स्फोटनाय परिकल्पना
दिल्ल्यां सप्त भीकराः निगृहीताः।
नवदिल्ली> राष्ट्रस्य विभिन्नस्थानेषु स्फोटनं कर्तुं पाकिस्थानात् सहयोगं लब्धवन्तः सप्त भीकराः दिल्ली आरक्षकसेनया निगृहीताः। एषु एकः पञ्चाबे फत्तेगढ साहिब निवासी इतरे षट् उत्तरप्रदेशे गासियाबादप्रदेशीयाः भवन्ति।
पाकिस्थानस्य चारवृत्तिसंघटनं ऐ एस् ऐ इत्यस्य निर्देशानुसारमासीत् एषां प्रवर्तनमिति आरक्षकसेनया निगदितम्। निगृहीतेभ्यः आधुनिकभुषुण्डयः, गोलकास्त्राणि, वाहनानि इत्यादीनि निगृहीतानि।
दिल्ल्याम् एन् सि आर् प्रदेशस्थान् प्रमुखान् धार्मिकपण्डितान् तन्त्रप्रधानकेन्द्राणि च लक्ष्यीकृत्य भीकराक्रमणयोजना एव दिल्ली सविशेषारक्षकसेनया भग्नीकृता।