ता। 

  २०२४ तमे वर्षे षेय्क् हसीना सर्वकारस्य पतनात्परं जमा अत्ते इस्लामी, इन्क्विलाब मोञ्चो इत्यादिसंघटनैः सह हस्तग्रहणं कृत्वा ऐ एस् ऐ  कुत्सितप्रवर्तनानां शीघ्रतां करोतीति भारतगुप्तान्वेषणविशकलनकुशलैः सूचितम्। बङ्गलादेशे धार्मिकतीव्रवादस्य प्रोत्साहनेन भारतविरुद्धतां जनयेत् इति लक्ष्यम्। गतदिने भारतहैकम्मीषन् कार्यालयं प्रति विधत्तम् आक्रमणं भारतेन आशङ्कया विलोक्यते।

 कैरल्याः अनुगृहीतचलच्चित्रकारः श्रीनिवासः दिवंगतः।

कोच्ची> अभिनेता, दृश्यरूपकथा, निदेशकः इत्यादिरूपेण मलयालचलच्चित्रमण्डलाय नूतनभावं दत्तवान् विख्यातः श्रिनिवासः [६९] दिवंगतः। उपद्विशतं चलच्चित्रेषु विभिन्नवेषान् कृत्वा, तावदेव   चलच्चित्रेभ्यः कथा-पटकथा-संभाषणानि विरच्य चलच्चित्रास्वादकहृदयेषु अनुपमं स्थानं प्राप्तवतः तस्य अन्त्यं तृप्पूणित्तुरास्थे सर्वकारातुरालये अद्यः प्रभाते अभवत्। 

  ४८ वर्षाणि चलच्चित्रक्षेत्रे विराजमानः श्रीनिवासः सामान्य-मध्यस्तरीयजनानां सामाजिकनिस्सहायावस्थां, राजनैतिकमण्डलापचयं च आक्षेपहासस्य अनुगमनेन सह तस्य चलच्चित्राणि प्रकाशितवान्। "वेल्लानकलुटे नाट्', 'चिन्ताविष्टयाय श्यामला', 'सन्देशं', 'पञ्चवटिप्पालं' 'नाटोटिक्काट्ट्', 'ञान् प्रकाशन्' इत्येतानि कतिपयोदाहरणानि भवन्ति। 

  १९५६ तमे वर्षे कण्णूरजनपदस्थे पाट्यं प्रदेशे आसीत्तस्य जननम्। मलयालचलच्चित्रमण्डले स्वकीयां व्यक्तिमुद्रां प्रपातितवन्तौ विनीत् श्रीनिवासः, ध्यान् श्रीनिवासः च तस्य पुत्रौ स्तः। अद्य मध्याह्नानन्तरं एकवादनतः एरणाकुलं नगरस्थे सभागारे [Town Hall] सामाजिक दर्शनं भविष्यति।

Latest news

 केरले तीव्र मतदानावलीपरिष्करणं [SIR] प्रथमसोपानं समाप्तम्। 

अनन्तपुरी> केरले मतदायकावल्याः समग्रपरिष्करणस्य [SIR] प्रथमचरणं समाप्तम्। संक्षिप्तावलिः, परिष्करणवेलायां बहिर्गतानामावलिः च डिसम्बर् २३ तमे दिनाङ्के प्रकाशयिष्यति। सर्वेषां राजनैतिकदलानां कृते आवल्याः प्रतिकृतिः परिशोधनार्थं लभते, मतदानिनामपि ओण् लैन् द्वारा आवलीपरिशोधनाय सुविधा लभते चेति मुख्यनिर्वाचनाधिकारी रत्तन् यू केल्करः प्रस्तुतवान्। 

  आवल्याः उपरि आक्षेपः अस्ति चेत् जनुवरी २२ पर्यन्तं आक्षेपान् समर्पितुं शक्यते। २४. ८१ लक्षं जनाः आवल्याः बहिर्नीताः इति सूच्यते। तेषु ६. ४९ लक्षं  संख्याकाः मृताः भवन्ति। ८. २१ लक्षं वासपरिवर्तनं कृताः। ६. ८९ लक्षं जनाः नाधिगताः। अन्तिमा आवलिः फेब्रुवरि २१ तमे दिनाङ्के प्रकाशयिष्यते।

 बहुजनप्रक्षोभनेतुः मरणम्

बङ्गलादेशः संघर्षभरितः। 

बहुत्र अक्रमः, दाहनम्। 

मृत्युंगतस्य उस्मान हादिनः चित्रेण सह प्रक्षोभकारिणः। 

धाक्का>भूतपूर्वप्रधानमन्त्रिण्याः षेक् हसीनायाः स्थानत्यागाय हेतुभूतस्य बहुजनप्रक्षोभस्य नायकस्य हत्यया बङ्गलादेशः पुनरपि संघर्षकलुषः वर्तते। भुषुण्डिप्रयोगेण परिचर्यायां वर्तमानः 'इन्क्विलाब मोञ्चो' संघटनस्य प्रायोजकः षीफ् उस्मान हादी नामकः सिङ्गपूरस्थे  आतुरालये गतदिने मृत्युं प्राप। तस्य मृत्युवृत्तान्ते अल्पकालीनसर्वकारस्य उपदेष्टा मुहम्मदयूनुस् इत्यनेन राष्ट्राय निगदिते आराष्ट्रं प्रतिषेधसूचकेन अक्रमपरम्पराः अग्निदाहकक्रियाश्च आरभन्त। 

  गतसप्ताहे धाक्कायां बिजोयनगरे निर्वाचनप्रचरणकार्यक्रमे भागं कुर्वन्तं हादिं लक्ष्यीकृत्य मुखावरणधारिणः केचन भुषुण्डिप्रयोगं कृतवन्तः। विशिष्टचिकित्सार्थं सः सिङ्गपूरं नीतः। तत्र मृत्युरभवत्।

 छत्तीसगढे त्रयः मावोवादिनः व्यापादिताः।

सुक्मा> छत्तीसगढे सुक्माजनपदे मावोवादि-सुरक्षासेनयोर्मध्ये जाते प्रतिद्वन्द्वे त्रयः मावोवादिनः मारिताः। एषु एका महिला आसीत्। गोलपल्लिनामकस्थलस्य समीपे वनप्रदेशे आसीत् संघट्टनम्। 

 न्याया. सौमन सेनः केरलस्य उच्चन्यायालयाधिपः। 

नवदिल्ली> केरलस्य उच्चन्यायालयस्य आगामि मुख्यन्यायाधिपरूपेण सर्वोच्चन्यायालयसमित्या  न्याया. सौमन सेनः निर्दिष्टः। इदानीं मेघालयस्य मुख्यन्यायाधिपः भवति सौमन सेनः। 

  जनुवरिमासे नवमदिनाङ्के  वर्तमानीनः मुख्यन्यायाधिपः नितिन जंदारः सेवानिवृत्तः भविष्यति। तत्स्थाने अस्ति न्यायाधीशस्य सौमनस्य नियुक्तिः। कोल्कोत्ताप्रदेशीयो भवत्ययम्। केरलोच्चन्यायालयस्य न्यायाधिपं ए मुहम्मद मुष्ताखं सिक्किमराज्यस्य मुख्यन्यायाधीशं कर्तुमपि निर्देशः कृतः।

 नरेन्द्रमोदिने ओमानस्य  परमोन्नतनागरिकबहुमतिः। 

मोदिने ओर्डर् ओफ् ओमान् पुरस्कारसमर्पणम्। 

मस्कट्> ओमानराष्ट्रस्य परमोन्नतनागरिकबहुमतिः 'ओर्डर् ओफ् ओमान्' भारतस्य प्रधानमन्त्रिणे नरेन्द्रमोदिने समर्पिता। ओमानस्य शासनाधिकारी सुल्तान् हैतं बिन् तारिखः मस्कटे अल् बराका राजभवने  मोदिने एनं  पुरस्कारं दत्तवान्। भारत-ओमानयोः सौहार्दं प्रबलीकर्तुं मोदिना कृतं योगदानं पुरस्कृत्य आसीदियं बहुमतिः। 

  मोदिने कस्माच्चन विदेशराष्ट्रात् लभ्यमानः २८ तमः पुरस्कारो भवत्येषः। गतदिने 'ग्रेट् ओणर् निषान् ओफ् एत्योपिया' नामकः एत्योपियाराष्ट्रस्य पुरस्कारः अपि मोदिवर्याय लब्धः।

 नवदिल्ल्यां वायूप्रदूषणम् अतिरूक्षम्।

50% कर्मकराः गृहे उपविश्य कार्यालयकर्म करणीयः। उल्लङ्घयति चेत् दण्डः दापयिष्यति।

  नवदिल्ली> वायूप्रदूषणसमस्या अतिरूक्षे जायमाने सन्दर्भेऽस्मिन् सर्वाः सर्वकारीयसंस्थाः निजीयसंस्थाः च प्रतिशतं पञ्चाशत् (50%) कर्मकराः कार्यलयकर्म गृहात् एव करणीय इति दिल्लीसर्वकारेण आदेशः दत्तः। आदेशं उल्लङ्घयति चेत् दण्डः दापयिष्यति इति पूर्वसूचना अपि सर्वकारेण दत्ता। नवदिल्ल्याम् अस्मिन् ऋतौ वायुमानं दिसंबर् १५ तमे दिने प्रातःकाले ४९८ 'ए क्यू ऐ सिवियर् प्लस्' विभागे रेखाङ्कितम्। शनिवासरादारभ्य मङ्गलवासरपर्यन्तं नवदिल्ल्याम् अतिशक्तेन हिमधूल्यावरणेन बहूनि यानमार्गापघाताः दुरापन्नाः।

 प्रधानमन्त्री ओमाने। 

उभयव्यापारसन्धिः हस्ताक्षरीकरिष्यते। 

नरेन्द्रमोदिने मस्कट् विमाननिलये दत्तं स्वीकरणम्। 

मस्कट्> त्रिराष्ट्रपर्यटनस्य अंशतया भारतप्रधानमन्त्री नरेन्द्रमोदी बुधवासरे ओमानराष्ट्रं सम्प्राप्तवान्। मोदिनः सान्निध्ये उभयोरपि राष्ट्रयोर्मध्ये स्वतन्त्रव्यापारसन्धेः अङ्गीकारः भविष्यति। सन्धेः निर्वहणाय केन्द्रवाणिज्यमन्त्री पीयूष गोयलः मस्कटे प्राप्तवानस्ति। 

  २०२३ तमे वर्षे आरब्धा 'सेपा' नामिका आर्थिकसहयोगसन्धिचर्चा एव इदानीं सार्थकीभवति। 'गल्फ् को-ओपरेषन् कौण्सिल्' इत्यत्र तृतीयं बृहत्तमम् आयातलक्ष्यस्थानमस्ति ओमानः। २०२४-२५ तमे १०५० कोटि डोलरमितस्य भारत-ओमानोभयपक्षव्यापारः सम्पन्नः। 

  ओमाने मोदिने 'गार्ड् ओफ् ओणर्' इत्यनेन सह हृद्यं स्वीकरणं प्रदत्तम्। ओमानस्य विदेशकार्यमन्त्री उपप्रधानमन्त्री च  सय्यिद् षिहाब बिन् तारिख् अल् सैदः मस्कट् विमाननिलयं प्राप्य स्वीकृतवान्।

 तुषारप्रपातः - चतुर्थं टि-२० परित्यक्तम्। 

लख्नौ> कठिनेन तुषारप्रपातेन भारत-दक्षिणाफ्रिकयोः चतुर्थः टि-२० क्रिकटप्रतिद्वन्द्वः परित्यक्तः। किमपि कन्दुकक्षेपणं न संवृत्तम्। परम्परायां भारतं २ -१  इति रीत्या अग्रे तिष्ठति। पञ्चमः अन्तिमश्च प्रतिद्वन्द्वः श्वः अहम्मदाबादे सम्पत्स्यते।

 राष्ट्रिय विद्यालयीयकायिकस्पर्धायां केरलस्य वीरतापदम्

सीनियर् विभागे वीरतापदं प्राप्तः केरलसंघः।

लख्नौ>  विद्यालयछात्राणां राष्ट्रियकायिकोत्सवे केरलं किरीटं प्राप। सीनियर्, जूनियर्, सब् जूनियर् इति त्रिषु विभागेष्वपि केरलीयछात्राः प्रथमस्थानं प्राप्तवन्तः। प्रथमतया एव केरलस्य विभागत्रये अपि सम्पूर्णाधिपत्यम्। हरियानं, मध्यप्रदेशः, उत्तरप्रदेशः, दिल्ली इत्यादिषु राज्यस्थेषु नगरेषु आसन् भिन्नभिन्नस्पर्धाः सम्पन्नाः।

 चतुर्थं टि २० अद्य। 

लक्ष्यं परम्पराप्राप्तिः। 

लख्नौ> दक्षिणाफ्रिकां विरुध्य टि-२० क्रिकट् परम्परायाः चतुर्थः प्रतिद्वन्द्वः अद्य सायं भविष्यति। पञ्चस्पर्धात्मिकपरम्परायां तिस्रायामतीतायां भारतं २ - १ इति क्रमेण अग्रे अस्ति। एतां स्पर्धामपि विजित्य परम्पराप्राप्तिरेव भारतस्य लक्ष्यम्।

 प्रादेशिकप्रशासनद्वारा दुरन्तनिवारणं - 

केन्द्रसर्वकारेण ५०७ कोटि रूप्यकाणि अनुमोदितानि।

नवदिल्ली> राज्यस्थाभिः प्रादेशिकसर्वकारसंस्थाभिः दुरन्तसाध्यतालघूकरणाभियोजनानि प्रचालयितुं ५०७. ३७ कोटि रूप्यकाणि केन्द्रप्रशासनेन अनुमोदितानि। गृहमन्त्रिणा अमित शाहेन अध्यक्षताम् वहमानया उच्चस्तरीयसमित्या २० राज्येभ्यः एव धनराशिः अनुमोदितः। 

  प्राकृतिकदुरन्तान् निरोद्धुम् अभिमुखीकर्तुं च समाजान् सज्जीकर्तुमुद्दिश्य २०२१ तमे वर्षे आसीत् मोदिसर्वकारेण इयमभियोजना उद्घोषिता। इदानीमियं ग्रामतलेषु व्याप्यमाना अस्ति।

 मध्यप्रदेशे स्वीकृतरक्तानां षट् बालकानां 'एछ् ऐ वि' बाधा। 

इन्दोर्> मध्यप्रदेशे विविधेभ्यः आतुरालयेभ्यः रक्तं स्वीकृतवन्तः 'तलासीमिया' रोगेण पीडिताः षट् बालकाः HIV [एय्ड्स्]  रोगाधीनाः जाताः। १२ - १५ वयस्काः भवन्ति  ते। तलासीमिया रोगपरिहाराय अनुक्रमेण रक्तपरिवर्तनस्यान्तरे एव रोगबाधा। 

  नूतनरक्तपरिवर्तनानन्तरं बालकानां शारिरिकास्वास्थ्ये जाते परं कृते परिशोधने आसीत् एयिड्स्  रोगनिर्णयः। अस्मिन् वर्षे जनुवरिमासतः मेय्मासपर्यन्तं कालपरिधौ आसीत्  रोगप्रकरणानि आवेदितानि। मध्यप्रदेशस्य स्वास्थ्यमन्त्रिणा राजेन्द्र शुक्लेन अन्वेषणाय आदेशः दत्तः।

 खनितबोम्बस्फोटनं

सैनिकः वीरमृत्युं प्राप।

श्रीनगरं> जम्मु-काश्मीरस्य कुप्वार जनपदे मृद्गुप्तबोम्बस्फोटनेन एकः सैनिकः मृतः। जम्मु-काश्मीरे 'लैट् इन्फन्ट्रि' विभागे हविल्दार् पदीयः सुबैर् अहम्मदनामकः एव वीरमृत्युं प्राप। सोमवासरे आसीदियं दुर्घटना। 

  काश्मीरस्य बहुत्र स्थानेषु भीकरैः सह प्रतिद्वन्द्वः अनुवर्तते। सोमवासरे उधंपुरे अपि भीकरैः सह प्रतिद्वन्द्वः जातः। तत्रैकः रक्षिपुरुषः वीरमृत्युं प्राप। कश्चन भीकरः भुषुण्डिपतितः अभवत्।

 नरेन्द्रमोदिनः जोर्दानस्य राज्ञा सह मेलनं सम्पन्नम्। 

अम्मान्> भारतस्य प्रधानमन्त्री नरेन्द्रमोदी जोर्दानराष्ट्रस्य राजा अब्दुल्ला द्वितीयः इब्नु अल् हुसैन् इत्यनेन सह मेलनं सम्पन्नम्। प्रादेशिकतात्पर्योपेताः विषयाः चर्चिताः। उभयोरपि राष्ट्रयोः हितानुसारसौहृदस्य दृढीकरणं भविष्यतीति सूच्यते। 

  पूर्वम् अम्मानस्थं विमाननिलयं प्राप्तवन्तं मोदिवर्यं जोर्दानस्य प्रधानमन्त्री जाफर हसनः साक्षादागत्य स्वीकृतवान्।

 ऊन१९ - एष्या चषकक्रिकट्। 

पाकिस्थानं पराजित्य भारतं पूर्वान्त्यचक्रे। 

अबुदाबी> ऊननवदशवयस्कानाम् एष्या चषकक्रिकट् स्पर्धायाः चतुर्थांशे प्रतिद्वन्द्वे पाकिस्थानदलं ९० धावनाङ्कैः पराजित्य भारतं  पूर्वान्त्यचक्रं प्राविशत्। प्रवासिकेरलीयः आरोण् जोर्ज् इत्यस्य वैभवपूर्णं कन्दुकताडनं, दीपेष् देवेन्द्रस्य आग्नेयकं कन्दुकक्षेपणं, कनिष्क चौहानस्य सर्वतोमुखक्रीडा च भारतम् अनायासविजयं नयन्ति स्म। 

  प्रथमं कन्दुकताडनं कृतवान् भारतसंघः ४६. १ क्षेपणचक्रेषु २४० धावनाङ्कैः बहिर्नीतः। प्रत्युत्तरताडने  ४१. २ क्षेपणचक्रेषु १५० धावनाङ्कान् सञ्चित्य  पाकिस्थानसंघस्य सर्वे बहिर्गताः। ४६ धावनाङ्कान्,त्रीणि द्वारकाणि च उपलब्धवान् कनिष्क चौहानः श्रेष्ठक्रीडकः जातः।

 मुम्बय्याम् कायिकेतिहाससंगमः।

सच्चिन्- मेसि संगमः कायिकप्रेमिणां कृते उत्साहलहरी।

मेसीवर्याय सच्चिनः स्वक्रीडावस्त्रं समर्पयति। 

मुम्बई> क्रिकट् इतिहासः सच्चिन् टेण्टुलकरः पादकन्दुकेतिहासः लयणल् मेसी च भारतीयपादकन्दुकेतिहासः सुनिल छेत्री, अन्ताराष्ट्रीयपादकन्दुकक्रीडकौ लूयी सुवारस्, रोड्रिगो पोली इत्येतैः सह यदा वाङ्कडे क्रीडाङ्कणं प्रविष्टवन्तौ तदा दशसहस्रशः कायिकाराधकाः आह्लादोन्मादावस्थां प्रापुः।क्रीडाङ्कणं सर्वं 'मेसी-- मेसी' आह्वानेन मुखरितमभवत्। 

  भारताय मुम्बई नगराय च सुवर्णनिमिषमेव मेसीवर्यस्य सन्दर्शनेन उपलब्धमिति सच्चिनः प्रस्तुतवान्। २०११ तमे वर्षे अस्मिन्नेव क्रीडाङ्कणे भारतस्य  क्रिकट् विश्वचषकप्राप्त्या सह निमषममुं सच्चिनः तुलनं कृतवान्। पादकन्दुके अपि वयं अत्युन्नतिं प्राप्यास्म इति सः प्रतीक्षामपि प्रकटीचकार। 

  मेसि वर्यः सच्चिनाय विश्वचषककन्दुकं सम्मानितवान्। सच्चिनस्तु   मेसि वर्याय आत्मनः दशमसंख्यााङ्कितं क्रीडावस्त्रं समर्पितवान्। क्रीडाङ्कणे सम्पन्नां भारतीयक्रीडकानां पादकन्दुकक्रीडामपि संवीक्षितवान्।

 प्रधानमन्त्रिणः त्रिराष्ट्रसन्दर्शनम् अद्य आरभते। 

नवदिल्ली> जोर्दानम्, एत्योपिया, ओमानम् इत्येतानि राष्ट्राणि सम्पश्य नयतन्त्रसौहृदं वर्धापयितुं प्रधानमन्त्री नरेन्द्रमोदी सोमवासरे प्रस्थास्यति। 

  ३८ वर्षेभ्यः परमेव कश्चित् प्रधानमन्त्री जोर्दानं सम्पश्यति। राजीव गान्धिः आसीत् अन्तिमतया जोर्दानं सन्दृष्टवान् भारतस्य प्रधानमन्त्री। मोदिवर्यः अब्दुल्ला द्वितीयः नामकं जोर्दानराजं सम्पश्य विविधमण्डलेषु उभयराष्ट्रहितान्  निर्णयान् करिष्यति। तदनन्तरं सः एत्योपिया, ओमानं च सन्द्रक्ष्यति।

 तृतीयं टि २० - भारतस्य विजयः। 

धर्मशाला> अर्षदीप सिंहस्य हर्षित राणस्य च कन्दुकक्षेपणप्रभावेण दक्षिणाफ्रिकां विरुध्य तृतीये टि २० प्रतिद्वन्द्वे भारतस्य अनायासविजयः। प्रथमचरणे ताडनं कृतवान्   दक्षिणाफ्रिकादलः २० क्षेपणचक्रेषु ११७ धावनाङ्कान् सम्प्राप। प्रत्युत्तरताडने भारतदलः १५. ५ क्षेपणचक्रेषु  ताडकत्रयस्य विनष्टे १२० धावनाङ्कान् सम्प्राप्य विजयी अभूत्। अनेन विजयेन पञ्चस्पर्धात्मिकायां परम्परायां २-१ इति रीत्या भारतम् अग्रे तिष्ठति।

 नितिन नबीनः भाजपादलस्य   राष्ट्रियप्रवर्तननिरताध्यक्षः। 

नवदिल्ली> बिहारराज्यस्य वीथीनिर्माणविभागस्य मन्त्री नितिन नबीनः भाजपा दलस्य राष्ट्रियप्रवर्तननिरताध्यक्षरूपेण राजनैतिलकार्यसमित्या नियुक्तः। इदं स्थानं प्राप्यमाणः ऊनतमवयस्को भवति ४५ वयस्कः नितिनः। अयं राष्ट्रियाध्यक्षस्य जे पी नड्डावर्यस्य अनन्तरगामी भविष्यतीति कल्प्यते।

 कर्मयोजनायाः नाम परिष्क्रियते। पूज्य बापु रोज़गार योजना इति।

   नवदिल्ली> महात्मा गान्धी राष्ट्रियकर्मयोजनायाः नामपरिष्करण-विधेयकस्य अङ्गीकारः केन्द्रमन्त्रिसभया प्रदत्तः। पूज्य बापु ग्रामीण-रोज़गारयोजना इत्यस्ति नवीननाम। १०० कर्मदिनानि १२५ इति वर्धिष्यन्ते। २००५ तमे यू पि ए सर्वकारेण एव इयं योजना समारब्धा। पूर्वं विद्यमान आङ्गलेयनाम हिन्दी भाषायां परिर्वत्य भवति नूतनं नामकरणम्। कर्मदिनानि अधिकतया आवश्यकानि इति कर्मकराणाम् अर्थनाम् अङ्गीकृत्य आसीत् कर्मदिनानां वर्धापनम् l

 'एछ् १ बी विसा'पत्रशुल्कवर्धनं - १९ राज्यानि न्यायालयमुपगतानि।

न्यूयोर्क्> कुशलानां कर्मकराणाम् अधिवासाय ट्रम्पशासनेन विधत्तं एछ् १ बी विसा'पत्रशुल्कवर्धनं विरुध्य यू एस् राष्ट्रस्य १९ राज्यानाम् 'अटोर्णी जनरल्' पदीयानां सख्येन 'मासच्यूसेट्स्' इत्यत्र वर्तमानं न्यायवादन्यायालयं प्रति अभियाचिका समर्पिता। सख्ये न्यूयोर्कस्य 'अटोर्णी जनरल्' अपि अस्ति। नियमानुसारमधिकारं नियतप्रक्रियां वा विना एव शुल्कः क्रमातीतः वर्धापित इति याचिकायां निवेदयति। 

  एछ् १ बी विसा'पत्रस्य नूतनम्  अपेक्षाशुल्कं एकलक्षं डोलर् मितेन [९० लक्षं रूप्यकाणि] सेप्टम्बरमासे ट्रम्पेन वर्धापितम्। पूर्वमेतत्तु २००० - ५००० डोलरमितमासीत्। प्रायेण भारतीयाः एवास्य विसापत्रस्य अधिकोपयोक्तारः। कुशलमतीनां विदेशकर्मकराणां अमेरिकाम् अधिवासं कृत्वा षट्वर्षाणि यावत् वृत्तिं कर्तुम् अनेन विसापत्रेण शक्यते। इदं शुल्कवर्धनं तु स्वास्थ्य-साङकेतिक-शैक्षिकमण्डलेषु सेवाकराणां दौर्लभ्याय कारणं भविष्यतीति मुख्यविमर्शः।

 लयणल् मेसी भारते।

कोल्कोत्तायाम् उत्साहोज्वलं स्वीकरणम्। 

कोल्कोत्तायां मेसिवर्यः आराधकान् अभिवादयति। 

कार्यक्रमः संघर्षभरितोSभवत्। 

कोल्कोत्ता> पादकन्दुकेतिहासः अर्जन्टीनाक्रीडकः  लयणल् मेसी भारतं सम्प्राप्तवान्। शनिवासरे प्रभाते ११. ३० वादने  कोल्कोत्तायां साल्ट् लेक् क्रीडाङ्कणं सम्प्राप्तं मेसीवर्यं सहस्रशः आराधकाः सोज्वलं हस्तताडनघोषेण स्वीकृतवन्तः। तदा मोहन् बगान-डयमण्ट हारबर् दलयोः प्रदर्शनस्पर्धा प्रचलन्नासीत्। क्रीडाङकणस्य पार्श्वैकस्मिन् चलन् मेसिवर्यः आराधकान् अभिवाद्यमकरोत्। कतिपयनिमेषाः वेदिकामुपविश्यानन्तरं हैदराबादं गन्तुं वेदिकातः प्रस्थितः च। 

  किन्तु मेसिवर्ये यथेच्छं दर्शनसौभाग्यं नालभत इत्यारोप्य प्रेक्षकाः निराशाः भूत्वा अतिक्रममारब्धवन्तः। कूपीस्यूतादीन्  यान् करगतान् सर्वान् क्रीडाङकणं विक्षिप्तवन्तः। उपकरणानि नाशितवन्तश्च। घटनायां ममता बानर्जीसर्वकारेण खेदः प्रकटितः।

 केरलजनविधिः 

यू डि एफ् सख्याय गभीरविजयः। 

एन् डि ए सख्यस्य विजयोपलब्धि‌ः - अनन्तपुरी महानगरम्। 

एल् डि एफ् सख्यस्य अप्रतीक्षितपतनम्। 

कोच्ची> केरले तद्देशस्वयंप्रशासनसंस्थासु सम्पन्नस्य  निर्वाचनस्य परिणामे समागते कोण्ग्रस् दलनेतृत्वे वर्तमानस्य यू डि एफ् सख्यस्य समग्राधिपत्यम्। ९४१ ग्रमपञ्चायत्तसभासु ५०५ सभाः यू डि एफ् सख्येन उपलब्धाः। २६ सभाः भाजपा नेतृत्वोपतेन एन् डि ए सख्येन प्राप्ताः। राज्यप्रशासनपक्षः वामपक्षसख्यं - एल् डि एफ्-   ३४१ सभाभिः संतृप्तिमभजत। १४ जिल्लापञ्चायत्तेषु एल् डि एफ् दलाय सप्त, यू डि एफ् सख्याय सप्त च जनपदानि लब्धानि।  षड् महानगरेषु यू डि एफ् ४, एल् डि एफ् १, एन् डि ए १ इति क्रमेण लब्धानि। अनन्तपुरी महानगरं एल् डि एफ् पक्षतः भाजपासख्येन निगृहीतम्। नगरप्रशासनेषु यू डि एफ् सख्येन ५४, वामपक्षेण २८, भाजपा सख्येन २ च नगराणि संगृहीतानि।

 पाक्किस्थानस्य विश्वविद्यालये संस्कृतपाठ्यक्रमेषु भगवद्गीतां, महाभारतं च पाठयिष्यति।

    इसलमाबाद्> शिक्षामण्डले अस्मात् मासात् आरभ्य लाहोर् विश्वविद्यालये पाठ्यक्रमेषु संस्कृतपाठ्यक्रमान् स्वीकृत्य जनश्रद्धां आकर्षति पाकिस्थानः। भारतात् पाकिस्थानस्य विभजनानन्तरं इदंप्रथमतया एव पाकिस्थानेषु कक्ष्याप्रकोष्टेषु संस्कृताध्ययनम् औपचारिकतया समारब्धम्।

 १९४७ तमसंवत्सरात् आरभ्य विभजनानन्तरं विश्वस्मिन् अतिप्राचीनासु भाषासु अन्यतमा इति प्रसिद्धायाः संस्कृतभाषायाः औपचारिकरीत्या अध्ययनं विरलमासीत् इति महाविद्यालयेन अन्तर्जालपुटे उक्तमस्ति। इदानीं बहुसंवत्सरानन्तरं भाषेयं कक्ष्याप्रकोष्ठेषु समानीता इत्येतत् दक्षिणेष्यायाः बौद्धिक - सांस्कृतिकपैतृकेण सह संकलनाय विश्वविद्यालयस्य प्रतिबद्धतां संसूचयति इति विश्वविद्यालयेन निगदितम्। 

    छात्राणां गवेषकाणां अभिभाषकाणाम् अक्कादमिक ' च कृते वासरान्त्यकार्यक्रमरूपेणैव प्रथमस्तरे संस्कृतपठनं समारब्धमासीत्। कार्यक्रमाय लब्धम् उत्तमं प्रतिकरणं परिगणय्य एव दीर्घकालपाठ्यक्रमः समारब्धः इति विश्वविद्यालयस्य प्रतिनिधिं पुरस्कृत्य माध्यमैः प्रतिवेदितम्। महाभारतं, भगवद्गीतां च पाठ्यक्रमेषु सन्निवेशयितुं योजनाम् आविष्करोति इति प्रतिवेदनमस्ति।

 बङ्गलादेशे फेब्रुवरि १२ तमे दिनाङ्के निर्वाचनम्।

धाक्का> बङ्गलादेशे बहुजन प्रक्षोभात् भूतपूर्वप्रधानमन्त्री षैक् हसीना बहिर्गतानन्तरं सम्पद्यमानं प्रथमं निर्वाचनं फेब्रुवरि १२ तमे दिनाङ्के भविष्यति। 

 २०२४ आगस्ट् पञ्चमदिनाङ्के हसीनायाः १५ संवत्सरात्मकं शासनं यदा समाप्तं ततः प्रभृति बङ्गलादेशः  राष्ट्रियप्रतिसन्धिम् अभिमुखीकुर्वन्नस्ति। निर्वाचनात् हसीनायाः राजनैतिकदलं अवामी लीग् संज्ञितं निरुद्धं वर्तते। 

  त्रिवारं प्रधानमन्त्रिपदम् आरूढवती खालिदा सिया इत्यनया नीयमानः 'बङ्गलादेश नाषणलिस्ट् पार्टी' इत्यस्य जयसाध्यता कल्प्यते। जतिया पार्टी, जमा अत्ते इस्लामी इत्यादयः दलाः अपि निर्वाचने स्पर्धिष्यन्ते। ३०० सदस्यस्थानानि सन्ति। ५० स्थानानि महिलानां कृते आरक्षितानि।

 राष्ट्रपतिः मणिपूरे सन्दर्शनमकरोत्। 

इम्फालः> राष्ट्रपतिः द्रौपदी मुर्मू वंशीयातिक्रमेण क्लेशमनुभूयमानं मणिप्पुरराज्यं सन्दर्शयामास। गुरुवासरे राज्यं प्राप्ता मुर्मूवर्या जनान् आश्वासयामास। तेषामाशङ्कां निवारयितुं केन्द्रसर्वकारः प्रतिज्ञाबद्ध इति तया प्रस्तुतम्। 

  दिनद्वयात्मके सन्दर्शने बह्व्यः अभियोजनाः तया उद्घाटिताः शिलान्यासं कृताः च। राष्ट्रपतिपदार्जनानन्तरं तस्याः प्रथमसन्दर्शनं भवति एतत्।

 भूतपूर्वः गृहमन्त्री शिवराजपाटीलः दिवंगतः। 

लात्तूरं> वरिष्ठः कोण्ग्रस् नेता तथा भूतपूर्वः केन्द्रगृहमन्त्री च शिवराजपाटीलः (९१) दिवंगतः। शुक्रवासरे प्रभाते लात्तूरस्थे स्वभवने आसीदन्त्यम्। अन्त्येष्टिकर्माणि अद्य सम्पत्स्यते। 

  इन्दिरा गान्धी, राजीव गान्धी, मन्मोहनसिंहः इत्येतेषां मन्त्रिमण्डले राष्ट्ररक्षा, व्योमयानं, गृहम् इत्येताः सुप्रधानविभागाः शिवराज पाटीलेन ऊढाः। तथा च लोकसभाध्यक्षपदं च  ऊढवान्। २००८ तमे वर्षे यदा मुम्बय्यां भीकराक्रमणं जातं तदा स आसीत् गृहमन्त्री। तत्कारणेन सः पदं तत्याज।

 द्वितीयं टि - २० 

दक्षिणाफ्रिका विजिता। ५

क्विन्टन् डि कोक् ।

मोहाली> क्विन्टण् डि कोक् नामकस्य कन्दुकताडकस्य प्रभावे द्वितीयायां टि-२० क्रिकट्स्पर्धायां दक्षिणाफ्रिका ५१धावनाङ्कैः विजिता जाता। प्राप्ताङ्कसूचिका - दक्षिणाफ्रिका २० क्षेपणचक्रेषु २१३/४। भारतं १९.१ क्षेपणचक्रेषु १६२ धावनाङ्कैः सर्वे बहिर्नीताः। स्पर्धाद्वये समाप्ते १-१ इति समस्थितिः प्राप्ता। आगामिस्पर्धा रविवासरे धर्मशालायां सम्पत्स्यते।

 अन्ताराष्ट्रचलच्चित्रोत्सवाय अद्य शुभारम्भः। 

अनन्तपुरी> केरले प्रतिवर्षं प्रचाल्यमानम् अन्ताराष्ट्रियचलच्चित्रोत्सवः शुक्रवासरे प्रारभते। राजधानीनगरस्थासु १६ चलच्चित्रशालासु ८२ राष्ट्रेभ्यः आगम्यमानानि २०६ चलच्चित्राणि आस्वादकसमक्षं प्रदर्शयिष्यन्ते। अष्ट दिनानि चलच्चित्रोत्सवः भविष्यति। 

  अद्य सायं षट्वादने निशागन्धिसभागारे मन्त्री सजि चेरियान् चलच्चित्रोत्सवस्य उद्घाटनं करिष्यति। चिलीराष्ट्रस्य विख्यातः निदेशकः पाब्लो लोरो मुख्यातिथिः भविष्यति। कार्यक्रमे कनेडिया चलच्चित्रकारी केल्ली फैफ् मार्षल् वर्या 'Spirit of Cenima' इति पुरस्कारेण समाद्रियते।

 केरले मतदानं ७३. ६९%।

कोच्ची> तद्देशस्वयंप्रशासनसभाः प्रति चरणद्वयात्मके निर्वाचने समाप्ते आहत्य ७३. ६९% मतदायकाः स्वाभिमतं प्रकटीकृतवन्तः। ९ तमे दिनाङ्के सम्पन्ने प्रथमचरणे ७१% , ह्यस्तने द्वितीयचरणे ७६% च मतदानं सम्पन्नम्। २०२० तमे वर्षे मतदानं ७६% आसीत्। मतगणना श्वः प्रभाते अष्टवादने आरप्स्यते।  २४४ गणनाकेन्द्राणि सन्ति।

 युक्रैने निर्वाचनाय सन्नद्धः इति सेलन्स्की।

वोलोदिमिर् सेलन्स्की।

रोमः> यू एस् राष्ट्रेण सुरक्षा प्रदास्यते चेत् युक्रैने निर्वाचनं  कर्तुं सन्नद्ध इति राष्ट्रपतिः वोलोदिमिर् सेलन्स्की प्रस्तुतवान्। इट्टल्यां रोमे वार्ताहराणां प्रश्नानां समाधानरूपेण भाषमाणः आसीत् सेलन्स्की। निर्वाचनं निराकर्तुं सेलन्स्की युद्धम् आयुधीकरोतीति  यू एस् राष्ट्रपतेः डोनाल्ड ट्रम्पस्य आरोपणस्य आधारे आसीत् सेलन्स्किवर्यस्य प्रस्तुतिः। 

  २०२४ मार्च मासे युक्रैने निर्वाचनं भवितव्यमासीत्। किन्तु २०२२ तमे वर्षे रष्यायाः अधिनिवेशे आरब्धे युक्रेनराष्ट्रं सेनाप्रशासनीधीनमभवत्। निर्वाचनं परिवर्तितं च।

 इन्डिगो विषये केन्द्रसर्वकारः दिल्ली उच्चन्यायालयेन विमृष्टः। 

नवदिल्ली> इन्डिगोसंस्थायाः अव्यवस्थया आराष्ट्रं व्योमसञ्चारः प्रतिसन्धिं प्राप इत्यस्मिन् विषये केन्द्रसर्वकारस्य व्यवहाराय विलम्बः जातः इति दिल्ली उच्चन्यायालयेन विमृष्टम्। प्रकरणे अतितीव्रे जाते एव प्रशासनस्य प्रक्रमः अभवत्, तावत्पर्यन्तं किं निरीक्षितमिति मुख्यन्यायाधिपः देवेन्द्रकुमार उपाध्यायः, न्यायाधीशः तुषार रावु गेडेला इत्येतयोः नीतिपीठेन पृष्टम्। यात्राप्रतिसन्धिविषये न्यायविचारान्वेषणम् [Judicial inquiry] आवश्यकमिति सामान्ययाचिकायाः परिगणनावसरे आसीदयं विमर्शः। यात्रिकाणां सुरक्षाविषये कापि अनास्था मास्तु इति नीतिपीठेन निर्दिष्टम्।

 तिरुप्पतिमन्दिराय प्रदत्तं कौशेयोत्तरीयं  कृत्रिमतन्तुना निर्मितम्। दशसंवत्सराभ्यन्तरे ५४ कोटिरूप्यकाणि चोरितानि।

अमरावती (आन्ध्रापदेशः)> आन्ध्राप्रदेशे प्रसिद्धस्य तिरुमल मन्दिरस्य परिपालनसंस्थां तिरुप्पति देवस्थानं नाम न्यासं वञ्चयित्वा कोटिशानि  रूप्यकाणि प्रसंवेदकेन (contractor) वञ्चनारूपेण कबलितानि।  २०१५ संवत्सरतः २०१५ संवत्सरपर्यन्तं कृत्रिमतन्तुनिर्मितम् उत्तरीयमेव प्रसंवेदकेन मन्दिराय दत्तम्। दशवर्षाभ्यन्तरे एवंरीत्या ५४ कोटि रूप्यकाणि स्ववशंकृतानि। निवेदनरेखासु (tender ) कौशेयोत्पन्नानि इत्येव सूचितमस्ति।

 कौमारकहोक्की विश्वचषकः

विश्ववीरः जर्मनी; भारतस्य तृतीयस्थानम्। 

कौमारकिरीटं प्राप्तः जर्मनीदलः। 

चेन्नै> कौमारकाणां विश्वयष्टिक्रीडावीरतास्पर्धायाः अन्तिमे प्रतिद्वन्द्वे वर्तमानीनवीरः जर्मनीदलः वीरतापदम् उपास्थापयत्। स्पेयिनदलं त्वरितलक्ष्यवेधने ३-२ इति क्रमेण पराजित्य एव जर्मन्याः किरीटप्राप्तिः। निश्चितसमये दलद्वयमपि समस्थितिं प्राप्तमासीत् १ - १ इति।

  विनष्टान्तिमयोः [Loser's final] प्रतिद्वन्द्वे अर्जन्टीनादलं निष्प्रभं कृत्वा भारतेन तृतीयस्थानं सम्प्राप्तम्। प्रथमार्धकाले लक्ष्यद्वयस्य पृष्ठतः स्थित्वा अनन्तरं समुज्वलेन क्रीडनेन आसीत् भारतस्य विजयप्राप्तिः। द्वितीयार्धे भारतं चत्वारि लक्ष्यकन्दुकानि अपि  सम्प्राप्य विजयी अभूत्।

 ऊनषोडशवयस्कानां सामाजिकमाध्यमनिरोधः। 

आस्ट्रेलियायां नियमः प्रवृत्तिपथमागतः। 

कान्बरा> ऊनषोडशवयस्काः बालकाः सामाजिकमाध्यमेभ्यः निरुद्धाः इत्येवं नियमितानां मध्ये  विश्वस्मिन् प्रथमराष्ट्रमिदं, सा ख्याति आस्ट्रेलियायै एव। एषः नियमः राष्ट्रे कुजवासरे प्रबलः जातः। अनेन इन्स्टग्रामः, फेय्स् बुक्, एक्स्, टिक् टोक्, यू ट्यूब् इत्यादिषु सामाजिकमाध्यमेषु कौमारवयस्कानां लक्षशः दत्तसंख्याः निर्जीवाः भवेयुः। 

  नियमोल्लंघने बालकाः वा रक्षितारो वा न दण्ड्याः, प्रत्युत, सामाजिकमाध्यमसंस्थाभ्यः  ४९. ५ कोटि आस्ट्रेलियाडोलर् मितं [२९५  कोटि रूप्यकाणि] द्रव्यदण्डं विधास्यति। दुर्घटनात्मकेभ्यः अनुक्रमणिकेभ्यः राष्ट्रस्य नूतनपरम्पराः परिपालनीयाः इत्येव लक्ष्यमिति सर्वकारेण निगदितम्। 

 सर्वकारस्यास्मिन् प्रक्रमे कुमाराः तापमनुभवन्ति।। सम्पूर्णनिरोधस्य स्थाने दुर्घटनात्मकानाम् अनुक्रमणिकानां निरोधः आसीत् वरमिति केचन कथयन्ति।

  

 केरले तद्देशनिर्वाचनस्य द्वितीयचरणं श्वः। 

अनन्तपुरी> केरलराज्ये प्रादेशिकप्रशासनेभ्यः प्रचाल्यमानस्य निर्वाचनस्य द्वितीयचरणं गुरुवासरे सम्पत्स्यते। मङ्गलवासरे सघोषप्रचारणं सोज्वलं समाप्तम्। अद्य निश्शब्दप्रचरणस्य कालः अस्ति। 

  तृश्शूर् जनपदात् आरभ्य कासरगोडपर्यन्तं सप्त जनपदेषु एव श्वः निर्वाचनम्।   ६०४ स्वयंप्रशासनेभ्यः १२३९१ प्रादेशिकसदस्याः निर्वाचनीयाः सन्ति। स्थानाशिनः ३८,८८४ तथा मतदानिनः सार्धैककोट्यधिकसंख्याकाः च सन्ति।

 इन्डिगो संस्थायाः १०% सेवां न्यूनीकर्तुं केन्द्रसर्वकारस्य आदेशः। 

नवदिल्ली> व्योमयात्रासेवायाम् इन्डिगो संस्थायाः अव्यवस्थामाधारीकृत्य दश प्रतिशतं सेवां न्यूनीकर्तुं केन्द्रसर्वकारस्य आदेशः। संस्थायाः प्रतिनिधिसंघेन सह उपवेशनानन्तरं केन्द्रव्योमयानमन्त्रिणा के राम मोहन नायिडुना निगदितमेतत्। अस्मात् कारणात् शैत्यकालसेवायां इन्डिगो संस्थायाः २३० सेवाः निरस्यमानाः भविष्यन्ति। 

  आहत्य वर्तमानेषु २३०० प्रतिदिनसेवासु ह्यः ४००+ सेवाः निरस्ताः जाताः। दिल्ल्यामेव १५० सेवाः निरस्ताः।

 हार्दिक पाण्ड्यस्य ताडनपटहेन

टि २० मध्ये भारतस्य विजयः। 

दक्षिणाफ्रिकां विरुध्य हार्दिक पाण्ड्यस्य कन्दुकताडनम्। 

कट्टकः>  विमुक्ताहतस्य हार्दिक पाण्ड्यस्य स्फोटकात्मकार्धशतकस्य आधारे दक्षिणाफ्रिकां विरुध्य प्रथमे टि २० प्रतिद्वन्द्वे भारतस्य १०१ धावनाङ्कानाम्  उज्वलविजयः। प्राप्ताङ्कसूचिका - भारतेन २० क्षेपणचक्रे १७५/६। दक्षिणाफ्रिका १२.३ क्षेपणचक्रे ७४ धावनाङ्कैः सर्वे बहिर्नीताः।

 भारत-दक्षिणाफ्रिका टि-२० परम्परायै अद्य प्रारम्भः। 

कट्टक्>  निकष-एकदिनस्पर्धापरम्परायाः परं क्रिकटे भारत-दक्षिणाफ्रिकयोः टि - २० परम्परायाः प्रथमस्पर्धा ओडीशायां कट्टक्कनगरस्थे बाराबती क्रीडाङ्कणे अद्य रात्रौ सप्तवादनतः सम्पद्यते। आहत्य पञ्च स्पर्धाः सन्ति। सूर्यकुमारयादवो भवति भारतस्य नायकः। 

  निकषपरम्परा दक्षिणाफ्रिकया प्राप्ता; एकदिनपरम्परा तु भारतेन च।

 सप्त जनपदेषु अद्य जनविधिः। 

कोच्ची>  केरले त्रयस्तरपञ्चायत्तनिर्वाचनस्य अंशतया तिरुवनंतपुरंतः एरणाकुलपर्यन्तं सप्त जनपदेषु मङ्गलवासरे  निर्वाचनं सम्पद्यते। चरणद्वयेन एव प्रादेशिकस्वयंप्रशासनसभानिर्वाचनं भविष्यति। द्वतीयचरणत्वेन इतरेषु सप्त जनपदेषु  गुरुवासरे निर्वाचनं भविष्यति। ग्रामप्रदेशेषु त्रीणि मतदानानि करणीयानि।  नगरप्रदेशेषु एकं मतदानमेव कर्तव्यम्। प्रभाते सप्तवादनतः सायं षट्वादनपर्यन्तं भवति मतदानप्रक्रिया।

 इन्डिगो व्योमसेवास्थगनं 

इतरव्योमसेवासंस्थानाम् आर्थिकलुण्ठने केन्द्रप्रशासनस्य प्रग्रहः। 

मुम्बई> कतिपयदिनैः अनुवर्तमानम् इन्डिगोसंस्थायाः प्रतिसन्धिम्  अवकाशं कृत्वा एयर् इन्डियासहिताः व्योमसेवासंस्थाः यात्रिकेभ्यः आर्थिकं चूषणमकुर्वन्। वर्तमानमूल्यात् दशगुणितं यावत् रूप्यकाणि चीटिकामानरूपेण विधत्तानि। दिल्ली-कोच्ची ४५,०००; दिल्ली-अनन्तपुरी  ४८,००० रूप्यकाणि आसीत् वर्धापितमूल्यम्। मुम्बई, हैदराबादः, बङ्गलुरु इत्यादिभ्यः स्थानेभ्यः च अमितमूल्यवर्धनं कृतम्। 

  किन्तु आराष्ट्रं प्रतिषेधे शक्ते व्योमयानमन्त्रालयस्य व्यवहारेण विमानयात्रामानाय परिधिः निश्चितः। ५०० कि मी दूरपर्यन्तं ७,५००; ५०० तः १०००कि मी पर्यन्तं १२,०००;१०००तः १५०० कि मी पर्यन्तं १५,००० रूप्यकाणि क्रमात् परिधिः निश्चितः।

 इन्डिगो प्रतिसन्धिः। 

६१० कोटि रूप्यकाणि प्रत्यर्पितानि। 

नवदिल्ली> वैमानिकानां सेवासमयपरिष्करणेन प्रतिसन्धिं प्राप्तायाः इन्डिगो व्योमयानसंस्थायाः प्रवर्तनं रविवासरे अपि व्यवस्थाहीनमभवत्। आहत्य वर्तमानासु २३०० सेवासु १६५० सेवा एव ह्यः विधत्ताः। ६५० संख्याकाः निरस्ताः। 

  अद्यावधि येषां व्योमयात्रा निरस्ता तेभ्यः ६१० कोटि रूप्यकाणि चीटिकाप्रत्यर्पणरूपेण [Ticket refund] प्रतिदत्तानि। रविवासरात्पूर्वं प्रत्यर्पणराशिः दातव्य इति व्योमयानमन्त्रालयस्य निर्देशः आसीत्। विमाननिलयेषु लग्नानि ३००० भाण्डानि यात्रिकसङ्केतं प्रति प्रापितानीति च इन्डिगो संस्थया निगदितम्। डिसम्बर् दशमदिनाङ्केन विमानसेवा साधारणस्थितिं प्राप्स्यतीति च संस्थया प्रस्तुतम्।

 गोवायां निशासमाजे अग्निबाधा

मरणानि २५ अभवन्। 

अग्निबाधितस्य निशासमाजस्य अन्तर्भागः। 

पनजी> उत्तरगोवायां अर्पोरा इत्यत्र 'बिर्च् बै रोमियो लेन्' नामके निशासमाजे रविवासरस्य प्रत्युषसि दुरापन्ने अग्निप्रकाण्डे मृतानां संख्या २५ अभवत्। तत्र विधत्तम् 'अग्निप्रदर्शन'मेव [fire show] अग्निबाधायाः हेतुरिति मन्यते। पञ्च विनोदसञ्चारिणः २० सेवकाश्च मृत्युमुपगताः। 

  सुरक्षाप्रक्रियां विना अग्निप्रदर्शनं कृतम् इति प्रकरणने संस्थायाः प्रयोजकमभिव्याप्य पञ्च जनाः निगृहीताः। समाजस्य स्वामिनौ सौरभ् लूत्रः, गौरव लूत्रः इत्येतयोः नाम्नि अपराधप्रकरणं पञ्जीकृतम्।

 अस्मिन् वर्षे भारतस्य  ७% आर्थिकवृद्धिः प्रतीक्षते। 

मुम्बई> भारतस्य आर्थिकाभिवृद्धिः सशक्तम् अनुवर्तते, अस्मिन् आर्थिकसंवत्सरे ७% वृद्धिः प्रतीक्षते इति वित्तमन्त्रिणा निर्मला सीतारामेण प्रस्तुतम्। हिन्दुस्थान् टैम्स् इत्यस्य कार्यक्रमे भाषमाणा आसीत् वित्तमन्त्री। 

  इदानीं ६. ३ - ६. ८ प्रतिशतं वृद्धिरेव सर्वकारेण निर्णीतम्। किन्तु वर्षस्य द्वितीयपादे अप्रतीक्षतया ८. २% वृद्धिरङ्कितमासीत्। अतः मुख्यार्थिकोपदेष्टा अनन्तनागेश्वरः ७% वृद्धिः प्रावोचत्। अस्याधारे एव वित्तमन्त्रिणा अपि तावती वृद्धिः प्रतीक्षते।

 एकदिनक्रिकटे विशाखविजयः। 

भारतस्य परम्पराप्राप्तिः।

यशस्वी जयस्वालस्य शतकप्राप्तिः। 

विशाखपट्टणं> दक्षिणाफ्रिकां विरुध्य विशाखपट्टणे सम्पन्ने तृतीये अन्तिमे एकदिनक्रिकट् प्रतिद्वन्द्वे भारतस्य अनुपमविजयः। दक्षिणाफ्रिकां नव द्वारकैः पराजित्य भारतं परम्परां सम्प्राप। 

  ५० क्षेपणचक्रेषु १० ताडकानां विनष्टे २७० धावनाङ्काः दक्षिणाफ्रिकया सम्पादिताः। प्रत्युत्तरक्रीडायां केवलमेकस्य कन्दुकताडकस्य विनष्टे २७१ धावनाङ्कान् सम्पाद्य भारतेन परम्परा प्राप्ता २ - १। ६१ कन्दुकेषु अवशिष्टेषु आसीत् भारतस्य उज्वलविजयः। यशस्वी जयस्वालस्य शतकं (११६), विराट कोहली (६५), रोहित शर्मा च अर्धशतकं च प्राप्तवन्तौ।

Latest news

 केरलस्य प्रादेशिकसर्वकारनिर्वाचनम्। 

प्रथमसोपानाय सघोषप्रचरणं श्वः समाप्यते। 

अनन्तपुरी> केरले प्रादेशिकानां स्वयंशासनसंस्थानां कृते सदस्यनिर्वाचनप्रचारणं शक्तिमता प्रचलति। राज्यप्रशाशकाः वामपक्षदलीयाः [LDF] विपक्षिकाः ऐक्यजनाधिपत्यदलीयाः [UDF] च समासमं प्रचारणे प्रगच्छन्ति। भा ज पा दलीयाश्च आत्मविश्वासेन तेषां शक्तिप्रकाशनाय कठिनप्रयत्नं कुर्वन्ति च। 

  कुजवासरे गुरुवासरे च चरणद्वयेन निर्वाचनं सम्पत्स्यते। कुजवासरे निर्वाचनं सम्पद्यमानेषु तिरुवनन्तपुरं, कोल्लं, पत्तनंतिट्टा, आलप्पुष़ा, इटुक्की, कोट्टयम्, एरणाकुलम् इत्येतेषु  ७ जनपदेषु सघोषप्रचरणं श्वः समाप्यते। इतरेषु ७ जनपदेषु कुजवासरस्य षट्वादनपर्यन्तं सघोषप्रचरणाय कालः विद्यते।

 अवरजानां होक्की विश्वचषकः। 

भारतं पूर्वान्त्यचक्रे। 

पूर्वान्त्यचक्रं प्रविष्टस्य भारतदलस्य आह्लादः। 

चेन्नै> अवरजानां होक्की विश्वचषके [Junior Hokkey Worldcup] भारतं बल्जियं पराजित्य पूर्वान्त्यचक्रं प्राविशत्। अत्यन्तोत्साहयुक्ते प्रतिद्वन्द्वे दलद्वयमपि निश्चितसमये लक्ष्यद्वयं सम्पाद्य समस्थितिमभजत। ततः त्वरितलक्ष्यवेधने [Penalty Shoot out] ४ - ३ इति क्रमेण भारतं विजयतीरं प्राप्नोत्। रविवासरस्य पूर्वान्त्यस्पर्धायां जर्मनी अस्ति प्रतिद्वन्द्वी।

 भारत-दक्षिणाफ्रिका 

अन्तिमम् एकदिनम् अद्य। 

विशाखपत्तनं> भारत-दक्षिणाफ्रिकयोः अन्तिमा तृतीया च एकदिनक्रिकट् प्रतिस्पर्धा अद्य मध्याह्ने १. ३० वादने आरप्स्यते। यो दलः विजयं प्राप्स्यति तस्मै परम्परां प्राप्तुमर्हति। 

  अतीते स्पर्धाद्वये अपि विनष्टोत्क्षेपनिर्णयः भारतीयदलः एकस्यां विजयं अन्यस्यां पराजयमपि रोचते स्म।

 भारताय तैलेन्धनं अनुस्यूतं प्रदास्यते इति पुतिनः।

नवदिल्ली> भारताय तैलेन्धनं प्रदातुं रष्यः सज्जः इति रष्यस्य राष्ट्रपतिः व्लादिमीरः पुतिनः अवदत्। रष्यातः तैलस्य आनयनं स्थगयितुं भारतस्योपरि अमेरिकः महासम्मर्दः क्रियमाणः अस्ति। सन्दर्भेऽस्मिन् भवति पुतिनस्य इदं ख्यापनम्। भारत-रष्ययोः मिथः भाषणवेलायाम् आसीत् पुतिनस्य इदं ख्यापनम् ॥

 व्योमयात्रायां प्रतिसन्धिः। 

इन्डिगोसंस्थायाः उपसहस्रं विमानानि निरस्तानि। 

इन्डिगोप्रतिसन्धौ आशङ्काकुलाः यात्रिकाः। 

नवदिल्ली> अतीते दिनद्वये इन्डिगोसंस्थायाः विमानसेवा  अव्यवस्थीकृता जाता। द्वित्राणि दिनान्यपि एषः क्रमभङ्गः अनुवर्तिष्यते इति सूच्यते। 

  वैमानिकानां सेवानिष्कर्षे विधत्तेन परिवर्तनेन जातः वैमानिकदौर्लभ्य एव प्रतिसन्धेः कारणम्। सहस्रशः यात्रिकाः दिनद्वयेन क्लेशमनुभवन्ति। 

  यात्राप्रतिसन्धौ विपक्षदलीयसदस्याः संसदः अन्तः बहिश्च प्रतिषेधः विधत्तः। विषये गृहमन्त्रिणः अमित शाहस्य व्यवहारे जाते डि जि सि ए इत्यनेन समस्यापरिहाराय प्रक्रमः आरब्धः। शनिवासरादारभ्य प्रतिसन्धेः लाघवं भविष्यतीति इन्डिगो संस्थायाः सि ई ओ पदीयः पीटर् एल्बेर्स् इत्यनेन प्रस्तुतम्।

केरलेषु संस्कृतदिनाचरणं सम्पन्नम्।

  कालटी> केरलसर्वकारस्य राज्यस्तरीयं संस्कृदिनाचरणं अद्य सम्पूर्णम् अभवत्।  कलटी श्री शङ्कराचार्य संस्कृतविश्वविद्यालयस्य परिसरे आसीत् मेलनम्। कार्यक्रमस्य अध्यक्षः शैक्षिकविभागस्य उपनिर्देशकः श्री. षिबु आर् आसीत्। कार्यक्रमस्य उद्घाटनं संस्कृतविश्वविद्यालयस्य कुलपतिः प्रोफ. गीताकुमारी अकरोत्।  संस्कृतभाषायां विद्यमानां वैज्ञानिकतां ज्ञात्वा एव विदेशीयाः संस्कृतभाषाध्ययनाय  समागताः सन्ति इति महाभागया उक्तम्। 

 चिकित्सार्थं खालिदा सिया लण्टनं नीयते। 

धाक्का> धाक्कास्थे आतुरालये अतिक्लिष्टावस्थायां परिचरणे वर्तमाना बङ्गलादेशस्य भूतपूर्वप्रधानमन्त्री बी एन् पी दलस्य अध्यक्षा च खालिदा सिया श्रेष्ठचिकित्सार्थं लण्टनं नेष्यते। खालिदायाः  परिचरणं कुर्वतः  वैद्यसंघस्यायं निर्णयः। अद्य रात्रौ खत्तरस्य 'रोयल् एयर् आम्बुलन्स्' द्वारा भवेत् तस्याः गमनम्।

 श्रीलङ्कायां भारतेन 'बेय्लिसेतुः' निर्मीयते। 

कोलम्बो> डिट् वा चक्रवातस्य दुष्प्रभावात् जातेन प्रलयेन महान्तं विनाशं दुरापन्ने श्रीलङ्काराष्ट्रे बेय्लिसेतुं निर्मातुं भारतं सन्नद्धमभवत्।  सेतुनिर्माणाय उपकरणानि ५०० जलशुद्धीकरणसंविधानानि च वायुसेनायाः विमाने श्रीलङ्कामानीतानि। सेतुनिर्माणे कुशलाः तन्त्रविदः,  दुरन्ताधीनानां साहाय्यार्थं वैद्यानभिव्याप्य २२ अङ्गोपेतः संघश्च श्रीलङ्कां प्राप्ताः। 

  ओपरेषन् सागरबन्धुः इत्यस्य अंशतया एव भारतस्य साह्यम्। गतसप्ताहे दुरापन्ने प्रलये अद्यावधि ४७९ जनाः मृत्युवशं गताः। ३५० जनाः अप्रत्यक्षाः जाताः च। बहवः जनपदाः पृथक्कृताः वर्तन्ते।

 पुतिनः भारतं सम्प्राप्तवान्।

व्लादिमिर्  पुतिनः नरेन्द्र मोदी च। 

नवदिल्ली> २३ तमे भारत-रूसयोः सांवत्सरीयोच्चमेलने भागं गृहीतुं रूसराष्ट्रपतिः व्लादिमीर पुतिनः भारतं सम्प्राप्तवान्। गुरुवासरे सायं ६.३५ वादने  दिल्ल्यां पालं विमाननिलयं सम्प्राप्तं पुतिनं भारतप्रधानमन्त्री नरेन्द्रमोदी साक्षात् गत्वा स्वीकृतवान्। २०२१ तमस्यानन्तरं पुतिनस्य प्रथमं भारतसन्दर्शनं भवत्येतत्।

  कञ्चित् विदेशनेतारं विमाननिलयं गत्वा  स्वीकृतवान् इति प्रधानमन्त्रिणः नयतन्त्रप्रक्रमः अस्मिन् सन्दर्शनविषये  भारतेन प्रदत्तं प्राधान्यं सूचयति। पुतिनेन सह रूसीयवाणिज्यमण्डलस्य बृहत्संघोSपि आगतः अस्ति।

 कोह्लिनः ऋतुराजस्य च शतकं विफलम्। 

द्वितीये एकदिने दक्षिणाफ्रिकायाः विजयः। 

रायपुरं> विराट कोह्लिनः (१०२) ऋतुराज गेय्कवादस्य (१०५) च शतकाभ्यां भारताय महान् प्राप्ताङ्कः उपलब्ध अपि दक्षिणाफ्रिकां विरुध्य द्वितीये एकदिनप्रतिद्वन्द्वे भारतं पराजयं रुरोच। भारतीयकन्दुकक्षेपकान् प्रहृत्य परवशीकृत्य दक्षिणाफ्रिका द्वारकचतुष्टयस्य विजयमग्रहीत्। 

  प्रथमे चरणे भारतेन ५० क्षेपणचक्रेषु पञ्च द्वारकाणां विनष्टे ३५८ धावनाङ्काः प्राप्ताः। प्रत्युत्तरेण दक्षिणाफ्रिका ४९.२ क्षेपणचक्रेषु षट् द्वारकाणां विनष्टे ३६२ धावनाङ्काः प्राप्ताः। दक्षिणाफ्रिकायाः पक्षतः प्रारम्भकः एय्डन् मार्क्रमः ११० धावनाङ्कान् सम्प्राप्य विजयस्य आधारशिलां रोपितवान्। ततः ब्रीट्स् के [६८ धावनाङ्काः ६४ कन्दुकैः], ब्रेविस् [५४ /३४], नायकः तेम्बा बवुमः [ ४६ ] च दक्षिणाफ्रिकां विजयमनयन्। 

  प्रथमे एकदिने भारतं विजयं प्राप्नोति स्म। अनेन स्पर्धात्रयात्मिका एकदिनपरम्परा इदानीं समस्थितिं भजते। अन्तिमा स्पर्धा शनिवासरे सम्पत्स्यते।

 रष्या-भारतशिखरमेलनं

व्लादिमिर् पुतिनः अद्य भारतं प्राप्नोति। 

नवदिल्ली> राष्याराष्ट्रपतिः व्लादिमिर् पुतिनः दिनद्वयात्मकसन्दर्शनार्थं गुरुवासरे भारतं प्राप्स्यति। उभयोरपि राष्ट्रयोः २३ तमं शिखरमेलनं शुक्रवासरे दिल्ल्यां हैदराबाद हौस् इत्यत्र सम्पत्स्यते। भारतं प्रति ट्रम्पस्य शुल्कयुद्धे अनुवर्तमाने सम्मेलनस्य प्राधान्यं कल्पते।

  व्यापार-वाणिज्यमण्डलेषु सहयोगः उभयपक्षचर्चायाः मुख्यविषयो भविष्यति। भारतात् मत्स्यविभवानां तथा आलुक-मातुलुङ्गानां च निर्याताय विपणीमारब्धुं निर्णयः अस्मिन् मेलने प्रतीक्षते। अनेन सह भारत-रूस् सैनिकसन्धेः रूसीयसंसदः अङ्गीकारः लब्धः इति सैनिकक्षेत्रे च नूतनसहयोगः भविष्यति।

 प्रधानमन्त्रिणः कार्यालयसमुच्चयस्य नाम परिष्कृतम्। 

नवदिल्ली> प्रधानमन्त्रिणः कार्यालयान्तर्भूतस्य भवनसमुच्चयस्य 'सेवातीर्थ' इति नूतनं नाम विधत्तम्। सेन्ट्रल् विस्ता अभियोजनायां निर्माणं पूर्तीकृतस्य भवनसमुच्चयस्य Executive Enclave इति  नाम आसीत्। एतन्नाम एव परिष्कृतम्। 

  एषः नामधेयपरिष्कारः न केवलं प्रशासनपरं किन्तु सांस्कृतिकं धार्मिकं चास्तीति अधिकारिभिरुक्तम्। राज्येषु राज्यपालानां भवनं लोकभवनमिति नाम्ना परिष्कर्तुं निर्णयमासीत्।

 डिट् वा चक्रवातः - श्रीलङ्कायै भारतस्य साहाय्यम्। 

कोच्ची> डिट् वा चक्रवातस्य दुष्प्रभावेण महान्तं क्लेशमनुभूयमानाय श्रीलङ्कराष्ट्राय भारतस्य उदारसाहाय्यं विधत्तम्। 'ओपरेषन् सागरबन्धुः' इति कृतनामधेयस्य साहाय्यस्य अंशतया ५३ टण् मितानि अवश्यवस्तूनि लङ्कामुपनीतानि। श्रीलङ्कायां लग्नाः २००० भारतीयाः स्वराष्ट्रमानीताः। 

  भारतनौसेनायाः नेतृत्वे दुरिताश्वासप्रवर्तनानि अनुवर्तन्ते। ऐ एन् एस् विक्रान्तः, ऐ एन् एस् उदयगिरिः इत्येतयोः महानौकयोः नेतृत्वे रक्षाप्रवर्तनानि आरब्धानि। महानौकाभ्यां उदग्रयानानि विन्यस्य रक्षाप्रवर्तनानि ऊर्जस्वलेन प्रचलन्ति।

 राष्ट्रपतिः अद्य केरले।

अनन्तपुरी> नौसेनादिनोत्सवे भागं कर्तुं राष्ट्रपतिः द्रौपदी मुर्मू वर्या अद्य सायं केरलं सम्प्राप्नोति। नौसेनादिनोत्सवे मुख्यातिथिः भवति  राष्ट्रपतिः। सेनया सज्जीकृतं चलच्चित्रद्वयं [Telefilm] राष्ट्रपतेः पुरतः प्रदर्शयिष्यते।  ततः लोकभवनं प्राप्यमाणा मुर्मूवर्या गुरुवासरे प्रातः ९. ४५ वादने दिल्लीं प्रतिनिवर्तयिष्यति।

 'ब्रह्मोस्' निर्माणाय केरलम् अनुज्ञितम्। १८० एकरमितम्।

सशस्त्रसीमाबलाय ४५ एकरमितं, फोरन्सिक् विश्वविद्यालयाय ३२ एकरमितं च।

नवदिल्ली> केरले 'ब्रह्मोस्' नामकाग्निबाणस्य निर्माणाय  भूमिम् दातुं राज्यसर्वकाराय सर्वोच्चन्यायालयस्य अनुज्ञा लब्धा।  तिरुवनंतपुरं जनपदस्थस्य  नेट्टकाल्त्तेरी अपावृतकारागृहस्य  [Open Jail] १८० एकरमितं भूमिं केन्द्रप्रशासनस्य ब्रह्मोस् निर्माणसंस्थायै दातुं न्याया. विक्रमनाथस्य आध्यक्षे वर्तमानेन नीतिपीठेन आदिष्टम्। केरलसर्वकारस्य अर्थनायामासीत् नीतिपीठस्य अनुज्ञा। 

  Brahmos Airospace Trivandrum Ltd (BATL) संस्थायै भूमिदानेन राष्ट्रसुरक्षा, प्रतिरोधाभिवृद्धिः इत्यादीनां साक्षात् योगदानाय शक्यते इति राज्यसर्वकारस्याभिमतं सर्वोच्चन्यायालयेन अङ्गीकृतम्। तथा च सशस्त्रसीमाबलम् इति केन्द्रसायुधारक्षकसेनायै [SSB] ४५ एकरमितं, Central Forensic sciences University इत्यस्मै ३२ एकरमितं च भूमिम् अनुमोदितुं राज्यसर्वकारस्य अपेक्षा च न्यायालयेन अङ्गीकृतम्।

 जोर्जियराज्ये रासायुधप्रयोगः। 

राज्यविरुद्धसमरान् नियन्त्रितुं जोर्जिय सर्वकारेण रासायुधप्रयोगः कृतः इत्यस्ति प्रतिवेदनम्। द्वितीये विश्वमहायुद्धे उपयुक्तं कामैट् नाम रासवस्तु अत्रापि उपयुक्तम्। यूरोपीयगणे जोर्जिया राज्यस्य प्रवेशनम् उद्दिश्य सर्वकारेण अनवरतं क्रियमाणः प्रयासः  स्थागितः इत्युक्त्वा आसीत्  समरः।

 कायिकभारताय संसदः अभिनन्दनम्। 

नवदिल्ली> इदंप्रथमतया महिलानां विश्वचषकक्रिकटकिरीटं प्राप्तवते भारतदलाय, दर्शनपरिमितानां टि - २० क्रिकट् विश्वचषकं प्राप्तवते भारतदलाय च संसदः अभिनन्दनं समर्पितम्। लोकसभाध्यक्षः ओं बिर्लवर्यः तदर्थं अभिनन्दनपत्रं प्रस्तुतवान्। 

  सोमवासरे प्रभाते सभायाः उपवेशने प्रथमं दिवंगतानां भूतपूर्वसदस्यानां कृते उपचारः समर्पितः। तेभ्यः आदरं संसूच्य  निमेषं यावत् मौनाचरणं कृतम्। तदनन्तरमासीत् कायिकभारताय अभिनन्दनं   संवृत्तम्।

 संसदः शीतकालमेलनं समारब्धम्। 

नवदिल्ली> भारतसंसदः शीतकालमेलनं सोमवासरे आरब्धम्। मतदान्यावल्याः तीव्रपरिष्करणं - SIR - स्थगयितव्यम् इति विपक्षीयदलानां कोलाहले प्रथमदिनं प्रक्षुब्धमभवत्। प्रत्युत, राज्यसभाध्यक्षरूपेण प्रथमतया सभां प्रति समागतवन्तं उपराष्ट्रपतिं सि पी राधाकृष्णमभिनन्द्य राज्यसभायां चर्चा संवृत्ता।

 डिट्वा तमिलनाटे च।

अष्ट मरणानि। 

चेन्नै> डिट्वा चक्रवातस्य दुष्प्रभावेण तमिलनाटे अपि कष्टनष्टानि जातानि। चक्रवाते तीव्रन्यूनमर्दरूपेण चैन्नैनगरस्य ३० कि मी दूरे स्थिते चेन्नै, चेङ्कल् पेट्, काञ्चीपुरं, तिरुवल्लुवरजनपदेषु अतिवृष्टिः अभवत्। वृष्टिदुष्प्रभावे अष्ट जनाः मृत्युमुपगताः। उपर्युक्तेषु जनपदेषु पर्यावरणनिरीक्षणविभागेन 'ओरञ्ज'जागरूकता उद्घोषिता आसीत्।