फिफा विश्वचषकः।

 फ्रान्सः पूर्वान्त्यचक्रं प्राविशत्। 

एम बापे। 

बोस्टणः> यू एसे बोस्टणक्रीडाङ्कणे सम्पन्ने प्रथमे चतुर्थांशप्रतिद्वन्द्वे फ्रान्स गणः मोरोकोगणं २- ० इति लक्ष्यक्रमेण पराजित्य प्रपूर्वान्यचक्रं प्रविवेश। आक्रमणे फ्रान्सस्य सर्वाधिपत्यं दृष्टायां क्रीडायाम् एं बापे, डम्बले इत्येतौ एकैकं लक्ष्यं प्राप्तवन्तौ। 

 २८ तमे निमिषे फ्रान्साय लब्धः, एं बापेवर्येण कृतः दण्डप्रहारः मोरोकोगणस्य लक्ष्यरक्षकस्य  रक्षणेन  निष्फलः जातः। मोरोकोदलमपेक्ष्य फ्रान्सदलेन क्रीडावैभवः प्रदर्शितः अपि मोरोकोदलस्य प्रतिरोधं भेत्तुं वैभवः न दृष्टः।  एवं प्रथमार्धांशः लक्ष्यरहितः परिसमाप्तः।

  द्वितीयार्धे ६० तमे निमिषे किलियन् एम बापेवर्यस्य मनोहरेण लक्ष्येन फ्रान्सः अग्रमागत‌ः। ६६ तमे निमिषे 'ओसुमाने डम्बले' इत्यनेन  फ्रान्सस्य द्वितीयं लक्ष्यं सम्पादितम्। द्वितीयार्धस्य अन्तिमनिमिषेषु एकं लक्ष्यमपि प्रतिदातुं मोरोकोगणस्य तीव्रप्रयत्नः अभवदपि फलवत्तः नाभवत्। भूतपूर्वः विश्ववीरः  फ्रान्सः प्रपूर्वान्त्यं प्राविशत्।

 फिफा विश्वचषकः।

चतुर्थांशस्पर्धाः अद्य आरभ्यते।

यू एस्> विश्वचषकपादकन्दुस्पर्धाः अद्य आरभ्य तीव्रतां प्रयान्ति। ४८ गणेभ्यः अष्ट गणाः इति स्पर्धायाम् आकुञ्चितायां प्रतिद्वन्द्वाः कठिनायन्ते। 

    चतुर्थांशचक्रस्य  प्रथमस्पर्धायां पूर्वभूतः विश्ववीरः फ्रान्सदलः नूतनं आफ्रिक्कीयप्रबलवन्तं मोरोको दलम् अभिमुखीकरोति। गुरुवासरे रात्रौ १. ३० वादने बूस्टण् क्रीडाङ्कणे अस्ति स्पर्धा। 

  अर्जेन्टीना, फ्रान्सः, इङ्गलाण्टः, स्पेयिनः, मोरोको, नोर्वे, स्विटसर्लान्टः, बेल्जियम् इत्येतानि राष्ट्राणि चतुर्थांशचक्रे स्पर्धन्ते। अद्यतनं विना  प्रतियोगिताक्रमः एवम् - स्पेयिनः x बेल्जियं शुक्रवासरे अर्धरात्रे १२. ३०, नोर्वे x  इङ्गलाण्टः रविवासरे प्रत्युषसि २. ३०, अर्जेन्टीना x स्विटसर्लान्टः रविवासरे प्रभाते ६. ३० वादनेषु।

 श्रीलङ्कायां कारागृहे संघर्षः - २७ मरणानि। 

कारागारात् बहिः दौत्यसंघस्य विन्यासः। 

कोलम्बो> श्रीलङ्कायाः समुद्रतीरनगरे नेगुम्बो इत्यत्र कारागृहे अपराधिनः संघकाः भूत्वा  परस्परं संघर्षमकुर्वन्। २७ जनाः मृताः। शताधिके आहताः। रविवासरे आरब्धः संघर्षः परेद्युरपि अनुवृत्तः। आरक्षकाधिकारिणां भुषुण्डीन् अपहृत्य प्रयुक्तवन्तः इति सूच्यते। 

  कारागारे उन्मादकवस्तूनाम् आनयनम् अनुकूलयन्तः प्रतिकूलयन्तः च आसन्, तयोः मिथः आसीत् संघट्टनम्। संघर्षावस्थां नियन्त्रयितुं सविशेषकर्मसेना प्रशासनेन नियुक्ता। संघट्टने अन्तर्भूतः कश्चन विभागः कारागारान्तरं प्रवेशिताः। ७०० कारागृहवासिनः ततः अपसृताः इति अधिकृतैरुक्तम्।

 परीक्षासु अपक्रमः - सि जे पी आन्दोलनं १९ दिनानि अतीतम्। 

वाङ्चुकवर्यस्य उपवासः अनुवर्तते। 

नवदिल्ली> नीट् यू जी परीक्षासु क्रमभङ्गमारोपणे केन्द्रशिक्षामन्त्रिणा स्थानं त्यक्तव्यं इति आवश्यमुन्नीय 'क्रोकोच् जनता पार्टी' - सी जे पी - इत्यस्य नेतृत्वे जन्तर् मन्तरे प्रचाल्यमानम् आन्दोलनं १९ दिनानि अतीतम्। आन्दोलनवेद्यां ११ दिनानि यावत् उपवासम् अनुष्ठीयमानः पर्यावरण-शैक्षिकप्रवर्तकः सोनं वाङ् चुक् इत्यस्य शरीरभारः सप्त किलो मितं न्यूनितम्। तस्मिन् विशेषतया  स्वास्थ्यसमस्याः न सन्तीति सी जे पी नेतृभिः निगदितम्।

 पश्चिमेष्यायां पुनरपि संघर्षः। 

यू एस् आक्रमणे ८ इरानीयसैनिकाः हताः। 

बहरिने कुवैटे च इरानस्य प्रत्याक्रमणम्। 

टेहरानः> मासचतष्टयात्पूर्वं यू एस्-इस्रेलयोः आक्रमणे हतस्य इरानस्य परमोच्चात्मीयनेतुः आयत्तुल्ला खमीनेः अन्त्यकर्मसु अनुवर्तमानेषु पश्चिमेष्या पुनरपि यू एस् - इरानयोः आक्रमणप्रत्याक्रमणैः कलुषिता जाता। 

  होर्मुस् सामुद्रधुन्यां तिस्रः पण्यमहानौकाः इरानेन आक्रान्ताः इत्यारोप्य इरानस्य उपाशीतिषु सेनाशिबिरेषु यू एस् सेना व्योमाक्रमणमकरोत्। अष्ट इरानीयसैनिकाः मृताः। 

   प्रतिक्रियारूपेण बहरिने कुवैटे च वर्तमानानि यू एसस्य सैनिकशिबिराणि विरुध्य इरान अपि आग्नेयास्त्राणि ड्रोण् आयुधानि च उपयुज्य आक्रमणमकरोत्। 

  युद्धपरिसमाप्त्यर्थं इरानेन सह प्रकल्पितं अल्पकालीनसन्धिपत्रं निरस्तमिति डोनाल्ड ट्रम्पेन प्रोक्तम्। तैलादीनां विक्रयणाय इरानाय परिकल्पितम् उपरोधलाघवं यू एसेन प्रत्याहृतम्। अतः भौगोलिकस्तरे तैलेन्धनमूल्यं वर्धितम्। अंशकविपण्यां तु मूल्यानि आपतितानि च।

 बदरीनाथमन्दिरे अपि समर्पितधनेषु दुर्विनियोगः।

एकस्य वृत्तिनिरोधः। 

बदरीनाथमन्दिरम्।

डराडूणः> अयोध्यामन्दिरमनुगम्य उत्तरखण्डस्थे बदरीनाथमन्दिरे अपि समर्पितधनेषु दुर्विनियोगः आरोप्यते। आरोपणे चतुरङगोपेतायाः समित्याः अन्वेषणम् आरब्धम्। घटनां पुरस्कृत्य मन्दिरसमित्याः निजीयनिर्वाहकसहायी [Private Secretary] मन्दिरोपसेवकः प्रमोद नौट्याली नामकः मन्दिरकार्यात् निरुद्धः [suspended]। बदरीनाथ-केदारनाथमन्दिरसमित्याः वरिष्ठसदस्योपेतया समित्या मन्दिरे प्रथमदृष्ट्या धनविनियोगे दुर्विनियोगः  अभवदिति सूचितमासीत्। अत एव वृत्तिनिरोधः कल्पितः इति समित्याः अध्यक्षः हेमन्त द्विवेदी निगदितवान्। तथा उत्तराखण्डसर्वकारेणापि सदस्यत्रयोपेता अन्वेषणसमितिः नियुक्ता। १५ दिनाभ्यन्तरे समित्या स्वनिगमनं समर्पणीयम्।

  

 अयोध्यामन्दिरपरिपालनन्यासस्य

आयः ३२४६ कोटिः; व्ययः २३७० कोटिः।

नवदिल्ली> अयोध्या श्रीरामजन्मभूमि तीर्थमन्दिरपरिपालनन्यासस्य आयव्ययविवरणानि प्रकाशितानि। न्यासस्य कोशाध्यक्षेन प्रकाशितं विवरणमनुसृत्य न्यासरूपीकरणवर्षात् २०२० तमात् आरभ्य अद्यावधि ३२६४ कोटिरूप्यकाणि लब्धानि। मन्दिरनिर्माणाय अनुबन्धप्रवर्तनेभ्यश्च २,३७० रूप्यकाणि विनियुक्तानि। समर्पणरूपेण लब्धानि सुवर्णोपेतानि ३० किलोमितानि वस्तूनि, रजतयुक्तानि १५१८ संख्यकानि वस्तूनि, अमूल्यानि इतरसमर्पितानि च न्यासस्य सकाशे वर्तन्ते इति कोशाध्यक्षः गोविन्द देव गिरिः न्यगादीत्। तेन निगदितं यत् सर्वाणि वस्तूनि सुरक्षितानि सन्ति। तेषां प्रमाणपत्राणि न्यासाधिष्ठितानि सन्ति। 

एस् ऐ टि अन्वेषणमनुवर्तते। 

  एतदाभ्यन्तरे  विविधकार्यक्रमेभ्यः मन्दिरे व्ययीकृतानां १२४ कोटि रूप्यकाणां व्ययसम्बन्धगणना च सविशेषान्वेषणसंघेन आरब्धा। २०२४ जनवरिमासे सम्पन्नः प्रतिष्ठाकार्यक्रमः, महाकुम्भमेलायै कृतं सज्जीकरणं, २०२५ तमवर्षस्य ध्वजारोहणम् इत्यादीनां व्ययगणनमेव परिशोधयति। प्रतिष्ठाकार्यक्रमाय एव ११३ कोटि रूप्यकाणि व्ययीकृतानीति न्यासस्य गणना।

 फिफा विश्वचषकः।

अर्जन्टीना चतुर्थांशे। 

विजेतुः अर्जन्टीनासंघस्य आह्लादः। 

यू एस्> लक्ष्यद्वयस्य पृष्ठतः स्थित्वा पराजयमभिमुखीकृत्य केवलं १५ निमेषाभ्यन्तरे लक्ष्यत्रयं प्रतिसमर्प्य अर्जन्टीनायाः ईजिप्तं विरुध्य अविश्वसनीय विजयः। अनेन विजयेन वर्तमानीनवीरः अर्जन्टीनागणः चतुर्थांशं प्राविशत्। 

  ७९ तमे निमिषे क्रिस्ट्यन् रोमेरा, ८३ तमे निमिषे लयोणल् मेसी, ९०+३ तमे निमिषे एन्सो फेर्णाटस् च अर्जन्टीनायै लक्ष्याणि सम्पादितवन्तौ। १५ तमे निमिषे यासर् इब्राहिमः, ६७ तमे निमिषे मुस्तफा सीको च ईजिप्तस्य लक्ष्यसम्पादकौ। 

  अस्मिन् विश्वचषके मेसेः अष्टमं लक्ष्यं, विश्वचषके आहत्य २१ तमं लक्ष्यं चास्ति ह्यः मेसीवर्येण सम्पादितम्।

 केरलम्। 

वयनाटे मृत्स्खलनं - त्रयः मृताः, पञ्च तिरोभूताः।

दुरन्तस्थानस्य दृश्यम्। 

 

मेप्पाडी [वयनाट्]>  वयनाट् जनपदे 'कल्लाटि - आनक्कांपोयिल्' प्रदेशस्थे सुरङ्गमार्गनिर्माणस्य प्रारम्भस्थाने मीनाक्षी इत्यत्र मृत्स्खलनेन इतरराज्यीयाः त्रयः कर्मकराः मृताः। प्रदेशवासिनः अभिव्याप्य १८ जनाः मृद्विलीनाः अभवन्। नव जनान् अधिगम्य आतुरालयं प्रावेशयत्। पञ्च जनाः तिरोभूताः वर्तन्ते। 

  सुरङ्गमार्गाय निर्भिद्यमानस्य बृहदुपलस्य समीपात् अपनेतुमवशिष्टः मृत्सञ्चय एव स्खलितः।  वीथीतलात् २० पादमितोन्नत्यां सञ्चिता विंशतिसहस्रं टण् मिता मृदेव अतिवृष्ट्याः परिणतेन प्रवाहिता। मङ्गलवासरे प्रभाते ११ वादने आसीदियं दुर्घटना।

 फिफा विश्वचषकः। 

पोर्चुगल् बहिर्गतं, रोनाल्डो वर्यस्य निराशया निवृत्तिः। 

स्पेयिनः चतुर्थांशे। 

स्पेयिनस्य विजये तद्दलीयानाम् आह्लादः, रोनाल्डो वर्यस्य निराशा च। 

डालस्> गतरात्रौ सम्पन्नायां पोर्चुगल-स्पेयिनयोः प्राक्चतुर्थांशप्रतियोगितायां स्पेयिनः पोर्चुगलं प्रत्युत्तररहितेन लक्ष्यकन्दुकेनैकेन पराजित्य चतुर्थांशचक्रं प्राविशत्। स्पर्धायाः क्षतपरिहारनिमिषेषु स्पेयिनस्य  मैकल् मेरीनो नामकेन प्राप्तं लक्ष्यं पोर्चुगलस्य बहिर्गमनं स्पेयिनस्य चतुर्थांशचक्रप्रवेशं च साध्यं कृतम्। 

  अनेन विश्वचषकेन विश्वचषकात् क्रीडानिवृत्तिं उद्घोषितवतः क्रिस्ट्यानो रोनाल्डो इति क्रीडाराजस्य पराजयः तमिव लक्षशः आराधकानपि निराशागर्तम् अपातयत्।

 नरेन्द्रमोदिने इन्डोनेष्यायां  हृद्यं स्वीकरणम्। 

मोदिनं इन्डोनेष्यायाः राष्ट्रपतिः स्वीकरोति। मोदिनः विमानं इन्डोनेष्यायुद्धविमानानि अनुगच्छन्ति। 

जकार्ता> त्रिराष्ट्रसन्दर्शनस्य अंशतया सोमवासरे इन्डोनेष्यां प्राप्तवन्तं भारतस्य प्रधानमन्त्रिणं नरेन्द्र मोदिनम् इन्डोनेष्यायाः राष्ट्रपतिः प्रबोवो सुबियान्तो वर्यः विमाननिलयं प्राप्य स्वीकृतवान्। तत्र सन्निहितस्य भारतीयजनसञ्चयस्य कण्ठेभ्यः "भारतमाता की जय्" "मोदी मोदी--" आह्वानानि उद्गतानि। इन्डोनेष्यायाः परम्परागतकलारूपाणि मोदिनः स्वीकरणार्थं सज्जीकृतानि आसन्। यदा नरेन्द्र मोदिनः विमानं इन्डोनेष्यायाः व्योमसीमां प्राविशत् ततः आरभ्य इन्डोनेष्यायाः युद्धविमानानि अन्वगच्छन् च।

 अयोध्या धनापहरणम्।

चम्पत्त रायिनः त्यागपत्रं स्वीकृतम्।

अयोध्या> अयोध्या राममन्दिरे भक्तजनैः समर्पितानां धनराशीनाम् अपहरणविषयमालक्ष्य समर्पितं, मन्दिरपरिपालनन्यासस्य मुख्यकार्यदर्शिनः चम्पत्त रायिनः तथा न्याससदस्यः अनिल मिश्रा इत्यस्य च त्यागपत्रं  सोमवासरे सम्पन्ने न्यासोपवेशने अङ्गीकृतम्। न्यासाध्यक्षस्य नित्यगोपालदासस्य आध्यक्षे सम्पन्ने उपवेशने नव स्थिरसदस्याः भागं गृहीतवन्तः।

 गाज़ा- प्रशासनम् हमास-संघटनया विसर्जितम्। अधिकारहस्तान्तरणं च

     गासा-नगरम्> गाज़ा-क्षेत्रे स्वकीयं शासनं विसृज्य हमास-संघटना अधिकारं 'पलेस्टीनियस्य समितये दास्यति। एषा समितिः तकनीकी-विशेषज्ञैः (Technocrats) निर्मास्यते। डोनल्ड ट्रम्पस्य शान्ति-योजनानुसारम् एषः निर्णयः स्वीकृतः। तथापि, पूर्वतनमन्त्रिपरिषदः कर्मचारिणः च स्वपदस्थाने एव स्थास्यन्ति। सुरक्षा-व्यवस्थायाः उत्तरदायित्वं पुनः हमास-संघटनायाः हस्ते एव भविष्यति।

 चरितम् अनुवृत्य नोर्वे। 

 ब्रसीलं प्रभञ्ज्य चतुर्थांशे। 

एर्लिङ् हालण्टः। 

न्यूयोर्क्> गतरात्रौ न्यू जर्सी क्रीडाङ्कणे सम्पन्ने षोडशगणीयचक्रस्य अन्यतमे प्रतिद्वन्द्वे पञ्चवारं विश्वचषकवीरतापदं प्राप्तवन्तं ब्रसीलगणं १ - २ इति लक्ष्यप्रकारे प्रभञ्ज्य नोर्वे चतुर्थांशचक्रं प्राविशत्। नोर्वेगणस्य श्रेष्ठक्रीडकस्य 'एर्लिङ् हालण्ट'स्य लक्ष्ययुगलमेव नोर्वेविजयस्य आधारः। स्थानेतरादेशत्वेन आगतस्य नेय्मरस्य लक्ष्यमासीत् ब्रसीलस्य समाश्वासः। परस्परस्पर्धाचरित्रे अद्यावधि नोर्वेदलं पराजापयितुं ब्रसीलः न शशाक। 

  क्रीडायाः प्रथमार्धे उभाभ्यामपि दलाभ्यां सविक्रमक्रीडा प्रदर्शिता अपि लक्ष्यजालं न कम्पितम्। १३ तमे ब्रसीलस्य दौर्भाग्यः आरब्धः। ब्रसीलानुकूलाय लब्धः दण्डप्रहारः ब्रूणो गिमारसेन कृतोSपि नोर्वेदलस्य लक्ष्यरक्षकेण और्जन् नेय्लान्ट् इत्येषः  उत्प्लुत्य रक्षितवान्। विश्वचषकस्य चरित्रे ४० वर्षाणामाभ्यन्तरे प्रथमा दण्डप्रहारनिष्फलता!

  द्वितीयार्धे अन्यस्थानीयेन आगतः नोर्वे क्रीडकः आन्ड्रियास् षेन् ड्रूपः क्रीडागतिं परिवर्तितवान्। तस्य साहाय्येन नोर्वेदलस्य सविक्रमक्रीडकः एर्लिंग हालण्टः ७९, ८९ निमिषद्वेये अत्युज्वलं लक्ष्यद्वयं सम्प्राप्तवान्। अनेन हालण्टः अस्मिन् विश्वचषके सप्त लक्ष्याणि सम्पाद्य मेसी, एम्बापे वर्ययोः समशीर्षः जातः। नोर्वे २-० इति अग्रे। 

  ६९ तमे निमिषे अन्यस्थानीयेन आगतः ब्रसीलस्य श्रेष्ठक्रीडकः नेय्मरः ९०+९तमे  निमिषे लब्धेन दण्डप्रहारेण लक्ष्यमवाप्तः अपि स्वदलं रक्षितुं तन्नपर्यप्तमभवत्। ब्रसीलस्य दौर्भाग्यं पूर्णं जातम्।

क्रीडान्त्ये क्रीडाङ्कणे पराजयेन विलपन् नेय्मरः।

 येमने हूतयः १४ सैनिकान् जघ्नुः। 

एडन्> येमनराष्ट्रे आधिकारिकसर्वकारस्य सैन्यस्य १५ भटाः हूतिनामकसायुधसंघस्य आक्रमणे हताः। 'होदैदा'नगरसमीपं हय्स् जनपदस्थे जबल् दुबास् इत्यत्र आसीत् आक्रमणम्। २३ सैनिकाः संघट्टने व्रणिताः। समीपकाले यमने वृत्तं अतीव रक्तरूषिताक्रमणम् अस्त्येतत् इति ए एफ् पि इति वार्तासंस्थया वृत्तान्तीकृतम्।

 फ्रान्सः चतुर्थांशे; प्रतिद्वन्द्वी मोरोक्को।

लक्ष्यसम्पादने एम्बाप्पे मेसेः समः।

किलियन् एम्बापे। 

डालस्> पराग्वे दलीयानां शारीरिकप्रहराणि, ३९ डिग्री तापं चातिक्रम्य फ्रान्सः प्रतियोगिनं १-० इति लक्ष्यक्रमेण पराजित्य विश्वचषकपादकन्दुकस्पर्धायाः चतुर्थांशचक्रं प्राविशत्। ७० तमे निमिषे लब्धं दण्डप्रहारं [Penalty kick] जालं प्रवेशितवान्  नायकः किलियन् एम्बाप्पे एव फ्रान्सस्य विजयशिल्पी। 

  अस्मिन् विश्वचषके एम्बाप्पेवर्यस्य सप्तमं लक्ष्यकन्दुकम् अस्तीदम्। अनेन लक्ष्यसंग्रहणे लयोलण् मेसेः समः अभवत्। आहत्य विश्वचषकलक्ष्येषु १९ संख्याकं प्राप्य मेसेः लक्ष्यैकस्मात्  पृष्ठतः अस्ति। षट्भिः  विश्वचषकैः   अस्ति मेसीवर्यस्य २० लक्ष्यप्राप्तिः। किन्तु २७ वयस्कः एम्बाप्पे त्रिभिः विश्वचषकैः १९ लक्ष्याणि सम्पादितवान्।

 केरले तीव्रवृष्टिः भविष्यति।

अनन्तपुरी> केरले कोष़िक्कोट्, कण्णूर्, कासरगोड् जनपदेषु अतितीव्रवृष्टिः स्यादिति केन्द्रीय ऋतुविज्ञानीयविभागेन निगदितम्। अतः एषु जनपदेषु सोमवासरे मङ्गलवासरे च ओरञ्जजागरूकता घोषिता। इतरेषु जनपदेषु पीतजागरूकता निर्दिष्टा। नवमदिनाङ्कपर्यन्तम् आकेरलं महती वृष्टिः भविष्यति।

 अयोध्यासमर्पितधनापहरणम्।

निर्णायकोपवेशनं श्वः। 

अयोध्या> राममन्दिरे भक्तजनैः समर्पितानां सुवर्ण-रजत-मुद्रादिधनानाम् अपहरणविवादस्य आधारे श्रीराम जन्मभूमितीर्थ मन्दिरपालनन्यासस्य [Temple Trust] प्रथमोपवेशनं सोमवासरे अपराह्णे त्रिवादने सम्पत्स्यते। न्यासाध्यक्षस्य महन्त् गोपाल दासस्य आश्रमे अस्ति उपवेशनम्। 

  पञ्चसंख्याकानि प्रकरणानि चर्चिष्यन्ते। पूर्वीयकार्यदर्शिप्रमुखः चम्पत् रायि, पूर्वसदस्यः अनिल मिश्रः  इत्यनयोः  स्थानत्यागपत्रमधिकृत्य भवेत् प्रथमा चर्चा। 

  राममन्दिरस्य शासननिर्वहणस्य कार्यक्षमता, २०२५-२६ वर्षस्य आयव्ययानाम् अवलोकनम् इत्यादीनि चर्च्यविषयेषु सन्ति।

 नरेन्द्रमोदिनः त्रिराष्ट्रसन्दर्शनं श्वः आरभ्यते। 

नवदिल्ली> राष्ट्रसुरक्षा, व्यापारः, समुद्रसुरक्षा इत्यादिषु भारतेन सह सहयोगं लक्ष्यीकृत्य प्रधानमन्त्री नरेन्द्र मोदी इन्डोनेष्या, आस्ट्रेलिया, न्यूसिलान्टः इत्येतानि राष्ट्राणि सम्पश्यति। जूलाय् षष्ठदिनाङ्कतः ११ तमदिनाङ्कपर्यन्तमेव सन्दर्शनम्। 

  ४० वर्षेभ्यः परमेव कश्चन भारतप्रधानमन्त्री न्यूसिलान्टं सम्पश्यति।

 भारत-इङ्लाण्ट् टि-२० परम्परा।

भारतस्य पराजयः। 

सूर्यवंशिनः प्रथमक्रीडा। 

माञ्चस्टर्> अन्ताराष्ट्रक्रिकट्स्पर्धायां भारताय क्रीड्यमानः न्यूनतमवयस्कः इति प्रशोभया वैभव सूर्यवंशी क्रीडितवानपि  भारतम् इङ्लाण्टेन  पराजितम्। द्वितीये टि-२० प्रतिद्वन्द्वे चतुर्भिः द्वारकैः आसीत् भारतस्य पराजयः। 

  प्रथमं कन्दुकताडनं कृतवान् भारतगणः २० क्षेपणचक्रेषु सप्त ताडकानां विनष्टे १९० धावनाङ्कान् सम्पादयामास। इदंप्रथमतया भारतस्य क्रीडावसनं धृत्वा सञ्जू सांसणस्य स्थाने प्रारम्भताडनं कृतवान् वैभव सूर्यवंशी १० कन्दुकेभ्यः १४ धावनाङ्कान् सम्पाद्य बहिर्नीतः। तस्य प्रकटने षट्कद्वयमासीत्। अनन्तरं नायकः श्रेयस् अय्यरः (३७ धावनाङ्काः), इषान किषनः (४९), अभिषेक शर्मा (४३) च भारतस्य प्रमुखाः सम्पादकाः। किन्तु प्रत्त्युत्तरक्रीडायाम् इङ्लाण्टः जेकब् बतलः (७६*), हारी ब्रूकः (३९),टों बान्टणः (३९) इत्येतेषाम् अतुल्यविक्रमे विजयलक्ष्यं प्राप।

 भारतीयक्रिकट् नभोमण्डले नूतनसूर्योदयः। 

वैभव सूर्यवंशी भारताय प्रथमतः क्रीडितवान्।

वैभव सूर्यवंशी । 

सच्चिन् टेण्डुल्करस्य कीर्तिमानम् अतिक्रान्तम्। 

माञ्चस्टर्> भारतीयवरिष्ठक्रिकट्गणस्य परं नूतनः ऊर्जवैभवः। अन्ताराष्ट्र क्रिकट् स्पर्धासु भारताय प्रथमतया क्रीडन् न्यूनतमवयस्कः इति प्रशस्तिः कौमारतारे वैभवसूर्यवंशिनौ प्रतिष्ठाप्यते। शनिवासरे माञ्चस्टर् क्रीडाङ्कणे इंगलान्टं विरुध्य सम्पन्ने द्वितीये टि-२० प्रतिद्वन्द्वे क्रीडितवान्। 

  १५ वर्षाणि ९९ दिनानि चास्ति सूर्यवंशेः वयः। १९८९ तमे वर्षे पाकिस्थानं विरुध्य निकषस्पर्धायां  सच्चिन् टेण्डुल्करे इदंप्रथमतया क्रीडिते तस्य वयः १६ वर्षाणि २०५ दिनानि चासीत्। 

  अन्ताराष्ट्र क्रिकट् समित्याः [ICC] पूर्णसदस्यत्वोपेतराष्ट्रेभ्यः इदंप्राथम्येन क्रीडन् कनिष्ठतमः द्वितीयो भवति वैभव सूर्यवंशी। पाकिस्थानस्य हसन् रासाभिधेयः भवति प्रथमस्थानीयः। तदा तस्य वयः १४ वर्षाणि २२७ दिनानि चासीत्। बिहारे तेजपुरं निवासीयस्य सूर्यवंशिनः अतीते ऐ पि एल् स्पर्धासु वैभवः एव राष्ट्रीयगणप्रवेशाय मार्गः अभवत्।

 मोरोको चतुर्धांशे। 

टेक्सस्> फिफा विश्वचषकस्य प्रथमे प्रचतुर्धांशप्रतिद्वन्द्वे आतिथेयं कानडादलं पराजित्य मोरोको चतुर्धांशं प्राविशत्। उत्तररहितेन लक्ष्यकन्दुकत्रयेण अस्ति मोरोकोदलस्य विजयः। असदीन् उनाहि नामकः लक्ष्यद्वयं प्राप्तवान्। सूफियाने रहीमि नामकः तृतीयं लक्ष्यं प्राप्तवान् च।

 फिफा विश्वचषकः।

प्रचतुर्धांशचक्रम् अद्य आरभ्यते। 

प्रथमस्पर्धायां कानडा - मोरोको। 

टेक्सस्> विश्वचषकपादकन्दुकं पूर्वचतुर्धांशस्य उत्साहं प्रविशते। ४८ स्पर्धागणाः २६ गणा इति आकुञ्चति। 

  प्रथमप्रतिद्वन्द्वे आतिथेयराष्ट्रं कानडा मोरोको प्रति स्पर्धते। शनिवासरे रात्रौ १०. ३० वादने अस्ति स्पर्धा। रविवासरे प्रत्युषसि २. ३० वादने फ्रान्सः पराग्वेदलं प्रति द्वन्द्वते।

 अयोध्यामन्दिरधनापहरणम्।

अपहरणदृश्यानि बहिरागतानि। 

नवदिल्ली> उत्तरप्रदेशे अयोध्यायां रामलल्लामन्दिरे समर्पणराशिम् अपह्रियमाणानि सि सि टि वी दृश्यानि अन्वेषणसंस्थया अधिगतानि। तानि बहिरागतानि च। 

  सविशेषान्वेषणसंस्थया [एस् ऐ टि] निगृहीतेषु अष्ट जनेषु पञ्च, भण्डारराशेः गणनावसरे धनं तेषां वसनेषु पादावरणेषु निलीय संस्थापनस्य दृश्यानि अधिगतानि। राममन्दिरात् २०० मीटर् मितं दूरे वर्तमानस्य समर्पितधनगणनकेन्द्रस्य  - नाम्ना Pilgrim Facilitation Centre - ४५ दिनानां सि सी टि वि दृश्यानि एव परिशोधितानि। निगृहीतैः व्यवहृतेषु स्थानेषु कृते परिशोधने आरक्षकैः मुद्राभाण्डानि अधिगतानि। निगृहीतात् अविनाश् शुक्ला इत्यस्मात् २०. ३९ लक्षं, करुणेश पाण्डे इत्यस्मात् १८. ०७ लक्षं, अनुकल्प मिश्रात् १६. ८२ लक्षं, लवकुश मिश्रात् १४. २५ लक्षं राम शंकर मिश्रात् ७. ३२ लक्षं चम्पत् रायि इत्यस्य यानचालकात् रामशंकरयादवात् एकलक्षं च रूप्यकाणि - इत्यस्ति अधिगतसंख्यानां विवरणम्। एतदतिरिच्य ११ ग्राम् मितं सुवर्णं, ३७४ ग्रां रजतं, ११२१ यू एस् डोलराणि च गृहीतानि।

 आयत्तुल्ला खमेनीवर्यस्य अन्त्यशुश्रूषाः अद्य आरभ्यते। 

आयत्तुल्ला खमेनी। 

दुबाय्> पश्चिमेष्यायुद्धस्य प्रथमदिने यू एस्-इस्रयेलाभ्यां हतः इरानस्य परमोच्चात्मीयनेता आयत्तुल्ला खमेनी इत्यस्य अन्त्यकर्माणि शनिवासरे आरभ्यते। संस्कारशुश्रूषाकार्यक्रमाः षट् दिनानि सन्ति। 

  इरानस्य राजधानीनगरे टेहराने खोमनगरे इराखस्थे कर्बलाप्रदेशे च खमीनेः मृतदेहं वहन्ती विलापयात्रा सम्पत्स्यते। इरानस्थे मषदनामके जन्मनगरे भवेत् तस्य अन्त्यविश्रान्तिः। 

 खमेनीवधानन्तरं युद्धं तीव्रं जातं कालदैर्घ्यं चाभवदित्यतः एव अन्त्यकर्मसु विलम्बो जातः।

 किन्तु खमीनेः अन्त्यश्रूषाकार्यक्रमेषु तस्य पुत्रः तथा वर्तमानीनः परमोच्चनेता च आयत्तुल्ला मोज्ताबा खमेनी न भागं करिष्यति। इस्रयेलस्य वधभीषां सुरक्षाकार्ये आशङ्कां चालक्ष्य एवायं निर्णय इति इरानीयपरमोच्चनेतुः भारतप्रतिनिधिः आयत्तुल्ला हक्कीम् इलाही इत्यनेन निगदितम्।

 फिफा विश्वचषकः।

केप वर्दे साभिमानं     पराजितम्।

स्वेदनिस्रावणेन अर्जेन्टीना प्रचतुर्धांशचक्रे।

मियामी> अत्यन्तमुत्साहोज्वले आकाङ्क्षानिर्भरे अधिकसमयं दीर्घिते च प्रतिद्वन्द्वे अर्जेन्टीना ३-२ इति लक्ष्यकन्दुकप्रकारेण केप वर्देदलं पराजित्य प्रचतुर्धांशचक्रं प्राविशत्। शक्तियुक्तं प्रतिद्वन्द्व्य आफ्रिकीयदलस्य साभिमाननिवृत्तिः।

प्रारम्भत एव शक्तं प्रतिरोधं विधत्तं केप वर्दे दलं प्रति अर्जेन्टीनायाः लक्ष्यप्रहाराय (goal shot) १५ तमनिमेषपर्यन्तं प्रतीक्षमाणाः अभवन्, आराधकाः। २९ तमे निमिषे मेस्सेः लक्ष्येण अर्जेंटीना अग्रे आगता। ५९ तमे निमिषे केपवर्देदलस्य डी दुवार्टे इत्यनेन लक्ष्यं प्रत्यर्पितम्। एवं समस्थितौ निश्चितसमयः समाप्तः। अस्मिन् विश्वचषके अर्जन्टीनायाः प्रथमसमस्थितिः! 

  अधिकसमये ९२ तमे निमिषे अर्जन्टीनायाः मार्टिनसेन द्वितीयं लक्ष्यमवाप्तम्। तत्तु १०३ तमे निमिषे केप वर्देस्य सिड्नी काब्रन् इत्यनेन प्रतिसमर्पितम्। आकांक्षाजनका समस्थितिः! विजयलक्ष्याय उभाभ्यामपि दलाभ्यां तीव्रं युद्धं कृतम्। १११ तमे निमिषे केप वर्दे दलस्य डिने बोर्गस् इत्यस्य स्वयंकृतानर्थेन अर्जन्टीना तृतीयं लक्ष्यं सम्प्राप्य पूर्वचतुर्थचक्रं प्रविवेश। 

  प्रथमविश्वचषके असाधारणवैभवं प्रकटितवन्तः केप वर्दे क्रीडकाः आराधकानां प्रशंसामुपलभ्य एव निवृत्ताः।

 केरलम्। 

"ओपरेषन् तूफान्" अभियोजनया ३० कोटीनां निरोधितोन्मादकवस्तूनि निगृहीतानि। 

ओपरेषन् तूफानस्य अंशतया निगृहीतानि उन्मादकवस्तूनि। 

अनन्तपुरी>  उन्मादक'माफिया'संघस्य उन्मूलनाशं लक्ष्यीकृत्य  केरलराज्ये मासैकस्मात् पूर्वम् आरब्धा ओपरेषन् तूफान् नाम अभियोजनाप्रचण्डवातः  सगौरवं वाति। एकमासाभ्यन्तरे ३० कोटिरूप्यकाणां निरोधितानि उन्मादकवस्तूनि निगृहीतानि। ५३५३ प्रकरणानि पञ्जीकृत्य ५७३६ अपराधिनः निगृहीताः। 

  ३७९२ किलोमितं 'गञ्जा' नामकं मादकं निगृहीतम्। १२.६७०९ ग्रां मेताफिटमिन्, ३७७६ ग्रां हाषिष् तैलं, ६५७.२१९ ग्रां ब्रौण् षुगर्, ३१.२३ ग्रां हेरोयिन्, ११ LSD stamp, २५.२३ ग्रां ओपियं, ४२८ गञ्जा सस्यानि इत्यादीनि उन्मादकवस्तूनि केरलस्य विभिन्नप्रदेशेभ्यः निगृहीतानि। 

 ये मादकवस्तूपभोगाधीनाः जाताः तान् प्रबोधेन पुनरधिवासेन च समाजस्य मुख्यपथमानेतुं प्रयत्नः करणीयः इति राज्यगृहविभागस्य लक्ष्यम्।

 महाप्रतापवता सह वीरबालस्य युद्धम् श्वः प्रत्युषसि। 

अर्जेन्टीना - केप् वर्दे प्रतिद्वन्दः। 

केप् वर्दे गणस्य लक्ष्यरक्षकः वोसीञ्ञा। 

मियामी> पादकन्दुकनभसि महाबलाढ्यः प्रतापशाली उज्वलप्रशोभवान् भवति लयोणल् मेस्सेः अर्जन्टीनादलः। विश्वचषकपादकन्दुकवेदिकां प्रति प्रथमप्रवेशे एव वीर्यशौर्यपराक्रमैः पादकन्दुकप्रणयिनाम् अद्भुतादरान् स्वीक्रियमाणः वीरबालः अस्ति केप् वर्दे इति आफ्रिकीयदलः। तयोः स्पर्धा जूलाय् चतुर्थस्य प्रत्युषसि ३.३० वादने [भारतीयसमयः] मियामी क्रीडाङ्कणे सम्पत्स्यते। अर्जेन्टीनायाः अधीशत्वेन सह केप वर्देदलस्य समरवीर्ये उज्वलोत्साहोपेतक्रीडा एव आराधकैः प्रतीक्ष्यते। 

  जे गणस्य (J group) अजय्येन वीरपदेन अस्ति अर्जन्टीनायाः knock out प्रवेशः। प्रतिद्वन्दिभ्यः ८ लक्ष्याणि  प्रदाय केवलं लक्ष्यैकं स्वीकृत्य आधिकारिकविजयः। लयोणल् मेस्सेः प्रतापः लक्ष्यसम्पादने अभङ्गुरमनुवर्तते च। मेसेः विश्वकीर्तिमानस्य अभिवर्धनं कांक्षन्ति आराधकाः। 

  किन्तु केवलं पञ्चलक्षं जनसंख्योपेतात् द्वीपराष्ट्रात् इदंप्रथमतया पादकन्दुकविश्वचषकमञ्चे रंगप्रवेशं कृतवान् केप् वर्दे दलः एच्छ् गणस्य (H group)द्वितीयस्थानमवाप्य अपसारणचरणं [Elimination round] प्राप। प्रकारान्तरेण कथ्यते चेत् अर्जेन्टीना इव 'अपराजितः' भवति केप् गणः। गणीयप्रतियोगितासु सर्वासु समस्थितिं परिपाल्य एव द्वितीयस्थानप्राप्तिः। पराजयः नाभवत्। त्रिषु प्रतिद्वन्द्वेषु आहत्य लक्ष्यद्वयस्य वशंगतः; द्वे लक्ष्ये प्राददात् च। उरुग्वेदलं प्रति २-२ समस्थितौ आसीदिदम्। अन्ययोः द्वयोः प्रतिद्वन्द्वयोः लक्ष्यरहितसमस्थितिः च। 

  प्रतिरोध एव केपगणस्य शक्तिः। ४० वयस्कस्य लक्ष्यरक्षकस्य [goalkeeper] 'वोसीञ्ञा' वर्यस्य वैभवे एव केपराष्ट्रस्य प्रतीक्षा।

Latest newsLatest news

 '८६' आफ्रिकायाः दुरन्तसंख्या!

यू एस्> फिफा विश्वचषके ८६  काचन दुरन्तसंख्या इति आफ्रिकीयक्रीडादलैः चिन्त्यते चेत् न्यायतः नाद्भुतम्। knock out इति निर्णायकस्पर्धासु डि आर् कोङ्गो, सेनगल्, ऐवरीकोस्ट् इत्येतेषाम् आफ्रिक्कीयदलानां पराजयस्य निर्णयः ८६ तमे निमिषे आसीत्। ह्यः सेनगलं  विरुध्य बल्जियस्य लुकाकु इत्यनेन प्रथमा लक्ष्यप्राप्तिः ८६ तमे निमिषे आसीत्। कोङ्गों विरुध्य हारि केय्नेन इङ्गलान्टस्य विजयलक्ष्यं ८६ तमे निमिषे! तावत्पर्यन्तं सेनगलः २-० इति लक्ष्यक्रमेण अग्रे आसीत्। 

   कोंगो ७० निमेषाधिकं यावत् अग्रतां संस्थाप्य आसीत् हारि केयन् वर्यस्य लक्ष्यद्वयं (७५, ८६)।

   ऐवरी कोस्टदलं प्रति नोर्वे दलस्य एर्लिंग हालण्टः ८६ तमे निमिषे लक्ष्यं प्राप्तवान्। प्रथमं लक्ष्यं प्राप्तं नोर्वेदलं विरुध्य ऐवरीदलम्  अमद् डियीलो इत्यनेन समस्थितिं [७४ तमे निमिषे] प्राप्तवदपि ८६ तमे निमिषे हालण्टः विजयक्ष्यं प्राप्तवान्।

Latest news Latest news

 फिफा विश्वचषकः।

बल्जियमः पूर्वचतुर्धांशे।

यू एस्> क्रीडायाः ८५ तमनिमेषं यावत् २-० इति लक्ष्यसम्पादनेन पूर्वचतुर्धांशप्रवेशं दृढीकृतवन्तं सेनगलदलं प्रतिलोम्य उज्वलं प्रत्यागमनं कृतवान् बल्जियमदलः ३-२ इति लक्ष्यक्रमेण प्रचतुर्धांशचक्रं प्राविशत्।

  क्रीडायाः २४, ५१ तमयोः निमिषयोः प्राप्तेन लक्ष्यद्वयेन सेनगलः अग्रतां प्राप्तवानासीत्।  ५६ तमे निमिषे बल्जियमेन कृतेन स्थानेतरादेशत्वद्वयेन ते क्रीडायां नूतनमुत्साहम् ऊर्जं च स्वीचक्रुः। ततः ८६ तमे निमिषे रोमेलु लुकाकु इत्यनेन आश्वासलक्ष्यं प्राप्य ८९ तमे निमिषे नायकः यूरी टीलमन्स् इत्यनेन समस्थितिं च बल्जियमः  सम्प्राप। 

  अनन्तरम् अधिकसमयं दीर्घितस्य प्रतिद्वन्द्वस्य क्षतिपरिहारसमये [injury time] नायकेनैव स्वदलस्य तृतीयलक्ष्यमपि सम्पादितम्। तथा अत्यन्तमुद्वेगभरिते उत्साहजनके च प्रतिद्वन्द्वे लक्ष्यद्वयस्य पृष्ठतः स्थितः बल्जियमः त्रीणि लक्ष्याणि प्रतिकृत्य सेनगलं पराजित्य प्रचतुर्धांशचक्रं प्राविशत्।

 युक्रैने रष्यायाः व्योमाक्रमणं - २० मरणानि।

रष्यया कृते आक्रमणे भग्नः भवनसमुच्चयः। 

 

कीव्> युक्रैनस्य राजधानीनगरे कीवे रष्यया कृते व्योमाक्रमणे २० जनाः हताः। नवत्यधिके व्रणिताश्च। बुधवासरे रात्रौ आरब्धमाक्रमणं गुरुवासरस्य प्रभातपर्यन्तं अनुवृत्तम्। रष्यायाः तैलसम्भरणशालाः प्रति युक्रैनेन कृतस्य आक्रमणस्य प्रतिक्रिया इति रष्यायाः सैनिकाधिकारिभिः उक्तम्। 

  कीवनगरस्य उपत्रिंशत् स्थानेषु आक्रमणमभवत्। विंशत्यधिके वासकेन्द्राणि भग्नानि। कतिपयभवनसमुच्चयेषु अग्निबाधा आपन्ना। ७४ दीर्घदूरमिसैलशस्त्राणि, २४ बालिस्टिकमिसैलशस्त्राणि, ४९६ ड्रोणानि च रष्यया प्रयुक्तानि। 

  बुधवासरे रात्रौ युक्रैनः रष्यायाः बृहत्तमं कामपि तैलशुद्धीकरणशालां  आक्रामत्। अत्र अग्निबाधा वृत्तान्तीकृता।  अपि च रष्यायाः सैनिकप्रक्रमाय  उपयुज्यमानः रेल् सेतुः अपि युक्रेनेन आक्रान्तः।

 वि बी जी रांजी परियोजना आरब्धा। 

विरुद्धवादैः बहूनि राज्यानि। 

नवदिल्ली> 'विकसित भारत-गारन्टी फोर् रोज़गार् आन्ड् आजीविका मिषन्' [Vikasit Bharath Garentee for Rosegar and Aheevika Mission]नामिका केन्द्रसर्वकारस्य अभियोजना बुधवासरे समारब्धा। ग्रामीणमण्डले सामान्यश्रमिकानां महिलानां आर्थिकस्थिरताम् उत्पादयितुम् आरब्धायाः महात्मा गान्धी  ग्रामीण कर्मदृढीकरणाभियोजनायाः स्थाने आरब्धा अस्तीयं योजना। १२५ कर्मदिनानि अस्यां दृढीकरोति। पूर्वम् एतत् १०० कर्मदिनानि आसन्। 

 किन्तु विपक्षीयराज्यसर्वकाराणां प्रतिषेधः नूतनाभियोजनां प्रति जातः। आहत्य व्ययस्य ४०% राज्यसर्वकारैः ऊढव्यमिति नूतनव्यवस्था। महात्मागान्धी अभियोजनायां १०% आसीत्। ९०% केन्द्रस्य भागः आसीत्। इदानीं ६०% एव। विपक्षीयसर्वकारैः सह भाजपा दलेन शास्यमाने बिहारे मध्यप्रदेशराज्ये च प्रतिषेधः उन्नीयते। केन्द्रप्रशासनांशस्य न्यूनता एव प्रतिषेधहेतुः।