गोलिकाप्रक्षेपेतिहासः 

जस्पाल राणा दिवंगतः।

नवदिल्ली> विख्यातः गोलिकाप्रक्षेपकः परिशीलकश्च जस्पाल राणावर्यः [४९] मृत्युमुपगतवान्। हृदयसंबन्धरोगेण दिल्लीस्थे निजीयातुरालये परिचर्याधीनः आसीत् सः। गुरुवासरे रात्रौ अन्त्यमभवत्। जर्मन्यां म्यूणिक् इत्यत्र भारतसंघेन सह विश्वचषकगोलिकाप्रक्षेपे भागं कृत्वा जूण् प्रथमदिने प्रत्यागतः सः उरोवेदनया आतुरालयं प्रविष्टः आसीत्। 

  उत्तरख्ण्डे लब्धजन्मा जस्पाल‌ः द्वादशे वयसि भुषुण्डिप्रयोगस्पर्धायां सुवर्णपतकं सम्पाद्य देशीयश्रद्धाम् अलभत। ततः एष्यन् गयिंस् मध्ये चत्वारि सुवर्णानि अभिव्याप्य अष्ट पतकानि सम्प्राप्तवान्। कोमण्वेल्त् गयिंस् मध्ये नव सुवर्णानि अभिव्याप्य १५ पतकानि सम्पादितवान्। 

  तदनन्तरं गोलिकाप्रक्षेपे  भारतस्य परिशिलकपदं प्राप्तस्य तस्य परिशीलनेन २०२४ तमे पारीस् ओलिम्पिक्से मनु भाक्करः  कांस्ययुगलं प्राप्तवान्। अर्जुन पुरस्कारः (१९९४), पद्मश्री (१९९७), द्रोणाचार्यपुरस्कार‌ः (२०२०) इत्येतैः सः बहुमानितः अस्ति।

 गृहधर्मिण्यः राष्ट्रविधात्र्यः  इति सर्वोच्चन्यायालयः।

गृहसेवायै प्रतिमासं ३०,००० रूप्यकाणां मूल्यं निश्चित्य अङ्गीकारः।

नवदिल्ली> गृहधर्मिण्यः (House wife) राष्ट्रनिर्माणाय प्रयतमानाः विशिष्टमहिलाः भवन्तीति सर्वोच्चन्यायालयेन निरीक्षितम्। मानवानां राष्ट्रस्य चाभिवृद्धये ताभिः दीयमानं योगदानम् अमूल्यमिति न्यायालयेन अभिप्रेतम्। 

  वाहनदुर्घटनया मृत्युमुपगतायाः पञ्चाबनिवासिन्याः गृहकार्यकुशलायाः सेवनाय प्रतिमासं ३०,००० रूप्यकाणि वेतनं निश्चित्य तस्याः पतये निष्कृतिं दातुं न्यायाधिपस्य सञ्जय करोलस्य अध्यक्षतायां विद्यमानेन नीतिपीठेन आदिष्टम्। तस्य विधिप्रस्तावे आसीत् पूर्वोक्तं निरीक्षणम्। पूर्वं एतादृशदुर्घटनानिष्कृतिप्रकरणेषु गृहिण्यै नाममात्रं धनमासीत् भृतिरूपेण निश्चितम्। 

  भारतस्य अशेषाभ्यन्तरोत्पादनस्य [GDP] १५ तः १७ प्रतिशतं यावद्भविष्यति गृहिणीनां सेवनस्य मूल्यमिति नीतिपीठेन निरीक्षितम्। कुटुम्बिनीनां महिलानां सेवनं राष्ट्रनिर्माणरूपेण अङ्गीकर्तव्यमिति नीतिपीठेन निर्दिष्टम्।

Latest news

 दिल्ली-मुम्बई शीघ्रमार्गे व्याघ्रसंरक्षितवनस्य अधः भारतस्य प्रथमः अष्टवीथि-सुरंगमार्गः उद्घाटनाय सज्जः।

 

प्रतीकात्मकं चित्रम्)

       दिल्ली-मुम्बई शीघ्रमार्गस्य (Expressway) निर्माणं प्रायेण पूर्णतां गच्छति। राजस्थानस्य कोटा नगरस्य समीपे निर्मितः 4.9 किलोमीटर् दीर्घः सुरंगमार्गः (Tunnel) जूण् मासस्य विंशति दिनाङ्कात् (20 जूण्) परम् उद्घाटितः भविष्यति इति 'दि न्यू इण्डियन् एक्सप्रेस्' पत्रिकाद्वारा प्रकाशितं वर्तते।

    पारिस्थितिकदृष्ट्या अत्यन्तं संवेदनशीलस्य 'मुकुन्दरा हिल्स् व्याघ्रसंरक्षितवनस्य' अधः निर्मितः अयम् सुरंगमार्गः भारतस्य प्रथमः अष्टवीथिपन्थाः (8-lane) इति मन्यते। अयम् सुरंगमार्गः 95,000 कोटिरूप्यकाणां व्ययेन निर्माणाधीनस्य 1,386 किलोमीटर् दीर्घस्य दिल्ली-मुम्बई शीघ्रमार्गस्य एकः मुख्यः भागः अस्ति। अस्मिन् मार्गे पूर्णरूपेण चालिते सति, दिल्ली-मुम्बई नगरयोः मध्ये यात्रासमयः प्रायेण 12 होराः भविष्यति, यः इतः पूर्वं 24 होराभ्यः (Hours) अधिकः आसीत्।

(Word Meanings)

शीघ्रमार्गः Expressway, सुरंगमार्गः Tunnel , व्याघ्रसंरक्षितवनम् Tiger Reserve , अष्टवीथिः Eight-lane, होराः  Hours

Latest news

 पण्यमहानौकां प्रति यू एस् आक्रमणम्। 

त्रयः भारतीयनाविकाः मृताः। 

नवदिल्ली> ओमानसमुद्रतीरे यू एस् नौसेनायाः अग्निशस्त्राक्रमणेन अग्निबाधितायाः पण्यमहानौकायाः तिरोभूताः त्रयः भारतीयनाविकाः मृत्युमुपगताः इति केन्द्रसर्वकारेण दृढीकृतम्। गुरुवासरे केन्द्र नौकाश्रयमन्त्री सर्वानन्द सोनोवालः वृत्तान्तोSयं स्थिरीकृतवान्। 

  हिमाचल प्रदेशनिवासी आदित्य शर्मा (२८), आन्ध्रप्रदेशीयः सुरेश पट्नालः (४४) इत्येतौ मृतौ। तृतीयस्य नामादिकं न बहिरागतम्। बुधवासरे पलावु देशस्य ध्वजोपेता 'सेटेबल्लो' नामिका महानौका आसीत् आक्रमणाधीना।

 होर्मुस् पुनरपि पिहितम्। 

यू एस्-इरानयोः परस्पराक्रमणम् अनुवर्तते। 

टेहरानं> विश्वमशेषम् इन्धनोपलब्धिसन्दिग्धतां बलेन नयन् आगोलपण्यवस्तुसञ्चलनस्य तन्त्रप्रधानः होर्मुस्  समुद्रसङ्कोचः इरानेन पूर्णतया पिहितः। सर्वासामपि महानौकानां सञ्चारनिरोध इति इरानेन उद्घोषितम्। 

  गतदिने यू एस् इरानः च परस्परं व्योमयुद्धं कठिनतया कृतवन्तौ। इरानस्य इन्धनोत्पादनप्रधानं खार्गद्वीपं निग्रहीष्यतीति ट्रम्पेन भीषा घोषिता।

 फिफा विश्वचषकः।

उद्घाटनस्पर्धायां मेक्सिको विजयीभूतम्।[२ - ०]

क्रीडा घटनाबहुला- त्रीणि रक्तपत्राणि। 

लक्ष्यकन्दुकप्राप्त्यां मेक्सिकोदलस्य आह्लादः। 

मेक्सिकोनगरं> २३ तम विश्वचषकपादकन्दुकमहोत्सवे समारब्धे प्रथमे प्रतिद्वन्द्वे आतिथेयस्य मेक्सिकोराष्ट्रस्य विजयः। प्रतिद्वन्द्विनं दक्षिणाफ्रिकादलं प्रत्युत्तररहितेन लक्ष्यकन्दुकद्वयेन पराजापयत। कार्कश्यक्रीडया घटनाबहुलायाम् अस्यां स्पर्धायां त्रीणि रक्तपत्राणि [red cards] क्रीडानियन्त्रकेन प्रयुक्तानि। 

  क्रीडायाः नवमे निमिषे जूलियन् क्विनोसस् नामकेन मेक्सिको राष्ट्राय प्रथमं लक्ष्यकन्दुकं सम्प्राप्तम्। ततः ६७ तमे निमिषे रौल् हिमनस् इत्यनेन द्वितीयं  लक्ष्यकन्दुकमपि सम्प्राप्तम्। किन्तु क्रीडा बहुवारं कार्कश्यरूपमापन्ना इत्यतः त्रयः क्रीडकाः रक्तपत्रप्रदर्शनेन बहिर्गताः। द्वौ दक्षिणाफ्रिकीयक्रीडकौ एको मेक्सिको क्रीडकश्च एवं क्रीडाबाह्याः जाताः।

Latest newsLatest news

 नरेन्द्रमोदिनः अनन्यथाप्राप्तित्वम्।

विश्वस्मात् अभिनन्दनप्रवाहः। 

 नवदिल्ली> भारतस्य राजनैतिकेतिहासे नवीनां कीर्तिं स्थापितवन्तं प्रधानमन्त्रिणं   नरेन्द्रमोदिनं प्रशंसयन्तः विश्वनेतारः राष्ट्रियनेतारश्च।    निर्वाचनेन प्रधानमन्त्रीपदं प्राप्य निरन्तरं ४४०० दिनानि  तत्स्थाने विराजमानः व्यक्तिः इति ऐतिहासिकपदं नरेन्द्रमोदी महोदयः अर्जितवान्। अनेन सः भारतस्य प्रथमप्रधानमन्त्रिणः पण्डितस्य जवाहरलालनेहरू महोदयस्य कीर्तिमानं भञ्जितवान्।

  यू एस् राष्ट्रपतिः डोनाल्ड ट्रम्पः, आस्ट्रेलियायाः प्रधानमन्त्री स्कोट् मोरिसणः, रष्यायाः राष्ट्रपतिः व्लादिमिर् पुतिनः, इटली, मालिद्वीपः,  श्रीलङ्का इत्यादीनां राष्ट्राणां प्रशासननेतारश्च मोदिनम् अभिनन्दितवन्तः। तेषां सर्वेषां  कृते मोदिवर्यः कृतज्ञतां प्रकाशितवान् च। 

१९५२ तमे वर्षे मई-मासस्य १३ दिनाङ्कतः १९६४ तमे वर्षे मई-मासस्य २७ दिनाङ्कपर्यन्तं निरन्तरं ४,३९८ दिनानि यावत् जवाहरलालनेहरू महोदयः निर्वाचितः प्रधानमन्त्री रूपेण देशस्य शासनं कृतवान्। २०१४ तमे वर्षे मई-मासस्य २६ दिनाङ्के प्रथमवारं देशस्य प्रधानमन्त्रिरूपेण शपथग्रहणं कृतवान् नरेन्द्रमोदी, २०१९, २०२४ तमवर्षयोः सामाजिकनिर्वाचनयोः अपि निरन्तरं जनमतं प्राप्य तृतीयवारमपि प्रशासने अनुवर्तते।

"विकासस्य प्रगतेः च कालः"

विगतेषु ४४०० दिनेषु देशस्य आर्थिक-सामाजिक-डिजिटल् क्षेत्रेषु बृहत्परिवर्तनानि अभवन् इति भाजपानेतृत्वेन सूचितम्।

डिजिटल् परिवर्तनानि यू.पी.आई. (UPI), डिजिटल्-इण्डिया-परियोजनाभ्यां च भारतं विश्वस्य बृहत्तमं डिजिटल्-व्यवहार-देशं सञ्जातम्।

बृहद् विकासात्मकपरियोजनाः - वन्देभारत-रेल्यानानि, द्रुतगति-राजमार्गाः (Expressways), नवीनं संसदभवनम्, आयुष्मान् भारत स्वास्थ्यपरियोजना च मोदीसर्वकारस्य प्रमुखाः वैभवाः इति मन्यन्ते।

वैश्विकप्रभावः -  विश्वस्य तीव्रगत्या वर्धमाना बृहत्तमा अर्थव्यवस्था-रूपेण भारतं परिवर्तयितुं, वैश्विकस्तरे देशस्य कूटनैतिकप्रभावं वर्धयितुं च एतया सिद्ध्या साध्यम् अभवत्।

 पश्चिमेष्या अशान्ता। 

आग्नेयक्रीडा अनुवर्तते। 

इराने अमेरिकायाः व्योमाक्रमणं; जोर्दान-कुवैट्-बहरिनराष्ट्राणि प्रति इरानस्य प्रत्याक्रमणम्। 

टेहरानं>  होर्मुस् समुद्रधुनिसमीपे स्वस्य सैनिकोदग्रयानं भग्नीकृतम् इत्यारोप्य अमेरिका गतदिने इरानम् आक्रामत्। प्रत्याक्रमणरूपेण जोर्दान-कुवैट्-बहरिनराष्ट्रेषु वर्तमानानि यू एस् सेनाशिबिराणि इरानेन आक्रान्तानि। 

  परन्तु इरानस्य ड्रोणेन सह संघट्य एव अमेरिकायाः उदग्रयानं भग्नमिति अमेरिकीयसेनाधिकारिणं प्रसूचयन् अन्ताराष्ट्रमाध्यमैः वृत्तान्तीकृतम्। घण्डाचतुष्टयं दीर्घिते यू एसस्य आक्रमणे इरानीयनगरस्थेषु व्योमप्रतिरोधसंविधानानि, भूतलनियन्त्रणकेन्द्राणि, समुद्रतीरस्थानि 'रडार्' केन्द्राणि च विशीरितानीति अमेरिकया निगदितम्।

Latest newsLatest news

 अद्य आरभ्य विश्वं कन्दुकं परितः भ्रमति। 

२३तमं विश्वचषकपादकन्दुकम् अद्य अर्धरात्रे प्रारभ्यते। 

प्रथमस्पर्धा - मेक्सिको × दक्षिणाफ्रिका। 

प्रथमस्पर्धा - मेक्सिकोस्थे 'आस्टेका' क्रीडाङ्कणे।

उद्घाटनस्पर्धा विधास्यमानं आस्टेका' क्रीडाङ्कणम्।

मेक्सिकोनगरं> अद्य आरभ्य विश्वस्य चक्षूंसि 'ट्रयोण्डा' [Trionda] नामककन्दुके केन्द्रीकृत्य कन्दुकेन सह भ्रमणमारप्स्यन्ते। परं ३९ दिनानि विश्वस्य 'कोणचत्वराणि' पादकन्दुकस्य अनियन्त्रित-अनिश्चित-अप्रतीक्षितप्रवेगेन सह आन्दोलनं करिष्यन्ति। आविश्वं युद्धस्य सन्दिग्धतायाम् आशङ्कायां क्लेशावस्थायां च वर्तमानायां सत्यामपि *लोकान् एकायमाना २३ तमा विश्वचषकपादकन्दुकस्पर्धापरम्परा अद्य अर्धरात्रे समारभ्यते।* 

  यू एस् ए, मेक्सिको, कानडा इत्येतेषु त्रिषु राष्ट्रेषु १६ वेदिकासु  एव स्पर्धाः विधास्यन्ति। बृहद्-लघूनि ४८ राष्ट्राणि विश्वचषकोत्सवे भागं कुर्वन्ति। आहत्य १०४ स्पर्धाः भविष्यन्ति। विश्वजेतारं निर्णीयमाना अन्तिमस्पर्धा जुलाई १९ तमे दिनाङ्के सम्पत्स्यते। 

  अद्य रात्रौ १२. ३० वादने (भारतीयसमयः) मेक्सिको नगरस्थे 'आस्टेका' क्रीडाङ्कणे मेक्सिको दक्षिणाफ्रिकयोः प्रथमस्पर्धा विधास्यति। अन्तिमस्पर्धा अमेरिकायां 'न्यू जेर्सी' क्रीडाङ्कणे च विधास्यति।

 प्रधानमन्त्रिपदे अद्य नरेन्द्रमोदिनः ३४०० तमं दिनम्। 

चिते पदे नेह्रुवर्यस्य  अनन्यथाप्राप्तिम् अतीतवान्। 

नरेन्द्र मोदी।

नवदिल्ली> स्वतन्त्रभारते निर्वाचनेन अधिकारं प्राप्य अनुस्यूततया अधिकतमदिनानि प्रधानमन्त्रिपदे उपतस्थिवान् इति अनन्यथाप्राप्तित्वं बुधवासरे नरेन्द्र मोदी स्वायत्तीकृतवान्। प्रथमप्रधानमन्त्री जवाहर लाल नेह्रोः ४३९८ दिनानीति प्राप्तित्वं  परं पुरावृत्तमभवत्। परन्तु इदानीमपि अधिकतमकालं प्रधानमन्त्रिपदम् अलङ्कृतवान् इति स्थानं नह्रुवर्याय एव कल्पते। 

  १९५७ तमे वर्षे आसीत् नह्रुवर्यस्य प्रथमा प्रधानमन्त्रिपदप्राप्तिः।१९५२ तमे वर्षे  निर्वाचनं यावत् सः मध्यकालीनसर्वकारं नीतवान्। तस्मिन् वर्षे मेय् १३ तमदिनाङ्कतः मरणपर्यन्तं ४३९८ दिनानि सः प्रधानमन्त्रिपदे उपतस्थिवान्। २०१४ मेय् २६ तमे दिनाङ्के प्रधानमन्त्रिपदम् आरूढवान् मोदिवर्यः २०२६ जूण् दशमदिने ४३९९ दिनानि पूरयित्वा नेह्रुवर्यस्य उपलब्धिं बिभेद।

 तमिल् चलनचित्रसंविधायकः पि. भारतीराजः दिवङ्गतः।

चित्रं - मातृभूमिवार्ता

  चेन्नै> वार्धक्य सहजेन रोगेण तमिल् चलनचित्रसंविधायकः पि. भारतीराजः (८४) दिवङ्गतः। तस्य पुत्रस्य मनोजस्य अकालमृत्योः अनन्तरं भारतीराजस्य अस्वास्थ्यम् अधिकतया वर्धितम् आसीत्।   महोदयेन चलनचित्रक्षेत्रे बह्व्या: ग्रमीणकथायाः पुनराख्यानं कृतम् ।

 'वी बी जी रांजी' अभियोजना जूलाय् प्रथमदिनाङ्कतः। 

नवदिल्ली> 'महात्मा गान्धी  दृढवृत्ति' अभियोजनायाः स्थाने केन्द्रप्रशासनेन आविष्कृता 'वी बी जी रांजी' नामिका अभियोजना   जूलाय् मासस्य प्रथमदिनाङ्के आरप्स्यते। वर्तमानीनपरियोजनायां ये वृत्तिं कृतवन्तः तेभ्यः तेषां वेतनं निश्चयेन लप्स्यते इति केन्द्रसर्वकारेण निगदितम्। तदर्थं ३०,००० कोटि रूप्यकाणि अनुमोदितानि। 

  वी बी रांजी अभियोजनायै ९५,६९२ कोटि रूप्यकाणि राज्येभ्यः अनुमोदितानि। न केवलं धनराशेः अनुज्ञा किन्तु यथाकालं वेतनलब्धिरपि सर्वकारेण दृढीकरिष्यते इति राज्यानां ग्रामविकासमन्त्रिभिः सह कृते मेलने केन्द्रमन्त्रिणा शिवराज सिंह चौहानेन स्पष्टीकृतम्।

 पाकिस्थानधीनकाश्मीरे संघर्षः तीव्रः। 

विंशत्यधिके जनाः मृताः 

मुसाफराबादः> पाकिस्थानं प्रशासनं विरुध्य पाकिस्थानधीनकाश्मीरे प्रक्षोभः तीव्रायते। प्रतिषेधिनः पाकिस्थानस्य सुरक्षासेना च मिथः कृते प्रतिद्वन्द्वे इतःपर्यन्तं विंशत्यधिके जनाः मृताः। द्विशताधिके जनाः व्रणिताश्च। 

  प्रक्षोभस्य नेतृत्वं वहत् नागरिकाधिकारसंघटनं 'जोयन्ट् अवामी आक्षन् कम्मिटी' [Joint Avami Action Committee] नामकं गतसप्ताहे प्रशासनेन निरुद्धमासीत्। ततः परमेव अयं प्रदेशः अशान्तः जातः। रविवासरस्य रात्रौ रावल्कोट्, मुसाफराबादः इत्येते स्थानद्वये प्रवृत्ते प्रतिद्वन्द्वे सप्त जनाः मृताः।

 केरलम्। 

वयनाट् जनपदे 'षिगल्ला'रोगः व्याप्यते। 

६०+ बालकाः रोगबाधिताः; ४००+ बालकाः लक्षणोपेताः। 

सुल्त्तान् बत्तेरी> राज्ये वयनाट् जनपदे 'षिगल्ला'नामकः जीवाणुजन्यरोगः व्याप्यते। सुल्त्तान् बत्तेरी प्रदेशे समीपप्रदेशेषु च ४४३ बालका‌ः लक्षणोपेताः सन्तः निरीक्षणे  वर्तन्ते। ६८ बालकाः रोगस्थिरीकृताः सन्तः आतुरालये परिचर्यायां वर्तन्ते। 

 राज्यसर्वकारे‌ण शीघ्रमेव प्रतिरोधप्रवर्तनानि आयोजितानि। राज्ये सर्वत्र जागरूकतानिर्देशाः प्रदत्ताः। स्वास्थमन्त्री के मुरलीधरः वयनाट् प्राप्य अवस्थाः अवलोकितवान्।   कल्पट्टाविधानसभासदस्यः  कृषिविभागमन्त्री टि सिद्दिखः रोगप्रतिरोधप्रवर्तनानि एकोपयितुं व्याप्रियमाणः अस्ति।

 ओमानतीरे महानौका अग्निबाधिता। 

नवदिल्ली> ओमानतीरे २४ भारतीयनाविकैः सह सञ्चरन्त्यां तैलमहानौकायाम् अग्निबाधा जाता। सोमवासरे पश्चिमेष्यायाम् इरानः इस्रयेलश्च परस्परम् आक्रमणं कृतवन्तौ आस्ताम्। किन्तु अग्निबाधायाः कारणं न स्पष्टीकृतम्। 

  सर्वे नाविकाः सुरक्षिताः वर्तन्ते इति केन्द्र महानौकाशयमन्त्रालयस्य निदेशकः ओपेष् कुमारशर्मा अवोचत्। होर्मुस् समुद्रसङ्कोचात् बहिः स्थीयमाना इयं महानौका शून्या अस्तीति तेन निगदितम्। मडगास्करदेशस्य ध्वजं वहन्ती एम् टि मारिवेक्स् नामिका महानौका आसीत् अग्निबाधिता।

 तमिल्नाडुमुख्यमन्त्रीविजयः ग्रैंडमास्टर्-प्रज्ञानन्देन सह चतुरङ्ग-क्रीडामकरोत्।

चेन्नै> सोमवासरे (जूण् ८, २०२६) चेन्नैनगरस्थे सचिवालये मुख्यमन्त्रिणं सि. जोसेफ विजयं द्रष्टुं ग्रैंडमास्टर् प्रज्ञानन्दः यदा आगतवान्, तदा मुख्यमन्त्री तत्क्षणमेव अधिकारिणः चतुरङ्गफलकं आनेतुम् आदिष्टवान्, तेन सह एकं वारं क्रीडितवान् च।

"अहं एतत् न प्रतीक्षितवान्। सः [मुख्यमन्त्रीविजयः] अधिकारिणः फलकम् आनेतुम् उक्त्वा मया सह क्रीडितुम् आरब्धवान्। सः चतुरङ्गं क्रीडति स्म इति अहं न जानामि स्म। यद्यपि अहं विजयी अभवम्, तथापि सः सुन्दरम् अक्रीडत्। सः प्रायेण स्वमित्रैः सह क्रीडति इति माम् अकथयत्," इति ग्रैंडमास्टर् उक्तवान्।

नोर्वेदेशे तस्य विजयम् अधिकृत्य मुख्यमन्त्री तस्मै ५० लक्षरूप्यकाणां धनपत्रं अपि उपहाररूपेण दत्तवान्।

न दूरवाण्यः, न च अन्तर्जालम्: नीट्-युजी (NEET-UG) प्रश्नपत्रनिर्मातारः जूण् २१ पर्यन्तं रहसि स्थापिताः, पुनःपरीक्षा भविष्यति इति विवरणम्।

चित्रं - पि टि ऐ

   प्रश्नपत्रस्य गुप्तताभङ्गम् अधिकृत्य मेय्-मासस्य तृतीये (३) दिनाङ्के आयोजितं नीट्-युजी-मूलपरीक्षाकेन्द्रं निरस्य सप्ताहेभ्यः परं एतं निर्णयं स्वीकृतवन्तः। राष्ट्रियप्रवेशपरीक्षायाः कृते स्वीकृतेषु अतीव कठिनेषु सुरक्षाक्रमेषु अन्यतमेन रूपेण, नाषणल् एलिजिबिलिटी कम् एन्ट्रन्स् टेस्ट् - अंडर् ग्रेजुवेट् (NEET-UG) २०२६ इत्यस्याः पुनःपरीक्षायाः प्रश्नपत्रनिर्माणकार्ये नियुक्ताः विद्वांसः जूण् २१ दिनाङ्के परीक्षायाः समाप्तिं यावत् सुरक्षिते तथा च अप्रकाशिते कस्मिंश्चित् स्थाने अवरुद्धाः स्थापिताः सन्ति इति प्रतिवेदनमस्ति।

 केरलम्। 

 उत्तरकेरले अतितीव्रवृष्टिः स्यात्। 

त्रिषु जनपदेषु विद्यालयविरामः।

अनन्तपुरी> केरले कोष़िक्कोट्, कण्णूर्, कासरगोड् जनपदेषु कुजवासरे अतितीव्रा वृष्टिः भवेदिति ऋतुविज्ञानीयविभागेन निगदितम्। त्रिष्वपि जनपदेषु विद्यालयानां शिक्षाविरामः उद्घोषिता। मलप्पुरं, वयनाट् जनपदद्वये ओरञ्ज् जागरूकता प्रख्यापिता। इतरेषु जनपदेषु पीतजागरूकता च उद्घोषिता।

 फिलिप्पीन्से भूकम्पः- ३२ जनाः मृताः। 

फिलिलिपीन्से दुरापन्नस्य भूकम्पस्य दृश्यम्। 

मानिला> द्वीपराष्ट्रे फिलिपीन्से सोमवासरे दुरापन्ने भूकम्पे ३२ जनाः मृताः। १३४ जनाः आहताः। बहूनि भवनानि विशीर्णानि। 

  प्रादेशितसमयानुसारं सार्धसप्तवादने राष्ट्रस्य दक्षिणपार्श्वे वर्तमाने 'मिन्डनावो' द्वीपे आसीत् भूकम्पः। मापिन्यां ७. ८ अङ्कितमासीत्। ततः घण्डाद्वयाभ्यन्तरे लघु तीव्र मिश्राणि १३० अनन्तरभूचलनानि अनुभूतानि। सुनामीजागरूकता उद्घोषिता अपि परं निराकृता।

 दह्यते महानसः।

पाकवातस्य मूल्यं पुनरपि वर्धापितम्। 

नवदिल्ली> मूल्यवर्धने क्लिश्यमानानां जनानामुपरि अशनिपातमिव गार्हिकपाकेन्धनस्य मूल्यमपि वर्धापितम्। मासत्रयाभ्यन्तरे  द्वीतीयवारमेव मूल्यवर्धनम्। दिल्ल्यां १४.२ किलोमितस्य दण्डगोलस्य २९ रूप्यकाणि वर्धयित्वा ९४२ रूप्यकाणि अभवन्। 

  भोजनालयादीनां वाणिज्यगोलकानां मूल्यं पूर्वमपि वर्धयित्वा जनाः कलेशमनुभवन्ति। 

  किन्तु अन्ताराष्ट्रविपण्यां जातम् इन्धनमूल्यवर्धनमेव अधुनातनमूल्यवर्धनस्य कारणमिति केन्द्रसर्वकारेण उच्यते। पाकवात-डीसल्-पेट्रोलानां मूल्यवर्धनानन्तरमपि सामाजिकक्षेत्रीयतैलसंस्थाः नष्टे एव प्रचलन्तीति केन्द्रप्रशासनस्य वादः।

अनुगृहीताभिनेता सलिंकुमारः कालयवनिकां प्राप्तः।

अनुग्रहीताभिनेता सलिंकुमारः कालयवनिकाम् अन्तर्दधे। 

नरेन्द्र मोदी, राहुल गान्धी इत्यादयः अन्वशोचयन्। 

सलिंकुमारः तस्य विभिन्नवेषेषु। 

कोच्ची> कैरलीचलच्चित्रमण्डले स्वमुद्राम् अङ्कितवान् राज्य-राष्ट्रियपुरस्कारं प्राप्तवान् अनुग्रहीतः अभिनेता सलिंकुमारः [५६] दिवंगतः। यकृत्संबन्धेन अस्वास्थ्येन कोच्चीनगरस्थम् आतुरालयं प्रवेशितस्य तस्य अन्त्यं शनिवासरे रात्रौ अभवत्। सहस्रशः जनानां, सामाजिक-सांस्कृतिक-राजनैतिकप्रमुखानां अन्त्याञ्जलिं स्वीकृत्य रविवासरे सायं तस्य शरीरमपि पञ्चत्वं प्राप। काञ्चिदपि धार्मिकाचारान् विना राज्यबहुमत्या च आसीत् मृतदेहसंस्कारः सम्पन्नः।

  शब्दानुकरणकलया कलाक्षेत्रं प्रविष्टवान् एरलाकुलं जनपदीयः सलिंकुमारः २००३ तमे वर्षे  हास्यकथापात्राणि स्वीकृत्य चलच्चित्रमण्डलं प्रविष्टवान्। नटनक्षेत्रे अपरिच्छेद्यम् अभिनयचक्रवालं प्रदर्शितवान् सः २५० अधिकं चित्रैः कलास्वादकानां मनसि चिरप्रतिष्ठां सम्प्राप्तः। ततः  भावात्मकाभिनयेन २००७,२०१०,२०१२ वर्षेषु राज्य-राष्ट्रियपुरस्कारान् सम्प्राप्तवान्। त्रीणि चलच्चित्राणि संविधानं कृतवान्। 

  सलिंकुमारस्य वियोगे प्रधानमन्त्री नरेन्द्र मोदी, विपक्षनेता राहुल गान्धी, इत्यादयः देशीयनेतारः अन्वशोचयन्। केरलस्य बहवः सामाजिक-सांस्कृतिक-राजनैतिकप्रमुखाः साक्षादागत्य अन्त्याञ्जलिं समार्पयन्।

निषा शशिकुमार: एवरेस्टशिखरम् आरूढवती कनिष्ठा व्यक्तिः।

 निषा शशिकुमार: एवरेस्टशिखरम् आरूढवती कनिष्ठा व्यक्तिः।

     चेन्नै निवासिनी १६ वर्षीया निषा शशिकुमारः विश्वस्य सर्वोच्चं एवरेस्टशिखरम् आरूढवती कनिष्ठा व्यक्तिः अभवत्। चिट्टूर् जनपदस्थायाः अस्याः निषायाः पर्वतारोहणे प्रेरणा तस्याः पिता शशिकुमार गन्धः आसीत्।

 वर्षद्वयात् पूर्वं नेपाले उत्तराखण्डे च कृतेन पदयात्रा (ट्रकिंग्) माध्यमेन निषायाः पर्वतारोहणे आसक्तिः उत्पन्ना। निषा एतावता रष्यदेशस्य मौण्ट् एल्ब्रस्, आफ्रिकायाः किलिमञ्जारो, आस्ट्रेलियायाः मौण्ट् कोस्युस्को, इण्डोनेष्यायाः कार्स्टेन्स् पिरामिड्, अर्जेन्टीनायाः अकोन्काग्वा इत्यादीनि शिखराणि आरूढवती। १५ वर्षे वयसि कार्स्टेन्स् पिरमिड् आरुह्य सा 'इण्डिया बुक् आफ् रेकॉर्ड्स्' मध्ये स्थानं प्राप्नोत्।

चित्राणि - इ टी वी भारतात्।

आगामि लक्ष्यम् - पञ्चमहाद्वीपानां शिखराणि आरूढवत्याः निषायाः आगामी लक्ष्यं उत्तर-अमेरिकायाः मौण्ट् डेनाली अस्ति। अस्य वर्षस्य नवम्बरमासाभ्यन्तरे 'सेवेन् सम्मिट्स् चैलेञ्ज्' (सप्तशिखरस्पर्धा) पूर्णं कूर्वाणा सा विश्वस्य कनिष्ठा शिखर विजयिनीनी इति भवितुं प्रयतते।

 पर्वतारोहणेन विना निषा बास्केटबाल्-क्रीडिका अस्ति, सा कराटे इति- कायिकाभ्यासम् अपि जानाति। निषा "पॉलिसी रिफॉर्म्स टू क्लैम्ब मौण्ट एवरेस्ट" नामकं पुस्तकम् अपि रचितवती।

 पश्चिमेष्यायुद्धं दिनशतमतीतम्। 

शान्तिः विदूरे।

> इरानं विरुध्य २०२६ फेब्रुवरि २८ तमे दिनाङ्के यू एस्-इस्रयेलसख्येन आरब्धं युद्धं शतं दिनानि अतीतानि। आविश्वम् इन्धनोपलब्धिसन्दिग्धता तथा मूल्यवर्धनं च क्लेशायमानं वर्तते। 

एप्रिल् अष्टमदिनाङ्कादारभ्य ह्रस्वकालिकः युद्धविरामः उपस्थापितः अपि पश्चिमेष्या इदानीमपि संघर्षभरिता अवशिष्यते। आणवयेजना न त्यक्ता इत्यारोप्य यू एस्, इस्रयेलश्च मिलित्वा इरानं आक्रमतः स्म। 

 इराने लबनने च आहत्य सप्तसहस्रं जनाः मृत्युमुपगताः इति गण्यन्ते। इतरेषु गल्फराष्ट्रेषु त्रिंशत्,इस्रयेले २६ च जनाः मृताः। १३ यू एस् सैनिकाः अपि एतस्मिन् कालान्तरे हताः।

 गुजरात्।

अतितापेन ८ सिंहशाबकाः मृताः। 

अहम्मदाबादः> गुजरात् राज्ये गीर् वने अष्ट सिंहशाबकानां मरणम् कठिनतापेन इति स्पष्टीकृतम्। गान्धिनगरस्थे  बयो टेकनोलजी परीक्षणालये विधत्तायां परिशोधनायामस्ति इदं दृढीकरणम्। 

  गते मासद्वये राज्ये उष्णमानं ४० - ४५ डिग्रीमितम् आसीत्।

 नोर्वे चतुरङ्गवीरताकिरीटं प्रग्नानन्दः अलभत। 

ओस्लो> अविश्वसनीयप्रकटनेन भारतस्य आर् प्रग्नानन्दः नोर्वे चतुरङ्गवीरताकिरीटं प्राप्तवान्। निर्णायके अन्तिमप्रतिद्वन्द्वे जर्मनेः विन्सन्ट् कैमर् नामकं पराजित्य एव २० वयस्कः प्रग्नानन्दः वीरः जातः। 

  विश्वस्मिन् प्रबलान् पञ्च कीडकान् प्रतिरुध्य अस्ति प्रग्नानन्दस्य विजयः। वर्तमानीनः विश्ववीरः माग्नस् काल्सः (नोर्वे), वेस्ली सोक् (अमेरिका), अलिरेसा फिरोसः (फ्रान्स्)  इत्यादयः प्रग्नानन्दस्य प्रतिद्वन्द्विषु प्रमुखाः आसन्।

 वर्षाकालदुष्प्रभावः

केरले पञ्च मरणानि। 

अनन्तपुरी> वर्षाकालमारभ्य दिनत्रये अतीते केरले विविधप्रदेशेषु पञ्च जनाः मृताः। तेषु त्रयः बालकाः भवन्ति। 

  कोष़िक्कोट् जनपदे स्नानार्थं नदीं गत्वा प्रवाहे निपत्य माता सप्तवयस्कः पुत्रश्च मृतौ। कासरगोडजनपदे वृष्ट्या गृहस्य आवेष्टकं निपत्य द्वौ बालकौ मृतौ। तृश्शूर् जनपदे एकः युवकः वृक्षनिकृन्तनः मृतः। दशमदिनाङ्कपर्यन्तं तीव्रवृष्टिः अनुवर्तिष्यते इति ऋतुविज्ञानीयविभागेन निगदितम्।

 जन्तर् मन्तर् क्रीडाङ्कणे सी जे पी युवसामाजिकसंघटनस्य प्रतिषेधः सम्पन्नः। 

जन्तर मन्तरे प्रतिषेधाय सञ्चितवन्तः जनाः। 

नवदिल्ली> नीट्, सि बी एस् ई परीक्षाणां कृत्यविलोपम् आलक्ष्य केन्द्र विद्याभ्यासमन्त्रिणा धर्मेन्द्र प्रधानेन स्थानं त्यक्तव्यम् इति कार्यमुन्नीय राष्ट्रराजधान्यां सी जे पी [कोक्रोच् जनता पार्टी]  नामक युवजनसमाजस्य प्रत्यक्षप्रतिषेधः सम्पन्नः। 'सामाजिकमाध्यमान्दोलनम्'  इति रीत्या आरब्धस्य सी जे पी युवजनसमाजस्य प्रथमे प्रत्यक्षरोषप्रकटने सहस्रशः युवजनाः भागं कृतवन्तः। 

  कोक्रोच् जनता पार्टी इत्यस्य स्थापकः अभिजित् दीप् के इत्यस्य ओण् लैन् द्वारा कृताह्वानमनुसृत्य जन्तर् मन्तर् क्रीडाङ्कणं प्राप्तानां युवकानां हस्तेषु राष्ट्रियध्वजं पुष्पाणि च दृश्यन्ते स्म। ह्यः आसीत् अभिजित् दीपस्य अमेरिकातः स्वदेशं प्रति आगमनम्। 

  प्रभाते दशवादने आरब्धः प्रतिषेधः सायं उपचतुर्वादने समाप्तः। सप्ताहाभ्यन्तरे विद्याभ्यासमन्त्रिणः स्थानत्यागं न भविष्यति तर्हि राष्ट्रव्यापकं प्रतिषेधं विधास्यतीति अभिजित् दीप् के वर्येण प्रोक्तम्।

 वैभवसूर्यवंशी भारतस्य वरिष्ठसंघे। 

वैभव सूर्यवंशी।

भारतीयसंघं प्राप्नुवन् कनिष्ठतमः क्रीडकः। 

सूर्यकुमारः निराकृतः; सञ्जू अन्तर्भूतः। 

मुम्बई> कतिपयकालेन क्रिकटक्रीडाक्षेत्रे तरङ्गायितः कौमारवयस्कः कन्दुकताडकः वैभव सूर्यवंशी भारतस्य वरिष्ठदलं प्राप्यमाणः कनिष्ठतमः क्रिकट्तारमभवत्। अस्य मासस्यान्त्ये अयर्लान्डे ततः इङ्गलाण्टे च आयोज्यमानासु टि-२० क्रीडासु एव सूर्यवंशिनः स्थानम्। 

  १५ वर्षाणि, ७१ दिनानि च वयस्के वैभवे क्रीडासंघं प्राप्ते क्रिकट् इतिहासस्य सच्चिन् टेण्टुल्करस्य नाम्नि भूतम् अनन्याप्तप्राथम्यं [world record] पुरावृत्तमभवत्। यदा सच्चिनः भारताय प्रथमतया क्रीडितवान् तदा तस्य वयः  १६ वर्षाणि २०५ दिनानि चासीत्। 

  सूर्यकुमार यादवं नायकस्थानात् संघाच्च निष्कासितः।नायकस्थाने श्रेयस् अय्यरः नियुक्तः। टि -२० विश्वचषके उज्वलप्रकटनं प्रदर्शितवान् सञ्जू सांसणः  अपि भारतदले अन्तर्भूतः।

 राष्ट्रे ४८ उत्क्षेपिणीषु 'ई-८५' इन्धनम्।

राष्ट्रे ई-८५ एथनोल्मिश्रितेन्धनं मन्त्री हरदीप सिंह पुरी उद्घाटयति। 

नवदिल्ली> भारते ८५% एथनोल् नामकरासवस्तूपेतम् इन्धनं  - ई ८५ - विश्वपर्यावरणदिने बहिर्नीतम्। शुक्रवासरे केन्द्र पेट्रोलियं मन्त्री हरदीप सिंह पुरी दिल्ल्याम् इन्डियन् ओयिल् उत्क्षेपिणीकेन्द्रे अस्य उद्घाटनमकरोत्। 

  विविधेन्धनवाहनेभ्यः [flex fuel vehicles] सज्जीकृते अस्मिन् ई-८५ इन्धने ८५ प्रति शतं एथनोल् अवशिष्टं पेट्रोल् चास्ति। 

  इदानीं आराष्ट्रं ४८ उत्क्षेपिणीषु ई - ८५ इन्धनं लभ्यते। डिसम्बरमासे ५०० उत्क्षेपिणीभ्यः लभ्यते। २०२७ वर्षान्त्ये ५००० उत्क्षेपिणीभ्यः इदमिन्धनं लप्स्यते। पेट्रोलियम् इन्धनानाम् आयातं न्यूनीकर्तुमुद्दिश्य एव अयं नूतनः प्रक्रमः।

 रष्यातः भारताय 'सुखोय्-५७' वाग्दत्तम्। 

सेन्ट पीटेर्स्बर्ग्> रष्यायाः पञ्चमपरम्परायां वर्तमानं युद्धविमानं सुखोय् - ५७ नामकं भारताय दास्यतीति रूसीयराष्ट्रपतिः व्लादिमिर् पुतिनः अवोचत्। भारते रष्यया सह सुखोय् - ५७ युद्धविमानं निर्मातुं सन्नद्धता अपि तेन निगदिता। विविधवार्तासंस्थानाम् अधिकारिभिः सह कृते मेलने आसीत् तस्यायं प्रस्तावः। 

  भारतस्य विश्वस्तः सहयोगी भवति भारतमिति पुतिनेन प्रोक्तम्। भारत-रूसयोः सौहृदं विनाशयितुं केषांचित् पाश्चात्यराष्ट्राणां प्रयत्नः विफलः भवेदिति सः अवदत्।

 विविधेन्धनवाहनानाम् उपयोगं वर्धापयितुं केन्द्रप्रशासनम्।

८५% एथनोल् युक्तेन्धनं प्रयुज्यते। 

मुम्बई> राष्ट्रे विविधेन्धनवाहनानाम् [Flex Fuel Vehicles] उपयोगः वर्धापयिष्यते इति केन्द्र पेट्रोलियं-प्रकृतिवायुविभागस्य मन्त्री हरदीप सिंह पुरी प्रावोचत्। तदर्थं ८५% एथनोल् युक्तवाहनानि राष्ट्रे  व्यापकं कर्तुं प्रचारं विधास्यति। पेट्रोलियेन्धनस्य आयातं नयूनीकर्तुमेव अस्य उद्देश्यमिति मन्त्रिणा प्रोक्तम्। 

  प्रारम्भस्तरे दिल्ली-एन् सि आर् क्षेत्रं, पूने,नासिक् इत्येतेषु स्थानेषु अभियोजनेयं विधास्यते। ५०० एथनोल् उत्क्षेपणयन्त्राणि [pump] अचिरेण एषु स्थानेषु सज्जीकरिष्यन्ति। वर्षेणैकेन उत्क्षेपणयन्त्राणां संख्या ५००० इति वर्धिष्यते। मारुति सुसुकी संस्थायाः फ्लेक्स् फ्यूवल् वाहनं 'वागण् आर्' इत्यस्य प्रस्तितिवेलायामासीत् मन्त्रिणः अयं प्रस्तावः।

 आन्डमानतटे बृहत्परिमाणे प्रकृतिवायुसञ्चयः।

आन्डमानसमुद्रान्तर्भागे प्रकृतिवाय्विन्धने अधिगते। 

हैदराबादः> आन्डमान निकोबार द्वीपसमीपे समुद्रतीरे बृहत्परिमाणे वायुरूपं प्रकृतेन्धनम् अधिगतम्। द्वीपसमूहस्य पूर्वतटात् १५ कि मी दूरे 'ओयिल् इन्डिया लिमिटड्' संस्थायाः 'श्रीविजयपुरं-३' इत्यस्मिन् पर्यवेक्षणकूपे अस्ति वाय्विन्धनस्य सान्निध्यम् अधिगतम्। केन्द्र पेट्रोलियं-प्रकृतिवायुमन्त्री हर्दीप सिंह पुरी वृत्तान्तमिदं निगदितवान्। 

  समुद्रस्य ३५५ मीटर् अधस्तात् १९०० मीटर् भौमान्तर्भागे अस्ति वायुसान्निध्यं दृष्टम्। राष्ट्रस्य समुद्रान्तरपर्यवेक्षणाभियोजना 'समुद्रमन्तन् मिषन्' इत्यस्मिन् एव अयमभिमानोपलब्धिः।